நீங்கள் தேடியது "சத்யேந்தர் ஜெயின்"

புதுடெல்லி:

தலைநகர் டெல்லியில் அரவிந்த் கெஜ்ரிவால் தலைமையிலான ஆம் ஆத்மி அரசில் சுகாதாரத்துறை மந்திரியாக இருந்தவர் சத்யேந்திர ஜெயின். அவர் தொடர்புடைய நிறுவனங்களில் பணமோசடி நடந்ததாக 2017-ம் ஆண்டு சி.பி.ஐ. வழக்குப்பதிவு செய்தது. இதன் அடிப்படையில் அமலாக்கத்துறையும் அவர் மீது வழக்குப்பதிவு செய்தது.

பிறகு 2022, மே 31-ம் தேதி பணமோசடி சட்டத்தின் கீழ், சத்யேந்திர ஜெயினை கைதுசெய்து திஹார் சிறையில் அடைத்தனர். இதனால் அவர் தனது பதவியை ராஜினாமா செய்தார். அவர் தாக்கல் செய்த ஜாமின் மனுக்கள் பலமுறை தள்ளுபடி செய்யப்பட்டன.

இதற்கிடையே, 2023-ம் ஆண்டு மே மாதம் மருத்துவ காரணங்களுக்காக சத்யேந்திர ஜெயினுக்கு சுப்ரீம் கோர்ட் 6 வாரம் இடைக்கால ஜாமின் வழங்கியது. பிறகு அவர் நிரந்தர ஜாமின் கேட்டு அவர் மனு தாக்கல் செய்தார். இதனை நீதிமன்றம் சுப்ரீம் கோர்ட் தள்ளுபடி செய்தது. இதனையடுத்து அவர் திஹார் சிறைக்கு திரும்பினார்.

டில்லி ரோஸ் அவென்யூ சிறப்பு நீதிமன்றத்தில் சத்யேந்திர ஜெயின் ஜாமின் கேட்டு மனு தாக்கல் செய்தார். இதனை நீதிபதி விஷால் கோக்னே விசாரித்தார். இரு தரப்பு வாதங்களை கேட்ட நீதிபதி தீர்ப்பை ஒத்திவைத்து இருந்தார்.

இந்நிலையில், இந்த வழக்கில் நீதிபதி அளித்த தீர்ப்பில் கூறப்பட்டுள்ளதாவது:

விசாரணையில் தாமதம், நீண்ட நாள் சிறைவாசம் மற்றும் வழக்கு விசாரணை துவங்க நீண்ட நாட்களாகும் என்ற உண்மையை கருத்தில் கொண்டு, குற்றம்சாட்டப்பட்டவர் நிவாரணம் பெற தகுதி உடையவர்.

பணமோசடி தடுப்பு சட்டம் போன்ற கடுமையான சட்டங்களின் கீழ் வரும் வழக்குகளில் தனிமனித சுதந்திரத்தையும் சுட்டிக்காட்டினார்.

ரூ.50 ஆயிரத்திற்கான தனி நபர் ஜாமின் பத்திரம், அதே தொகைக்கு இரண்டு பேர் உத்தரவாதம் வழங்கவேண்டும். சாட்சிகளுடனோ, வழக்குடன் தொடர்புடைய தனி நபர்களுடனோ தொடர்பு கொள்ளக்கூடாது.

விசாரணையில் எந்த வகையிலும் செல்வாக்கு செலுத்தக்கூடாது. நீதிமன்றத்தின் அனுமதி இல்லாமல் வெளிநாடுகளுக்கு செல்லக்கூடாது என் நிபந்தனைகள் விதித்துள்ளது.

ஊழல் வழக்கில் கைதாகி சிறையில் இருக்கும் ஆம் ஆத்மி கட்சியினரில் ஜாமின் கிடைத்த 3வது நபர் இவர் ஆவார். இதற்கு முன்னர் கெஜ்ரிவால், மணீஷ் சிசோடியா ஆகியோரும் ஜாமினில் வெளியே வந்துள்ளது குறிப்பிடத்தக்கது.

புதுடெல்லி :

டெல்லி மந்திரி சத்யேந்தர் ஜெயின், சட்டவிரோத பண பரிமாற்ற தடை வழக்கில் கடந்த ஆண்டு அமலாக்கத்துறையால் கைது செய்யப்பட்டார். அப்போதிருந்து டெல்லி திகார் சிறையில் இருந்து வருகிறார்.

சிறையில் அவர் மசாஜ் செய்து கொள்வதும், வெளி உணவை சாப்பிடுவதும் வீடியோவாக வெளியாகி பரபரப்பு ஏற்படுத்தியது.

இந்தநிலையில், சத்யேந்தர் ஜெயின் மீது திகார் சிறை கூடுதல் ஐ.ஜி., சிறை சூப்பிரண்டு, துணை சூப்பிரண்டு, உதவி சூப்பிரண்டு, சட்ட அதிகாரி ஆகியோர் டி.ஜி.பி.யிடம் (சிறைகள்) புகார் தெரிவித்துள்ளனர்.

