ஆன்மிகம்

சென்னை:

மகத்துவம் வாய்ந்த மார்கழியில் முக்கிய நிகழ்வான வைகுண்ட ஏதாதசியையொட்டி பெருமாள் கோவில்களில் சொர்க்கவாசல் திறப்பு வரும் 10-ந்தேதி நடக்கிறது. இதையொட்டி 108 திவ்ய தேசங்களில் ஒன்றான சென்னை திருவல்லிக்கேணி பார்த்தசாரதி கோவிலில் சிறப்பு ஏற்பாடுகள் செய்யப்பட்டு வருகிறது.

இதற்கான முன்னேற்பாடு பணிகளை இந்து சமய அறநிலையத்துறை அமைச்சர் சேகர்பாபு ஆய்வு செய்தார். அதனை தொடர்ந்து நிருபர்களுக்கு அவர் பேட்டி அளித்தார். அப்போது அவர் கூறியதாவது:-

பார்த்தசாரதி கோவிலில் இந்த ஆண்டு வைகுண்ட ஏகாதசியை முன்னிட்டு 10 மற்றும் 11 ஆகிய இரண்டு நாட்களில் 2 லட்சத்திற்கும் மேற்பட்ட பக்தர்கள் வருவார்கள் என எதிர்பார்க்கப்படுகின்றது. வைகுண்ட ஏகாதசி அன்று சொர்க்கவாசல் காலை 4.30 மணிக்கு திறக்கப்படும். அதற்கான தரிசனக் கட்டண சீட்டு ரூ.500-க்கு ஆன்லைன் மூலம் வருகின்ற 6-ந் தேதி பெற்று கொள்ளலாம்.

1,500 கட்டணச் சீட்டுகள் ஆன்லைன் மூலம் வழங்கப்படும். மேலும், 500 நபர்கள் முதலில் வருவோருக்கு முன்னுரிமை அடிப்படையில் சொர்க்கவாசல் தரிசனம் செய்ய கட்டணமின்றி அனுமதிக்கப்படுவார்கள். சொர்க்கவாசல் நிகழ்வுக்கு பிறகு நடக்கும் தரிசன நிகழ்வுக்கு சிறப்பு தரிசன கட்டணம் ரத்து செய்யப்படுகிறது.

முதியோர்கள், மாற்றுத் திறனாளிகள் மற்றும் கர்ப்பிணிகள் வைகுண்ட ஏகாதசி அன்று காலை 8 மணி முதல் 10 மணி வரையிலும், மதியம் 2 மணி முதல் 4 மணி வரையிலும் கோவிலின் பின்கோபுர வாசல் வழியாக சாமி தரிசனம் செய்வதற்கு ஏற்பாடு செய்யப்பட்டுள்ளது.

காவல்துறை சார்பில் 3 துணை கமிஷனர்கள் தலைமையில் உதவி கமிஷனர்கள், இன்ஸ்பெக்டர்கள் என ஒரு முறைக்கு 600 போலீசார் வீதம் 3 முறைகளில் பாதுகாப்பு பணிகளை மேற்கொள்ள உள்ளனர். கோவிலின் சுற்றுப்புறங்களில் 32 கண்காணிப்பு கேமராக்கள் கூடுதலாக பொருத்தப்பட உள்ளன.

கோவிலில் 5 இடங்களில் மருத்துவ முகாம்கள் நடத்தப்படும். 2 ஆம்புலன்ஸ் வாகனங்கள் தயார் நிலையில் வைக்கப்படும். அனைத்து பக்தர்களுக்கும் பாதுகாக்கப்பட்ட குடிநீர் பாட்டில்கள் வழங்கப்படும். கோவில் தெப்பக்குளம் அருகிலும் மற்றும் நரசிம்மர் சன்னதி பின்புறமும் 20 தற்காலிக கழிப்பிடங்கள் அமைக்கப்படுகிறது.

இவ்வாறு அவர் தெரிவித்தார்.

இன்றைய பஞ்சாங்கம்

குரோதி ஆண்டு மார்கழி-20 (சனிக்கிழமை)

பிறை: வளர்பிறை

திதி: பஞ்சமி இரவு 11.16 மணி வரை பிறகு சஷ்டி

நட்சத்திரம்: சதயம் இரவு 10.51 மணி வரை பிறகு பூரட்டாதி

யோகம்: அமிர்த, மரணயோகம்

ராகுகாலம்: காலை 9 மணி முதல் 10.30 மணி வரை

எமகண்டம்: நண்பகல் 1.30 மணி முதல் 3 மணி வரை

சூலம்: கிழக்கு

நல்ல நேரம்: காலை 7 மணி முதல் 8 மணி வரை மாலை 5 மணி முதல் 6 மணி வரை

திருநள்ளாறு ஸ்ரீ சனிபகவான் சிறப்பு அபிஷேகம், அலங்காரம். சிதம்பரம், திருநெல்வேலி, குற்றாலம் கோவில்களில் ஸ்ரீ சிவபெருமான் உற்சவம் ஆரம்பம். திருவள்ளூர் ஸ்ரீ வீரராகவப் பெருமாள், மதுரை ஸ்ரீ கூடலழகர், ஸ்ரீ ரங்கம் ஸ்ரீ நம்பெருமாள் கோவில்களில் அலங்கார திருமஞ்சன சேவை. மன்னார்குடி ஸ்ரீ ராஜகோபால சுவாமி, திருவல்லிக்கேணி ஸ்ரீ பார்த்தசாரதிப் பெருமாள் கோவிலில் ஸ்ரீ வரதராஜ மூலவருக்கு திருமஞ்சன சேவை. உப்பிலியப்பன் கோவில் ஸ்ரீ சீனிவாசப் பெருமாள் ஸ்திர வார திருமஞ்சன அலங்கார சேவை. திருமோகூர் ஸ்ரீ காளமேகப் பெருமாள், ஸ்ரீ வைகுண்டம் ஸ்ரீ வைகுண்டபதி, திருவட்டாறு ஸ்ரீ ஆதிகேசவப் பெருமாள் கோவில்களில் காலை சிறப்பு திருமஞ்சன சேவை. திருஇந்தளூர் ஸ்ரீ பரிமள ரெங்கராஜர் புறப்பாடு. ஸ்ரீ வாஞ்சியம் திருமுருகப் பெருமான் அபிஷேகம், அலங்காரம். ஆழ்வார் திருநகரி ஸ்ரீ நம்மாழ்வார் புறப்பாடு.

இன்றைய ராசிபலன்

மேஷம்-ஆதரவு

ரிஷபம்-ஜெயம்

மிதுனம்-ஒற்றுமை

கடகம்-கட்டுப்பாடு

சிம்மம்-கடமை

கன்னி-கண்ணியம்

துலாம்- உழைப்பு

விருச்சிகம்-ஏற்றம்

தனுசு- வரவு

மகரம்-தாமதம்

கும்பம்-பயணம்

மீனம்-இனிமை

ஆலய முகப்புத் தோற்றம்

அனந்தன் என்னும் பெருமாளுக்கு இந்தப் பூவுலகம் முழு வதும் சிறப்பு வாய்ந்த பல ஆலயங்கள் உள்ளன. கிராமப்புறங்களில் மிகப் பழமை வாய்ந்த வைணவக் கோவில்கள் இருப்பது மிக மிக அரிது.

