நீங்கள் தேடியது "கேரளா கழிவுகள்"

கேரளா மாநில மருத்துவக் கழிவுகள் மற்றும் இறைச்சிக் கழிவுகள் தமிழக மாவட்டங்களில் கொட்டப்படுவது தொடர்ந்து நடைபெற்று வருகிறது. சமீபத்தில் நெல்லை மாவட்டத்தை ஒட்டிய கிராமங்களில் கேரள கழிவுகள் கொட்டப்பட்டன.

இந்த விவகாரம் பூதாகாரமாக வெடித்த நிலையில், எதிர்க்கட்சி தலைவர் எடப்பாடி பழனிசாமி தமிழக அரசுக்கு கடும் கண்டனம் தெரிவித்து எக்ஸ் தளத்தில் பதிவிட்டு இருந்தார். இதற்கு விளக்கம் அளிக்கும் வகையில், தமிழ்நாடு நிதித்துறை மற்றும் சுற்றுச்சூழல் துறை அமைச்சர் தங்கம் தென்னரசு எக்ஸ் தளத்தில் பதிவிட்டுள்ளார்.

அதில், "கடந்த பத்தாண்டுகால அடிமை அதிமுக ஆட்சியில் தான், கோவை, தேனி , திருநெல்வேலி, விருதுநகர் உள்ளிட்ட தமிழ்நாடு கேரளா எல்லையோர பகுதிகளில், கேரளாவில் இருந்து சட்டவிரோதமாக கழிவுகளை கொண்டுவந்து கொட்டி தமிழ்நாடே கேரளாவின் குப்பைத்தொட்டியாகி கிடந்தது. 2016 ஆம் ஆண்டு "மருத்துவக் கழிவுகள் அபாயம்: இன்னும் விழித்துக்கொள்ளாத தமிழகம்!" என்று விகடன் தனி கட்டுரையே வெளியிட்டது. 2019 ஆம் ஆண்டில் விருதுநகர் மாவட்டம், திருவில்லிபுத்தூர் அருகே உள்ள இனாம் கரிசல்குளம் கிராமத்தில் கேரளாவில் இருந்து குப்பைகளை லாரி லாரியாக கொண்டுவந்து கொட்டிய லாரிகளை மக்களே சிறைபிடித்த நிகழ்வு என பல்வேறு உதாரணங்களை எடுத்துக்கூற முடியும்.

மாண்புமிகு முதலமைச்சர் மு.க. ஸ்டாலின் அவர்கள் தலைமையிலான திராவிட மாடல் ஆட்சி அமைந்தவுடனே தமிழ்நாடு - கேரளா எல்லை தீவிரமாக கண்காணிக்கப்பட்டு கேரளா கழிவுகள் தமிழ்நாட்டிற்குள் நுழைவது பெருமளவு தடுக்கப்பட்டு வருகிறது. கழிவுகளை கொட்டுவோர் மீது கடுமையான நடவடிக்கைகள் மேற்கொள்ளப்பட்டு வருகின்றன. எதிர்பாரா விதமாக நடக்கும் ஓரிரு நிகழ்வுகள் மீதும் உடனடியாக நடவடிக்கை எடுக்கப்பட்டு சம்மந்தப்பட்ட குற்றவாளிகள் சட்டப்படி தண்டிக்கப்பட்டு வருகின்றனர்.

சமீபத்தில் திருநெல்வேலி மாவட்டத்தின் கல்லூர் பகுதிகளில் சட்டவிரோதமாக கேரளாவில் இருந்து கழிவுகள் கொண்டுவந்து கொட்டப்படுகிறது என புகார் வந்தவுடன் விரைந்து நடவடிக்கை எடுத்ததன் பேரில், கழிவுகளை கொட்டிய சுத்தமல்லி கிராமத்தை சேர்ந்த மனோகரன், மாயாண்டி ஆகியோர் கைது செய்யப்பட்டுள்ளனர்.

தமிழ்நாட்டில் கேரள மருத்துவக் கழிவுகள் கொட்டப்படுவதைத் தடுக்க உரிய நடவடிக்கை எடுக்குமாறும் கேரள மாசுக்கட்டுப்பாட்டு வாரியத்திற்கு இதுகுறித்து உத்தரவுகளைப் பிறப்பிக்குமாறும் ஒன்றிய மாசுக்கட்டுப்பாட்டு வாரியத்திற்கு தமிழ்நாடு மாசுக்கட்டுப்பாட்டு வாரியம் சார்பில் கடிதம் அனுப்பப்பட்டுள்ளது.

