ஆன்மிகம்

கோவில் தோற்றம்

செங்கல்பட்டு மாவட்டத்தில் திருக்கழுக்குன்றம் வட்டத்தில் அமைந்துள்ளது, வெங்கம்பாக்கம் கிராமம். இங்கு ஸ்ரீரங்கநாதப் பெருமாள் திருக்கோவில் அமைந்துள்ளது. பொதுவாக அரங்கநாதப் பெருமாள் என்றாலே அவர் சயனக்கோலத்தில் தான் காட்சி தருவார்.

ஆனால் இந்த ஆலயத்தில் உள்ள பெருமாள், அமர்ந்த கோலத்தில் அருள்பாலிப்பது, வேறு எங்கும் காணக் கிடைக்காத காட்சி என்கிறார்கள். இந்த ஆலயத்தைப் பற்றி இங்கே பார்ப்போம்.

இந்த திருத்தலத்தில் உள்ள ஸ்ரீரங்கநாதப் பெருமாள், சுயம்பு மூர்த்தியாக இந்த கிராமத்தில் தோன்றியிருக்கிறார். இதையடுத்து அவருக்கு ஊர் மக்கள் அனைவரும் சேர்ந்து, ஆரம்ப காலத்தில் சிறிய கூரை அமைத்து வழிபாட்டைத் தொடங்கியிருக்கிறார்கள்.

நாளடைவில் சிறிய அளவில் கல்லால் ஆன கட்டிடம் கட்டி, அதனுள் ஸ்ரீரங்கநாதப் பெருமாளை பிரதிஷ்டை செய்திருக்கிறார்கள். கோவிலை நிர்மாணித்து 1964-ம் ஆண்டில் முதல் கும்பாபிஷேகத்தை சிறப்பாக நடத்தி முடித்துள்ளனர்.

அதன்பின்னர் 1991-ம் ஆண்டும் கோவில் புனரமைக்கப்பட்டு, சற்றே விரிவுபடுத்தி கட்டப்பட்டு, மீண்டும் கும்பாபிஷேகம் நடத்தப்பட்டிருக்கிறது.

இந்த ஆலயத்தின் முகப்பு பகுதியில் மகாவிஷ்ணு, நான்கு திருக்கரங்களுடன் ஆதிசேஷன் மீது அமர்ந்திருக்கும் சுதைச் சிற்பம் காணப்படுகிறது. அவருக்கு இருபுறத்திலும் சிறிய திருவடி என்று அழைக்கப்படும் அனுமனும், பெரிய திருவடி என்று அழைக்கப்படும் கருடனும் அமர்ந்திருக்கிறார்கள்.

அதன் அருகிலேயே மகாவிஷ்ணு ஆதிசேஷன் மீது சயனக் கோலத்தில் வீற்றிருக்கும், பல வண்ண சுதைச் சிற்பம் காண்போர் கண்களைக் கவரும் விதத்தில் அமைந்துள்ளது. பழமையான இக்கோவிலானது, கருவறை, அர்த்தமண்டபம், முன்மண்டபம் என்ற அமைப்புடன் கட்டப்பட்டிருக்கிறது.

பொதுவாக ஸ்ரீரங்கநாதப்பெருமாள் ஆதிசேஷன் மீது சயனித்திருக்கும் கோலத்தில்தான் காட்சி அளிப்பார். ஆனால் இத்தலத்தில் பெருமாள் ஆதிசேஷன் மீது சிம்மாசனத்தில் அமர்ந்த திருக்கோலத்தில் இருப்பது, அரிதான ஒரு அமைப்பாகும்.

கிழக்கு திசை நோக்கி வீற்றிருக்கும் இந்தப் பெருமாள், வலது காலை தொங்கவிட்டும், இடது காலை மடக்கி வைத்த நிலையிலும் அமர்ந்துள்ளார். நான்கு கரங்கள் கொண்ட இந்தப் பெருமாளின் மேல் இரு கரங்களில் சங்கு, சக்கரம் தாங்கியும், கீழ் இரு கரங்களில் வலது கரத்தை பீடத்தின் மீதும், இடது கரத்தை முழங்காலின் மீதும் வைத்த நிலையில் காணப்படுகிறார்.

மூலவர் சன்னிதிக்கு எதிர்புறத்தில் கருடாழ்வார் வீற்றிருக்கிறார். மூலவர் சன்னிதிக்கு எதிரே மறுபுறத்தில் ஆஞ்சநேயர் சன்னிதி இருக்கிறது. இத்தலத்தின் வழியாக செல்லும் பக்தர்கள் அனைவரும், இவ்வாலயம் வந்து பெருமாளை வணங்கிச் செல்வதை வழக்கமாக வைத்திருக்கிறார்கள்.