ஆனால் கடலூர் மாவட்டம் புவனகிரி வட்டத்திலுள்ள பு.உடையூர் கிராமத்தில் அப்படி ஒரு பெருமைமிகு பெருமாள் ஆலயம் அமைந்திருக்கிறது. இந்த ஆலயம் கல்யாண வெங்கடேசப் பெருமாள் கோவில் ஆகும்.

இவ்வாலயம் மன்னர் காலத்தில் கட்டப்பட்ட ஆலயம் என்பதை மட்டும், அதன் கட்டிடக்கலையை வைத்து கணிக்க முடிகிறது. ஆனால் யாரால் கட்டப்பட்டது என்பதற்கான சான்று எதுவும் இல்லை.

பல நூறு வருடங்களாக சிதிலமடைந்து கிடந்த இந்த ஆலயத்தில், ராமானுஜர் சில காலம் தங்கியிருந்ததாகவும், அவர் சிதிலமடைந்த ஆலயத்தை புதுப்பித்ததாகவும் தற்போதைய தல வரலாறு தெரிவிக்கிறது.

தில்லையை தரிசிக்க வந்த ராமானுஜர், இந்த வழியாகத்தான் தில்லைக்குச் சென்றிருக்கிறார். அப்போது இந்த கிராமத்தில் சிதிலமடைந்து கிடந்த கல்யாண வெங்கடேசப் பெருமாள் ஆலயத்தைப் பார்த்துள்ளார்.

அப்பகுதி மக்களிடம், "ஏன் இப்படி இந்த ஆலயத்தை கண்டுகொள்ளாமல் விட்டு விட்டீர்கள்? பரந்தாமன் ஆலயத்தை பார்ப்பதற்கே, மனது பாரமாக இருக்கிறதே!" என்று வருத்தப்பட்டாராம்.

ஊர் மக்களோ, "பல நூற்றாண்டு காலமாகவே இந்த ஆலயம் சிதிலமடைந்துதான் இருக்கிறது. இந்த ஆலயத்தை கட்டும் அளவுக்கு, எங்களிடம் போதிய பொருளாதாரம் இல்லை" என்று கூறினராம்.

உடனே ராமானுஜர் தன் பயணத்தை பாதியில் நிறுத்திவிட்டு, இவ்வூரில் சில காலம் தங்கி ஊர் மக்களின் உடல் உழைப்போடு சிதைந்து கிடந்த கல்யாண வெங்கடேசப் பெருமாள் ஆலயத்தை பழமை மாறாமல் அப்படியே கட்டி முடித்திருக்கிறார் என்ற செவி வழிச் செய்தி நமக்குக் கிடைக்கிறது. அதன்பிறகு அவ்வூர் மக்கள், இந்த பெருமாளைக் கொண்டாடத் தொடங்கினர்.

கோவில் அமைப்பு

முன்மண்டபம் அதில் திருநாமம், அனுமன், கருடாழ்வார் ஆகியோரின் சுதை சிற்பங்கள் அழகுற காட்சி தருகின்றன. அவைகளை வணங்கிவிட்டு உள்ளே சென்றால், பலிபீடம், கருடாழ்வார் ஆகியோரை தரிசிக்கலாம்.

ஆலயத்தில் நுழைந்ததும் முதலில் இருப்பது மணி மண்டபம். அடுத்தது மகா மண்டபம். அர்த்த மண்டபத்தின் வாசலில் ஜெயன், விஜயன் ஆகிய இரண்டு துவார பாலகர்கள் கம்பீரமாக காட்சி தருகிறார்கள். அந்த மண்டபத்தில் சன்னிதிகள் எதுவும் கிடையாது.

கிழக்கு நோக்கிய கருவறையில் கல்யாண வெங்கடேசப் பெருமாள், ஸ்ரீதேவி - பூதேவியுடன் நின்ற கோலத்தில் காட்சி தருகிறார். இவர்களுக்கு முன்பாக ஸ்ரீதேவி-பூதேவியுடன் கூடிய வரதராஜப் பெருமாள், இடது பக்கம் சக்கரத்தாழ்வார், வலது பக்கம் பெருந்தேவி தாயார் ஆகியோர் அருள் பாலிக்கின்றனர்.

தன் திருநாமத்திலேயே கல்யாண வெங்கடேசப் பெருமாள் என்று இருப்பதால், இவ்வாலயம் திருமணத் தடையை போக்கும் சிறப்பு மிக்க ஆலயமாகத் திகழ்கிறது.

பல்வேறு காரணங்களால் தடைப்பட்டு வந்த திரு மணங்கள் கைகூட, இவ்வாலய பெருமாள் மீது நம்பிக்கை வைத்து, அவரது சன்னிதி முன்பாக நின்று 'கோவிந்தா..' என்று கோஷம் எழுப்பி பிரார்த்தனை செய்தாலே போது மானது.

தடைகளை அகற்றி விரைவில் திருமணம் நடைபெற வைகுண்டவாசன் அருள்பாலிப்பார் என்பது பக்தர்களின் அசைக்க முடியாத நம்பிக்கை ஆகும்.

திருமணத்திற்குப் பிறகு இல்லற வாழ்க்கையில் சின்னச் சின்ன சலசலப்புகள் வருவது சகஜம்தான். ஆனால் அதுவே கோபமாக மாறி கணவன் - மனைவியை பல நேரங்களில் பிரிப்பதுண்டு.

மனம் வருத்தத்தால் மண வாழ்க்கையில் பிரிந்து வாழும் தம்பதிகள் மீண்டும் இணைந்து வாழவும் இவ்வாலய கல்யாண வெங்கடேசப் பெருமாளை துளசி மாலை சூட்டி வணங்குகிறார்கள்.

அப்படி ஒன்றுசேரும் தம்பதியர் இருவரும் இங்கு வந்து, துளசியால் இறைவனை அர்ச்சித்து, தங்களின் நன்றிக் கடனை செலுத்துகிறார்கள்.

இவ்வாலயம் அமைந்த பு.உடையூர் கிராமத்தின் முக்கியமான தொழிலாக கருதப்படுவது விவசாயம் தான்.

இங்குள்ள விவசாயிகள், தங்கள் விவசாயப் பணியை தொடங்கும் முன்பு, நாராயணனின் நாமத்தை கூறி பிரார்த்தனை செய்துவிட்டுதான், விவசாயப் பணிகளைத் தொடங்குகிறார்கள். அப்படி செய்யப்படும் விவசாயம், அமோக விளைச்சலை அள்ளித் தருவதாக சொல்கிறார்கள்.

கல்வியில் சிறந்து விளங்க இங்கிருக்கும் அனுமனுக்கு கல்வி பயிலும் மாணவ - மாணவிகள், 'ஸ்ரீராமஜெயம்' எழுதி மாலையாக தொடுத்து அணிவித்து பிரார்த்தனை செய்கின்றனர். அப்படி செய்பவர்களுக்கு மன உறுதியும், தன்னம்பிக்கையும் பிறப்பதோடு, கல்வியிலும் சிறந்து விளங்குவதாக பக்தர்கள் கூறுகிறார்கள்.

