நீங்கள் தேடியது "One side love"

மதுரை:

நவநாகரீக வாழ்வில் டிஜிட்டல் மயம் தவிர்க்க முடியாததாகி விட்டது. கடிதங்களில் தொடங்கிய தகவல் தொடர்பு இன்று கையடக்கத்திற்கு வந்து விட்டது. செல்போன் இல்லாத கரங்களே இல்லை, அதற்கு குழந்தைகளும் விதிவிலக்கல்ல என்பது போல் எங்கு பார்த்தாலும், எந்த நேரமும் ஒவ்வொருவரும் கைகளில் ஏந்தி நிற்கும் செல்போன்களால் குற்றங்களும் கணக்கில் அடங்காமல் போய்விட்டது.

தும்பை விட்டு வாலை பிடித்த கதையாக எத்தனையோ விழிப்புணர்வுகள் ஏற்படுத்தப்பட்டாலும், துளியும் பிரயோஜனமில்லை என்பதற்கு சான்றாக அடுத்தடுத்து நடக்கும் சம்பவங்களே சாட்சி. அதிலும் பருவம் தவறும் மாற்றங்களால் பாலியல் உள்ளிட்ட பிரச்சனைகளும் இந்த சமூகத்தில் புரையோடிப் போன ஒன்றாகவே இருக்கிறது.

அதிலும் திசைமாறிச் செல்லும் இளைஞர்களின் காதல் காவியம் பலரை பாதிப்படைய செய்துள்ளது. கண்டதும் காதல், ஈர்க்கும் வசீகரத்தால் இளம்பெண்களை தன்பால் இழுக்கும் மாய வித்தைகளை கற்றுக் கொண்டு அவர்கள் செய்யும் அட்டூழியங்களால் பெண் பிள்ளைகளை பெற்றவர்கள் வயிற்றில் நெருப்பை கட்டிக் கொண்டு நாட்களை காலத்திற்கு தள்ளப்பட்டு உள்ளனர்.

இதில் காலத்தின் கட்டாயத்தாலும், குடும்ப சூழ்நிலை காரணமாகவும் வேலைக்கு செல்லும் இளம்பெண்கள் தங்களையும், குடும்பத்தையும் இழந்து பின்னர் நிற்கதியாக நிற்கும் சம்பவங்களை படித்தும், பார்த்தும், அறிந்தும் மாற்றம் மட்டும் வரவேயில்லை. பாலியல் கவர்ச்சி என்பது கொடூர கொலையில் முடிந்த சம்பவங்கள் ஏராளமாக அரங்கேறியுள்ளன.

சென்னை கல்லூரியில் 2-ம் ஆண்டு படித்த மாணவி சத்யா (20), பரங்கி மலை ரெயில் நிலையத்தில் ஓடும் ரெயிலில் தள்ளிக் கொல்லப்பட்டது தமிழகத்தையே உறைய வைத்தது. தன்னைக் காதலிக்க மறுத்த சத்யாவை ஒருதலையாக காதலித்த சதீஷ் (23) என்ற போலீஸ் குடும்பத்தை சேர்ந்தவர் முதலில் காதலிக்க வற்புறுத்தி, பின்னர் சரமாரியாக தாக்கியும் உடன்படாததால் ஓடும் ரெயிலில் இருந்து தள்ளி கொலை செய்தார்.

கடந்த 2016-ம் ஆண்டு ஜூன் 24-ந்தேதி தன்னைக் காதலிக்க மறுத்த சாப்ட்வேர் என்ஜினீயராக சுவாதியை நுங்கம்பாக்கம் ரெயில் நிலையத்தில் வைத்து அவரை, ஒருதலையாக காதலித்த ராம்குமார் என்பவர் வெட்டிக்கொன்றார். பின்னர் அவரும் தற்கொலை செய்துகொண்டார். இதேபோல் தன்னை காதலிக்க மறுத்தார் என்ற ஒரே காரணத்துக்காக விழுப்புரத்தை அடுத்த வ.பாளையத்தில் சிறுமி நவீனாவை, செந்தில் என்ற வாலிபர் தீ வைத்து எரித்துக் கொலை செய்தார்.

விருத்தாசலம் அருகே கறிவேப்பிலைக்குறிச்சியில் கல்லூரி மாணவி திலகவதி தன்னை காதலிக்க மறுத்ததால் கடந்த 2019-ம் ஆண்டு ஆகாஷ் என்பவர் கத்தியால் குத்திக்கொலை செய்தார். 2021-ல் காதலிக்க மறுத்த கல்லூரி மாணவி சுவேதாவை தாம்பரம் ரெயில் நிலையத்தில் வைத்து ராமசந்திரன் என்ற வாலிபர் குத்திக்கொலை செய்தார். 2022-ல் காதலிக்க மறுத்த உறவுக்கார பெண்ணும், கல்லூரி மாணவியுமான கீர்த்தனாவை, புதுச்சேரி சந்நியாசிக்குப்பத்தில் முகேஷ் என்ற வாலிபர் வெட்டிக் கொன்றார்.

