நீங்கள் தேடியது "CELL PHONE SIGNAL"

பென்னாகரம்:

தருமபுரி மாவட்டம், பென்னாகரம் அருகே உள்ள கோடுபட்டி கிராமத்தில் ஏராளமான பொதுமக்கள் வசித்து வருகின்றனர். இந்த பகுதியில் செல்போன் சிக்னல் கிடைக்காததால் மக்கள் தவித்து வருகின்றனர்.

இதனால் உறவினர்கள், குடும்பத்தினர்களுக்கு பேச முடியாமல் கடும் சிரமம் அடைந்து வருகின்றனர். அந்த பகுதியில் பி.எஸ்.என்.எல். டவர் அமைக்க வேண்டும் என அப்பகுதி மக்கள் கோரிக்கைவிடுத்து வந்தனர். ஆனால் எந்த அதிகாரியும் இதனை கண்டுகொள்ளவில்லை.

இதனால் ஆத்திரம் அடைந்த பொதுமக்கள் இன்றுகாலை 30-க்கும் மேற்பட்டோர் இருசக்கர வாகனங்களை சாலையின் நடுவே நிறுத்திவிட்டு மறியல் போராட்டம் செய்தனர். இதனால் அந்த பகுதியில் போக்குவரத்து பாதிக்க ப்பட்டது.

இது குறித்து தகவல் அறிந்த பென்னாகரம் போலீசார் சம்பவ இடத்திற்கு விரைந்து சென்றனர். அங்கு போராட்டத்தில் ஈடுபட்டவர்களிடம் போலீசார் பேச்சுவார்த்தை நடத்தினர். இதனால் அங்கிருந்து போராட்டகாரர்கள் கலைந்து சென்றனர். இதனால் சுமார் ஒரு மணி நேரம் போக்குவரத்து பாதிப்பு.

திருப்பூர்:

திருப்பூர் மாவட்டம் பல்லடம் சட்டமன்ற தொகுதி பொங்கலூர் அருகே உள்ளது தேவணம்பாளையம் கிராமம். இங்கு 1500க்கும் மேற்பட்ட குடும்பத்தினர் வசித்து வருகின்றனர். விவசாயம் பிரதான தொழிலாக இருந்தாலும், தற்காலத்து இளைஞர்கள் நகர பகுதிகளில் பல்வேறு பணிகளுக்கு சென்று வருகின்றனர். பொங்கலூரில் பி.எஸ்.என்.எல் உட்பட பல்வேறு செல்போன் கோபுரம் அமைக்கப்பட்டுள்ளது.

பொங்கலூரில் இருந்து தேவணம்பாளையம் கிராமம் 3 கிலோ மீட்டர் தொலைவில் உள்ளது. ஆனால் இந்த கிராமத்தில் எந்த செல்போன் சிக்னலும் கிடைப்பதில்லை. கடந்த 3 ஆண்டுகளாக பி.எஸ்.என்.எல்., ஏர்டெல், ஜியோ உட்பட எந்த நெட்வொர்க் சிம் உபயோகபடுத்தினாலும் சரியாக டவர் கிடைப்பதில்லை என அப்பகுதி பொதுமக்கள் தெரிவிக்கின்றனர். இ-மெயில், வாட்சப் உள்ளிட்ட சமூக வலைத்தளங்களை கூட பயன்படுத்த முடியவில்லை என தெரிவிக்கின்றனர். வீட்டிற்குள் இருக்கும் போது எந்த ஒரு அழைப்பும் வருவதில்லை எனவும், அதே போல் யாரையும் தொடர்பு கொள்ள முடியவில்லை எனவும் வேதனையை தெரிவிக்கின்றனர்.

தேவணம்பாளையத்தில் இருந்து 3 கிலோ மீட்டர் தள்ளி பொங்கலூர் வந்தால் மட்டுமே செல்போன் பயன்படுத்த முடியும். கிராமத்தில் இருக்கும் போது மருத்துவம் உள்ளிட்ட அவசர தேவைக்கு கூட யாரையும் தொடர்பு கொள்ள முடியாது என அப்பகுதி பொதுமக்கள் தெரிவிக்கின்றனர். இது குறித்து பல முறை அரசு அதிகாரிகள், தொலை தொடர்பு நிறுவனங்கள் ட்ராய் ஆகியவற்றிற்கு மனு அளித்தும் இது வரை எந்தவித நடவடிக்கையும் எடுக்கவில்லை என கூறப்படுகிறது.

