நீங்கள் தேடியது "slug 102422"

சேலம்:

தமிழகத்தில் பாராளுமன்ற தேர்தல் முடிந்த நிலையில் அரவக்குறிச்சி, சூலூர், திருப்பரங்குன்றம், ஓட்டப்பிடாரம் ஆகிய 4 தொகுதிகளுக்கான இடைத்தேர்தல் பிரசாரம் நேற்றுடன் நிறைவடைந்தது.

இந்த தொகுதிகளுக்கான வாக்குப்பதிவு நாளை (19-ந்தேதி) நடைபெறுகிறது. இதையொட்டி வாக்காளர்களுக்கு பணம் கொடுப்பதை தடுக்க தமிழகம் முழுவதும் நேற்றிரவு பறக்கும் படையினர் மற்றும் போலீசார் தீவிர வாகன சோதனையில் ஈடுபட்டனர்.

அதன் தொடர்ச்சியாக சேலம் சந்தைப்பேட்டை பகுதியில் செவ்வாய்ப்பேட்டை போலீஸ் நிலைய ரோந்து போலீசார் இன்று அதிகாலை 2 மணியளவில் தீவிர வாகன சோதனை மேற்கொண்டனர். அப்போது அந்த வழியாக வேகமாக வந்த ஒரு சொகுசுகாரை தடுத்து நிறுத்தி சோதனையிட்டனர்.

அப்போது காரில் கட்டு கட்டாக ரூ.49 லட்சம் பணம் இருந்தது தெரிய வந்தது. இது குறித்து காரில் இருந்த செவ்வாய்ப்பேட்டை தெய்வநாயகம் தெருவவை சேர்ந்த சித்தாராம் (வயது 40) என்பவரிடம் போலீசார் விசாரித்தனர்.அவர் முன்னுக்கு பின் முரணாக பேசியதால் சந்தேகம் அடைந்த போலீசார் சேலம் வடக்கு தொகுதி தேர்தல் உதவி அதிகாரியான முத்திரை தாள் விற்பனை தாசில்தார் மாதேஸ்வரனுக்கு தகவல் தெரிவித்தனர்.

உடனே அங்கு விரைந்து வந்த தாசில்தார் மாதேஸ்வரன் காரில் இருந்த பணம் குறித்து வியாபாரி சித்தாராமிடம் விசாரணை நடத்தினர்.செவ்வாய்ப்பேட்டையில் அழகு சாதன பொருட்கள் விற்பனை கடை வைத்துள்ளதாகவும், சோப்புத்தூள், காப்பித்தூள் மற்றும் சிகெரட் மொத்த வியாபாரம் செய்து வருவதால் அதற்கான பொருட்களை கொள்முதல் செய்ய ஆந்திராவுக்கு செல்வதாகவும் அவர் கூறினார்.

ஆனால் அதற்கு உரிய ஆவணங்கள் இல்லாததால் ரூ.49 லட்சத்தையும் தேர்தல் அதிகாரிகள் பறிமுதல் செய்தனர். மேலும் அந்த பணத்தை சேலம் வடக்கு தொகுதி தேர்தல் அதிகாரியும், சேலம் ஆர்.டி.ஓ.வுமான செழியனிடம் இன்று காலை ஒப்படைத்தனர். அவர் அந்த பணத்தை சேலம் மாவட்ட கருவூலத்தில் ஒப்படைக்க உள்ளதாகவும், உரிய ஆவணங்களை காட்டி சித்தாராம் பணத்தை வாங்கி கொள்ளலாம் என்றும் கூறினார்.

போரூர்:

திருச்சியைச் சேர்ந்தவர் தாராசந்த். தங்கம் மற்றும் வைர நகை வியாபாரி. இவர் ஆர்டரின் பேரில் சென்னையில் உள்ள சிறிய நகை கடைகளுக்கு நகைகள் சப்ளை செய்து வருகிறார்.

இந்தநிலையில் கடந்த 7-ந் தேதி சென்னையில் உள்ள கடைகளுக்கு நகைகள் கொண்டு செல்வதற்காக சேலத்தில் இருந்து அரசு பஸ் மூலம் கோயம்பேடுக்கு வந்தார்.

மதியம் 2மணி அளவில் தாராசந்த் கோயம்பேடு பஸ் நிலையத்தில் இறங்கிய போது தான் கொண்டு வந்த பையில் வைர நகைகள் அடங்கிய பெட்டி மாயமாகி இருப்பதை கண்டு அதிர்ச்சி அடைந்தார்.

