சேலம்:
சேலம் மாநகராட்சி புதிய பேருந்து நிலையத்தில் ஆணையாளர் கிறிஸ்துராஜ் திடீர் ஆய்வு மேற்கொண்டார். ஆய்வின் போது புதிய பேருந்து நிலைய வளாகத்தில் உள்ள கட்டண கழிப்பிடங்கள், கட்டணமில்லா கழிப்பிடங்கள் முறையாக பராமரிக்கப்பட்டு சுத்தமாக வைக்கப்பட்டுள்ளதா என்றும், நிர்ணயிக்கப்பட்ட கட்டணத்தை விட கூடுதலாக கட்டணம் வசூலிக்கப்டுகிறதா, கழிப்பிடங்களில் போதுமான தண்ணீர் வசதி உள்ளதா என்பது குறித்தும், துர்நாற்றம் இல்லாத வகையில் மருந்து தெளிக்கப்படுகிறதா என்றும், கழிப்பிடம் சுத்தமாக உள்ளதா, தண்ணீர் வசதி, காற்றோட்ட வசதி, கழிப்பறை கதவுகளில் தாழ்பாள் சரியான முறையில் உள்ளதா என்று மக்கள் தங்கள் கருத்துக்களை தெரிவிக்க க்யூ ஆர் கோடு பொருத்தப்பட்டு உள்ளதையும் ஆய்வு செய்தார்.
மேலும், பேருந்து நிலையத்திலிருந்து பேருந்துகள் வெளியே செல்வதற்கும், உள்ளே வருவதற்கும் உள்ள பாதைகளில் ஆக்கிரமிப்பு ஏதேனும் உள்ளதா, பேருந்து நிலைய நடைபாதையில் பயணிகளுக்கு இடையூறு ஏற்படும் வகையில் அனுமதி பெறாமல் கடைகள் வைக்கப்பட்டுள்ளதா, புதிய பேருந்து நிலையத்தில் எத்தனை கடைகளுக்கு அனுமதி வழங்கப்பட்டுள்ளது.
அனுமதி அளிக்கப்பட்டதற்குமேல் கூடுதலாக கடைகள் வைக்கப்பட்டுள்ளதா என்பதையும் சம்மந்தப்பட்ட அதிகாரிகளிடம் கேட்டறிந்தார். மேலும் வாகன நிறுத்தங்களில் வாகனங்களுக்கு வசூலிக்கப்படும் கட்டண விபரங்கள் குறித்தும், அது குறித்து சம்மந்தப்பட்ட அதிகாரிகள் முறையாக ஆய்வு செய்கிறார்களா என்பதை ஆய்வு செய்த ஆணையாளர் அவர்கள் புதிய பேருந்து நிலையத்தில் உள்ள கழிப்பிடங்கள் மற்றும் நடைபாதைகள் அனைத்தும் சுத்தமாகவும், சுகாதாரமான முறையிலும் வைத்திருக்க வேண்டும் என சம்மந்தப்பட்ட அதிகாரிகளுக்கு உத்தரவிட்டார்.
அதனைத் தொடர்ந்து சீர்மிகு நகரத்திட்டத்தின் கீழ் திருமணி முத்தாறு குறுக்கே நடைபெற்று வரும் பாலம் அமைக்கும் பணிகளின் முன்னேற்றம் குறித்து ஆய்வு செய்த ஆணையாளர் பணிகள் எவ்வாறு நடைபெற்று வருகிறது என்பதை கேட்டறிந்தார். பணிகளை மிக விரைவில் முடித்திட வேண்டும் என சம்மந்தப்பட்ட அலுவலர்களுக்கு உத்தரவிட்டார்.
ஆய்வின் போது உதவி செயற்பொறியாளர் செந்தில் குமார், செல்வராஜ், உதவி பொறியாளர்கள் பாலசுப்பிரமணியம், சுரேஷ், சுகாதார அலுவலர் சதீஷ் ஆகியோர் உடனிருந்தனர்.