நியாய விலை கடை, தபால் நிலையம் போன்றவற்றில் இணையவழி சேவை கிடைக்காததால் பொதுமக்கள் மிகுந்த அவதி அடைந்து வருகின்றனர். 5ஜி தொழில் நுட்பம் அறிமுக படுத்திய பிறகும் கூட தங்கள் கிராம பகுதிக்கு 2ஜி சேவை கூட கிடைக்கவில்லை என குற்றச்சாட்டு தெரிவிக்கின்றனர்.

திருச்சி :

டிஜிட்டல் சேவையில் இந்தியா உலக நாடுகளுடன் போட்டி போட்டுக் கொண்டிருக்கிறது. தற்போது நமது நாட்டில் 5 ஜி ஸ்பெக்ட்ரம் ஒதுக்கீடு செய்ய ஏல நடவடிக்கைகள் தொடங்கப்பட்டுள்ளன. ஒருபுறம் நாடே டிஜிட்டல் மயமாகி கொண்டிருக்கும் வேளையில், மறுபுறம் எந்தவித தொலைத்தொடர்பும் கிடைக்காத நிலையில் பல ஊர்கள் இருக்கத்தான் செய்கிறது.

அந்த வகையில், திருச்சி மாவட்டம் கண்ணூத்து பஞ்சாயத்து மலை கிராம மக்கள் இன்னமும் செல்போன்களை கூட பயன்படுத்த முடியாத நிலையில் இருக்கிறார்கள். இதுவரை எந்த செல்போன் கம்பெனியை சேர்ந்தவர்களும் இங்கு டவர் அமைக்க முன்வரவில்லை. இதனால் செல்போன் இணைப்பில் இருந்து மேற்கண்ட கிராமம் முழுமையாக துண்டிக்கப்பட்டு இருக்கிறது.

கடந்த 10 ஆண்டுகளுக்கும் மேலாக இந்த மலை கிராம மக்கள் செல்போன் கோபுரம் அமைப்பதற்காக போராடி வருகின்றனர். டவர் கிடைக்காத காரணத்தினால் அந்த மலை கிராம மக்கள் 4 கிலோ மீட்டர் தூரம் வரை செல்போனில் பேசுவதற்கு நடந்து செல்லும் அவலம் நீடிக்கிறது. கண்ணுத்திலிருந்து நான்கு கிலோ மீட்டர் தொலைவில் உள்ள வையம்பட்டி கிராமத்துக்கு சென்றால் தான் டவர் கிடைப்பதாக சொல்கிறார்கள்.

மலை கிராம பள்ளியைச் சேர்ந்த ஒரு ஆசிரியை கூறும்போது, ஒவ்வொரு நாளும் மாணவர் வருகை மற்றும் இதர பணிகளை கணினியில் ஏற்றுவதற்கு பக்கத்து கிராமத்துக்கு செல்ல வேண்டியிருக்கிறது. இதனால் ஆசிரியர்கள் மற்றும் இதர பள்ளி பணியாளர்களின் வேலை பாதிக்கிறது எனது வேதனை தெரிவித்தார்.

கண்ணூத்து பகுதியைச் சேர்ந்த காந்தாயி என்ற பெண்மணி கூறும் போது, எங்கள் கிராமத்தை குட்டி கொடைக்கானல் என்று அழைக்கிறார்கள். இது பெருமையாக இருக்கிறது. ஆனால் செல்போன் போன்ற நவீன வசதிகளை பெற முடியாமல் இருப்பது வேதனை அளிக்கிறது. ஒரு இளம் பெண்ணுக்கு சமீபத்தில் பிரசவ வலி ஏற்பட்டது. ஆம்புலன்சுக்கு தகவல் சொல்ல வெகு தூரம் நடக்க வேண்டி வந்தது. இந்த இடைப்பட்ட நேரத்தில் வீட்டிலேயே பிரசவம் நடந்தது என கூறினார்.

தனியார் செல்போன் கம்பெனி நிர்வாகத்தினர் அந்த மலை கிராமத்தில் குறைந்தபட்சம் 500 பேராவது மேற்கண்ட நிறுவனத்தின் செல்போனை பயன்படுத்தினால் மட்டும்தான் செல்போன் கோபுரம் அமைக்க முடியும் என தெரிவித்துள்ளனர். ஆனால் அரசின் பி.எஸ்.என்.எல். நிறுவனமும் காலதாமதம் செய்வதாக கூறப்படுகிறது. இந்த நிலையில் மாவட்ட நிர்வாகம் தரப்பில் வைபை வசதிக்கான ஏற்பாடுகள் நடைபெற்று வருவதாக தெரிவிக்கப்பட்டுள்ளது.