அதில், ''சத்யேந்தர் ஜெயின் அனுபவிக்கும் வசதிகளை நாங்கள் தடுக்க முயற்சிப்பதால் அவர் எங்களை வசை பாடுகிறார். 'நான் வெளியே வந்த பிறகு கடுமையான பின்விளைவுகளை சந்திப்பீர்கள்' என்று மிரட்டுகிறார்'' என்று அவர்கள் கூறியுள்ளனர்.

இதுபோல், நோட்டீஸ் கொடுக்க சென்ற தங்களை சத்யேந்தர் ஜெயின் மிரட்டியதாக 2 அதிகாரிகள் புகார் செய்துள்ளனர். இதுகுறித்து ஆம் ஆத்மி தரப்போ, டெல்லி அரசு தரப்போ எதுவும் கூறவில்லை.

புதுடெல்லி :

டெல்லியில் நடந்து வரும் ஆம் ஆத்மி அரசில் மந்திரியாக இருப்பவர் சத்யேந்தர் ஜெயின். சுகாதாரத்துறை பொறுப்பு வகித்து வந்தார். சட்டவிரோத பண பரிமாற்ற வழக்கில் அவரை அமலாக்கத்துறை கைது செய்தது. கடந்த 5 மாதங்களாக டெல்லி திகார் சிறையில் அடைக்கப்பட்டுள்ளார்.

அங்கு அவருக்கு சிறப்பு சலுகைகளும், விசேஷ உணவு வகைகளும் அளிக்கப்படுவதாக தகவல்கள் வெளியாகி வருகின்றன.

இதற்கிடையே, சத்யேந்தர் ஜெயினுக்கு சிறையில் 'மசாஜ்' செய்யப்படும் வீடியோ வெளியாகி பெரும் பரபரப்பு ஏற்படுத்தியது. அவர் படுத்தபடி முதுகு, கால்களுக்கு மசாஜ் எடுத்துக் கொள்வதும், நாற்காலியில் அமர்ந்தபடி தலைக்கு மசாஜ் எடுத்துக் கொள்வதும் இடம்பெற்றிருந்தன. இதையொட்டி, ஆம் ஆத்மியை எதிர்க்கட்சிகள் குற்றம் சாட்டின.

ஆனால், சத்யேந்தர் ஜெயினுக்கு 'மசாஜ்' செய்யப்படவில்லை என்று ஆம் ஆத்மி கட்சி மறுப்பு தெரிவித்தது. அவர் முதுகு தண்டுவட காயத்தால் பாதிக்கப்பட்டதால் 'பிசியோதெரபி' சிகிச்சை அளிக்கப்பட்டதாக கூறியது.

இந்தநிலையில், டெல்லி மந்திரி சத்யேந்தர் ஜெயினுக்கு பிசியோதெரபி சிகிச்சை அளிக்கப்படவில்லை என்று தெரிய வந்துள்ளது. அவருக்கு மசாஜ் செய்பவர், பிசியோதெரபி நிபுணர் அல்ல, கற்பழிப்பு குற்றத்துக்காக 'போக்சோ' சட்டத்தில் கைதாகி, திகார் சிறையில் இருக்கும் கைதி என்று சிறை வட்டாரங்கள் தெரிவித்தன. அவர் பெயர் ரிங்கு.

இதைத்தொடர்ந்து, சத்யேந்தர் ஜெயினை பதவி நீக்கம் செய்யுமாறு பா.ஜனதா கோரிக்கை விடுத்துள்ளது. இதுகுறித்து பா.ஜனதா செய்தித்தொடர்பாளர் கவுரவ் பட்டியா கூறியதாவது:-

புதிய தகவல் வெளியான நிலையில், டெல்லி முதல்-மந்திரி அரவிந்த் கெஜ்ரிவால் ஒரு மணி நேரத்தில் இதற்கு பதில் சொல்லத் தயாரா? அவர் நாட்டு மக்களிடம் மன்னிப்பு கேட்க வேண்டும்.

சத்யேந்தர் ஜெயின் ஒரு நிமிடம் கூட பதவியில் நீடிக்கக்கூடாது. அவரை உடனே பதவி நீக்கம் செய்ய வேண்டும். அந்த பொறுப்பை நிறைவேற்ற முடியாவிட்டால், அரவிந்த் கெஜ்ரிவால் பதவி விலக வேண்டும்.

இவ்வாறு அவர் கூறினார்.

டிசம்பர் 4-ந் தேதி, டெல்லி மாநகராட்சி தேர்தல் நடக்கிறது. இந்த நிலையில், ஆம் ஆத்மி மந்திரி பற்றிய தகவல்கள், புயலை கிளப்பி உள்ளது.