மாண்புமிகு முதலமைச்சர் உத்தரவின் பேரில் தமிழ்நாடு - கேரளா எல்லைப்பகுதிகள் தீவிரமாக கண்காணிக்கப்பட்டு வருகின்றன. எத்தைத் தின்றால் பித்தம் தெளியும் என்பதுபோல் எதிலாவது அரசியல் செய்து பேர் எடுக்கத் துடித்துக் கொண்டிருக்கிறார் எடப்பாடி பழனிசாமி," என்று குறிப்பிட்டுள்ளார்.

தென்காசி:

மேற்கு தொடர்ச்சி மலையையொட்டி இயற்கை எழில் கொஞ்சும் பகுதியாக அமைந்துள்ள தென்காசி மாவட்டம் பல்வேறு சுற்றுலா தலங்களை உள்ளடக்கியதாக காணப்படுகிறது.

புளியரை சோதனை சாவடியை கடந்து சென்றால் அண்டை மாநிலமான கேரளாவை சென்றடையலாம். அங்கு காய்கறிகள், மணல், ஜல்லி அனைத்தும் இந்த சோதனை சாவடி வழியாக தான் கொண்டு செல்லப்படும்.

இந்நிலையில் கேரளாவில் மருத்துவக்கழிவுகள், குப்பை கழிவுகளை கொட்டு வதற்கு பல்வேறு விதி முறைகள் கடைபிடிக்கப்பட்டு வரும் நிலையில், தென்காசி மாவட்டத்தில் இருந்து அங்கு சென்று திரும்பும் சிறிய முதல் கனரக வாகனங்களில் மருத்துவக்கழிவு களை ஏற்றி அனுப்பி விடுகின்றனர்.

வாகனங்களின் டிரைவர்களும் பணத்திற்கு ஆசைப்பட்டு, மருத்துவக் கழிவுகளை ஏற்றி வந்து தென்காசி மாவட்டத்தில் சாலையோரம் கொட்டி விட்டு சென்று விடுகின்றனர். கேரளாவில் இருந்து தென்காசி மாவட்டத்திற்குள் நுழையும் அனைத்து வாகனங்களையும் புளியரை செக்போஸ்டில் முழுமை யாக சோதனை செய்யப் படாததே இந்த நிலைக்கு காரணம் என்ற குற்றச்சாட்டு பரவலாக உள்ளது.

இந்த மருத்துவ கழிவுகளை பாவூர்சத்திரம், ஆலங்குளம், கடையநல்லூர், புளியங்குடி, சங்கரன்கோவில் மற்றும் அதன் சுற்று வட்டார பகுதிகளில் அமைந்துள்ள விவசாய நிலங்களில் கொட்டி செல்கின்றனர்.

சமீபத்தில் கூட கேரளா மாநிலம் கோட்டயத்தில் இருந்து பிளாஸ்டிக் கழிவு மருத்துவ கழிவுகள் மற்றும் மெத்தை கழிவுகளை கொண்டு வந்து ஆலங்குளம் அருகே கொட்டி எரித்து கொண்டிருந்த குற்றச் சாட்டில் ஒருவர் கைது செய்யப்பட்டு 4 பேர் மீது வழக்குப்பதிவு செய்யப்பட்டு உள்ளது.

எனவே தென்காசி மாவட்டத்திற்குள் தலை தூக்கி வரும் கேரளா கழிவுகளை முழுமையாக நிறுத்திட தென்காசி மாவட்ட எல்லையில் அமைந்துள்ள புளியரை செக்போஸ்டில் கூடுதல் போலீசாரை நியமிக்க வேண்டும். அங்கு வாகன சோதனையை தீவிரப்படுத்த வேண்டும். கேரள கழிவுகளை கொண்டு வருபவர்கள் மற்றும் அதற்கு துணை புரியும் நபர்கள் மீது குண்டர் தடுப்புச் சட்டத்தில் வழக்குப் பதிவு செய்து நடவடிக்கை எடுக்க வேண்டும் என தென்காசி மாவட்ட விவசாயி கள் மற்றும் சமூக ஆர்வலர்கள் சார்பில் கோரிக்கை எழுந்துள்ளது.