பல்லடம்:
தமிழக விவசாயிகள் பாதுகாப்பு சங்கத்தின் நிறுவனர் ஈசன் முருகசாமி கூறியதாவது:- தமிழ்நாடு வீட்டு வசதி துறை அமைச்சர் சு.முத்துச்சாமியை ஈரோட்டில் உள்ள அவரது இல்லத்தில் நேற்று தமிழக விவசாயிகள் பாதுகாப்பு சங்கத்தினர் நேரில் சந்தித்து கோரிக்கை மனு அளித்தோம்.
இதன்படி தமிழ்நாடு அரசின் கூட்டுறவுத்துறை சார்பில் கடந்த 2021 ஆம் ஆண்டு கூட்டுறவு பயிர் கடன் தள்ளுபடி செய்யப்பட்டதில், பிப்ரவரி 1 ந்தேதி முதல் 7 ந்தேதி வரை பணத்தை திருப்பி செலுத்தி, கடன் தள்ளுபடி பட்டியலில் இடம்பெற்று, கடன் தள்ளுபடி சான்றிதழ் பெற்ற விவசாயிகளுக்கு பணத்தை திருப்பி அளிக்காமல் உள்ளதை, விரைந்து அளிக்க வேண்டும்.
தமிழ்நாடு அரசு கள் இறக்கி விற்க விதித்துள்ள தடையை நீக்க கோரியும், விவசாய விளை நிலங்களில் மது பிரியர்கள் குடித்துவிட்டு பாட்டில்களை உடைத்து வீசி எறிவதால், கால்களில் காயம் ஏற்படுதல், கால்நடைகள் காயம் படுதல் ஆகிய பிரச்சினைகளுக்கு தீர்வு காண்பதில் கடுமையான சிக்கல் உள்ளதால், நிரந்தர தீர்வாக டாஸ்மாக்கில் விற்க்கப்படும் மதுபான பாட்டில்களுக்கு பதிலாக பிளாஸ்டிக் பவுச்களை வழங்க வேண்டும். பீர் பாட்டில்களுக்கு பதிலாக இரும்பு டின் வடிவத்தில் வழங்க கோரியும் கோரிக்கை மனு அளித்து வலியுறுத்தினோம். இவ்வாறு அவர் தெரிவித்தார்.
