ஆட்டோ டிப்ஸ்

சுசுகி மோட்டார்சைக்கிள் இந்தியா நிறுவனம் மேம்பட்ட ஜிக்சர் சீரிஸ் மாடல்களை அறிமுகம் செய்து இருக்கிறது. புதிய ஜிக்சர் சீரிஸ் 155சிசி மற்றும் 250சிசி மாடல்கள் ஆகும். இவை நேக்கட் மற்றும் ஃபேர்டு என இருவித டிசைனிங்கில் கிடைக்கின்றன. 2023 ஜிக்சர் சீரிஸ் புதிய நிறங்களில் அறிமுகமாகி இருக்கின்றன. ஜிக்சர் மாடல்கள் நல்ல வரவேற்பை பெற்று வரும் நிலையில், மிட்-லைஃப் அப்டேட் மூலம் அதன் விற்பனை மற்றும் ஆயுளை நீட்டிக்க சுசுகி திட்டமிட்டுள்ளது.

டாப் எண்ட் மாடலான 2023 சுசுகி ஜிக்சர் SF 250 தற்போது மெட்டாலிக் மேட் ஸ்டெல்லார் புளூ, மெட்டாலிக் மேட் பிளாக் No. 2 மற்றும் மெட்டாலிக் சோனிக் சில்வர் மற்றும் மெட்டாலிக் ட்ரிடான் புளூ நிறங்களில் கிடைக்கிறது. நேக்கட் ஸ்டிரீட்ஃபைட்டர் மாடல் மெட்டாலிக் மேட் ஸ்டெல்லார் புளூ மற்றும் மெட்டாலிக் மேட் பிளாக் No.2 நிறங்களில் கிடைக்கிறது. சிறிய 155சிசி ஜிக்சர் மாடல் மெட்டாலிக் சோனிக் சில்வர் மற்றும் பியல் பிளேஸ் ஆரஞ்சு, மெட்டாலிக் ட்ரிடான் பூளூ மற்றும் கிளாஸ் ஸ்பார்கிள் பிளாக் என மூன்று விதமான நிறங்களில் கிடைக்கிறது.

புதிய நிறங்கள் மட்டுமின்றி 2023 மாடல்களில் சுசுகி நிறுவனம் சுசுகி ரைட் கனெக்ட் வசதியை வழங்கி இருக்கிறது. இது மோட்டார்சைக்கிள்களில் ப்ளூடூத் கனெக்டிவிட்டியை வழங்குகிறது. இத்துடன் டர்ன்-பை-டர்ன் நேவிகேஷன், எஸ்எம்எஸ் அலர்ட், மிஸல்டு கால் நோட்டிஃபிகேஷன், ஓவர்ஸ்பீடிங் அலர்ட் போன்ற அம்சங்கள் வழங்கப்பட்டு இருக்கிறது. இதற்கான ஸ்மார்ட்போன் செயலியை ஐஒஎஸ் மற்றும் ஆண்ட்ராய்டு தளங்களில் டவுன்லோட் செய்து கொள்ளலாம்.

காஸ்மெடிக் மற்றும் கனெக்டிவிட்டி தவிர புதிய ஜிக்சர் சீரிசில் மெக்கானிக்கல் மாற்றங்கள் எதுவும் மேற்கொள்ளப்படவில்லை. அந்த வகையில் சுசுகி ஜிக்சர் 250சிசி மாடலில் 249சிசி, சிங்கில் சிலண்டர், ஆயில் கூல்டு மோட்டார் வழங்கப்பட்டு இருக்கிறது. இந்த என்ஜின் 26.13 ஹெச்பி பவர், 22.2 நியூட்டன் மீட்டர் டார்க் இழுவிசையை வெளிப்படுத்துகிறது. இதன் 155சிசி மாடலில் சிங்கில் சிலிண்டர், ஏர்-கூல்டு என்ஜின் உள்ளது. இந்த என்ஜின் 13.41 ஹெச்பி பவர், 13.8 நியூட்டன் மீட்டர் டார்க் இழுவிசையை வழங்குகிறது.

விலை விவரங்கள்:

2023 சுசுகி ஜிக்சர் SF 250 மெட்டாலிக் சோனிக் சில்வர், மெட்டாலிக் ட்ரிடான் புளூ - ரூ. 2 லட்சத்து 02 ஆயிரத்து 500

2023 சுசுகி ஜிக்சர் SF 250 மெட்டாலிக் மேட் ஸ்டெல்லார் புளூ, மெட்டாலிக் மேட் பிளாக் No.2 - ரூ. 2 லட்சத்து 02 ஆயிரம்

2023 நேக்கட் ஜிக்சர் 250 மெட்டாலிக் மேட் ஸ்டெல்லார் புளூ, மெட்டாலிக் மேட் பிளாக் No.2 ரூ. 1 லட்சத்து 95 ஆயிரம்

2023 சுசுகி ஜிக்சர் SF - ரூ. 1 லட்சத்து 45 ஆயிரத்து 500

2022 சுசுகி ஜிக்சர் நேக்கட் மெட்டாலிக் சோனிக் சில்வர் மற்றும் பியல் பிளேஸ் ஆரஞ்சு, மெட்டாலிக் ட்ரிடான் புளூ மற்றும் கிளாஸ் ஸ்பார்கில் பிளாக் ரூ. 1 லட்சத்து 40 ஆயிரத்து 500

அனைத்து விலைகளும் எக்ஸ்-ஷோரூம் அடிப்படையில் குறிப்பிடப்பட்டு இருக்கிறது.