இத்தலத்துப் ஸ்ரீரங்கநாதப் பெருமாளை வணங்கினால், முயற்சித்த காரியம் வெற்றிகரமாக நிறைவேறும் என்று இப்பகுதி மக்கள் நம்புகின்றனர்.

இந்த ஆலயத்தில் நடைபெறும் வைணவ நிகழ்வுகளில், வைகுண்ட ஏகாதசி திருவிழா மிகவும் முக்கியத்துவம் வாய்ந்தது. இந்த விழாவில், வெங்கம்பாக்கம் மற்றும் அதைச் சுற்றியுள்ள கிராமங்களில் இருந்து ஆயிரக்கணக்கான பக்தர்கள் வந்து, பெருமாளை தரிசனம் செய்து அவரின் அருளைப் பெற்றுச் செல்வது வாடிக்கை.

இந்த ஆலயம் தினமும் காலை 8 மணி முதல் 10 மணி வரை யிலும், மாலை 5 மணி முதல் இரவு 7 மணி வரையிலும், பக்தர்கள் தரிசனம் செய்வதற்காக திறந்து வைக்கப்பட்டிருக்கும்.

அமைவிடம்

சென்னையில் இருந்து புதுச்சேரி செல்லும் கிழக்குக் கடற் கரைச் சாலையில் மாமல்லபுரத்திற்கும், கல்பாக்கத்திற்கும் இடையில் அமைந்துள்ளது வெங்கம்பாக்கம். செங்கல்பட்டில் இருந்து கல்பாக்கம் சாலையில் இயங்கும் அனைத்துப் பேருந்துகளும் இவ்வூரில் நின்று செல்லும். பேருந்து நிறுத்தத்தில் இருந்து சதுரங்கப்பட்டினம் சாலையில் ஒரு கிலோமீட்டர் தொலைவில் இத்தலம் அமைந்துள்ளது.

திருப்பாவை

பாடல்:

மாலே! மணிவண்ணா! மார்கழி நீராடுவான்

மேலையார் செய்வனகள் வேண்டுவன, கேட்டியேல்;

ஞாலத்தை எல்லாம் நடுங்க முரல்வன

பாலன்ன வண்ணத்துன் பாஞ்ச சன்னியமே

போல்வன சங்கங்கள் போய்ப்பா டுடையனவே,

சாலப் பெரும்பறையே; பல்லாண் டிசைப்பாரே,

கோல விளக்கே, கொடியே, விதானமே,

ஆலின் இலையாய்! அருளேலோ ரெம்பாவாய்.

விளக்கம்:

எங்களிடம் பேரன்பு கொண்ட திருமாலே! மணிவண்ணா! மார்கழி நோன்பை நோற்க, நாங்கள் புதிதாக ஒன்றும் கேட்கப் போவதில்லை. பெரியவர்கள் விதித்துள்ளவற்றுள் நாங்கள் வேண்டுவதைக் கேட்பாயாக! உலகையே நடுங்கச் செய்யும் உன் பாஞ்சஜன்யம் போன்ற வெண்சங்குகள், உன் புகழைப் பாடவல்ல பெரிய பறை முரசுகள், பல்லாண்டு பாடும் பாடல் கலைஞர்கள், அழகிய விளக்குகள், கொடிகள், குடைகள் ஆகியவற்றை ஆலிலையில் அவதரித்த நீ எங்களுக்கு அருள வேண்டும்.

திருவெம்பாவை

பாடல்:

பப்பற வீட்டிருந் துணரும்நின் அடியார்

பந்தனை வந்தறுத் தார்அவர் பலரும்

மைப்புறு கண்ணியர் மானுடத் தியல்பின்

வணங்கு கின்றார்; அணங்கின் மணவாளா!

செப்புறு கமலங்கண் மலரும்தண் வயல்சூழ்

திருப்பெருந் துறையுறை சிவபெரு மானே!

இப்பிறப் பறுத்தெமை ஆண்டருள் புரியும்

எம்பெரு மான்! பள்ளி எழுந்தருளாயே!

விளக்கம்:

நிலமற்ற இடத்தில் தவம் செய்து உன்னை உணர்ந்த யோகியரும், பந்த பாசங்களை உதறியவர்களும், மை தீட்டிய கண்களுடைய பெண்டிரைப் போன்று தங்களைப் பாவித்துக் கொண்டு உன்னைத் தொழுகிறார்கள். உமையம்மையின் மணவாளனே! இந்தப் பிறவியை நீக்கி எம்மை ஆட்கொள்ளுகின்ற எங்கள் எம் பெருமானே! சிவந்த தாமரை மலர்கள் மலர்ந்துள்ள வயல்கள் சூழ்ந்திருக்கும் திருப்பெருந்துறையில் உறைந்தருளும் சிவபெருமானே! துயில் நீங்கி எழுந்தருள்வாய்.