இந்த ஆலயத்தில் ஆண்டு விழா மற்றும் வைகுண்ட ஏகாதசி ஆகிய விழாக்கள் மட்டுமே கொண்டாடப்படுகிறது. வைகுண்ட ஏகாதசி அன்று காலையும், மாலையும் சிறப்பு திருமஞ்சனம் செய்யப்படுகிறது. விசேஷ அலங்காரம் செய்யப்பட்டு அன்று ஒரு நாள் மட்டும் இரவு முழுவதும் ஆலயம் திறந்திருக்கும்.

அதோடு வாரம் தோறும் சனிக்கிழமைகள், மாதந்தோறும் ஏகாதசி ஆகிய நாட்களிலும், கல்யாண வெங்கடேசப் பெருமாளுக்கு சிறப்பு திருமஞ்சனம் நடை பெறும்.

இந்த ஆலயம் தினமும் காலை 9 மணி முதல் பகல் 12 மணி வரை மட்டுமே திறந்திருக்கும். சனிக்கிழமை மட்டும் மாலை வேளையிலும் திறக்கப்படும்.

அமைவிடம்

கடலூர் மாவட்டம் புவனகிரி மற்றும் சிதம்பரத்தில் இருந்து பு.உடையூர் கிராமத்திற்கு நகரப் பேருந்து வசதி உள்ளது.

* தண்டாயுதபாணி விக்ரகம் மிகுந்த சூடாக இருக்கும். ஆதலால் இரவு முழுவதும், அந்த விக்கிரகத்திலிருந்து நீர் வெளிப்படும். இந்த நீரை அபிஷேக தீர்த்ததுடன் கலந்து, காலை அபிஷேகம் நடக்கும் போது, அங்கு இருக்கும் பக்தர்களுக்கு பிரசாதமாக விநியோகம் செய்கிறார்கள்.

தண்டாயுதபாணி விக்ரகத்திற்கு நான்கு விதமான அபிஷேக பொருட்கள் மட்டும் தான் உபயோகிக்கப்படுகிறது. அவை, நல்லெண்ணெய், பஞ்சாமிர்தம், சந்தனம், விபூதி என்பவை. பன்னீர் மார்கழி மாதத்தில் மட்டும் உபயோகப்படுத்தப்படுகிறது. இவைகளில் சந்தனம், பன்னீர் தவிர மற்றவை எல்லாம் தண்டாயுதபாணியின் சிரசில் வைத்து, உடனே அகற்றப்படுகிறது.

* அதாவது முடி முதல், அடி வரை அபிஷேகம் என்கிற முழு அபிஷேகம் சந்தனத்துக்கும், பன்னீரும் மட்டும் தான். இதில் சிரசு விபூதி என்பது சித்தர் உத்தரவால் பக்தர்களுக்கு வழங்கபடுகிற ஒரு பிரசாதம் அது கிடைப்பது மிக புண்ணியம்.

* ஒரு நாளைக்கு ஆறு முறை தண்டாயுதபாணிக்கு அபிஷேகம் அலங்காரம் செய்யபடுகிறது. இது ஐந்து முதல் ஏழு நிமிடத்துக்குள் முடிந்துவிடும்.

* அபிஷேகம் முடிந்து அலங்காரம் செய்துவிட்டால், பின்னர் அடுத்த அபிஷேகம் வரை மாலை சாற்றுவதோ, பூக்களால் அர்ச்சனை செய்வதோ கிடையாது.

* அம்பாள், முருகர், அகத்தியர் இவர்களுடைய உத்தரவுக்கு பின் தான் போகர் இப்படி ஒரு சக்தி வாய்ந்த சிலையை செய்ய முயற்சியே எடுத்தார். இதற்காக 4000 மேற்பட்ட மூலிகைகளை பல இடங்களிலும் சென்று தெரிவு செய்து கொண்டு வந்தார்.

81 சித்தர்கள் இந்த நவபாஷாணத்தை போகர் சொற்படி தயார் பண்ணினர். இது பொது நல எண்ணத்துடன் செய்யப்பட்டதால் காலமும், இயற்கையும் தன் சீற்றத்தை குறைத்துக் கொண்டு சித்தர்களுக்கு உதவி செய்ததாக இன்னொரு தகவல் உண்டு.

* இரவில் முருகனின் மார்பில் மட்டும் வட்ட வடிவில் சந்தனக் காப்பு சார்த்தபடுகிறது.

* விக்ரகத்தின் புருவங்களுக்கிடையில் ஒரு பொட்டு அளவுக்கு சந்தனம் வைக்கப்படும். முன்னொரு காலத்தில் சந்தன காப்பை முகத்திலும் சார்த்திக் கொண்டிருந்தனர். பின்னாளில் இந்த முறை மாற்றப்பட்டது.

* தண்டாயுதபாணி சிலையில், நெற்றியில் ருத்ராட்சம், கண், மூக்கு, வாய், தோள்கள், கை, விரல்கள் போன்றவை மிக அற்புதமாக உளியால் செதுக்கபட்டது போல் தெளிவாக இருக்கும் இது போகரின் கை வண்ணம்.

* அந்த சிலையை சுற்றி எப்போதும் ஒரு வித சுகந்த மணம் (இதுவரை ஒரு போதும் வெளியே உணர்ந்திராத) பரவி நிற்கும்.

* இந்த சிலையை செய்ய போகர் எடுத்துக்கொண்ட நாட்கள் - ஒன்பது வருடம்.

பழனி பாலதண்டாயுதபாணி கோவில் சுமார் 500 அடி உயரத்தில் மலையின் மீது அமைந்துள்ளது. மலைக்கோவிலுக்கு செல்ல படிப்பாதை, யானைப்பாதை, மின் இழுவை ரெயில், ரோப்கார் மற்றும் திருமஞ்சன பாதை ஆகியவை உள்ளன.

* தொடக்க காலத்தில் மலையின் பாறைத்திட்டுகள் வழியாகவே மலைக்குச் சென்று வந்துள்ளனர். பின்னர் பக்தர்கள் நலனை கருத்தில் கொண்டு, 1927-ம் ஆண்டு அடிவாரத்தில் இருந்து மலைக் கோவிலுக்குச் செல்ல 690 படிகள் கொண்ட பாதை அமைக்கப்பட்டது. இதுவே தற்போதைய பிரதான பாதையாக இருந்து வருகிறது.

* பாதயாத்திரை பக்தர்கள், நேர்த்திக்கடன் செலுத்துவோர் இந்த வழியைத்தான் பயன்படுத்துகின்றனர். கந்தசஷ்டியின் போது கோவில் யானை, மலைக்கோவிலுக்கு சென்று வருவதற்காக யானைப் பாதை அமைக்கப்பட்டது.

* தற்போது யானைப் பாதையும் பக்தர்கள் பயன்பாட்டில் உள்ளது. இதில் சாய்வு தளமும் அதை இணைக்கும் படிகளும் உள்ளன.

* இது தவிர வயதானவர்கள், மாற்றுத்திறனாளிகள் சிரமமின்றி சென்று தரிசனம் செய்யும் வகையில், 1964-ம் ஆண்டு முதல் மின் இழுவை ரெயில் சேவை தொடங்கப்பட்டது. தற்போது திருப்புகழ், வெற்றிவேல், முருகா என 3 மின்இழுவை ரெயில்கள் இயக்கப்படுகிறது.

அதைத் தொடர்ந்து விரைவாக மலைக்கோவில் செல்வதற்கு 2004-ம் ஆண்டு நவம்பர் 3-ந் தேதி ரோப்கார் சேவை தொடங்கப்பட்டது. ரோப் கார் மூலம் 3 நிமிடத்தில் அடிவாரத்தில் இருந்து மலைக்கோவிலுக்கு செல்ல முடியும்.

