நீங்கள் தேடியது "நெல் விளைச்சல்"

சென்னை:

தமிழ்நாட்டில் நெல் அறுவடை சம்பா, குறுவை பெயரில் அறுவடை நடக்கிறது. இதில் சம்பா அறுவடையில் 75 சதவீதமும், குறுவை அறுவடையில் 25 சதவீதமும் இருக்கிறது.

இந்தியா முழுவதும் கடந்த 2023-ம் ஆண்டு பருவமழை கைவிட்டதால் விளைச்சல் பாதிக்கப்பட்டு, உற்பத்தி குறைந்தது. அதாவது, வழக்கத்தைவிட 3.7 சதவீதம் உற்பத்தி குறைந்து காணப்பட்டது. மேலும் சன்னரக அரிசிக்கான ஏற்றுமதிக்கும் தடைவிதிக்கப்பட்டது. இதனால் அரிசி விலை கடந்த 2023-ம் ஆண்டு ஜூன் மாதம் முதல் டிசம்பர் மாதம் வரை 'கிடுகிடு'வென உயர்ந்து இருந்தது.

இந்த நிலையில் கடந்த ஆண்டில் (2024) தென்மேற்கு மற்றும் வடகிழக்கு பருவமழை எதிர்பார்த்ததைவிட நல்ல மழை கொடுத்து சென்றதால், நெல் விளைச்சல் அமோகமாக கிடைத்துள்ளது.

தமிழ்நாட்டில் குறுவை அறுவடை முடிந்த நிலையில் அதில் எதிர்பார்த்த அளவுக்கு நெல் விளைச்சல் இருந்தது. அதனைத்தொடர்ந்து தற்போது சம்பா அறுவடையும் தொடங்கியுள்ளது. கனமழையால் கடலூர், விழுப்புரம் உள்ளிட்ட சில பகுதிகளில் அறுவடை பாதிப்பு இருந்துள்ளது.

இதனால் தமிழ்நாட்டில் சம்பா விளைச்சல் சற்று குறையும் என எதிர்பார்க்கப்படுகிறது. அதாவது, 72 லட்சம் டன் நெல் விளைச்சல் இருக்கும் இடத்தில் 70 லட்சம் டன்தான் கிடைக்கும் என சொல்லப்படுகிறது.

தமிழ்நாட்டில் இந்த நிலை இருந்தாலும், கர்நாடகா, ஆந்திரா, தெலுங்கானா, மேற்கு வங்காளம், ஒடிசா மாநிலங்களிலும் நெல் விளைச்சல் அமோகமாக இருந்து இருக்கிறது.

இதனை பம்பர் அறுவடை என்று சொல்கிறார்கள். அதாவது, இந்தியாவில் வழக்கமாக 130 மில்லியன் டன் உற்பத்தி இருக்கும். பருவமழை கைக்கொடுத்ததன் விளைவாக 137.83 மில்லியன் டன் நெல் உற்பத்தி இருக்க வாய்ப்பு இருப்பதாகவும், இது 140 மில்லியன் டன் உற்பத்தி வரை செல்வதற்கான வாய்ப்புள்ளதாகவும் தகவல்கள் தெரிவிக்கின்றன. விளைச்சலை முன்கூட்டியே உணர்ந்தே அரிசிக்கான தடையை நீக்கியும், அதற்கான சுங்க வரியை விலக்கியும் மத்திய அரசு உத்தரவு பிறப்பித்ததாக சொல்லப்படுகிறது.

நெல் அமோக விளைச்சல் காரணமாக 60 கிலோ நெல் மூட்டை ரூ.1,400 முதல் ரூ.1,500 வரை தற்போது இருக்கிறது. கடந்த 2023-ம் ஆண்டில் இதன் விலை ரூ.1,700 முதல் ரூ.1,800 ஆக இருந்தது. நெல் விலை தற்போது குறைந்துள்ளதால், அரிசி விலையும் அடுத்த மாதத்தில் (பிப்ரவரி) இருந்து குறைய வாய்ப்பு இருப்பதாக அரிசி ஆலை உரிமையாளர்கள், வணிகர்கள் தெரிவிக்கின்றனர்.