இன்றைய பஞ்சாங்கம்

குரோதி ஆண்டு மார்கழி-10 (வெள்ளிக்கிழமை)

பிறை: வளர்பிறை.

திதி: ஏகாதசி காலை 10.02 மணி வரை. பிறகு துவாதசி.

நட்சத்திரம்: கார்த்திகை நண்பகல் 1.41 மணி வரை. பிறகு ரோகிணி.

யோகம்: சித்த, மரணயோகம்.

ராகுகாலம்: காலை 10.30 மணி முதல் 12 மணி வரை

எமகண்டம்: பிற்பகல் 3 மணி முதல் 4.30 மணி வரை

சூலம்: மேற்கு

நல்ல நேரம்: காலை 6 மணி முதல் 7 மணி வரை மாலை 5 மணி முதல் 6 மணி வரை

இன்று ஸ்ரீவைகுண்ட ஏகாதசி. கர்போட்ட நிவர்த்தி. சகல விஷ்ணு ஆலயங்களிலும் பரமதவாசல் திறப்பு விழா. சகல விஷ்ணு ஆலயங்களிலும் இராப்பத்து உற்சவம் ஆரம்பம். ஸ்ரீரங்கம் ஸ்ரீநம்பெருமாள் முத்தங்கி சேவை. ஸ்ரீவில்லிபுத்தூர் ஸ்ரீஆண்டாள் முத்தங்கி சேவை. இரவு தங்க சேஷ வாகனத்தில் புறப்பாடு. சங்கரன்கோவில் ஸ்ரீகோமதியம்மன் தங்கப்பாவாடை தரிசனம். ராமேஸ்வரம் ஸ்ரீபர்வதிவர்த்தினியம்மன் நவசக்தி மண்டபம் எழுந்தருளி அம்பாள் தங்கப் பல்லக்கில் புறப்பாடு. திருவிடைமருதூர் ஸ்ரீபிருகத் சுந்தரகுசாம்பிகை புறப்பாடு. கரூர் தான்தோன்றிமலை ஸ்ரீகல்யாண வெங்கடரமண சுவாமிக்கு திருமஞ்சனம். லால்குடி ஸ்ரீபிரவிருந்த ஸ்ரீமதி என்கிற பெரு திருப்பிரட்டியார் சமேத ஸ்ரீசப்தரிஷீஸ்வரர் கோவிலில் அபிஷேகம். தூத்துக்குடி ஸ்ரீபாகம் பிரியாள் வீரவநல்லூர் ஸ்ரீமரகதாம்பிகை தலங்களில் அபிஷேகம். கீழ்த்திருப்பதி ஸ்ரீகோவிந்தராஜப் பெருமாள் காலை திருமஞ்சனம். மாலை ஊஞ்சல் சேவை.

இன்றைய ராசிபலன்

மேஷம்-வெற்றி

ரிஷபம்-செலவு

மிதுனம்-தெளிவு

கடகம்-சாந்தம்

சிம்மம்-உழைப்பு

கன்னி-சாதனை

துலாம்- ஓய்வு

விருச்சிகம்-முயற்சி

தனுசு- நலம்

மகரம்-ஈகை

கும்பம்-உயர்வு

மீனம்- நன்மை

ஒவ்வொரு ஆண்டும் வைகுண்ட ஏகாதசி விழா அனைத்து பெருமாள் கோவில்களிலும் சிறப்பாக கொண்டாடப்படுவது வழக்கம்.

புகழ்பெற்ற கோவில்கள் மட்டுமின்றி, பெரும்பாலான பெருமாள் கோவில்களிலும், எந்தெந்த கோவில்களில் எல்லாம் பரமபத வாசல் உள்ளதோ அங்கு எல்லாம் வைகுண்ட ஏகாதசி அன்று அதிகாலையில் சொர்க்கவாசல் திறக்கப்படும் நிகழ்வு நடைபெறும்.

இன்று 10-1-2025 அதிகாலையில் திருச்சி ஸ்ரீ ரங்கம், திருவல்லிக்கேணி பார்த்தசாரதி ஆகிய கோவில்களில் சொர்க்கவாசல் ஆனது திறக்கப்பட்டது.

பல்வேறு பெருமாள் கோவில்களில் சொர்க்கவாசல் திறப்பு நிகழ்ச்சியில் ஆயிரக்கணக்கான பக்தர்கள் கலந்து கொண்டு கோவிந்தா கோவிந்தா என்ற முழக்கத்துடன் சாமி தரிசனம் செய்தனர்.

திருச்சி:

108 வைணவ திருத்தலங்களில் முதன்மையானதும், பூலோக வைகுண்டம் என்று பக்தர்களால் அழைக்கப்படும் ஸ்ரீரங்கம் ரெங்கநாதர் கோவிலில் வைகுண்ட ஏகாதெசி பெருவிழா மிகவும் பிரசித்திப்பெற்றது.