திருமஞ்சன பாதை வழியே, குருக்கள் மற்றும் கோவில் பணியாளர்கள் ஆகியோர் தீர்த்தம் எடுத்து வர மட்டுமே கோவில் நிர்வாகம் அனுமதித்துள்ளது.

திருப்பாவை

பாடல்:

குத்து விளக்கெரியக் கோட்டுக்கால் கட்டில்மேல்

மெத்தென்ற பஞ்ச சயனத்தின் மேலேறிக்

கொத்தலர் பூங்குழல் நப்பின்னை கொங்கைமேல்

வைத்துக் கிடந்த மலர்மார்பா! வாய் திறவாய்;

மைத்தடங் கண்ணினாய்! நீ உன் மணவாளனை

எத்தனை போதும் துயிலெழ வொட்டாய்காண்;

எத்தனை யேலும் பிரிவாற்ற கில்லாயால்;

தத்துவம் அன்று தகவேலோ ரெம்பாவாய்.

விளக்கம்:

குத்து விளக்குகள் சுற்றிலும் எரிந்து கொண்டிருக்க, யானையின் தந்தத்தால் செய்த கட்டிலில், மென்மையான பஞ்சு மெத்தையில், பூச்சூடிய கூந்தலை உடைய நப்பின்னையின் மார்பகத்தின் மீது சாய்ந்து படுத்திருக்கும் கண்ணபிரானே! வாய் திறந்து பேசுவாய்! மையிட்டு விரிந்த கண்களை உடைய நப்பின்னையே! எத்தனை நேரமானாலும், நீ உன் கணவனை எழுப்ப மாட்டாய். சிறு பொழுதும் அவன் பிரிவை நீ பொறுக்க மாட்டாய்; இது உன் பெருமைக்குப் பொருந்தாது.

திருவெம்பாவை

பாடல்:

உங்கையிற் பிள்ளை உனக்கே அடைக்கலம்என்று

அங்கப் பழஞ்சொற் புதுக்கும்எம் அச்சத்தால்

எங்கள் பெருமான்! உனக்கொன் றுரைப்போம்கேள்!

எங்கொங்கை நின்னன்பர் அல்லார்தோள் சேரற்க

எங்கை உனக்கல்லா தெப்பணியுஞ் செய்யற்க;

கங்குல் பகல்எங்கண் மற்றொன்றுங் காணற்க

இங்கிப் பரிசே எமக்கெங்கோன் நல்குதியேல்

எங்கெழிலன் ஞாயிறு?எமக்கேலோர் எம்பாவாய்.

விளக்கம்:

எம் பெருமானே! 'உன் கைப்பிள்ளை உனக்கே அடைக்கலம்' என்ற பழமொழியை நாங்கள் புதுப்பிக்கின்றோம். இருப்பினும் அச்சமே ஏற்படுகின்றது. அதனால் நாங்கள் உன்னை வேண்டிக் கொள்கிறோம். எங்கள் மார்புகள் உன் அடியாரல்லாதவரைச் சேராதிருக்கட்டும். எங்கள் கைகள் உங்களைத் தவிர வேறு யாருக்கும் ஏவல் செய்யாது இருக்கட்டும். எங்கள் கண்கள் இரவும் பகலும் உன்னைத் தவிர வேறெதையும் காணாமல் இருக்கட்டும். இத்தகைய வரத்தை எங்களுக்கு நீ அருள் செய்தால், கதிரவன் எத்திசையில் உதித்தால் எமக்கு என்ன கவலை?

இன்றைய பஞ்சாங்கம்

குரோதி ஆண்டு மார்கழி-19 (வெள்ளிக்கிழமை)

பிறை: வளர்பிறை.

திதி: சதுர்த்தி நள்ளிரவு 1.09 மணி வரை. பிறகு பஞ்சமி.

நட்சத்திரம்: அவிட்டம் நள்ளிரவு 12.04 மணி வரை. பிறகு சதயம்.

யோகம்: சித்தயோகம்.

ராகுகாலம்: காலை 10.30 மணி முதல் 12 மணி வரை

எமகண்டம்: பிற்பகல் 3 மணி முதல் 4.30 மணி வரை

சூலம்: மேற்கு

நல்ல நேரம்: காலை 6 மணி முதல் 7 மணி வரை மாலை 5 மணி முதல் 6 மணி வரை

சங்கரன்கோவில் ஸ்ரீகோமதியம்மன் தங்கப்பாவாடை தரிசனம். ராமேஸ்வரம் ஸ்ரீபர்வதவர்த்தினியம்மன் நவசக்தி மண்டபம் எழுந்தருளி அம்பாள் தங்கப்பல்லக்கில் புறப்பாடு. திருமாலிருஞ்சோலை ஸ்ரீகள்ளழகர் கோவிலில் ஸ்ரீசுந்தரவல்லித்தாயார் புறப்பாடு. ஸ்ரீவில்லிபுத்தூர் ஸ்ரீஆண்டாள் புறப்பாடு. சமயபுரம் ஸ்ரீமாரியம்மன், இருக்கன்குடி ஸ்ரீமாரியம்மன் தலங்களில் அபிஷேகம். திருவிடைமருதூர் ஸ்ரீபிருகத் சுந்தரகுசாம்பிகை புறப்பாடு. கரூர் தான்தோன்றி மலை ஸ்ரீகல்யாண வெங்கட்ரமண சுவாமிக்கு திருமஞ்சனம். திருத்தணி ஸ்ரீமுருகப்பெருமானுக்கு கிளி வாகன சேவை. பெருஞ்சேரி படைவீடு ஸ்ரீரேணுகாம்பாள் புறப்பாடு. தூத்துக்குடி ஸ்ரீபாகம்பிரியாள், வீரவநல்லூர் ஸ்ரீமரகதாம்பிகை தலங்களில் அபிஷேகம். கீழ்த்திருப்பதி ஸ்ரீகோவிந்தராஜப் பெருமாளுக்கு காலை திருமஞ்சனம், மாலை ஊஞ்சல் சேவை. லால்குடி ஸ்ரீசப்த ரிஷீஸ்வரர் கோவிலில் அபிஷேகம்.

இன்றைய ராசிபலன்

மேஷம்-ஜெயம்

ரிஷபம்-கவனம்

மிதுனம்-அன்பு

கடகம்-கடமை

சிம்மம்-கண்ணியம்

கன்னி-மகிழ்ச்சி

துலாம்- உறுதி

விருச்சிகம்-தீரம்

தனுசு- உண்மை

மகரம்-வரவு

கும்பம்-செலவு

மீனம்- தெளிவு

கோவில் தோற்றம்

வகுளகிரி சேத்திரம் என அழைக்கப்படும் தாமிரபரணி கரையில் உள்ள கருங்குளம் திருத்தலத்தை 'தென்திருப்பதி' என்று அழைக்கிறார்கள். இந்த கோவிலில் உருவம் இல்லாத சந்தன கட்டையில் வெங்கடாசலபதி மூலவராக உள்ளார்.

