புதுடெல்லி:
ஐரோப்பிய நாடுகளுடனான உறவுகளை மேம்படுத்துவதற்காக மத்திய மந்திரி சுஷ்மா சுவராஜ் இத்தாலி, பிரான்ஸ் உள்ளிட்ட நாடுகளில் 7 நாள் பயணமாக இன்று டெல்லியில் இருந்து புறப்பட்டு சென்றார்.
இந்த பயணத்தின் முதல்கட்டமாக இத்தாலி சென்றடையும் சுஷ்மா அந்நாட்டின் பிரதமர் கியூசெப்பி கான்ட்டே மற்றும் வெளியுறவுத்துறை மந்திரி என்ஸோ மோவேரோ மிலான்சேய் ஆகியோரை சந்தித்து இந்தியா - இத்தாலி இடையிலான நட்புறவுகளை பலப்படுத்துவது தொடர்பாக ஆலோசனை நடத்துகிறார்.
19-ம் தேதி பிரான்ஸ் தலைநகர் பாரிஸ் செல்லும் அவர், பிரான்ஸ் வெளியுறவுத்துறை மந்திரி ஜேன் எய்வெஸ் லி டிரியான் மற்றும் உயரதிகாரிகளை சந்திக்கிறார்.
20-ம் தேதி லக்சம்பர்க் நாட்டுக்கு சென்று அந்நாட்டின் மன்னர் ஹென்றி ஆல்பர்ட் கேப்ரியல் பெலிக்ஸ் மேரி குய்ல்லாவ்மே மற்றும் பிரதமர் ஜேவியர் பெட்டெல் ஆகியோரை சந்திக்கிறார்.
பயணத்தின் இறுதிக்கட்டமாக பெல்ஜியம் நாட்டுக்கு செல்லும் அவர் 23-ம் தேதிவரை அங்கு தங்குகிறார். ப்ருசெல்ஸ் நகரில் பெல்ஜியம் துணை பிரதமர் மற்றும் வெளியுறவுத்துறை மந்திரியுமான டிடியெர் ரெய்ண்டெர்ஸ் ஐரோப்பிய கமிஷன் தலைவர் ஜேன் கிளாட் ஜங்கர் மற்றும் ஐரோப்பிய பாராளுமன்ற தலைவர் அண்டோனியோ டஜானி ஆகியோரை சந்தித்து ஐரோப்ப்பிய யூனியன் - இந்தியாவுடனான உறவுகளை மேம்படுத்துவது தொடர்பாக முக்கிய ஆலோசனை நடத்துகிறார்.
‘பருவநிலை, அமைதி, பாதுகாப்பு: செயல்பாட்டுக்கான நேரம்’ என்னும் தலைப்பில் ஐரோப்பிய பாராளுமன்றத்தில் சிறப்புரையாற்றும் சுஷ்மா அங்கு நடைபெறும் சர்வதேச யோகா தின விழாவில் தலைமையேற்பதுடன் ஐரோப்பிய நாடுகளில் வாழும் இந்திய வம்சாவளி மக்களையும் சந்தித்து விட்டு 24-ம் தேதி டெல்லி திரும்புகிறார். #SushmaSwaraj #Europeannations #Europeannationstrip