இந்த ஆண்டுக்கான வைகுண்ட ஏகாதசி திருவிழா கடந்த டிசம்பர் 30-ந்தேதி திருநெடுந்தாண்டகத்துடன் தொடங்கியது. தொடர்ந்து 31-ந்தேதி பகல்பத்து திருவாய்மொழி திருநாள் தொடங்கியது.

விழாவையொட்டி உற்சவர் நம்பெருமாள் தினமும் தினந்தோறும் காலையில் பல்வேறு அலங்காரத்தில் மூலஸ்தானத்தில் இருந்து புறப்பட்டு அர்ச்சுன மண்டபத்தில் பக்தர்களுக்கு சேவை சாதித்து வருகிறார்.

பகல் பத்து 10-ம் திருநாளான இன்று நாச்சியார் திருக்கோலம் எனப்படும் மோகினி அலங்காரம் நடைபெற்றது. பாற்கடலை கடைந்து கிடைத்த அமுதத்தை அசுரர்கள் பறித்துக் கொள்ள, தேவர்கள் திருமாலைச் சரணடைந்தனர். அவரும் மோகினியாகத் தோன்றி, தேவர்களுக்கு அமுதம் கிடைக்கச் செய்தார்.

இதை நினைவூட்டும் வகையில் இந்த மோகினி அலங்கார காட்சி நடைபெற்றது. இதற்காக இன்று காலை 6 மணிக்கு மூலஸ்தானத்தில் இருந்து புறப்பட்ட நம்பெருமாள், 7 மணிக்கு அர்ச்சுன மண்டபம் வந்தார். அங்கு மோகினி அலங்காரத்தில் எழுந்தருளி அருள்பாலித்தார்.

நம்பெருமாளின் மோகினி அலங்காரம் கண்கொள்ளா காட்சியாக அமைந்தது. அவர் வெண்ணிற பட்டு புடவை அணிந்து, வலது திருக்கையில் தங்கக் கோலக்கிளி தாங்கி, இடது திருக்கை தொங்க விட்டுக் கொண்டு, கம்பீரமாக அமர்ந்த திருக்கோலத்தில் காட்சி அளித்தார்.

மேலும் சவுரிக் கொண்டை அணிந்து, அதில் கலிங்கத்துராய் , நெற்றி பட்டை , முத்து பட்டை சாற்றி, காதில் வைர மாட்டல், வைரத் தோடு அணிந்து, மூக்குத்தி அணிந்து காட்சி தந்தார். மார்பில் பங்குனி உத்திர பதக்கம், அதன்மேல் தாயாரின் திருமாங்கல்யம், அழகிய மணவாளன் பதக்கம், அடுக்கு பதக்கங்கள் அணிவிக்கப்பட்டிருந்தன.

மேலும் நெல்லிக்காய் மாலை, தங்க பூண் பவழ மாலை, காசு மாலை அணிந்து, இடது திருக்கை முழுவதும் தங்க வளையல்கள், அரசிலை பதக்கம், பவழ வலையல், தாயத்து சரங்களுடன் கம்பீரமாக் காட்சி அளித்தார்.

வடியில் தங்க சதங்கை, தண்டைகளும், பின்புறம் ஏலக்காய் ஜடை தாண்டா சாற்றி,அதன் மேல் கல் இழைத்த ஜடை நாகத்துடன் சேர்ந்த சிகப்பு கெம்புக்கல் ஜடை, ராக்கொடி அணிந்து, திருக்கைகளில் புஜ கீர்த்தி சாற்றி, அரைச்சலங்கை இடுப்பில் வலைவாக சாற்றி சூர்ய பதக்கம் உள்ளிட்ட ஆபரணங்கள் அணிந்திருந்தார்.

வருடம் ஒருமுறை மட்டுமே சேவை தரும் நாச்சியார் திருக்கோலத்தை காண திருச்சி மாவட்டம் மட்டுமின்றி தமிழகத்தின் பல்வேறு பகுதிகளில் இருந்தும் ஆயிரக்கணக்கான பக்தர்கள் வந்திருந்தனர். பக்தர்கள் மோகின் அலங்காரத்தில் பெருமாளை பக்தி பரவசத்துடன் தரிசனம் செய்தனர்.

இதையடுத்து மாலை 5 மணிக்கு அர்ச்சுன மண்டபத்தில் இருந்து புறப்படும் நம்பெருமாள், இரவு 7 மணிக்கு கருட மண்டபம் சென்றடைவார். பின்னர் அங்கிருந்து புறப்பட்டு இரவு 8.30 மணிக்கு மூலஸ்தானம் சென்றடைவார்.