அரியும் சிவனும் ஒன்று என்பதை விளக்கும் வண்ணமாக உருவமற்ற நிலையில் வெங்கடாசலபதி உள்ளார். பலநூறு வருடங்களாக நெய், சந்தனம், பால் போன்ற திரவத்தினால் அபிஷேகம் செய்தும், சந்தன கட்டையில் உள்ள இந்த மூலவருக்கு எந்தவித பாதிப்பும் இல்லை. இதுவே இறைவனின் அருள் கடாட்சமாகும்.

திருபாற்கடலில் விஷ்ணுவைக் காணச் சென்றார், நாரதர். அங்கு அவர் இல்லை. நாரதர் தனது மனக்கண்ணில் விஷ்ணு இருக்கும் இடத்தைப் பார்த்தார். விஷ்ணு கருட வாகனத்தில் லட்சுமியோடு தாமிரபரணிக் கரையில் வகுளகிரியில் இருந்தார்.

ஆதிசேஷன் வகுளகிரி உருவத்தில் இருக்க பகவானை சுற்றி மலை மீது தேவர்கள் வீற்றிருந்தனர். உடனே நாரதரும் இங்கே வந்து வணங்கி நின்றார். இங்கு ஒரு உறங்கா புளியமரம் உள்ளது. இந்த மரம் பூக்கும்; ஆனால் காய்க்காது.

வடநாட்டில் சுபகண்டன் என்ற அரசன், கண்டமாலை நோயால் பாதிக்கப்பட்டான். அவனுக்கு கழுத்தில் புழு வந்து நாற்றம் எடுத்தது. நோயைத் தீர்க்க பெரிய வைத்தியர்களாலும் முடியவில்லை. திருப்பதி சென்று வெங்கடாசலபதியை வணங்கினான். அவன் கனவில் வெங்கடாசலபதி தோன்றினார்.

"சந்தனக் கட்டையால் ஒரு தேர் செய். அதில் இருந்து உருவம் இல்லாமல் ஒரு கட்டை மிச்சமாகும். அதை தாமிரபரணிக் கரையில் உள்ள வகுளகிரி மலையில் வைத்து வழிபடு. உன் நோய் தீரும்" என்றார். அதுபோலவே செய்து, கருங்குளம் வகுளகிரி மலையில் உருவமற்ற சந்தன கட்டையை மூலவராக பிரதிஷ்டை செய்து வழிபட்டான்.

சிங்கநாதன் என்னும் அரசன் தனது 30-வது வயதில் வயிற்று வலியால் பாதிக்கப்பட்டான். பல இடங்களில் வைத்தியம் பார்த் ததும் எந்த பலனும் கிடைக்கவில்லை. முடிவில் மன வருத்தம் அடைந்து, நாரதரை சந்தித்து தனது நிலையை கூறி அழுதான்.

அப்போது நாரதர், "அரசே நீ சென்ற பிறவியில் கார்முகன் என்னும் வேடனாகப் பிறந்தாய். ஒரு முறை காட்டில் வேட்டையாடச் சென்றபோது, மான் வடிவில் தன் துணைவியோடு விளையாடிக் கொண்டிருந்த முனிவரை அம்பு கொண்டு தாக்கினாய்.

அந்த முனிவர் இறக்கும் தருவாயில், 'இதே போல் வலியால் நீ துடித்து ரணப்படுவாய்' என்று சாபமிட்டு விட்டு சொர்க்கம் அடைந்தார். அந்த முன் ஜென்ம சாபமே தற்சமயம் உன்னை பீடிக்கிறது.

இந்த சாபம் தீர வகுளகிரி மலைமேல் உள்ள வெங்கடாசலபதியை தரிசனம் செய்" என்றார். அரசனும் அவ்வாறே செய்து தனது சாபத்தை நீக்கிக் கொண்டான்.

வேதவிற்பன்னர் ஒருவர் தனது மனைவி குழந்தைகளோடு கங்கை சென்றார். முன்னதாக தனது உடமைகளை அவ்வூரில் இருந்த செல்வந்தனிடம் ஒப்படைத்து விட்டுச் சென்றார். திரும்பி வந்து கேட்ட போது, அந்தச் செல்வந்தன் "நீ என்னிடம் எதுவும் தரவில்லை" என கையை விரித்தான்.

அந்த வேதியர் கொடுத்த சாபத்தால் செல்வந்தனுக்கு, தீராத வயிற்று வலி உண்டானது. பாவம் செய்ததை அறிந்து அது நீங்க பகவானிடம் உருகி வேண்டி நின்றான், அந்த செல்வந்தன். பின்னர் இத்தலம் வந்து தன் நோய் நீங்கப் பெற்றான்.

திருமாலின் பக்தர்களான கோதரன்- மாலதி தம்பதிகளுக்கு நீண்ட காலமாக குழந்தைப்பேறு இல்லை. இதனால் அவர்கள் ஒவ்வொரு நாளும் வருத்தத்தில் வாழ்ந்தனர். ஒரு முறை வேதியர் வடிவில், திருமால் அவர்களின் இல்லம் சென்றார்.

வகுளகிரி மலை வந்து விஷ்ணுவை வணங்கி பணிவிடை செய்ய கூறினார். தம்பதியினர் அவ்வாறே வணங்கி பிள்ளை பேறு அடைந்தனர். இப்படி பல அற்புதங்கள் நிகழ்ந்த தலமாக, இந்த கருங்குளம் வெங்கடாசலபதி ஆலயம் திகழ்கிறது.

முன்காலத்தில் மலை மீது ஏறிச்செல்ல சாலை வசதி எதுவும் கிடையாது. ஒரு முறை கும்பாபிஷேகப் பணிக்காக வண்டியில் கல்லைக் கொண்டு செல்ல அதிகமான கூலி கேட்டார், வண்டிக்காரர். மலை மீது இருப்பதால் கோவில் நிர்வாகத்தினரும் 'சரி' என ஒப்புக்கொண்டனர்.

ஆனால் அந்த வண்டி, உறங்கா புளிய மரம் அருகே வந்தபோது அச்சு முறிந்தது. வண்டிக்காரரும், மாடும் அதிசயமாக உயிர் தப்பினர். சோதித்த போது வண்டியின் அச்சாணி மலையின் அடிவாரத்திலேயே விழுந்து கிடந்தது.

அச்சாணி இல்லாமல் மலை மீது வண்டி வந்ததை எண்ணி வண்டிக்காரர் அதிர்ந்து போய் விட்டார். பகவானின் சக்தியை எண்ணி 'எனக்கு கூலியே வேண்டாம்' என கூறிச் சென்று விட்டார்.

சைவம், வைணவம் ஒற்றுமைக்கு எடுத்துக்காட்டாக இந்த ஆலயம் திகழ்கிறது. இந்த பெருமாள் ஆலயத்திற்கு வரும் பக்தர்கள், முதலில் அடிவாரத்தில் உள்ள சிவபெருமானை வணங்கி விட்டுத்தான் மலை மீது ஏறுகிறார்கள்.

மார்த்தாண்டேஸ் வரர் என்ற அரசன், இந்த சிவன் கோவிலைக் கட்டினார். எனவே சிவனுக்கு 'மார்த்தாண்டேஸ்வரர்' என்றும், இவ்வூருக்கு 'மார்த்தாண்டேஸ்வரர் கருங்குளம்' என்றும் பெயர் இருந்தது.

