புதுப்பாளையம்:
திருவண்ணா மலையிலிருந்து 20-க்கும் மேற்பட்ட பயணிகளை ஏற்றிக்கொண்டு திருப்பத்தூருக்கு அரசு பஸ் இன்று மதியம் சென்று கொண்டிருந்தது.
பெங்களூரில் இருந்து திருவண்ணாமலை நோக்கி டேங்கர் லாரி வந்து கொண்டிருந்ததாக கூறப்படுகிறது.
அப்போது மேல் செங்கம் பண்ணை அருகே பஸ்சும், லாரியும் வரும்போது எதிர்பாராத விதமாக நேருக்கு நேர் மோதி விபத்துக்குள்ளானது. இதில் டேங்கர் லாரி ஒட்டி வந்த டிரைவருக்கு பலத்த காயம் ஏற்பட்டது. இதேபோல் பஸ்சில் பயணம் செய்த 10-க்கும் மேற்பட்டோர் காயம் அடைந்தனர்.
இதுகுறித்து அந்த வழியாக வந்தவர்கள் 108 ஆம்புலன்சுக்கும், மேல் செங்கம் போலீசருக்கும் தகவல் தெரிவித்தனர். விரைந்து வந்த போலீசார் போக்குவரத்தை சீர் செய்து காயம் அடைந்தவர்களை மீட்டு பொதுமக்கள் உதவியுடன் செங்கம் அரசு மருத்துவமனைக்கு அனுப்பி வைக்கப்பட்டனர்.
லாரி டிரைவரை மேல் சிகிச்சைக்காக திருவண்ணா மலை அரசு மருத்துவக் கல்லூரி மருத்துவமனைக்கு அனுப்பி வைத்தனர்.
அவருக்கு அங்கு தீவிர சிகிச்சை அளிக்கப்பட்டு வருகிறது. மேலும் போலீசார் வழக்கு பதிவு செய்து விசாரணை நடத்தி வருகின்றனர். இதனால் சிறிது நேரம் போக்குவரத்து பாதிப்பு ஏற்பட்டது.