கியா இந்தியா நிறுவனம் செல்டோஸ் ஃபேஸ்லிஃப்ட் மாடலை அறிமுகம் செய்வதற்கான பணிகளில் ஈடுபட்டு வருகிறது. புதிய செல்டோஸ் மாடல் கடந்த ஆண்டு நவம்பர் மாத வாக்கில் சர்வதேச சந்தையில் அறிமுகம் செய்யப்பட்டது. இந்த நிலையில், 2023 செல்டோஸ் மாடல் இந்தியாவில் டெஸ்டிங் செய்யப்படும் புகைப்படங்கள் வெளியாகி உள்ளது.

2019 வாக்கில் அறிமுகம் செய்யப்பட்ட நிலையில், செல்டோஸ் மாடல் அப்டேட் செய்யப்படுவது இதுவே முதல் முறை ஆகும். புதிய மாடல் ஏற்கனவே சர்வதேச சந்தையில் அறிமுகம் செய்யப்பட்டு விட்ட நிலையில், இந்த எஸ்யுவி வெளிப்புற ஸ்டைலிங்கில் மாற்றங்களை பெற்று இருக்கிறது. 2023 மாடலில் சிக்னேச்சர் டைகர் நோஸ், எல்இடி ஹெட்லேம்ப் கிளஸ்டர்கள், முன்புற கிரில் பகுதியில் டிஆர்எல்கள் உள்ளன.

இத்துடன் டூயல் டோன் சில்வர் மற்றும் பிளாக் ஃபினிஷ் செய்யப்பட்ட அலாய் வீல்கள், ரிடிசைன் செய்யப்பட்ட டெயில் லேம்ப்கள், இலுமினேட் செய்யப்பட்ட லைட் ஸ்டிரைப் டெயில்கேட் முழுக்க இடம்பெற்று இருக்கிறது. கேபினுள் இன்ஸ்ட்ரூமெண்ட் கிளஸ்டர் மற்றும் இன்ஃபோடெயின்மெண்ட் சிஸ்டம் எவ்வித மாற்றங்களையும் பெறவில்லை.

பவர்டிரெயினை பொருத்தவரை 2023 செல்டோஸ் மாடலில் தற்போதைய வெர்ஷனில் உள்ளதை போன்றே 1.5 லிட்டர் பெட்ரோல் மற்றும் 1.5 லிட்டர் டீசல் என்ஜின்கள் வழங்கப்படும் என தெரிகிறது. இவை புதிய RDE மற்றும் BS6 2 புகை விதிகளுக்கு பொருந்தும் வகையில் அப்டேட் செய்யப்பட்டு இருக்கும். இரு என்ஜின்களுடன் மேனுவல் மற்றும் ஆட்டோமேடிக் கியர்பாக்ஸ் வழங்கப்படுகிறது.

வரும் மாதங்களில் 2023 கியா செல்டோஸ் அறிமுகம் செய்யப்பட இருக்கும் நிலையில், இந்த மாடல் மாருதி சுசுகி கிராண்ட் விட்டாரா, டொயோட்டா அர்பன் குரூயிசர் ஹைரைடர், ஃபோக்ஸ்வேகன் டைகுன், எம்ஜி ஆஸ்டர், ஸ்கோடா குஷக் மற்றும் ஹூண்டாய் கிரெட்டா போன்ற மாடல்களுக்கு போட்டியாக அமையும். 

Photo Courtesy: Rushlane

இந்திய ஆட்டோமொபைல் சந்தையில் முன்னணி கார் உற்பத்தியாளர்களில் ஒன்றாக உருவெடுக்க நிசான் திட்டமிட்டு இருந்தது. பல்வேறு பிரிவுகளில் புதிய கார் மாடல்களை அறிமுகம் செய்வதில் நிசான் கவனம் செலுத்தி வந்தது. மைக்ரா ஹேச்பேக், சன்னி செடான், எவானியா எம்பிவி, நிக்ஸ் எஸ்யுவி, டெரானோ எஸ்யுவி என ஏராள மாடல்களை அறிமுகம் செய்தது. எனினும், இவை எதுவும் நிசான் நிறுவனத்திற்கு பலன் அளிக்கவில்லை.

இந்திய சந்தையில் இருந்து வெளியேற நிசான் திட்டமிட நினைத்த காலத்தில் மேக்னைட் மாடல் அறிமுகம் செய்யப்பட்டது. மேக்னைட் மாடல் தனியே நின்று நிசான் இந்தியாவை விட்டு வெளியேறாமல் செய்தது. ரெனால்ட்-நிசான் கூட்டணியில் ஏற்கனவே பிளாட்ஃபார்ம் மற்றும் என்ஜின் பகிர்ந்து கொண்டு வருகின்றன. முன்னதாக டஸ்டர் மற்றும் டெரானோ மற்றும் சன்னி, ஸ்கேலா மாடல்கள் இவ்வாறு அறிமுகமாகின.

சமீபத்தில் ரெனால்ட் கைகர் மாடல் நிசான் மேக்னைட் மாடலை தழுவி உருவாக்கப்பட்டு இருக்கிறது. இந்த கார் டிரைபர் மாடலை போன்ற பிளாட்ஃபார்மிலேயே உருவாக்கப்பட்டு இருக்கிறது. மேக்னைட் பெற்று இருக்கும் வெற்றியை அடுத்து நிசான் நிறுவனம் இந்திய சந்தையில் மற்றொரு புது காரை அறிமுகம் செய்ய இருப்பதாக அறிவித்து இருக்கிறது.