தாமிரபரணி ஆற்றில் நீராடிவிட்டு, மலையடிவாரத்தில் உள்ள சிவன் கோவிலில் தாயாரையும், சிவனையும் வணங்கி விட்டு, தம்பதி சகிதம் இருக்கும் நவக்கிரகங்களை வணங்கி விட்டு எம்பெருமான் வெங்கடா சலபதியைக் காண படியேற வேண்டும். மலையின் பின் பகுதியில் இருந்து வாகனம் ஏறிச்செல்ல தனிவழி உண்டு.

ஆனாலும் படி ஏறிச்செல்வதே உத்தமமாகும். கோவிலுக்குச் சென்று அங்கே பிரதான தெய்வமாக விளங்கும், சந்தனகட்டையில் உள்ள எம் பெருமானைத் தரிசித்து விட்டு, அவரின் வலது புறம் உள்ள உறங்கா புளியமரத்தைத் தரிசித்து விட்டு வலம் வரவேண்டும்.

அதன்பிறகு முதன்மையான கோவிலாக விளங்கும் பழைய கோவிலுக்கு வரவேண்டும். இங்கு பெருமாள் எதிரே கருடன் அமர்ந்திருக்க, கர்ப்பக்கிரகத்தில் ஸ்ரீதேவி- பூதேவியுடன் வெங்கடாசலபதி காட்சி அளிக்கிறார். அவர் முன்பே உற்சவர்கள் உள்ளார்கள்.

இங்குதான் பக்தர்களுக்கு ஜடாரியாக நம்மாழ்வாரின் தரிசனம் கிடைக்கும். முன் வாகனத்தில் ஆஞ்சநேயர் உள்ளார். அவரிடம் பக்தர்கள் தங்களின் பிரச்சினையை எழுதி, அதனுடன் 'ஸ்ரீராம ஜெயம்' எழுதி மாலையாக அணிவிக்கிறார்கள்.

இந்தக் கோவிலில் மார்கழி மாதம் முழுவதும் அதிகாலை 5 மணிக்கு நடைதிறக்கும். மற்ற மாதங்களில் காலை 8 மணி முதல் 10.30 மணி வரையிலும், மாலை 5.30 மணி முதல் இரவு 8 மணி வரையிலும், பக்தர்கள் தரிசனம் செய்வதற்காக கோவில் திறந்துவைக்கப்பட்டிருக்கும்.

அமைவிடம்

இந்த கோவில் அமைந்த கருங்குளம் பகுதி, நெல்லை - திருச்செந்தூர் மெயின் ரோட்டில் 18 கிலோமீட்டர் தொலைவில் உள்ளது. விரைவு பேருந்து இங்கு நிற்காது. நெல்லை சந்திப்பில் இருந்து 15 என்ற எண் கொண்ட டவுண் பஸ்கள் கோவில் அடிவாரம் வரை செல்லும்.

விரைவு பேருந்துகளில் செய்துங்கநல்லூர் வந்து அங்கிருந்து ஆட்டோவில் செல்லலாம். கருங்குளம் மெயின்ரோட்டில் இருந்தும் ஆட்டோ வசதி உண்டு.

திருப்பாவை

பாடல்:

உந்து மதகளிற்றன் ஓடாத தோள்வலியன்

நந்தகோ பாலன் மருமகளே! நப்பின்னாய்!

கந்தம் கமழும் குழலி! கடைதிறவாய்;

வந்தெங்கும் கோழி அழைத்தன காண்; மாதவிப்

பந்தல்மேல் பல்கால் குயிலினங்கள் கூவினகாண்;

பந்தார் விரலி! உன் மைத்துனன் பேர்பாட,

செந்தா மரைக்கையால் சீரார் வளையொலிப்ப

வந்து திறவாய், மகிழ்ந்தேலோ ரெம்பாவாய்.

விளக்கம்:

மதநீர் சொரிகின்ற யானையைப் போன்ற பலமுடையவனும், பகைவர்களுக்கு தன் முதுகைக் காட்டாத தோள்வலிமை உடையவனுமாகிய நந்தகோபனுடைய மருமகளே! நப்பின்னைப் பிராட்டியே! வாசனை வீசும் கூந்தலை உடையவளே! வாசல் கதவைத் திறப்பாய்! பொழுது புலர்ந்ததற்கு அடையாளமாக கோழிகள் கூவுகின்றன. குருக்கத்தி மலர்ப் பந்தலின் மீதுள்ள குயில்கள் பலமுறை கூவுகின்றன. கண்ணனுடன் பந்தாடி, அந்த பந்தைக் கையில் பிடித்தபடி உறங்குபவளே! உன் கணவனாகிய கண்ணனுடைய திருநாமங்களை நாங்கள் பாடுகின்றோம். உனது சிவந்த தாமரை போன்ற திருக்கைகளில் உள்ள வளையல்கள் ஒலி எழுப்பும்படி வந்து கதவைத் திறவாய்!

திருவெம்பாவை

பாடல்:

அண்ணா மலையான் அடிக்கமலஞ் சென்றிறைஞ்சும்

விண்ணோர் முடியின் மணித்தொகை வீறற்றார் போல்

கண்ணார் இரவி கதிர்வந்து கார்கரப்பத்

தண்ணார் ஒளிமழுங்கித் தாரகைகள் தாமகலப்

பெண்ணாகி ஆணாய் அலியாய் பிறங்கொளிசேர்

விண்ணாகி மண்ணாகி இத்தனையும் வேறாகிக்

கண்ணார் அமுதமாய் நின்றான் கழல்பாடிப்

பெண்ணே! இப் பூம்புனல்பாய்ந்து, ஆடேலோர் எம்பாவாய்.

விளக்கம்:

பெண்ணே! அந்த திருவண்ணாமலையில் வாழும் எம் பெருமானின் தாமரைத் திருவடிகளில் விழுந்து வணங்கும் தேவர்களின் தலைகளில் சூடியுள்ள மாணிக்கக் கற்கள் ஒளி மங்கிப் போகும். வானில் கதிரவன் தோன்றும் போது, சந்திரனின் ஒளி மங்கி, விண்மீன்களும் மறைந்து போகும். பெண்ணாகவும், ஆணாகவும். இரண்டும் அற்ற மூன்றாம் பாலினத்தவராகவும், அனைத்து உயிரினங்களாகவும், விண்ணாகவும், மண்ணாகவும், இன்னபிறவாக விளங்குபவனும், கண்களால் பருக வேண்டிய அமுதமாக நிலைபெற்றவனுமாகிய நம்பெருமானது திருவடிகளின் பெருமையைப் பாடி, இந்த பூங்குளத்தில் நீராடி மகிழ்வோம்.

