விண்ணில் ஏவப்படும் 100-வது செயற்கைக்கோள் - கவுன்ட் டவுன் தொடக்கம், தயார் நிலையில் இஸ்ரோ

இந்திய விண்வெளி ஆராய்ச்சி நிறுவனமான இஸ்ரோ தனது 100-வது செயற்கைக்கோளை நாளை விண்ணில் செலுத்துகிறது. இதற்கான 27.30 மணி நேர கவுண்ட் டவுன் இன்று அதிகாலை 2.53 மணிக்கு தொடங்கியது.

இஸ்ரோவின் ஜி.எஸ்.எல்.வி. எப் -15 ராக்கெட் என்.வி.எஸ்.-02 என்ற செயற்கைக்கோளை சுமந்து கொண்டு நாளை (ஜனவரி 29) காலை 6.23 மணிக்கு விண்ணில் ஏவப்படுகிறது. இந்த ராக்கெட் ஆந்திர மாநிலம் ஸ்ரீஹரிகோட்டாவில் உள்ள சதீஷ் தவான் விண்வெளி ஆய்வு மையத்தில் இருந்து விண்ணில் ஏவப்பட உள்ளது.

நாளை 100-வது செயற்கைக்கோளை ஏவுவதன் மூலம் விண்வெளி ஆய்வு மற்றும் செயற்கைக்களோ தொழில்நுட்பத்தில் இந்தியா குறிப்பிடத்தக்க நிலையை அடையும். இது நாட்டில் ஏற்கனவே வளர்ந்து வரும் விண்வெளி திறனை மேலும் வலுப்படுத்தும்.

விண்ணில் செலுத்தப்படும் என்.வி.எஸ்-02 செயற்கைக்கோள் இஸ்ரோவின் கீழ் இயங்கி வரும் யு.ஆர். ராவ் செயற்கைக்கோள் மையத்தில் தயாரிக்கப்பட்டது. மேலும் இந்த செயற்கைக்கோள் இஸ்ரோவின் பிற செயற்கைக்கோள் பணி மையங்களின் ஆதரவுடன் வடிவமைக்கப்பட்டு, ஒருங்கிணைக்கப்பட்டு உள்ளது.

ராக்கெட் மற்றும் செயற்கைக்கோளின் செயல்பாடுகள் தொடர்ச்சியாக கண்காணிக்கப்பட்டு வருகிறது. ராக்கெட் விண்ணில் ஏவ தயார் நிலையில் உள்ளது என்று இஸ்ரோ விஞ்ஞானிகள் கூறினர்.