குனியமுத்தூர்:
கோவை பொள்ளாச்சி ரோட்டில் ஏராளமான பள்ளிகள் மற்றும் கல்லூரிகள் உள்ளது. இதனால் குறிச்சி, சுந்தரா புரம், எல்ஐசி காலனி, காந்திநகர், ஈச்சனாரி ஆகிய பஸ் நிறுத்தங்களில் பள்ளி கல்லூரி மாணவ- மாணவிகளின் கூட்டம் அதிகமாக காணப்படுகிறது.
மாணவர்களின் கூட்டத்தை கண்டு அரசு பஸ்கள் பஸ் நிறுத்தத்தில் நிற்காமல் செல்கிறது. மேலும் மழைக்காலம் என்பதால் மழையில் நனைந்து கொண்டிருக்கும் மாணவிகள் பஸ்சில் செல்ல முடியாமல் தவிப்பதை அன்றாடம் காணமுடிகிறது.பொதுவாகவே கோவையில் அனைத்து பஸ் நிறுத்த ங்களிலும் காலை வேலைகளில் கூட்டம் அதிகமாக இருப்பதை நாம் காண முடிகிறது. பொள்ளாச்சி சாலையில் ஏராளமான தொழிற்சாலைகள், கம்பெனிகள், பள்ளி, கல்லூரிகள் உள்ள சூழ்நிலையால் எந்த நேரமும் பயணிகள் கூட்டம் அதிகமாக காணப்படுகிறது. பஸ் நிறுத்தத்தில் அரசு பஸ்கள் நிற்காமல் செல்லும்போது, பின்னால் வரக்கூடிய தனியார் பஸ்கள் அனைத்து பயணிகளையும் ஏற்றி செல்கின்றனர். காலை மற்றும் மாலை வேலைகளில் ஒவ்வொரு வழித்தடத்தில் செல்லும் பஸ்களின் எண்ணிக்கையை அதிகப்படுத்தினால் இப்பிரச்சனையில் இருந்து விடுபட முடியும் என்றும் பொதுமக்கள் வலியுறுத்தி உள்ளனர். அரசு போக்குவரத்து கழக அதிகாரிகள் இதனை கவனம் கொண்டு உடனடியாக நடவடிக்கை எடுக்க வேண்டும் என்று பொதுமக்கள் கோரிக்கை விடுத்துள்ளனர்.