புதிய நிசான் கார் ரெனால்ட் டிரைபர் மாடலை தழுவி உருவாக்கப்படுகிறது. டிரைபர் மாடல் சப்-4 மீட்டர் எம்பிவி மாடல் ஆகும். இதே போன்ற வழிமுறையை டேட்சன் பிராண்டு முதல் முறையாக தனது கோ பிளஸ் மாடலில் பின்பற்றி இருந்தது. டிரைபர் மாடல் எண்ட்ரி லெவல் 7 சீட்டர் காராக டிசைன் செய்யப்பட்டு உள்ளது.

நிசான் நிறுவனம் தற்போது இந்திய சந்தையில் மேக்னைட் மற்றும் கிக்ஸ் என இரண்டு கார்களை மட்டுமே விற்பனை செய்து வருகிறது. அந்த வகையில், வரும் ஏப்ரல் மாத வாக்கில் கிக்ஸ் மாடலின் விற்பனை நிறுத்தப்பட இருக்கிறது. நிசான் நிறுவனத்தின் டிரைபர் வெர்ஷன் இந்த ஆண்டு இறுதியில் அறிமுகம் செய்யப்பட உள்ளது.

ரெனால்ட் இந்தியா நிறுவனம் தனது வாகனங்கள் விற்பனையை ஊக்குவிக்க பிப்ரவரி 2023 மாதத்திற்கான சலுகை விவரங்களை வெளியிட்டு உள்ளது. இந்த முறை கார்களுக்கு அதிகபட்சம் ரூ. 62 ஆயிரம் வரையிலான பலன்கள் அறிவிக்கப்பட்டு இருக்கிறது. இவை தள்ளுபடி, எக்சேன்ஜ் மற்றும் கார்ப்பரேட் பலன்கள் வடிவில் வழங்கப்படுகின்றன. மேலும் இவை ஒவ்வொரு மாடல், வேரியண்ட் மற்றும் பகுதிக்கு ஏற்ப வேறுபடும்.

சலுகை கிடைக்கும் பட்சத்தில் விவசாயிகள், சார்பன்ச் மற்றும் கிராம பஞ்சாயத்து உறுப்பினர்கள் ஊரக பலன்களின் கீழ் ரூ. 5 ஆயிரம் வரை தள்ளுபடி பெறலாம். இத்துடன் RELIVE ஸ்கிராபேஜ் திட்டத்தின் கீழ் அதிகபட்சம் ரூ. 10 ஆயிரம் வரையிலான பலன்களை பெற முடியும். சமீபத்தில் தான் ரெனால்ட் நிறுவனம் தனது கார்களில் பிஎஸ்6 ஸ்டெப் 2 புகை விதிகளுக்கு ஏற்ப அப்டேட் செய்தது. தற்போது அறிவிக்கப்பட்டு இருக்கும் சலுகைகள் பிப்ரவரி 28 ஆம் தேதி வரை வழங்கப்படுகிறது.

ரெனால்ட் டிரைபர் மாடலை வாங்குவோருக்கு அதிகபட்சம் ரூ. 62 ஆயிரம் வரையிலான பலன்கள் வழங்கப்படுகின்றன. இவை வாகன குறியீட்டு எண்ணிற்கு ஏற்ப வேறுபடும். அந்த வகையில் வாகன குறியீட்டு எண் 2022 மாடலின் தேர்வு செய்யப்பட்ட வேரியண்ட்களை வாங்கும் போது ரூ. 25 ஆயிரம் தள்ளுபடி, ரூ. 25 ஆயிரம் எக்சேன்ஜ் சலுகை மற்றும் ரூ. 12 ஆயிரம் கார்ப்பரேட் பலன்கள் வழங்கப்படுகின்றன.

வாகன குறியீட்டு எண் 2023 வாங்கும் போது ரூ. 15 ஆயிரம் தள்ளுபடி, ரூ. 25 ஆயிரம் எக்சேன்ஜ் பலன்கள் மற்றும் ரூ. 12 ஆயிரம் வரை கார்ப்பரேட் பலன்கள் வழங்கப்படுகின்றன. இந்த சீரிசில் அதிநவீன மாடலாக பிஎஸ்6 ஃபேஸ் 2 வாங்கும் போது ரூ. 15 ஆயிரம் எக்சேன்ஜ் சலுகையும், 12 ஆயிரம் வரை கார்ப்பரேட் பலன்கள் வழங்கப்படுகின்றன.

ரெனால்ட் கைகர் வாகன குறியீட்டு எண் 2022 மற்றும் 2023 வாங்குவோருக்கு ரூ. 25 ஆயிரம் தள்ளுபடி (தேர்வு செய்யப்பட்ட வேரியண்ட்களுக்கு மட்டும்), ரூ. 25 ஆயிரம் எக்சேன்ஜ் சலுகை, ரூ. 12 ஆயிரம் கார்ப்பரேட் பலன்கள் வழங்கப்படுகின்றன. இதே சீரிசில் பிஎஸ்6 ஃபேஸ் 2 வாங்கும் போது ரூ. 10 ஆயிரம் எக்சேன்ஜ் பலன்கள், ரூ. 12 ஆயிரம் கார்ப்பரேட் பலன்கள் வழங்கப்படுகிறது.

ரெனால்ட் குவிட் வாகன குறியீட்டு எண் 2022 மாடலை வாங்கும் போது ரூ. 20 ஆயிரம் தள்ளுபடி, ரூ. 20 ஆயிரம் எக்சேன்ஜ் சலுகை ரூ. 12 ஆயிரம் கார்ப்பரேட் பலன்கள் வழங்கப்படுகின்றன. இதே காரின் பிஎஸ்6 ஃபேஸ் 2 வாங்கும் போது ரூ. 10 ஆயிரம் எக்சேன்ஜ் சலுகை ரூ. 12 ஆயிரம் கார்ப்பரேட்பலன்களாக வழங்கப்படுகின்றன.