இதுகுறித்து தமிழ்நாடு அரிசி ஆலை உரிமையாளர்கள், நெல் அரிசி வணிகர்கள் சங்கங்களின் பொதுச் செயலாளர் ஏ.சி.மோகன் கூறும்போது, 'பருவமழை எதிர்பார்த்ததை விட கைக்கொடுத்து இருப்பதால் நெல் விளைச்சல் அமோகமாக இருக்கிறது. இதனால் அரிசி விலை கிலோவுக்கு ரூ.2 முதல் ரூ.3 வரை அடுத்த மாதத்தில் (பிப்ரவரி) இருந்து குறைய வாய்ப்பு அதிகம் இருக்கிறது. விலை குறைவால் விவசாயிக்கு எந்த பாதிப்பும் இருக்காது. விளைச்சல் அதிகமாக இருப்பதால் வருகிற ஆகஸ்டு மாதம் வரை அரிசி தட்டுப்பாடு என்ற பேச்சுக்கே இடம் இருக்காது' என்றார்.

பட்டுக்கோட்டை:

தஞ்சாவூர் மாவட்டம் பட்டுக்கோட்டை அருகே உள்ள ஆம்பலாப்பட்டு தெற்கு கிராமத்தைச் சேர்ந்த விவசாயி ஜெயராஜ் (வயது 52). இவருக்கு சொந்தமான 2 ஏக்கர் நிலத்தில் கடந்த 6 மாதங்களுக்கு முன்பு நெல் பயிரிட்டு, ரூ.50 ஆயிரம் செலவு செய்தார். ஆனால் போதுமான நெல் விளைச்சல் இல்லாமல் செலவு செய்த தொகை கூட கிடைக்காமல் நஷ்டம் அடைந்தார்.

இதனால் மனவேதனை அடைந்த அவர் இந்த முறை நெல் சாகுபடி செய்யாமல் விவசாய நிலத்தை அப்படியே தரிசாக விட்டு விட்டார். அதன் பிறகு ஜெயராஜ் தனது வயலுக்கு செல்லாமல் இருந்தார்.

இந்நிலையில் கடந்த சில தினங்களுக்கு முன்பு அப்பகுதியை சேர்ந்த பொதுமக்கள், ஜெயராஜிடம் உங்கள் வயலில் நெல் கதிர் விட்டு பயிர்கள் தலைசாய்ந்துள்ளது. இன்னும் ஏன் கதிரை அறுக்காமல் வைத்துள்ளீர்கள் என்று கேட்டுள்ளனர்.

அதைக்கேட்டு அதிர்ச்சியடைந்த ஜெயராஜ், கடந்த சில மாதங்களாக வயலுக்கு செல்லாமல் இருந்து மீண்டும் வயலை பார்க்கச் சென்றபோது அங்கு நெல்கதிர் வளர்ந்து முற்றி பயிர்கள் தலை சாய்ந்துள்ளது கண்டு இன்ப அதிர்ச்சியில் உறைந்தார்.

இதுபற்றி ஜெயராஜ் கூறுகையில், கடந்த முறை நெல் விவசாயம் செய்து நஷ்டம் அடைந்த நிலையில் அதற்குப்பின் நெல் விவசாயத்தையே மறந்து விட்டு தான் வேறு தொழிலை பார்க்க சென்று விட்டேன். இந்த நிலையில் என்னுடைய வயலில் கதிர் விட்டு நெல் பயிர்கள் தலை சாய்ந்து கிடக்கிறது என்று தகவல் தெரிந்து வயலுக்கு சென்று பார்த்தபோது எனக்கே இது ஆச்சரியமாக இருந்தது.

நான் நெல் விதை விதைக்கவில்லை, நடவு நடவில்லை, தண்ணீர் பாய்ச்சவில்லை, உரம் வைக்கவில்லை ஆனால் ஒரு ஏக்கருக்கு 8 மூட்டை வீதம் 16 மூட்டை நெல் விளைந்திருக்கிறது. இது என்னை மட்டுமல்ல இப்பகுதியில் உள்ள அனைத்து விவசாயிகளையும் ஆச்சரியப்பட வைத்துள்ளது. கடந்த முறை நெல்கதிர் அறுத்து விட்டு, வயலை சுத்தம் செய்யாமல் விட்டு விட்டேன்.

இந்நிலையில் கதிர் அறுத்த பிறகு இருந்த அடியில் உள்ள அருப்பு தாழிலிருந்து பயிர் வளர்ந்து அதன் மூலம் நெல் விளைந்துள்ளது என்னைப்போன்ற விவசாயிகளுக்கு ஆச்சரியமாக உள்ளது. ஆயிரக்கணக்கில் செலவு செய்து பயிரிட்டபோது கிடைக்காத நெல் விளைச்சல் ஒரு பைசா கூட செலவு செய்யாமல் தற்போது ஒரு ஏக்கருக்கு 8 மூட்டை விளைந்திருப்பது மிகப்பெரிய சந்தோசமாக உள்ளது என்றார்.