திமுக செயற்குழு கூட்டத்தில் அமித் ஷாவை கண்டித்து தீர்மானம் நிறைவேற்றம்

சென்னை:

தி.மு.க. தலைமை செயற்குழு கூட்டம் அண்ணா அறிவாலயம் கலைஞர் அரங்கில் இன்று காலை நடைபெற்றது.

பரபரப்பான அரசியல் சூழலில் தி.மு.க. தலைவர் முதலமைச்சர் மு.க.ஸ்டாலின் தலைமையில் நடைபெற்ற இந்த கூட்டத்தில் பொதுச்செயலாளர் துரைமுருகன், பொருளாளர் டி.ஆர்.பாலு, முதன்மைச் செயலாளர் கே.என்.நேரு, அமைப்புச் செயலாளர் ஆர்.எஸ்.பாரதி, கனிமொழி உள்ளிட்ட துணைப் பொதுச்செயலாளர்கள்.

துணை முதலமைச்சர் உதயநிதி ஸ்டாலின், அமைச்சர்கள், எம்.பி.க்கள், எம்.எல்.ஏ.க்கள், மாவட்டக் கழக செயலாளர்கள், தலைமை செயற்குழு உறுப்பினர்கள் கலந்து கொண்டனர்.

இந்த கூட்டத்தில் ஒரே நாடு, ஒரே தேர்தலை கொண்டு வர முயற்சிக்கும் மத்திய அரசை கண்டித்தும், டாக்டர் அம்பேத்கர் குறித்து மத்திய உள்துறை மந்திரி அமித்ஷா பேசிய விவகாரம் தொடர்பாகவும் கண்டன தீர்மானம் நிறைவேற்றப்பட்டது.

இது தவிர மதுரை டங்ஸ்டன் கனிம சுரங்க அனுமதியை ரத்து செய்ய வேண்டும் என்பது உள்பட பல முக்கிய தீர்மானங்கள் நிறைவேற்றப்பட்டது. அதன் பிறகு கூட்டத்தில் அமைச்சர் உள்ளிட்ட பலரும் பேசினார்கள். கூட்டத்தில் கட்சியின் ஆக்கப்பணிகள் குறித்து ஆலோசிக்கப்பட்டது.

செயற்குழு கூட்டத்தில் சுமார் 1000 பேர்கள் வரை கலந்து கொண்டனர். செயற்குழு கூட்டத்தில் கலந்து கொண்ட தி.மு.க. நிர்வாகிகளுக்கு காலை உணவு வழங்கப்பட்டது.