சண்டிகர் மேயர் தேர்தல்: ஆம் ஆத்மி, காங்கிரஸ் கூட்டணியை வீழ்த்தி பாஜக வெற்றி

சண்டிகரில் நடைபெற்ற மேயர் தேர்தலில் மொத்தமுள்ள 36 வாக்குகளில் 19 வாக்குகளை பெற்று பாஜக வெற்றி பெற்றுள்ளது. 17 வாக்குகள் மட்டுமே பெற்று ஆம் ஆத்மி - காங்கிரஸ் கூட்டணி தோல்வியடைந்துள்ளது.

ஆம் ஆத்மி வேட்பாளர் பிரேம் லதாவை தோற்க்கடித்து பாஜகவின் ஹர்ப்ரீத் கவுர் பாப்லா சண்டிகர் மேயராக வெற்றி பெற்றுள்ளார்.

மேயர் தேர்தலின் வாக்கு எண்ணிக்கையை மேற்பார்வையிட உச்ச நீதிமன்றத்தால் ஓய்வுபெற்ற பஞ்சாப் மற்றும் ஹரியானா உயர்நீதிமன்ற நீதிபதி ஜெய்ஸ்ரீ தாக்கூர் நியமிக்கப்பட்டிருந்தார்.

வாக்கு எண்ணிக்கையை வீடியோ பதிவு செய்யவும் உச்ச நீதிமன்றம் உத்தரவிட்டிருந்தது. ஏனெனில் கடந்தாண்டு நடைபெற்ற சண்டிகர் மேயர் தேர்தலில் முறைகேடுகளில் ஈடுபட்டு பாஜக வென்றது பெரும் பரபரப்பை ஏற்படுத்தியது.

இதனையடுத்து இந்த விவகாரத்தில் தலையிட்ட உச்ச நீதிமன்றம் ஆம் ஆத்மி வேட்பாளர் வெற்றி வெற்றி பெற்றதாக அறிவித்தது குறிப்பிடத்தக்கது.