ஈரோடு:
இந்தியாவில் ஒவ்வொரு சீசனிலும் குறிப்பிட்ட சுவாமி வழிபாட்டுக்கான யாத்திரை, மாலை அணிவித்து செல்லுதல் போன்றவை நடக்கிறது. இதன் படி தமிழகம் உள்பட தென் மாநிலங்களில் முருகன், அய்யப்பன், மாரியம்மன் வழிபாடு அதிகம் நடக்கிறது.
இந்த கோவில்களுக்கு இருமுடி கட்டியும், விரதம் இருந்தும், பாதயாத்திரையாக ஆயிரக்கணக்கான பக்தர்கள் செல்கின்றனர். இவர்களுக்கான துணியால் ஆன இருமுடி ஜோல்னா பையை ஈரோடு அடுத்த நாராயணவலசு பகுதியில் தயாரித்து அவற்றில் சுவாமி படங்களுடன் ஸ்லோகங்கள் பிரிண்ட் செய்து பல்வேறு மாவட்டங்கள், வெளி மாநிலங்கள், வெளிநாடுகளுக்கு அனுப்பி வைக்கின்றனர்.
இதுகுறித்து இருமுடி ஜோல்னா பை உற்பத்தியில் ஈடுபடும் சுகுமாரன் என்பவர் கூறும் போது:-
பாதயாத்திரை சீசனுக்கு கோவில்களுக்கு செல்வோருக்கு பெரிய பைகளை விட ஜோன்லா பை, இருமுடி பை அவசியம் தேவை. எடை குறைவு என்பதுடன் எளிதில் உலர்ந்து விடுவதுடன் தூக்கி செல்வதும் எளிதாகும்.
இந்த பை ஈரோடு பகுதியில் உற்பத்தி, பிரிண்ட் செய்து தருகிறோம். மார்கழி, தை, மாசி, பங்குனி, மாதங்களில் முருகனுக்கும், ஆடி மற்றும் மார்கழி மாதம் அம்மனுக்கும், கார்த்திகை முதல் தை வரை ஐய்யப்பனுக்கும் மேல்மருவத்தூர், சமயபுரம், பண்ணாரி அம்மன் கோவில் யாத்திரை செல்லும் சீசன் காலமாகும்.
இதற்காக இருமுடி பையுடன், ஜோல்னா பை பிரிண்ட் செய்து தமிழகம் உள்பட தென் மாநிலங்கள், ஒடிசா மாநிலத்திற்கும், கனடா உள்ளிட சில வெளிநாடுகளுக்கும் அனுப்புகிறோம். நீலம், கருப்பு, மஞ்சள், பச்சை போன்ற நிறங்களில் ஜோல்னா பையும், இருமுடி பையும் தயாரித்து வழங்குகிறோம். இவை 160 ரூபாய் முதல் 180, 195 ரூபாய் வரையிலான விலையில் கிடைக்கிறது.
இவ்வாறு அவர் கூறினார்.