இதன் தொடர்ச்சியாக இராப்பத்து திருவாய்மொழி திருநாள் நாளை முதல் தொடங்குகிறது. நாளை (வெள்ளிக் கிழமை) அதிகாலை 4.15 மணிக்கு நம்பெருமாள் மூலஸ்தானத்தில் இருந்து ரத்தின அங்கி, பாண்டியன் கொண்டை, கிளிமாலை உள்பட பல்வேறு சிறப்பு திருவாபரணங்கள் அணிந்து மூலஸ்தானத்தில் இருந்து சிம்ம கதியில் புறப்பட்டு வெளியில் வருவார்.

2-ம் பிரகாரம் வலம் வந்து நாழிகேட்டான் வாசல் வழியே 3-ம் பிரகாரத்திற்கு வரும் நம்பெருமாள், துரைப்பிரதட்சணம் வழியாக பரமபதவாசல் பகுதிக்கு வருவார்.

அதனைத் தொடர்ந்து அதிகாலை 5.15 மணியளவில் பரமபதவாசல் திறக்கப்படும். அப்போது நம்பெருமாள் பக்தர்கள் புடைசூழ பரமபதவாசல் வழியாக எழுந்தருள்வார். பக்தர்கள் ரங்காரங்கா கோஷம் முழங்க அரங்கனை பிந்தொடர்ந்து சொர்க்கவாசல் வழியாக வருவார்கள்.

பின்னர் நம்பெருமாள் மணல்வெளி, நடைப்பந்தல், தவுட்டரவாசல் வழியாக ஆயிரங்கால் மண்டபத்தின் எதிரில் உள்ள திருக்கொட்டகைக்கு வருவார். அங்கு பெருமாள் சுமார் 1 மணி நேரம் பக்தர்களுக்கு சேவை சாதிப்பார்.

அதன்பின் சாதரா மரியாதையாகி(பட்டு வஸ்திரம் சாற்றுதல்) ஆயிரங்கால் மண்டபத்தில் உள்ள திருமாமணி மண்டபத்தில் எழுந்தருளி நள்ளிரவு வரை பக்தர்களுக்கு அருள்பாலிப்பார். பின்னர் இரவு 12 மணிக்கு அங்கிருந்து புறப்பட்டு, வீணை வாத்தியத்துடன், இரவு 1.15 மணிக்கு மூலஸ்தானம் சென்றடைவார்.

ராப்பத்து பெருவிழாவின் 7ம் திருநாளான 16-ந்தேதி அன்று திருக்கைத்தல சேவை நடைபெறும். 8-ம் திருநாளான 17-ந்தேதி திருமங்கை மன்னன் வேடுபறி வைபவம் நடைபெறும். 10ம் திருநாளான 19-ந்தேதி தீர்த்தவாரியும், 20-ந்தேதி நம்மாழ்வார் மோட்சத்துடன் வைகுண்ட ஏகாதெசி பெருவிழா நிறைவு பெறும்.

காசிப முனிவருக்கும் அவரது மனைவி அதிதி என்பவருக்கும் விசுவவான் முதலான பன்னிரண்டு சூரியர்கள் பிறந்தனர். அதிதி அன்னையின் புத்திரர்கள் ஆதலால் பன்னிரு சூரியர்களையும் 'ஆதித்தியர்' என்பர்.

பிரம்மதேவன் ஒரு காலத்தில் இருள் மயமான அண்டத்தைப் பிளந்தார். அப்போது அவ் அண்டத்திலிருந்து 'ஓம்' என்றப் பேரொலி எழுந்தது. அவ்வொலியில் இருந்து ஒளி உருவமாக சூரியன் தோன்றினான். இவ்வாறே சூரிய பகவானின் முதல்தோற்றம் நிகழ்ந்தது என மன மார்க்கண்டேய புராணம் கூறுகின்றது.

பன்னிரு சூரியர்களில் முதலாமவராகிய விசுவவான் என்ற சூரிய பகவான் துவஷ்டாவின் மகளான சஞ்ஞீகை (உஷா) என்பவரை மணந்துகொண்டார். சஞ்ஞீகையின் திருவயிற்றில் வைத்சுதமனு, யமன், அசுவினி தேவர்கள் ஆகியோர் பிறந்தனர்.

சூரியனின் சூடு (வெப்பம்) தாங்க இயலாதவளாகிய சஞ்ஞீகை தன்னுடைய நிழலையே ஒரு பெண்ணாக உருவாக்கினாள். அவளைத் தனக்குப் பதிலாக சூரியனுக்குத் தெரியாமலே அவரிடம் இருக்கச் செய்து சஞ்ஞீகை தந்தை வீடு சென்றுவிட்டாள்.