கரூரில் உள்ள தனியார் பொறியியல் கல்லூரியில் மூன்றாம் ஆண்டு படித்து வந்த மாணவி சோனாலியை அவரது வகுப்பறையில் வைத்து, அதே கல்லூரியில் பயின்ற மாணவர் உதயகுமார் என்பவர் மரக்கட்டையால் அடித்தே கொலை செய்தார். இதற்கு காரணமும் தன்னை காதலிக்க மறுத்ததுதான்.

சற்றே இதுபோன்ற விரும்பத்ததாக சம்பவங்கள் நினைவில் இருந்து மறைந்த நிலையில் நேற்று தஞ்சை மாவட்டம் பட்டுக்கோட்டையை அடுத்த மல்லிப்பட்டிணம் அரசு பள்ளியில் ஆசிரியை ரமணியை, அவரை ஒருதலையாக காதலித்து வந்த மதன்குமார் என்பவர் கத்தியால் குத்தி கொலை செய்தார். பள்ளியில் நடந்த இந்த சம்பவம் தமிழகம் முழுவதும் பெரும் அதிர்வலையை ஏற்படுத்திய நிலையில் நேற்று இரவு மதுரையிலும் ஒரு சம்பவம் நடந்துள்ளது. அதுபற்றிய விபரம் வருமாறு:-

மதுரை ஒத்தக்கடை அருகே உள்ள சக்கரா நகரில், தனியார் ஒருவர் நடத்தி வரும் ஜெராக்ஸ் கடையில் அதே பகுதியைச் சேர்ந்த லாவண்யா என்பவர் வேலைபார்த்து வந்தார். குடும்ப வறுமையால் கல்லூரி படிப்பை தொடர முடியாத சூழலுக்கு தள்ளப்பட்ட லாவண்யா கடந்த நான்கு வருடமாக பணிபுரிந்து வருகிறார்.

இந்தநிலையில் லாவண்யா வேலைக்கு வரும்போதும், பணி முடிந்து வீடு திரும்பும்போது மதுரை ஒத்தக்கடை பகுதியைச் சேர்ந்த சித்திக் ராஜா (வயது 25 ) என்பவர் பின்தொடர்ந்து சென்று தொல்லை கொடுத்து வந்துள்ளார். பல சமயங்களில் லாவண்யாவை வழிமறித்து தன்னை காதலிக்க வற்புறுத்தி உள்ளார்.

ஆனால் அதனை தட்டிக் கழித்த லாவண்யா தனது குடும்ப நிலை குறித்து பக்குவமாக எடுத்துக்கூறியும் அதனை துச்சமாக நினைத்த சித்திக்ராஜா எனக்கு நீதான்... என்ற வசனங்களும் பேசி மயக்க முயன்றுள்ளார். எப்பேற்பட்ட நிலையிலும் உன்னை திருமணம் செய்து கொள்ள முடியாது என்று லாவண்யா தனது முடிவில் தெளிவாக இருந்தார்.

இந்தநிலையில் சம்பவத்தன்று லாவண்யா வேலை பார்க்கும் ஜெராக்ஸ் கடைக்கு நேரில் சென்று லாவண்யாவிடம் நீண்ட நேரமாக பேச்சுக் கொடுத்தவாறு இருந்தார். ஆனால் அவர் மசியாததால் ஆத்திரம் அடைந்த சித்திக் ராஜா, சேரில் அமர்ந்திருந்த லாவண்யாவை கைகளால் காட்டுமிராட்டித்தனமாக தாக்கினார்.

இதில் நிலைகுலைந்த லாவண்யா இருக்கையில் இருந்து பின்புறமாக கீழே விழுந்தார். அப்போது குனிந்தவாறு சித்திக்ராஜா தாக்கினார். லாவண்யாவின் அலறல் சத்தம் கேட்டு அக்கம்பக்கத்தினர் ஓடி வந்தனர். உடனே சித்திக் ராஜா அங்கிருந்து தப்பி ஓடிவிட்டார்.

இதில் பலத்த காயம் அடைந்த லாவண்யா மயக்கம் அடைந்தார். உடனடியாக அக்கம் பக்கத்தில் உள்ளவர்கள் அவரை மீட்டு அரசு ராஜாஜி மருத்துவமனையில் சிகிச்சைக்காக சேர்த்தனர். இதுகுறித்து ஒத்தக்கடை போலீசார் வழக்கு பதிவு செய்து விசாரணை நடத்தி வருகின்றனர்.

இது தொடர்பான காட்சிகள் அந்த ஜெராக்ஸ் கடையில் பொருத்தப்பட்டிருந்த சி.சி.டி.வி. கேமராவில் பதிவாகி உள்ளது. தற்போது அந்த வீடியோ வைரலாகி உள்ளது.