டொயோட்டா நிறுவனம் இந்திய சந்தையில் தனது அர்பன் குரூயிசர் ஹைரைடர் ஹைப்ரிட் மாடல் விலையை ரூ. 50 ஆயிரம் வரை அதிகரித்து இருக்கிறது. இந்த விலை உயர்வு காரின் மூன்று வேரியண்ட்களுக்கும் பொருந்தும். கடந்த ஆண்டு செப்டம்பர் மாத வாக்கில் அர்பன் குரூயிசர் ஹைரைடர் மாடலின் விலை அறிவிக்கப்பட்டது. அந்த வகையில், இந்த காரின் முதல் விலை உயர்வு இது ஆகும்.

மாருதி சுசுகி நிறுவனத்தின் கிராண்ட் விட்டாரா மாடலின் ரிபிராண்டு செய்யப்பட்ட வெர்ஷனாக அர்பன் குரூயிசர் ஹைரைடர் மாடல் அறிமுகம் செய்யப்பட்டு இருக்கிறது. இந்த கார் பெட்ரோல் மற்றும் ஹைப்ரிட் என இருவித பவர்டிரெயின் ஆப்ஷ்களில் கிடைக்கிறது. இதுதவிர இந்த காரின் CNG வேரியண்ட் விலைகளும் இந்த ஆண்டு அறிவிக்கப்பட்டு இருந்தது. அர்பன் குரூயிசர் ஹைரைடர் மாடல்- E, S, G மற்றும் V என நான்கு வேரியண்ட்களில் கிடைக்கிறது.

இந்திய சந்தையில் அர்பன் குரூயிசர் ஹைரைடர் மாடலின் விலை ரூ. 15 லட்சத்து 11 ஆயிரம் என துவங்கி டாப் எண்ட் மாடல் விலை ரூ. 18 லட்சத்து 99 ஆயிரம் என நிர்ணயம் செய்யப்பட்டு இருந்தது. தற்போது இந்த விலை ரூ. 15 லட்சத்து 61 ஆயிரம் என துவங்குகிறது. இதன் டாப் எண்ட் மாடல் விலை ரூ. 19 லட்சத்து 49 ஆயிரம் ஆகும். அனைத்து விலைகளும் எக்ஸ்-ஷோரூம் அடிப்படையில் குறிப்பிடப்பட்டு இருக்கிறது.

ஹைரைடர் ஸ்டிராங் ஹைப்ரிட் மாடலில் 1.5 லிட்டர் பெட்ரோல் என்ஜின் மற்றும் எலெக்ட்ரிக் மோட்டார் உள்ளது. இதன் பெட்ரோல் என்ஜின் 91 ஹெச்பி பவர், 122 நியூட்டன் மீட்டர் டார்க் இழுவிசையையும், எலெக்ட்ரிக் மோட்டார் 79 ஹெச்பி பவர், 141 நியூட்டன் மீட்டர் டார்க் இழுவிசையை வெளிப்படுத்துகிறது. இத்துடன் இ-டிரைவ் ஆட்டோமேடிக் கியர்பாக்ஸ் வழங்கப்படுகிறது. இந்த ஸ்டிராங் ஹைப்ரிட் எஸ்யுவி லிட்டருக்கு 27.97 கிலோமீட்டர் மைலேஜ் வழங்கும் என டொயோட்டொ தெரிவித்துள்ளது.

மஹிந்திரா நிறுவனத்தின் XUV400 எலெக்ட்ரிக் எஸ்யுவி மாடலுக்கான முன்பதிவு ஜனவரி 26 ஆம் தேதி துவங்கியது. இந்த நிலையில், புது XUV400 மாடல் முன்பதிவில் 10 ஆயிரம் யூனிட்களை கடந்துள்ளதாக மஹிந்திரா நிறுவனம் அறிவித்து இருக்கிறது. அறிமுகம் செய்யப்பட்ட முதல் 12 மாதங்களில் மஹிந்திரா நிறுவனம் 20 ஆயிரம் XUV400 யூனிட்களை வினியோகம் செய்ய திட்டமிட்டுள்ளது.

தற்போது இந்த காருக்கான காத்திருப்பு காலம் ஏழு மாதங்களாக இருக்கிறது. மேலும் வினியோகத்தை பொருத்தவரை XUV400 டாப் எண்ட் மாடல் EL வேரியண்டிற்கு முன்னுரிமை வழங்கப்படும் என மஹிந்திரா நிறுவனம் அறிவித்து இருக்கிறது. முதற்கட்டமாக இந்த எலெக்ட்ரிக் எஸ்யுவி-இன் வினியோகம் மார்ச் மாத வாக்கில் துவங்க இருக்கிறது.

இந்திய சந்தையில் மஹிந்திரா XUV400 மாடல் டாடா நெக்சான் EV, எம்ஜி ZS EV மற்றும் பிஒய்டி அட்டோ 3 போன்ற மாடல்களுக்கு போட்டியாக அமைகிறது. புதிய மஹிந்திரா XUV400 EC வேரியண்ட் 3.3 கிலோவாட் அல்லது 7.2 கிலோவாட் AC சார்ஜர் வங்கப்படுகிறது. இதன் EL வேரியண்ட் உடன் 7.2 கிலோவாட் AC சார்ஜர் மட்டுமே வழங்கப்படுகிறது.