சஞ்ஞீகையின் நிழலாகத் தோன்றிய அப்பெண்ணிற்குச் சாயாதேவி (பிரத்யுஷா) என்ற பெயர் வழங்கலாயிற்று. சாயாதேவி தான், வேறொரு பெண் என்ற விபரத்தை அறிவிக்காமலே ஆதித்தியரிடம் வாழ்க்கைத் துணையாக வாழ்ந்து வந்தாள். சூரியனும் அவளைச் சஞ்ஞீகை என்றே நினைத்து நெடுநாட்கள் வாழ்ந்துவந்தான்.

சாயாதேவிக்கு சாவர்ணியமனு, சனி என்ற மகன்களும் பத்திரை என்ற மகளும் பிறந்தனர்.

ஒரு சமயம் சூரியன் தன் மகனான எமனால் சாயாதேவி தோன்றிய உண்மை வரலாற்றை அறிந்தார். உடனே உஷாதேவியின் தந்தையான துவஷ்டாவிடம் சென்று உஷாதேவி இருக்குமிடத்தை அறிந்து கொண்டு அங்கே விரைந்தார்.

அடர்ந்த காட்டில் பெண் குதிரை உருவத்தில் உஷாதேவி தவம் செய்து கொண்டிருப்பதைக் கண்டார். பின்னர் அவரிடம் பேசி அன்போடு அழைத்து வந்து அவள் விருப்பப்படி இருவரோடும் இன்பமுடன் இல்லறம் ஏற்றருளினார். இவ்விரு தேவிகளே சூரியனிடம் என்றும் பிரியாதிருந்து அருள் செய்கின்றனர்.

சூரியனுக்கு மனைவியர் பலர் உண்டு எனப் புராணங்கள் கூறுகின்றன. சூரியனுக்கும் சருஷிணிக்கும் பிறந்தவர்கள் பிருகு, வால்மீகர் ஆவர். சூரியனுக்கும் ஊர்வசிக்கும் பிறந்தவர்கள் அகத்தியரும், வால்மீகியும் ஆவர்.

சூரியனுக்கும் குந்திதேவிக்கும் பிறந்தவன் கர்ணன் என்று பாரதமும், சுக்ரீவன் சூரியக்குமாரனே என்று ராமாயணமும் கூறுகின்றன.

சிவபெருமானை நோக்கி சூரியன் கடுந்தவம் செய்து 'கிரகபதம்' எனும் பேறு பெற்றார். மேலும் ஆயிரம் கிரகணங்களோடு ஒளி மண்டலத்தில் உலா வரும் உயர்வையும் சிவனருளால் பெற்றார். அதனால் சூரியன் தம் ஆயிரம் கிரகணங்களால் இருளை அழிக்கவும் ஒளியை உண்டாக்கவும் வெப்பத்தைத் தரவும் கூடிய வல்லமை பெற்றார்.

1000 கிரகணங்களில் 400 கிரகணங்கள் மழை பொழிவதற்கும், 300 கிரகணங்கள் மழை வளம் உண்டாக்குவதற்கும் 300 கிரகணங்கள் பனி பொழிவதற்கும் பயன்படுகின்றன என்று புராணங்கள் எடுத்துரைக்கின்றன.

சூரியன் மேஷம் முதல் மீனம் வரையிலான பன்னிரண்டு ராசிகளுக்கும் செல்வார். அவர் ஒரு ராசியில் இருந்து அடுத்த ராசிக்குச் செல்லும் சமயமே மாதப் பிறப்பு நிகழ்கிறது. சூரியன் சஞ்சரிக்கும் ராசியின் பெயரைக் கொண்டே அந்தந்த மாதங்களுக்குப் பெயர் வழங்கப்படுகின்றன.

சித்திரை மாதப் பிறப்பைச் சித்திரை விசு என்றும் ஐப்பசி மாதப் பிறப்பை 'ஐப்பசி விசு' என்றும் கூறுவர். இவ்விரு மாதப் பிறப்புகளுக்கு முன் எட்டு நாழிகைகளும் பின் எட்டு நாழிகைகளும் புண்ணிய காலங்களாகும்.

தட்சிணாயணம் தொடங்கும் ஆடி மாதப் பிறப்பின் முன் 16 நாழிகையும், உத்ராயணம் தொடங்கும் தை மாதப் பிறப்பின் பின் 16 நாழிகைகளும் புண்ணிய காலங்கள்.

சூரியன் மகர ராசியில் (தை மாதம்) இருக்கும்போது ஞாயிற்றுக்கிழமை, அமாவாசை, திருவோணம் நட்சத்திரம், வியதீபாத யோகம் ஆகிய நான்கும் கூடினால் அது அர்த்தோதய புண்ணிய காலமாகும்.

சூரியன் மகரராசியில் இருக்கும்போது திங்கட்கிழமை, அமாவாசை, திருவோணம், வியதீபாதம் ஆகியவை கூடியவரின் மகோதய புண்ணிய காலமாகும்.