காதல் திருமணம் என்பது இருபாலரும் ஒருவரையொருவர் முழுமையாகப் புரிந்து கொண்டு முறையான வாழ்க்கையை அமைத்துக் கொள்வது. பாலியல் கவர்ச்சியால் ஏற்படும் காதல், விரைவிலேயே கசந்துவிடும் என்பதை இளைஞர்கள் உணர வேண்டும் என்பதே ஒட்டு மொத்த பெண் பிள்ளைகளை பெற்றவர்களின் எதிர்பார்ப்பு. 

கொண்டலாம்பட்டி:

சேலம், ஜாகீர்ரெட்டிப்பட்டி, ஸ்ரீநகர் பகுதியை சேர்ந்தவர் சேகர். இவரது மகன் கோபால் (வயது 22). இவர் 5 -ரோட்டில் உள்ள ஒரு தனியார் வங்கியில் ஊழியராக வேலை பார்த்து வந்தார்.

இந்த நிலையில் கோபால் அதே பகுதியை சேர்ந்த 17 வயது மதிக்கத்தக்க இளம்பெண்ணை ஒருதலை பட்சமாக காதலித்து வந்தார்.

மேலும் தனது காதலை அந்த பெண்ணிடம் கூறியதாக தெரிகிறது. அதற்கு அந்த பெண் தனக்கு படிப்புத் தான் முக்கியம். நான் யாரையும் காதலிக்கமாட்டேன் என்று தெரிவித்தார். இருப்பினும் கோபால் தொடர்ந்து அந்த பெண்ணிடம் காதலை ஏற்குமாறு வற்புறுத்தியதாக தெரிகிறது. ஆனால் அந்த பெண் காதலை ஏற்க மறுத்து விட்டார்.

இதனால் விரக்தி அடைந்த கோபால் வி‌ஷத்தை எடுத்து குடித்து தற்கொலைக்கு முயன்றார். உயிருக்கு போராடிய அவரை உறவினர்கள் மீட்டு சேலம் அரசு ஆஸ்பத்திரியில் சேர்த்தனர். அங்கு அவருக்கு தீவிர சிகிச்சை அளிக்கப்பட்டது.

ஆனால், எந்த முன்னேற்றமும் ஏற்படவில்லை. இதனால் மேல் சிகிச்சைக்காக சென்னை ஸ்டான்லி ஆஸ்பத்திரியில் கோபாலை சேர்த்தனர். அங்கு சிகிச்சை பலனின்றி நேற்று அவர் பரிதாபமாக இறந்தார்.

இந்த சம்பவம் குறித்து சூரமங்கலம் போலீஸ் நிலைய சப்-இன்ஸ்பெக்டர் மணிவண்ணன் வழக்குப்பதிவு செய்து விசாரணை நடத்தி வருகின்றார்.

மதுரை:

மதுரை கல்மேடு டேவிதார் நகரைச் சேர்ந்தவர் முத்துக்குமார் (வயது 20). மதுரை மாநகராட்சியில் ஒப்பந்த ஊழியராக பணியாற்றி வந்தார்.

இவர் அதே பகுதியைச் சேர்ந்த பெண்ணை காதலித்து வந்தார். அந்த பெண் இவரை காதலிக்கவில்லை என்று கூறப்படுகிறது.

இதனால் வாழ்க்கையில் விரக்தியடைந்த முத்துக்குமார் வி‌ஷம் குடித்தார். அவரை உடனடியாக அந்தப்பகுதியில் உள்ள ஆஸ்பத்திரிக்கு கொண்டு சென்றனர். ஆஸ்பத்திரிக்கு செல்லும் வழியில் முத்துக்குமார் பரிதாபமாக இறந்தார்.

இது தொடர்பாக முத்துக்குமாரின் தாய் முருகேஸ்வரி சிலைமான் போலீசில் புகார் செய்தார். சப்- இன்ஸ்பெக்டர் அருள்தாஸ் வழக்குப்பதிவு செய்து முத்துக்குமார் உடலை மீட்டு பிரேத பரிசோதனைக்கு அனுப்பி வைத்து தீவிர விசாரணை நடத்தி வருகிறார்.

மதுரை:

மதுரை செல்லூர் பூந்தமல்லி நகரைச் சேர்ந்தவர் சுந்தரமாணிக்கம். இவரது மகன் அஜித்குமார் (வயது 19). இவர் தெப்பக்குளம் பகுதியில் உள்ள தனியார் கல்லூரியில் படித்து வந்தார். அங்கு அஜித்குமார் ஒரு மாணவியை ஒருதலையாக காதலித்ததாக தெரிகிறது.

இதில் ஏற்பட்ட தோல்வியில் மனம் உடைந்த அஜித்குமார், வீட்டில் யாரும் இல்லாத நேரத்தில் தூக்குப்போட்டு தற்கொலை செய்து கொண்டார்.

இது குறித்த புகாரின் பேரில் செல்லூர் போலீசார் வழக்குப்பதிவு செய்து விசாரணை நடத்தி வருகிறார்கள்.