இன்றைய பஞ்சாங்கம்

குரோதி ஆண்டு மார்கழி-18 (வியாழக்கிழமை)

பிறை: வளர்பிறை

திதி: திருதியை பின்னிரவு 2.44 மணி வரை பிறகு சதுர்த்தி

நட்சத்திரம்: திருவோணம் நள்ளிரவு 12.58 மணி வரை பிறகு அவிட்டம்

யோகம்: சித்தயோகம்

ராகுகாலம்: நண்பகல் 1.30 மணி முதல் 3 மணி வரை

எமகண்டம்: காலை 6 மணி முதல் 7.30 மணி வரை

சூலம்: தெற்கு

நல்ல நேரம்: காலை 9 மணி முதல் 10 மணி வரை மாலை 4 மணி முதல் 5 மணி வரை

இன்று திருவோண விரதம். சுவாமிமலை ஸ்ரீ முருகப்பெருமான் தங்கக் கவசம் அணிந்து வைரவேல் தரிசனம். திருப்பதி ஸ்ரீ ஏழுமலையப்பன் புஷ்பாங்கி சேவை மற்றும் மைசூர் மண்டபம் எழுந்தருளல். திருமெய்யம் ஸ்ரீ சத்தியமூர்த்தி புறப்பாடு. ஆலங்குடி ஸ்ரீ குருபகவான் கொண்டைக் கடலைச் சாற்று வைபவம். சோழவந்தான் அருகில் குருவித்துறை ஸ்ரீ குருபகவானுக்கு அபிஷேகம், அலங்காரம். திருக்கோஷ்டியூர் ஸ்ரீ சவுமிய நாராயணப் பெருமாள் திருமஞ்சன சேவை. திருவல்லிக் கேணி ஸ்ரீ ராகவேந்திர சுவாமி மடத்தில் ஸ்ரீ ராகவேந்திர ருக்கு குருவார திருமஞ்சன சேவை. கரூர் ஸ்ரீ ரங்கநாதர் புறப்பாடு. பெருஞ்சேரி ஸ்ரீ வாகீஸ்வரர் புறப்பாடு. சாத்தூர் ஸ்ரீ வேங்கடேசப் பெருமாள் தோலுக்கினியானில் பவனி. தக்கேலம் ஸ்ரீ தட்சிணாமூர்த்தி சுவாமிக்கு அபிஷேகம், அலங்காரம். திருவல்லிக்கேணி ஸ்ரீ பார்த்த சாரதிப் பெருமாள் கோவில் ஸ்ரீ ராமர் மூலவருக்கு திருமஞ்சன சேவை.

இன்றைய ராசிபலன்

மேஷம்-பொறுமை

ரிஷபம்-பொறுப்பு

மிதுனம்-லாபம்

கடகம்-ஆதரவு

சிம்மம்-ஆதாயம்

கன்னி-தெளிவு

துலாம்- வெற்றி

விருச்சிகம்-பெருமை

தனுசு- நன்மை

மகரம்-தேர்ச்சி

கும்பம்-நலம்

மீனம்-நட்பு

திருப்பாவை

பாடல்:

அம்பரமே, தண்ணீரே சோறே அறஞ்செய்யும்

எம்பெருமான் நந்தகோ பாலா, எழுந்திராய்;

கொம்பனார்க் கெல்லாம் கொழுந்தே!

குலவிளக்கே!

எம் பெரு மாட்டி! யசோதாய்! அறிவுராய்;

அம்பரம் ஊடறுத் தோங்கி உலகளந்த

உம்பர்கோ மானே! உறங்காது எழுந்திராய்!

செம்பொற் கழலடிச் செல்வா! பலதேவா!

உம்பியும் நீயும் உறங்கேலோ ரெம்பாவாய்.

விளக்கம்:

ஆடையையும், உணவையும், நீரையும் வரையறையே இல்லாது தானம் அளிக்கும் எங்கள் தலைவர் நந்தகோபரே! எழுந்தருள்வீர்! பூங்கொடி போன்ற ஆயர்குலத்தின் கொழுந்து போன்ற ஒளி விளக்கே! எங்கள் தலைவியாகிய யசோதை அம்மா! வானளாவ உயர்ந்து நின்று உலகங்களை அளந்த தேவர்களின் தலைவனே! உறக்கத்தை விடுத்து எழுந்தருள்வாய்! சிவந்த பொன்னாலான கால்களை அணிந்த பலதேவனே! நீயும் உன் தம்பியான கண்ணனும் இனியும் உறங்காது, உறக்கத்தை விடுத்து எழுந்தருள்வீர்!

திருவெம்பாவை

பாடல்:

செங்கண் அவன்பால் திசைமுகன்பால் தேவர்கள்பால்

எங்கும் இலாதோர் இன்பம்நம் பாலதாக்

கொங்குண் கருங்குழலி நம்தம்மைக் கோதாட்டி

இங்குநம் இல்லங்கள் தோறும் எழுந்தருளிச்

செங்கமலப் பொற்பாதந் தந்தருளுஞ் சேவகனை

அங்கண் அரசை அடியோங்கட் காரமுதை

நங்கள் பெருமானைப் பாடி நலந்திகழப்

பங்கயப் பூம்புனல் பாய்ந்து ஆடேலோர் எம்பாவாய்.

விளக்கம்:

பெண்களே! அந்த சிவந்த கண்களை உடைய திருமாலுக்கும், ஒவ்வொரு திசைக்கும் ஒரு முகம் வீதம் நான்கு முகங்களைக் கொண்ட பிரம்மனுக்கும், ஏனைய தேவர் பெருமக்களுக்கும் கிடைக்காத ஒரு பேரின்பத்தை நமக்கு அள்ளிக் கொடுப்பவள், நறுமணம் மிக்க கூந்தலையுடைய நம் அன்னை உமையவள். அவள் நம்மை சீராட்டி, நம் இல்லங்கள் தோறும் எழுந்தருளும் வகையில் தன் சிவந்த தாமரை போன்ற திருவடிகளை நமக்குக் காட்டி, அனைவருக்கும் அரசனாக விளங்குபவனும், அடியவர்களுக்கு கிடைத்தற்கரிய அமுதத்தைப் போன்று விளங்குபவனுமாகிய நம் சிவபெருமானைப் போற்றிப் பாடி, தாமரை மலர்ந்துள்ள இந்த பொய்கையில் நீராடுவோமாக!

இன்றைய பஞ்சாங்கம்

குரோதி ஆண்டு மார்கழி-17 (புதன்கிழமை)

பிறை: வளர்பிறை

திதி: துவிதியை மறுநாள் விடியற்காலை 4.02 மணி வரை பிறகு திருதியை

நட்சத்திரம்: உத்திராடம் நள்ளிரவு 1.31 மணி வரை பிறகு திருவோணம்

யோகம்: அமிர்த, சித்தயோகம்

ராகுகாலம்: நண்பகல் 12 மணி முதல் 1.30 மணி வரை

எமகண்டம்: காலை 7.30 மணி முதல் 9 மணி வரை

சூலம்: வடக்கு

நல்ல நேரம்: காலை 6 மணி முதல் 7 மணி வரை மாலை 4 மணி முதல் 5 மணி வரை

இன்று சந்திர தரிசனம். திருப்பதி ஸ்ரீ ஏழுமலையப்பன் சகஸ்ரகலசாபிஷேகம். ஸ்ரீ ரங்கம் ஸ்ரீ நம்பெருமாள், காஞ்சீபுரம் ஸ்ரீ வரதராஜப் பெருமாள் கோவில்களில் பகற்பத்து உற்சவம். கரூர் ஸ்ரீ அபயபிரதான ரங்கநாதர் புறப்பாடு. திருவல்லிக்கேணி ஸ்ரீ பார்த்தசாரதிப் பெருமாள் கோவிலில் ஸ்ரீ நரசிம்ம மூலவருக்கு திருமஞ்சன சேவை. மதுராந்தகம் ஏரிகாத்த ஸ்ரீ கோதண்டராம சுவாமிக்கு திருமஞ்சன சேவை. பத்ராசலம் ஸ்ரீ ராமபிரான் புறப்பாடு. விருதுநகர் ஸ்ரீ விஸ்வநாதருக்கு அபிஷேகம், அலங்காரம், வழிபாடு. ஸ்ரீ ரங்கம் ஸ்ரீ நம்பெருமாள், ஸ்ரீ வைகுண்டம் ஸ்ரீ வைகுண்டபதி, தேவக்கோட்டை ஸ்ரீரங்கநாதர் புறப்பாடு. வேதாரண்யம் ஸ்ரீ சிவபெருமானுக்கு காலையில் சிறப்பு அபிஷேகம், அலங்காரம். திருப்பெருந்துறை ஸ்ரீ மாணிக்க வாசகர் புறப்பாடு. திருநெல்வேலி சமீபம் நான்காம் நவதிருப்பதி திருப்பு ளியங்குடி மூலவர் ஸ்ரீபூமிபாலகர், திருபுளியங்குடி வள்ளியம்மை கோவிலில் அபிஷேகம், அலங்காரம்.

