புதிய அவதாரம் எடுக்கும் சத்யராஜ்

வெப் தொடர்களுக்கு வரவேற்பு உள்ளதால் முன்னணி நடிகர்-நடிகைகள் பலர் இணையதள தொடர்களில் நடிக்க தொடங்கியுள்ளனர். ஜெயலலிதா வாழ்க்கையை மையமாக வைத்து சமீபத்தில் வெளியான குயின் வெப் தொடருக்கு நல்ல வரவேற்பு கிடைத்தது. இதில் ரம்யாகிருஷ்ணன், சோனியா அகர்வால் ஆகியோர் நடித்திருந்தனர். 

இதேபோல் முன்னணி நடிகைகளான காஜல் அகர்வால், தமன்னா, சமந்தா, நித்யாமேனன், பிரியா பவானி சங்கர், பிரியாமணி ஆகியோரும் வெப் தொடர்களில் நடிக்கிறார்கள். பிரசன்னா, பரத், பாபி சிம்ஹா, மீனா ஆகியோர் ஏற்கனவே வெப் தொடர்களில் நடித்துள்ளனர். 

இந்த நிலையில் முதல் முறையாக சத்யராஜ், சீதா, சுகன்யா ஆகியோரும் புதிய வெப் தொடர் ஒன்றில் இணைந்து நடிக்கின்றனர். இந்த தொடரை தாமிரா இயக்குகிறார். இவர் ஏற்கனவே பாலசந்தர், பாரதிராஜா நடித்த ரெட்டை சுழி, சமுத்திரக்கனி நடித்த ஆண்தேவதை ஆகிய படங்களை டைரக்டு செய்தவர். காதல், நகைச்சுவை, குடும்ப கதையம்சத்தில் இந்த வெப் தொடர் தயாராகிறது. படப்பிடிப்பு தற்போது தொடங்கி உள்ளது.