பேட்டரியை பொருத்தவரை மஹிந்திரா XUV400 மாடலில் 39.5 கிலோவாட் ஹவர் பேட்டரி பேக் வழங்கப்பட்டு இருக்கிறது. இந்த கார் முழு சார்ஜ் செய்தால் அதிகபட்சம் 456 கிலோமீட்டர் வரை செல்லும் என சான்று பெற்றுள்ளது. இந்திய சந்தையில் மஹிந்திரா XUV400 மாடலின் விலை ரூ. 15 லட்சத்து 99 ஆயிரம் என துவங்கி அதிகபட்சம் ரூ. 18. லட்சத்து 99 ஆயிரம் என நிர்ணயம் செய்யப்பட்டு உள்ளது.

டாடா நெக்சான் EV மாடலுக்கு போட்டியாக மஹிந்திரா XUV400 மாடல் சமீபத்தில் அறிமுகம் செய்யப்பட்ட நிலையில், தற்போது மாருதி சுசுகி நிறுவனம் தன் பங்கிற்கு புது எலெக்ட்ரிக் கார் மாடலை அறிமுகம் செய்யும் பணிகளில் ஈடுபட்டு வருகிறது. மாருதி சுசுகி நிறுவனத்தின் புதிய Fronx எலெக்ட்ரிக் கார் மாடல் விரைவில் இந்தியாவில் அறிமுகமாகிறது.

2030 வாக்கில் இந்திய சந்தையில் ஆறு முற்றிலும் புது எலெக்ட்ரிக் வாகனங்களை அறிமுகம் செய்ய மாருதி சுசுகி திட்டமிட்டுள்ளது. இவற்றில் முதல் மாடலாக Fronx காம்பேக்ட் கிராஸ்ஒவர் எஸ்யுவி சமீபத்திய ஆட்டோ எக்ஸ்போ 2023 நிகழ்வில் காட்சிப்படுத்தப்பட்டது. அடுத்த சில ஆண்டுகளில் Fronx மாடலின் ஆல்-எலெக்ட்ரிக் வெர்ஷன் இந்திய சந்தையில் அறிமுகம் செய்யப்படுகிறது.

தற்போது புதிய மாருதி சுசுகி Fronx EV மாடலின் விவரங்கள் மர்மமாகவே உள்ளது. டிசைனை பொருத்தவரை புதிய Fronx EV மாடல் அதன் பெட்ரோல் வெர்ஷனை போன்றே காட்சியளிக்கும் என தெரிகிறது. எலெக்ட்ரிக் வெர்ஷனுக்கு முன் Fronx பெட்ரோல் மாடல் வரும் வாரங்களில் விற்பனையகம் வர இருக்கிறது.

ஆட்டோ எக்ஸ்போ 2023 நிகழ்வில் காட்சிப்படுத்தப்பட்ட Fronx EV மாடல் டூயல் டோன் பிளாக் மற்றும் பர்பில் நிற இருக்கை மேற்கவர்களை கொண்டுள்ளது. உபகரணங்களை பொருத்தவரை ஹெட்-அப் டிஸ்ப்ளே, வயர்லெஸ் சார்ஜர், 9 இன்ச் அளவில் டச் ஸ்கிரீன் இன்ஃபோடெயின்மெண்ட் சிஸ்டம், 360 டிகிரி பார்கிங் கேமரா வழங்கப்படுகிறது.

மாருதி சுசுகி Fronx EV மாடலில் வழங்கப்பட இருக்கும் பேட்டரி மற்றும் மோட்டார் பற்றிய விவரங்கள் ரகசியமாக வைக்கப்பட்டுள்ளன. எனினும், இதன் ஒட்டுமொத்த டிரைவிங் ரேஞ்ச் மற்றும் செயல்திறன் டாடா நெக்சான் EV மற்றும் மஹிந்திரா XUV400 மாடல்களுக்கு போட்டியளிக்கும் வகையில் இருக்கும் என எதிர்பார்க்கலாம்.

மஹிந்திரா நிறுவனம் இந்திய சந்தையில் புதிய தலைமுறை ஸ்கார்பியோ N மாடலை கடந்த ஆண்டு ஜூன் மாத வாக்கில் அறிமுகம் செய்யப்பட்டது. அறிமுகம் செய்யப்பட்டதில் இருந்து புது ஸ்கார்பியோ N வாங்க பலரும் விருப்பம் தெரிவித்தனர். முன்பதிவில் நல்ல வரவேற்பை பெற்று வந்த ஸ்கார்பியோ N வினியோகம் பல்வேறு காரணங்களால் தொடர்ந்து பாதிக்கப்பட்டு வருகிறது.

ஸ்கார்பியோ N மட்டுமின்றி இரண்டாம் தலைமுறை தார், முற்றிலும் புதிய XUV700 உள்ளிட்ட மாடல்களுக்கும் கடும் தட்டுப்பாடு சூழல் ஏற்பட்டு இருக்கிறது. இதன் காரணமாக இந்த கார்களின் காத்திருப்பு காலம் அதிகரித்து வருகிறது. இந்திய சந்தையில் மஹிந்திரா ஸ்கார்பியோ N மாடலின் விலை ரூ. 12 லட்சத்து 74 ஆயிரம் என துவங்கி அதிகபட்சம் ரூ. 24 லட்சத்து 05 ஆயிரம், எக்ஸ்-ஷோரூம் வரை நிர்ணயம் செய்யப்பட்டு உள்ளது.

இந்திய சந்தையில் மஹிந்திரா ஸ்கார்பியோ N மாடல் Z2, Z4, Z6, Z8 மற்றும் Z8L போன்ற வேரியண்ட்களில் கிடைக்கிறது. இந்த மாடல் ஆறு மற்றும் ஏழு பேர் அமரக்கூடிய இருக்கை அமைப்புகளில் கிடைக்கிறது. ஸ்கார்பியோ N எண்ட்ரி லெவல் மாடலின் பெட்ரோல் மற்றும் டீசல் வேரியண்ட்களுக்கான காத்திருப்பு காலம் 85 முதல் 90 வாரங்களாக இருக்கிறது. Z4 வேரியண்டிற்கான காத்திருப்பு காலம் 90 முதல் 95 வாரங்கள் ஆகும்.