இக்காலங்களில் புண்ணிய தீர்த்தங்களில் நீராடி சூரிய வணக்கம் செய்து இறைவழிபாடு, தியானம் முதலியன செய்தால் பல பிறவிகளில் செய்த வினை நீங்கும். பெரும் புண்ணியங்கள் சேரும் என்று ஆகமங்களும் புராணங்களும் கூறுகின்றன.

உங்களுக்கு சூரியதோஷம் இருந்தால், நேரம் கிடைக்கும் போதெல்லாம் அனுமன் கோவிலுக்குப் போய் வழிபடுங்கள். தாமிரத்தால் செய்த இஷ்டதெய்வ டாலர் அல்லது அனுமன் டாலரை அணிந்து கொள்ளுங்கள்.

ஞாயிற்றுக்கிழமைகளில் காலை 6.15 முதல் 6.45 மணிக்குள் வீட்டு பூஜையறையில் பசுநெய்தீபம் 5 அகலில் ஏற்றிவைத்து வழிபடுங்கள். பசுமாட்டுக்கு கோதுமை அல்லது கோதுமைத்தவிடு வாங்கிக் கொடுங்கள். ஆதித்ய ஹிருதயம், அனுமன் சாலீசா துதிகளை தினமும் சொல்லுங்கள் அல்லது கேளுங்கள்.

வசதி இருப்பவர்கள், மாணிக்கக் கல்லில் டாலர் செய்து கழுத்தில் அணியுங்கள். அல்லது, மாணிக்கத்தால் செய்த விநாயகரை பூஜியுங்கள்.

வருடத்திற்கு ஒரு முறை அனுமன் கோவிலுக்குப் போய் தரிசனம் செய்து விட்டு கோதுமையால் ஆன இனிப்பு வகைகளை இயன்ற அளவு தானம் செய்யுங்கள். சூரியனார் கோவிலுக்குப் போவதும் நல்லது.

தினமும் சூரிய உதயத்திற்கு முன் எழுந்து அன்றாடப் பணிகளை செய்ய ஆரம்பியுங்கள். மாதத்தில் ஒருநாள் நவக்கிரக சூரியனை தரிசித்து வழிபடுங்கள்.

மேற்கண்ட பரிகாரங்களுள் உங்களால் இயன்றதையெல்லாம் செய்யுங்கள். சூரியதோஷம் நிச்சயமாக உங்களை விட்டுப் போகும்.

திருப்பாவை

பாடல்:

ஒருத்தி மகனாய்ப் பிறந்து ஓரிரவில்

ஒருத்தி மகனாய் ஒளித்து வளர,

தரிக்கிலா னாகித்தான்த்தான் தீங்கு நினைந்த

கருத்தைப் பிழைப்பித்துக் கஞ்சன் வயிற்றில்

நெருப்பென்ன நின்ற நெடுமாலே! உன்னை

அருத்தித்து வந்தோம்; பறைதருதியாகில்

திருத்தக்க செல்வமும் சேவகமும் யாம் பாடி

வருத்தமும் தீர்ந்து மகிழ்ந்தேலோ ரெம்பாவாய்.

விளக்கம்:

எங்களிடம் மிகுந்த கருணையுடைய ஒப்புயர்வற்ற கண்ணனே! ஒப்பற்ற தேவகியின் மகனாய்ப் பிறந்து, பிறந்த அதே இரவில் வேறொருத்தியான யசோ தையின் மகனாக மாற்றப்பட்டு மறைந்து வளர்ந்தாய்! ஆணவத்தால் உன்னை அழிக்க நினைத்த கம்சனின் வஞ்சகத்தை தோற்கடித்து, அவனது வயிற்றில் நெருப்பாக நின்ற பெருமானே! உன்னை நாடி வந்திருக்கிறோம். நோன்புக்குத் தேவையான அருளை நீ தருவாயானால், உனது அருட்செல்வத்தையும், தொண்டினையும் பாடுவோம். வருத்தம் நீங்கி மகிழ்ந்திருப்போம்.

திருவெம்பாவை

பாடல்:

பூதங்கள் தோறும்நின்றாய் எனின் அல்லால்

போக்கிலன் வரவிலன் எனநினைப் புலவோர்

கீதங்கள் பாடுதல் ஆடுதல் அல்லால்

கேட்டறியோம்உனைக் கண்டறி வாரைச்

சீதங்கொள் வயல்திருப் பெருந்துறை மன்னா!

சிந்தனைக் கும்அரியாய்! எங்கள் முன்வந்து

ஏதங்கள் அறுத்தெம்மை ஆண்டருள் புரியும்

எம் பெருமான்! பள்ளி எழுந்தரு ளாயே!