இன்றைய ராசிபலன்

மேஷம்-உதவி

ரிஷபம்-தாமதம்

மிதுனம்-பணிவு

கடகம்-அன்பு

சிம்மம்-பாசம்

கன்னி-மகிழ்ச்சி

துலாம்- தனம்

விருச்சிகம்-பக்தி

தனுசு- உழைப்பு

மகரம்-கடமை

கும்பம்-நட்பு

மீனம்-போட்டி

திருச்சி:

108 திவ்ய தேசங்களில் முதன்மையான பூலோக வைகுண்டம் என போற்றப்படும் ஸ்ரீரங்கம் ரெங்கநாதர் கோவிலில் ஆண்டு முழுவதும் பல்வேறு திருவிழாக்கள் வெகுவிமரிசையாக நடை பெறும்.

மார்கழி மாதம் நடைபெறும் திருஅத்யயன உற்சவம் எனப்படும் வைகுண்ட ஏகாதசி திருவிழா தனித்துவம் மிக்கது. பகல்பத்து, ராபத்து இயற்பா என மொத்தம் 21 நாட்கள் இந்த விழா நடைபெறும்.

பகல்பத்து உற்சவத்தின் முதல் நாளான திருமொழி திருநாள் இன்று (செவ்வாய்க்கிழமை) கோலாகலமாக தொடங்கியது. இதை யொட்டி நம்பெருமாள் காலை 7.45 மணிக்கு மூலஸ்தானத்தில் இருந்து புறப்பட்டு காலை 8.30 மணிக்கு அர்சுன மண்டபம் வந்தடைந்தார்.

மஞ்சள் நிற பட்டு (பீதாம்பரம்) அணிந்து ரத்தின பாண்டியன் கொண்டை அணிந்து, நெற்றி பூ சாற்றி, வைர அபய ஹஸ்தம், பதக்கம், அடிக்கை, ஒட்டியா ணம், கைகளில் தாயத்து சரம் , திருவடியில் தண்டை அணிந்து புறப்பாடாகி அர்ச்சுன மண்டபத்தில் எழுந்தருளினார்.

மதியம் 12 மணிவரை அரையர்கள் நம்பெருமாள் முன் நின்று நாலாயிரம் திவ்யப்பிரபந்த பாடல்களை அபிநயம் மற்றும் இசையுடன் பாடினர்.

இரவு 7.30 மணிக்கு அர்ச்சுன மண்டபத்தில் இருந்து நம்பெருமாள் புறப்பட்டு இரவு 9.45 மணிக்கு மூலஸ்தானம் சென்றடை கிறார். பகல் பத்தின் முதல் நாளான இன்று மூலவர் ரெங்கநாதர் முத்தங்கி சேவையில் காட்சியளித்தார். இந்த முத்தங்கி சேவை தொடர்ந்து 20 நாட்களுக்கு நடைபெறும்.

இதே போல் பகல் பத்தின் ஒவ்வொரு நாளும் உற்சவர் நம்பெருமாள் வெவ்வேறு அலங்காரத்தில் அர்ச்சுன மண்டபத்தில் எழுந்தருளி பக்தர்களுக்கு சேவை சாதிப்பார். பகல்பத்து உற்ச வத்தின் 10-வது நாள் (9-ந்தேதி) நம்பெருமாள் நாச்சி யார் திருக்கோலம் எனப்படும் மோகினி அலங்காரத்தில் எழுந்தருளி பக்தர்களுக்கு சேவை சாதிப்பார். 10-ந்தேதி ராப்பத்து உற்சவத்தின் முதல் நாள் வைகுண்ட ஏகாதசி திருநாள் ஆகும்.

அன்று அதிகாலை 4.15 மணிக்கு நம்பெருமாள் மூலஸ்தானத்தில் இருந்து புறப்பட்டு அதிகாலை 5.15 மணிக்கு பரமபதவாசல் எனப்படும் சொர்க்கவா சலில் எழுந்தருள்வார். இதை யொட்டி நம்பெருமாள் ரத்தின அங்கி அணிந்து பக்த ர்களுக்கு அருள்பாலிப்பார்.

சொர்க்கவாசல் திறப்பு நிகழ்ச்சியில் லட்சகணக்கான பக்தர்கள் கலந்து கொண்டு நம்பெருமாளுடன் பரமபத வாசலை கடந்து செல்வார்கள். சொர்க்கவாசல் 11-ந்தேதி முதல் 15-ந் தேதி வரை பகல் 1 மணி முதல் இரவு 8 மணிவரை திறந்திருக்கும். 16-ந்தேதி மாலை 4 மணிமுதல் இரவு 9 மணிவரை திறந்திரு க்கும். 17-ந்தேதி சொர்க்க வாசல் திறப்பு இல்லை.

சொர்க்கவாசல் திறப்பு தினமான 10-ந்தேதி முதல் ராப்பந்து எனப்படும் திருவாய்மொழி திருநாள் தொடங்குகிறது. ராப்பத்தின் ஒவ்வொரு நாளும் உற்சவர் நம்பெருமாள் வெவ்வேறு அலங்காரத்தில் ஆயிரங்கால் மண்டபத்தின் நடுவே உள்ள திருமாமணி ஆஸ்தான மண்டபத்தில் எழுந்தருளி பக்தர்களுக்கு சேவை சாதிப்பார்.

ராப்பத்து ஏழாம் திரு நாளான 16-ந்தேதி நம்பெரு மாள் திருக்கைத்தல சேவை யும், எட்டாம் திருநாளான 17-ந்தேதி திருமங்கைமன்னன் வேடுபறி நிகழ்ச்சியும், பத்தாம் திருநாளான 19-ந்தேதி தீர்த்தவாரியும், 20-ந்தேதி நம்மாழ்வார் மோட்சமும், இயற்பா சாற்றுமறை நிகழ்ச்சி யும் நடைபெறும். இத்துடன் வைகுண்ட ஏகாதசி திருவிழா நிறைவு பெறும்.

விழாவிற்கான ஏற்பா டுகளை ஸ்ரீரங்கம் கோவில் இணை ஆணையர் மாரி யப்பன், கோவில் உள்துறை கண்காணிப்பாளர் வேல்மு ருகன், கண்காணிப்பாளர் வெங்கடேசன், மற்றும் கோவில் பணியாளர்கள் செய்து வருகிறார்கள்.