ஸ்கார்பியோ N டீசல் Z6 மாடலுக்கான காத்திருப்பு காலம் 100 முதல் 105 வாரங்களாக உள்ளது. Z8 பெட்ரோல் மற்றும் டீசல் வேரியண்ட்களுக்கும் இதே போன்ற காத்திருப்பு காலம் உள்ளது. Z8 லக்சரி வேரியண்ட் ஆட்டோமேடிக் வெரிஷனுக்கான காத்திருப்பு காலம் 20 முதல் 25 வாரங்களாக உள்ளது. டாப் எண்ட் வேரியண்ட்-ஆன Z8 L மேனுவல் வாங்க 70 முதல் 75 வாரங்கள் வரை காத்திருக்க வேண்டும்.

மஹிந்திரா ஸ்கார்பியோ N மாடல் 2.0 லிட்டர் நான்கு சிலிண்டர்கள் கொண்ட எம்ஹாக் பெட்ரோல் மற்றும் 2.2 லிட்டர் நான்கு சிலிண்டர்கள் கொண்ட எம்ஹாக் டீசல் என்ஜின் ஆப்ஷன்களில் கிடைக்கிறது. இருவித என்ஜின்களுடன் 6 ஸ்பீடு மேனுவல் அல்லது 6 ஸ்பீடு டார்க் கன்வெர்ட்டர் ஆட்டோமேடிக் யூனிட் வழங்கப்பட்டு இருக்கிறது.

இதன் பெட்ரோல் என்ஜின் மேனுவல் டிரான்ஸ்மிஷன் மாடல் 203 ஹெச்பி பவர், 370 நியூட்டன் மீட்டர் டார்க் இழுவிசையை வெளிப்படுத்துகிறது. ஆட்டோமேடிக் மாடல் 203 ஹெச்பி பவர், 380 நியூட்டன் மீட்டர் டார்க் இழுவிசையை வெளிப்படுத்துகிறது. டீசல் என்ஜின் 175 ஹெச்பி பவர், 370 நியூட்டன் மீட்டர் டார்க் இழுவிசையை மேனுவல் டிரான்ஸ்மிஷனில் வழங்குகிறது. ஆட்டோமேடிக் வேரியண்ட் 175 ஹெச்பி பவர், 400 நியூட்டன் மீட்டர் டார்க் இழுவிசையை வெளிப்படுத்துகிறது. 

டாடா மோட்டார்ஸ் நிறுவனம் இந்திய சந்தையில் தனது IC என்ஜின் கொண்ட பயணிகள் வாகனங்கள் விலையை உயர்த்துவதாக அறிவித்து இருக்கிறது. இந்த விலை உயர்வு பிப்ரவரி 1 ஆம் தேதி அமலுக்கு வர இருக்கிறது. கார் மாடல் மற்றும் வேரியண்ட்களுக்கு ஏற்ப 1.25 சதவீதம் வரை விலை உயர்த்தப்பட இருக்கிறது.

"ஒழுங்குமுறை மாற்ங்கள் மற்றும் ஒட்டுமொத்த செலவீனங்கள் தொடர்ந்து அதிகரித்து வரும் பிரச்சினையில் எதிர்கொள்ளும் நோக்கில் விலை உயர்வை அறிவிக்கிறோம்," என டாடா மோட்டார்ஸ் வெளியிட்டு இருக்கும் அறிக்கையில் குறிப்பிடப்பட்டு உள்ளது.

தற்போது டாடா மோட்டார்ஸ் நிறுவனம்- டாடா நெக்சான், டாடா சஃபாரி, டாடா பன்ச், டாடா டியாகோ, டாடா டிகோர், டாடா அல்ட்ரோஸ் மற்றும் டாடா ஹேரியர் போன்ற மாடல்களை IC என்ஜின் பிரிவில் விற்பனை செய்து வருகிறது. சமீபத்தில் டாடா நெக்சான் EV சீரிஸ் விலையை டாடா மோட்டார்ஸ் மாற்றியமைத்தது.

அதின்படி டாடா நெக்சான் EV மாடலின் விலை ரூ. 31 ஆயிரமும், டாடா நெக்சான் மேக்ஸ் வேரியண்ட்களின் விலை ரூ. 85 ஆயிரம் வரை குறைக்கப்பட்டது. இதுதவிர டாடா மோட்டார்ஸ் நிறுவனம் சமீபத்தில் நடைபெற்று முடிந்த ஆட்டோ எக்ஸ்போ 2023 நிகழ்வில் பல்வேறு புது கார் மற்றும் கான்செப்ட் மாடல்களை காட்சிக்கு வைத்தது.

இதில் கர்வ் மற்றும் சியெரா EV மாடல்கள் ப்ரோடக்ஷன் நிலையை எட்டியுள்ளன. இத்துடன் டாடா அல்ட்ரோஸ் CNG மற்றும் டாடா பன்ச் CNG மாடல்கள் டுவின்-சிலிண்டர் தொழில்நுட்பத்துடன் காட்சிக்கு வைக்கப்பட்டு இருந்தன.

கேடிஎம் நிறுவனம் எலெக்ட்ரிக் ஸ்கூட்டர் மாடலை உருவாக்கி வருவதாக நீண்ட காலமாக தகவல்கள் வெளியாகி வருகின்றன. தற்போது கேடிஎம் எலெக்ட்ரிக் ஸ்கூட்டர் மாடல் தற்போதைக்கு அறிமுகம் செய்யப்படாது என கிஸ்கா டிசைனை சேர்ந்த ஜெரால்டு கிஸ்கா தெரிவித்து இருக்கிறார்.