அதில் 23 வைர வளையல்கள் இருந்தன. பஸ்சில் உடன் பயணம் செய்த மர்ம நபர்கள் வைர நகைகள் இருந்த பெட்டியை கொள்ளையடித்து சென்று இருப்பது தெரியவந்தது.

இதன் மதிப்பு சுமார் ரூ.25லட்சம் ஆகும். தாராசந்த் நகையுடன் பஸ்சில் ஏறுவதை நோட்டமிட்ட கொள்ளை கும்பல் அவருடன் வந்துள்ளனர். பின்னர் அவர் அசந்த நேரத்தில் நகையை கொள்ளையடித்து தப்பி சென்று இருப்பது தெரிய வந்துள்ளது.

இது குறித்து தாராசந்த் கோயம்பேடு பஸ் நிலைய போலீசில் புகார் அளித்தார். போலீசார் வழக்கு பதிவு செய்து பஸ் நிலையத்தில் உள்ள கண்காணிப்பு கேமராவில் பதிவான காட்சிகளை வைத்து தீவிர விசாரணை நடத்தி வருகின்றனர்.

சேலம்:

சேலம் மாவட்டம் வீராணம் அருகே உள்ளது பருத்திக்காடு கிராமம். இந்த கிராமத்தில் 500-க்கும் மேற்பட்ட குடும்பத்தினர் வசித்து வருகிறார்கள்.

இந்த கிராமத்திற்கு கடந்த சில மாதங்களாக 10 நாட்களுக்கு ஒரு முறை மட்டுமே குடிநீர் விநியோகிக்கப்பட்டு வருவதாக கூறப்படுகிறது. இது குறித்து அந்த கிராம மக்கள் சம்பந்தப்பட்ட அதிகாரிகள் உள்பட பலரிடம் புகார் கொடுத்தனர். ஆனால் எந்த நடவடிக்கையும் எடுக்கவில்லை என்று கூறப்படுகிறது.

இதனால் ஆத்திரம் அடைந்த அந்த பகுதி மக்கள் 100-க்கும் மேற்பட்டோர் காலி குடங்களுடன் இன்று காலை ஒன்று திரண்டனர். பின்னர் சேலம்-அரூர் சாலையில் பருத்திக்காடு பிரிவு ரோடு மற்றும் வைதாதனூர் பிரிவு ரோடு ஆகிய 2 இடங்களில் 50 பெண்கள் உள்பட 100-க்கும் மேற்பட்டோர் காலி குடங்களுடன் சாலை மறியலில் ஈடுபட்டனர்.

இதனால் சேலம்-அரூர் நெடுஞ்சாலையில் போக்குவரத்து பாதிக்கப்பட்டு இருபுறமும் நீண்ட தூரம் வாகனங்கள் அணி வகுத்து நின்றன. தகவல் அறிந்த வீராணம் போலீசார் சம்பவ இடத்திற்கு விரைந்து சென்று அவர்களுடன் பேச்சுவார்த்தை நடத்தினர்.

அப்போது ஆவேசம் அடைந்த மக்கள் குடிநீர் இல்லாமல் கடும் அவதிப்படுவதாகவும், இது குறித்து அதிகாரிகளிடம் பல முறை மனு கொடுத்தும் கண்டு கொள்ளவில்லை என்றும் புகார் கூறினர். மேலும் வட்டார வளர்ச்சி அதிகாரி சம்பவ இடத்திற்கு வந்து தண்ணீர் முறையாக வழங்கப்படும் என்று உறுதி அளித்தால் தான் போராட்டத்தை கைவிடுவோம் என்றும் ஆவேசமாக கூறினர்.

அப்போது போலீசாருக்கும், மறியலில் ஈடுபட்டவர்களுக்கும் இடையே வாக்குவாதம் ஏற்பட்டது. போலீசார் தொடர்ந்து அவர்களை சமாதானப்படுத்தியதை அடுத்து 7 மணிக்கு தொடங்கிய மறியல் போராட்டடம் 7.40 மணிக்கு கைவிடப்பட்டது. ஆனாலும் கலைந்து செல்லாத மக்கள் வட்டார வளர்ச்சி அதிகாரி வருகைக்காக சாலையோரம் காத்து நின்றனர். இதனால் அந்த பகுதியில் பரபரப்பு நிலவி வருகிறது.

சேலம்:

சேலம் அம்மாப்பேட்டை பாபு நகர் பகுதியைச் சேர்ந்தவர் ஆறுமுகம் (வயது 60). கொத்தனார். இவருக்கு பெருமாயி, மாதம்மாள் என்ற 2 மனைவிகள் உள்ளனர். மாதம்மாளுக்கு 2 மகன்கள் உள்ளனர். பெருமாயிக்கு குழந்தைகள் இல்லை.

