இந்திய கிரிக்கெட் அணி நவம்பர் மாதம் முதல் ஆஸ்திரேலியாவில் சுற்றுப்பயணம் மேற்கொண்டு பார்டர் - கவாஸ்கர் கோப்பைக்கான 5 போட்டிகள் கொண்ட டெஸ்ட் தொடரில் பங்கேற்கிறது. இந்தியா - ஆஸ்திரேலியா இடையிலான முதலாவது டெஸ்ட் நவம்பர்22-ம் தேதி பெர்த்தில் தொடங்குகிறது.
ஆஸ்திரேலிய அணி 2014-15-ம் ஆண்டுக்கு பிறகு இந்தியாவுக்கு எதிரான டெஸ்ட் தொடரை வென்றதில்லை. தொடர்ந்து 4 தொடர்களை அந்த அணி பறிகொடுத்துள்ளது. இதில் உள்நாட்டில் இரு டெஸ்ட் தொடரில் தோற்றதும் அடங்கும். இதற்கிடையே ஆஸ்திரேலிய டெஸ்ட் கேப்டனும், வேகப்பந்து வீச்சாளருமான பேட் கம்மின்சுக்கு 8 வாரம் ஓய்வு அளிக்கப்பட்டுள்ளது.
இது குறித்து அவர் கூறியதாவது:-
'உலக டெஸ்ட் சாம்பியன்ஷிப் இறுதிப்போட்டியில் இருந்து ஏறக்குறைய 18 மாதங்களாக நான் தொடர்ச்சியாக பந்து வீசி வருகிறேன். இந்த ஓய்வு நான் இன்னும் புத்துணர்ச்சியுடன் திரும்புவதற்கு உதவும். பார்டர்-கவாஸ்கர் கோப்பையை இதுவரை நான் வென்றதில்லை. அதை வெல்வதற்குரிய நல்ல நிலையில் நாங்கள் இருக்கிறோம்' என்று கம்மின்ஸ் குறிப்பிட்டார்.