பெர்ஃபார்மன்ஸ் ரக மோட்டார்சைக்கிள்களை அறிமுகம் செய்வதில் கேடிஎம் பிரபலமாக உள்ளது. இந்த நிலையில், ஸ்கூட்டரை மாடலை அறிமுகம் செய்யும் பட்சத்தில் இந்த அடையாளம் பாதிக்கப்படும் என கிஸ்கா டிசைன்ஸ் தெரிவித்து இருக்கிறது.

முன்னதாக 2013 டோக்கியோ ஆட்டோ விழாவில் கேடிஎம் நிறுவனம் இ-ஸ்பீடு எலெக்ட்ரிக் ஸ்கூட்டரை கேடிஎம் அறிமுகம் செய்தது. இந்த எலெக்ட்ரிக் ஸ்கூட்டர் டிரெலிஸ் ஃபிரேம், கச்சிதமான டிசைன் மற்றும் ஆரஞ்சு நிறம் கொண்டிருந்த ஸ்கூட்டர், தோற்றத்தில் கேடிஎம் ஸ்டைலிங் சார்ந்து இருந்தது.

எனினும், இது கான்செப்ட் வடிவிலேயே இருந்தது. எலெக்ட்ரிக் ஸ்கூட்டர் அறிமுகம் தற்போது நடைபெறாது என்ற பட்சத்தில் கேடிஎம் நிறுவனம் எலெக்ட்ரிக் மோட்டார்சைக்கிள் மாடல்களை உருவாக்கும் பணிகளில் ஈடுபட்டு வருகிறது.

இவை ஃபிரீரைடு E-XC மற்றும் SX E 5 மற்றும் SX-E 3 மாடல்கள் எலெக்ட்ரிக் வடிவில் அறிமுகமாகும் என கூறப்படுகிறது. எதிர்காலத்தில் கேடிஎம் நிறுவனம் E-டியூக் மாடலை அறிமுகம் செய்யும் திட்டத்தில் இருக்கிறது. எனினும், இதன் வெளியீடு பற்றி கேடிஎம் சார்பில் இதுவரை எந்த தகவலும் வழங்கப்படவில்லை.

இந்திய சந்தையில் முன்னணி ஆட்டோமொபைல் உற்பத்தியாளரான மஹிந்திரா தனது ஸ்கார்பியோ N காரின் விலையை அதிரடியாக உயர்த்தி இருக்கிறது. கடந்த ஆண்டு ஜூன் மாத வாக்கில் அறிமுகம் செய்யப்பட்ட ஸ்கார்பியோ N மாடலின் விலை அறிமுக சலுகையாக ரூ. 11 லட்சத்து 99 ஆயிரம், எக்ஸ்-ஷோரூம் என நிர்ணயம் செய்யப்பட்டு இருந்தது.

இந்த நிலையில், அறிமுக சலுகை நிறைவு பெற்றதை அடுத்து ஸ்கார்பியோ N விலை ரூ. 1 லட்சம் வரை உயர்த்தப்பட்டு இருக்கிறது. தற்போதைய விலை உயர்வு காரின் அனைத்து வேரியண்ட்களுக்கும் பொருந்தும். விலை உயர்வின் படி மஹிந்திரா ஸ்கார்பியோ N பேஸ் பெட்ரோல் மாடல் விலை ரூ. 12 லட்சத்து 74 ஆயிரம் என மாறி இருக்கிறது.

மஹிந்திரா ஸ்கார்பியோ N டீசல் வேரியண்ட்களின் விலை ரூ. 13 லட்சத்து 24 ஆயிரம் என துவங்குகிறது. அறிமுக விலைகளுடன் ஒப்பிடும் போது Z2 மற்றும் Z4 வேரியண்ட்களின் விலை ரூ. 75 ஆயிரம் அதிகரிக்கப்பட்டு இருக்கிறது. இதோடு ஐந்து கூடுதல் வேரியண்ட்களின் விலையும் அதிகரிக்கப்பட்டு இருக்கிறது.

இதுதவிர Z6 டீசல் வேரியண்ட்களின் விலை ரூ. 65 ஆயிரமும், Z8 மற்றும் Z8L பெட்ரோல் வேரியண்ட்களின் விலை ரூ. 65 ஆயிரம் உயர்த்தப்பட்டு இருக்கிறது. ஸ்கார்பியோ N Z8L மேனுவல் மற்றும் 4WD பெட்ரோல் வேரியண்ட் விலை ரூ. 65 ஆயிரம் அதிகரித்துள்ளது. Z8L மேனுவல் மற்றும் 4WD மாடலின் விலை ரூ. 1 லட்சத்து 01 ஆயிரம் உயர்த்தப்பட்டு இருக்கிறது. Z8L ஆட்டோமேடிக் வேரியண்ட்களின் விலை ரூ. 15 ஆயிரம் உயர்ந்துள்ளது.

இந்திய சந்தையில் மஹிந்திரா ஸ்கார்பியோ N 2.0 லிட்டர் டர்போ பெட்ரோல் மற்றும் 2.2 லிட்டர் டீசல் என இருவித என்ஜின் ஆப்ஷன்களில் கிடைக்கிறது. இவை முறையே 198 ஹெச்பி பவர், 380 நியூட்டன் மீட்டர் டார்க் மற்றும் 173 ஹெச்பி பவர், 400 நியூட்டன் மீட்டர் டார்க் இழுவிசையை வெளிப்படுத்துகின்றன. இத்துடன் 6 ஸ்பீடு மேனுவல் அல்லது ஆட்டோமேடிக் டிரான்ஸ்மிஷன் மற்றும் 4WD ஆப்ஷனாக வழங்கப்படுகிறது.