ஆறுமுகத்திற்கு குடிப்பழக்கம் இருந்ததாக கூறப்படுகிறது. குடித்துவிட்டு வீட்டிற்கு வரும் அவர் ஏதாவது பாட்டு பாடிக் கொண்டே இருப்பார். வழக்கம்போல நேற்று இரவும் குடித்துவிட்டு வந்து பாட்டுப் பாடி கொண்டிருந்தார்.

ஆறுமுகம் பாட்டு பாடியது அவரது வீட்டின் அருகில் வசிக்கும் முரளிக்கு (வயது 29)எரிச்சலை ஏற்படுத்தியது. இதனால் முரளி ஆறுமுகத்தின் வீட்டிற்கு சென்று எனது மனைவியை பார்த்து தான் நீ பாட்டு பாடுகிறாய் என்று கூறினார். அப்போது அவர்களுக்கிடையே தகராறு ஏற்பட்டது.

தகராறு முற்றியதும் ஆத்திரம் அடைந்த முரளி, அவரது தம்பி சரவணன், தாய் மாதம்மாள் ஆகிய 3 பேரும் சேர்ந்து ஆறுமுகத்தை உருட்டுக் கட்டையால் சரமாரியாக தாக்கினர். இதில் அவருக்கு காயம் ஏற்பட்டது. அப்போது ஆறுமுகத்தின் மனைவி மற்றும் மகன்கள் தகராறை விலக்கிவிட்டு விட்டு தூங்க சென்றனர். காலையில் ஆறுமுகத்தை மனைவி எழுப்பிய போது அவர் இறந்து கிடந்தார்.

இதனால் அதிர்ச்சி அடைந்த அவர் கதறி அழுதார். பின்னர் சம்பவம் குறித்து அம்மாப்பேட்டை போலீசில் புகார் செய்யப்பட்டது. போலீசார் சம்பவ இடத்திற்கு வந்து விசாரணை நடத்தி ஆறுமுகத்தின் உடலை மீட்டு பிரேத பரிசோதனைக்காக சேலம் அரசு ஆஸ்பத்திரிக்கு அனுப்பி வைத்தனர்.

மேலும் அவரை தாக்கிய முரளி உள்பட 3 பேரையும் காவல் நிலையத்திற்கு அழைத்துச் சென்று தொடர்ந்து விசாரணை நடத்தி வருகின்றனர்.

விசாரணையில் முரளி மீது பல்வேறு வழக்குகள் நிலுவையில் உள்ளதும் அவர் அடிக்கடி அந்த பகுதியில் உள்ள அனைவரிடமும் தகராறில் ஈடுபட்டு வருவார் என்றும் கூறப்படுகிறது.

இந்த சம்பவம் அந்த பகுதியில் பெரும் பரபரப்பை ஏற்படுத்தியது.

சேலம்:

சேலம் மாவட்டத்தில் கடந்த சில நாட்களாக விட்டுவிட்டு மழை பெய்து வருகிறது.

வாழப்பாடி மற்றும் சுற்று வட்டார பகுதிகளில் நேற்று மதியம் திடீரென பலத்த காற்று வீசியது. தொடர்ந்து அந்த பகுதியில் கனமழை பெய்ததால் விவசாயிகள், பொதுமக்கள் மகிழ்ச்சி அடைந்தனர்.

வாழப்பாடியை அடுத்த துக்கியம்பாளையம் கிராமத்தில் சூறைக்காற்று வீசியதால் வீட்டு கூரைகள் சேதம் அடைந்தது. ஆட்டோ ஓட்டுநர் பிச்சமுத்து என்பவர் வீட்டு கூரை சூறைக்காற்றில் 50 அடி தூரத்திற்கு பறந்து சென்று விழுந்தது.

ஆத்தூர் நரசிங்கபுரம், கெங்கவல்லி சுற்று வட்டார பகுதிகளில் மாலை 5.30 மணியளவில் இடி, மின்னலுடன் கனமழை பெய்தது. மேலும் சூறைக்காற்றுடன் ஆத்தூரில் ஆலங்கட்டி மழையும் பெய்தது. இதனை அந்த பகுதி சிறுவர்கள் ஆர்வத்துடன் சேகரித்தனர்.