அறிமுகம் செய்யப்பட்டதில் இருந்தே மஹிந்திரா நிறுவனம் ஸ்கார்பியோ N வினியோகத்தில் டாப் எண்ட் மாடல்களுக்கு அதிக முக்கியத்துவம் கொடுத்து வருகிறது. இதன் மிட் ரேன்ஜ் மாடல்களின் வினியோகம் சமீபத்தில் துவங்கியது. டாப் எண்ட் Z8L வேரியண்ட் தவிர மற்ற வேரியண்ட்களின் காத்திருப்பு காலம் தற்போது 25 மாதங்கள் வரை உள்ளது. இது ஒவ்வொரு பகுதிக்கும் ஏற்ப வேறுபடும்.

யமஹா இந்தியா நிறுவனம் நாடு முழுக்க மைலேஜ் சேலஞ்ச் பெயரில் தனது வாடிக்கையாளர்களுக்கு அவ்வபோது போட்டிகளை நடத்துவதை வாடிக்கையாக கொண்டிருக்கிறது. அந்த வகையில், சமீபத்தில் யமஹா சேலஞ்ச் போட்டி சென்னையில் நடைபெற்றது. இதில் ஏராளமான யமஹா வாடிக்கையாளர்கள் கலந்து கொண்டனர்.

125சிசி ஹைப்ரிட் ஸ்கூட்டர் மாடல்கள் வழங்கும் சிறந்த மைலேஜ் குறித்து வாடிக்கையாளர்கள் இடையே விழிப்புணர்வை ஏற்படுத்த, இந்தியா யமஹா மோட்டார் (IYM) நிறுவனம் தனது அங்கீகரிக்கப்பட்ட டீலர் மூலம் 'மைலேஜ் சேலஞ்ச் ஆக்டிவிட்டி'யை நடத்தியது. யமஹாவின் 125cc ஹைப்ரிட் ஸ்கூட்டர் சீரிசில் ஃபசினோ 125 Fi ஹைப்ரிட், ரே ZR 125 Fi ஹைப்ரிட் மற்றும் ஸ்ட்ரீட் ரேலி 125 Fi ஹைப்ரிட் போன்ற மாடல்கள் உள்ளன.

இந்த முறை நடைபெற்ற போட்டியில் மொத்தம் 24 யமஹா வாடிக்கையாளர்கள் பங்கேற்றனர். முதற்கட்டமாக மைலேஜ் சவால் செயல்பாடுகள் குறித்து பங்கேற்பாளர்களுக்கு சுருக்கமான அமர்வுடன் தொடங்கியது. அமர்வின் போது, போட்டியாளர்களுக்கு திறமையான சவாரி நடத்தை மற்றும் சவாரிக்கு திட்டமிடப்பட்ட பாதை பற்றிய வழிகாட்டுதல்கள் வழங்கப்பட்டன.

இதைத் தொடர்ந்து அவர்கள் 30-கிலோமீட்டர் பயணத்தைத் தொடங்குவதற்கு முன் அவர்களின் ஸ்கூட்டர்களுக்கு எரிபொருள் நிரப்பப்பட்டது. பின் நகர போக்குவரத்து மற்றும் திறந்த சாலைகள் ஆகியவற்றின் கலவையை உள்ளடக்கிய பாதையில் போட்டியாளர்கள் ஸ்கூட்டரை இயக்கினர். இதில் ஸ்கூட்டரின் சஸ்பென்ஷன், சூழ்ச்சி, பிரேக்கிங், மற்றும் ஆரம்ப பிக்-அப் உள்ளிட்டவைகளை அனுபவிக்க முடியும்.

வெற்றிகரமாக திரும்பிய பின், ஸ்கூட்டர்களின் முந்தைய எரிபொருள் அளவுக்கு ஏற்ப எரிபொருள் மீண்டும் நிரப்பப்பட்டன. மேலும் மைலேஜ் கணக்கீட்டிற்காக பயன்படுத்தப்பட்ட எரிபொருளின் அளவு பதிவு செய்யப்பட்டது. கலந்து கொண்ட அனைத்து வாடிக்கையாளர்களுக்கும் நினைவுப் பரிசுகள் வழங்கப்பட்டன.

யமஹா மைலேஜ் சேலஞ்ச் போட்டியில் இந்த முறை முதலிடம் பிடித்த சுரேந்தர் தனது ஸ்கூட்டரில் லிட்டருக்கு 135.5 கிமீ மைலேஜ் பெற்றார். இரண்டு மற்றும் மூன்றாவது இடத்தை பிடித்தவர்கள் முறையே லிட்டருக்கு 124.18 மற்றும் 121.6 கிமீ மைலேஜ் பெற்றுள்ளனர்.

இத்துடன் இலவச வாட்டர் வாஷ் மற்றும் அவர்களின் வாகனங்களை 10 பாயிண்ட் இன்ஸ்பெக்ஷன் செய்வதற்கான ஏற்பாடு செய்யப்பட்டு இருந்தது. மைலேஜ் சவால் செயல்பாட்டில் பங்கேற்ற வாடிக்கையாளர்களிடம் இருந்து, இரண்டு செயல்பாடுகளிலும் அதிக மைலேஜைப் பெற்ற முதல் 5 வெற்றியாளர்களுக்கு கோப்பைகள், சான்றிதழ்கள் மற்றும் பரிசு அட்டைகள் வழங்கப்பட்டன.