இந்த மழை 2 மணிநேரத்திற்கும் மேல் கனமழையாக நீடித்ததால் சாலையில் வெள்ளம் பெருக்கெடுத்து ஓடியது. ஆத்தூர் 18-வது வார்டு காலனி பகுதியில் உள்ள 50-க்கும் மேற்பட்ட வீடுகளில் தண்ணீர் புகுந்தது. பல வீடுகள் பாதியளவு தண்ணீரில் மூழ்கின.

இதனால் அந்த வீட்டில் உள்ளவர்கள் உறவினர் வீடுகளுக்கு சென்று தஞ்சம் அடைந்தனர். மழையைத் தொடர்ந்து மின் விநியோகம் நிறுத்தப்பட்டதால் பொதுமக்கள் அவதி அடைந்தனர். இதேபோல தலைவாசல், பட்டுத்துறை, தேவியாக்குறிச்சி ஆகிய பகுதிகளிலும் இடி, மின்னலுடன் மழை பெய்தது.

தம்மம்பட்டி, செந்தாரப் பட்டி, நாகியம்பட்டி, கொண்டையம்பள்ளி, கூடமலை, கிருஷ்ணாபுரம், தெடாவூர், வீரகனூர் ஆகிய பகுதிகளிலும் இடி, மின்னலுடன் கனமழை பெய்தது. இதனால் அந்த பகுதிகளில் விவசாய நிலங்களில் தண்ணீர் தேங்கியதால் விவசாயிகள் மகிழ்ச்சி அடைந்தனர்.

கொங்கணாபுரத்தில் நேற்று மாலை பலத்த காற்றுடன் மழை பெய்தது. இதில் கொங்கணாபுரத்தில் இருந்து சேலம் செல்லும் சாலையில் கன்னந்தேரி அருகே ஒண்டிப்பனை பகுதியில் புளியமரம் முறிந்து சாலையில் விழுந்தது. இதனால் அந்த பகுதியில் போக்குவரத்து பாதிக்கப்பட்டது. மேலும் மின்கம்பங்களும் சாய்ந்ததால் மின்தடை ஏற்பட்டது.

சங்ககிரியில் இரவு 8 மணிக்கு தொடங்கிய மழை ஒரு மணிநேரம் கொட்டித் தீர்த்தது. இதனால் வெள்ளப்பெருக்கு ஏற்பட்டதால் வாகனங்கள் சாலையில் செல்ல முடியாமல் போக்குவரத்து பாதிப்பு ஏற்பட்டது. பஸ்சுக்காக காத்திருந்த பயணிகள் கடும் அவதி அடைந்தனர்.

மேலும் சங்ககிரி ஒன்றியத்திற்கு உட்பட்ட கொமரநல்லிபாளையம் எம்.ஜி.ஆர். நகரில் வசிக்கும் செல்லம்மாள் என்பவரது தொகுப்பு வீடு மழையில் இடிந்து விழுந்தது. மேலும் அந்த பகுதியில் 8 தொகுப்பு வீடுகள் பழுதடைந்தன.

ஓமலூர், காடையாம்பட்டி பகுதியில் நேற்றிரவு 2 மணிநேரத்திற்கும் சூறைக் காற்றுடன் கனமழை பெய்தது. இதில் சிக்கனம்பட்டி, குப்பூர் உள்பட பல பகுதிகளில் பயிரிடப்பட்டிருந்த 10 ஆயிரத்திற்கும் மேற்பட்ட வாழை மரங்கள், 2 ஆயிரத்திற்கும் மேற்பட்ட பாக்கு மரங்கள் சேதம் அடைந்தன.

இதனால் பாதிக்கப்பட்ட விவசாயிகள் தவித்து வருகிறார்கள். ஓமலூர் பகுதியில் இடி, மின்னலுடன் பெய்த கனமழையால் 100-க்கும் மேற்பட்ட டி.வி. பெட்டிகள் உள்பட எலக்ட்ரானிக் பொருட்கள் சேதம் அடைந்தன.

சேலம் மாவட்டத்தில் பெய்த மழை விவரம் மில்லி மீட்டரில் வருமாறு:-

ஆத்தூர் - 98.6, தம்மம்பட்டி - 58.4, சங்ககிரி - 56, கெங்கவல்லி - 52.4, மேட்டூர் - 51.4, ஓமலூர் - 23.4, கரியகோவில் - 19, ஆனைமடுவு - 17, சேலம் - 13.8, காடையாம்பட்டி - 9.6, ஏற்காடு - 9.4, எடப்பாடி - 3, பெத்தநாயக்கன் பாளையத்தில் 2 மி.மீட்டர் மழையும் பெய்துள்ளது.  #Rain

கொண்டலாம்பட்டி:

சேலம், சூரமங்கலம் கென்னடி நகரை சேர்ந்தவர் கதிரவன். இவரது மனைவி சங்கீதா (வயது 33). இவர்களுக்கு 2 மகன்கள் உள்ளனர். இவர்கள் மும்பையில் வசித்து வருகிறார்கள்.

இந்த நிலையில் கதிரவனுக்கும், சங்கீதாவுக்கும் இடையே கருத்து வேறுபாடு ஏற்பட்டது. இதனால் கணவரை பிரிந்து சங்கீதா சேலத்திற்கு வந்து கென்னடி நகரில் வாடகை வீட்டில் தங்கியிருந்தபடி, அந்த பகுதியில் உள்ள ஒரு ஓட்டலில் வேலை பார்த்து வந்தார்.

நேற்று சங்கீதா திடீரென வீட்டில் தூக்குப்போட்டு தற்கொலை செய்து கொண்டார். இது பற்றி சூரமங்கலம் போலீசார் திருவாக்கவுண்டனூர் புத்தர் தெருவில் வசித்து வரும் அவரது தாய் மேகலாவுக்கு தகவல் தெரிவித்தனர்.

பின்னர் சங்கீதா உடல் சேலம் அரசு ஆஸ்பத்திரிக்கு அனுப்பி வைக்கப்பட்டது. தொடர்ந்து போலீசார் வழக்குப்பதிவு செய்து விசாரணை நடத்தி வருகின்றனர்.

சேலம், அம்மாப்பேட்டை கிருஷ்ணன் கோவில் தெருவை சேர்ந்தவர் தீபக் கார்த்திக். இவரது மனைவி சந்திரலேகா (வயது 20). இவர்கள் இருவரும் காதலித்து கடந்த 5 மாதங்களுக்கு முன்பு திருமணம் செய்து கொண்டனர்.

இந்த நிலையில் சந்திரலேகா தனது உறவினர் வீட்டிற்கு சென்றபோது 2 ஆயிரம் பணம், தங்க காசு மாயமானது. இதில் மனவேதனை அடைந்த அவர் நேற்று இரவு வீட்டில தூக்குமாட்டி தற்கொலை செய்து கொண்டார்.

இது குறித்து சேலம் வடக்கு சரக போலீஸ் உதவி கமி‌ஷனர் ஆனந்த குமார் மற்றும் ஆர்.டி.ஓ. செழியன் ஆகியோர் விசாரணை நடத்தி வருகின்றனர்.

சேலம்:

சேலம் தெற்கு தொகுதிக்குட்பட்ட கொண்டலாம்பட்டி பகுதியில் இன்று அதிகாலை தேர்தல் பறக்கும் படையினர் வாகன சோதனையில் நடத்தினர்.

அப்போது அந்த வழியாக வந்த லாரிகளை நிறுத்தி சோதனை செய்தனர். அதில் அழகர்சாமி என்பவர் ஓட்டி வந்த லாரியில் ரூ.1 லட்சத்து 20 ஆயிரம் இருந்தது.

இது குறித்து அதிகாரிகள் அவரிடம் விசாரித்த போது விஜயவாடாவுக்கு செல்வதாகவும், டீசல் மற்றும் செலவுகளுக்கு அந்த பணத்தை வைத்ததுள்ளாகவும் கூறினர்.

ஆனால் அதற்கு சரியான ஆவணங்கள் இல்லை எ ன்று கூறிய பறக்கும் படையினர் அதனை பறிமுதல் செய்து மாவட்ட கருவூலத்தில் ஒப்படைத்தனர்.

இதே போல அந்த வழியாக செல்வம் என்பவர் ஓட்டி வந்த லாரியையும் நிறுத்தி பறக்கும் படையினர் சோதனை செய்தனர்.

அப்போது லாரியில் இருந்த ரூ.57 ஆயிரம் சிக்கியது. அது குறித்து செல்வத்திடம் கேட்ட போது வடமாநிலத்திற்கு செல்வதாகவும், செலவுக்காக இந்த பணத்தை வைத்துள்ளதாகவும் கூறினார்.

ஆனால் அதற்கான ஆவணங்கள் இல்லை என்று கூறிய அதிகாரிகள் அந்த பணத்தை பறிமுதல் செய்தனர்.

அப்போது செலவுக்கு கொண்டு செல்லும் பணத்திற்கு எப்படி ஆவணம் காட்ட முடியும் என்று புலம்பியபடியே செல்வம் அங்கிருந்து சென்றார்.