விளக்கம்:

திருப்பெருந்துறையில் வாழ்கின்ற அரசே! பஞ்சபூதங்கள் ஒவ்வொன்றிலும் நிறைந்து, பிறப்பும் - இறப்பும் இல்லாதவன் என்று புலவர்கள் உன்னைப் புகழ்ந்து பாடுவதை நாங்கள் கேட்டறிந்துள்ளோம். ஆனால் உன்னைக் கண்டறிந்தவர்கள் பற்றி நாங்கள் அறிந்ததில்லை. குளிர்ந்த வயல்கள் சூழ்ந்த திருப்பெருந்துறையின் மன்னவனே! எங்கள் முன் வந்து நாங்கள் செய்யும் தவறுகளை நீக்கி எங்களை ஆட்கொண்டு அருள்புரிகின்ற எமது தலைவனே! உனது திருப்பள்ளியில் இருந்து எழுந்தருள்வாய்! 

இன்றைய பஞ்சாங்கம்

குரோதி ஆண்டு மார்கழி-25 (வியாழக்கிழமை)

பிறை: வளர்பிறை

திதி: தசமி நண்பகல் 12.03 மணி வரை பிறகு ஏகாதசி

நட்சத்திரம்: பரணி பிற்பகல் 3.05 மணி வரை பிறகு கார்த்திகை

யோகம்: சித்த, மரணயோகம்

ராகுகாலம்: நண்பகல் 1.30 மணி முதல் 3 மணி வரை

எமகண்டம்: காலை 6 மணி முதல் 7.30 மணி வரை

சூலம்: தெற்கு

நல்ல நேரம்: காலை 9 மணி முதல் 10 மணி வரை மாலை 4 மணி முதல் 5 மணி வரை

இன்று கார்த்திகை விரதம். சுவாமிமலை ஸ்ரீ முருகப்பெருமான் தங்கக் கவசம் அணிந்து வைரவேல் தரிசனம். ஆவுடையார்கோவில் ஸ்ரீ மாணிக்கவாசகர் உத்ராட்ச விமானத்தில் பிட்டு நேர்பட மண் சுமந்து போருளியக் காட்சி. திருப்போரூர் ஸ்ரீ முருகப் பெருமான் பால் அபிஷேகம். ஸ்ரீ வில்லிபுத்தூர் ஸ்ரீ ஆண்டாள் கண்ணன் திருக்கோலமாய் மாலை தந்தப் பரங்கி நாற்காலியில் பவனி. மதுரை ஸ்ரீ நவநீத கிருஷ்ண சுவாமி, கரூர் ஸ்ரீ ரங்கநாதர், நெல்லை ஸ்ரீ நெல்லையப்பர் கோவில்களில் புறப்பாடு. திருவல்லிக்கேணி ஸ்ரீ பார்த்தசாரதிப் பெரு மாள் நாச்சியாார் திருக்கோலம், மோகனாவதாரம். குறுக்குத்துறை ஸ்ரீ முருகப் பெருமான் பவனி. திரு வல்லிக்கேணி ஸ்ரீ ராகவேந்திர சுவாமிக்கு குருவார திரு மஞ்சனம். ஆலங்குடி ஸ்ரீ குரு பகவானுக்கு கொண்டைக் கடைலைச் சாற்று வைபவம். தக்கோலம் ஸ்ரீ தட்சிணா மூர்த்தி சுவாமிக்கு அபிஷேகம். திருப்பதி ஏழுமலையப்பன் புஷ்பாங்கி சேவை.

இன்றைய ராசிபலன்

மேஷம்-பாராட்டு

ரிஷபம்-வெற்றி

மிதுனம்-பரிசு

கடகம்-நலம்

சிம்மம்-சாந்தம்

கன்னி-கீர்த்தி

துலாம்- உதவி

விருச்சிகம்-போட்டி

தனுசு- ஆர்வம்

மகரம்-பக்தி

கும்பம்-நன்மை

மீனம்-மேன்மை

இன்றைய பஞ்சாங்கம்

குரோதி ஆண்டு மார்கழி-24 (புதன்கிழமை)

பிறை: வளர்பிறை

திதி: நவமி பிற்பகல் 2.16 மணி வரை பிறகு தசமி

நட்சத்திரம்: அசுவினி மாலை 4.35 மணி வரை பிறகு பரணி

யோகம்: மரண, சித்தயோகம்

ராகுகாலம்: நண்பகல் 12 மணி முதல் 1.30 மணி வரை

எமகண்டம்: காலை 7.30 மணி முதல் 9 மணி வரை

சூலம்: வடக்கு

நல்ல நேரம்: காலை 6 மணி முதல் 7 மணி வரை மாலை 4 மணி முதல் 5 மணி வரை

திருப்பதி ஸ்ரீ ஏழுமலையப்பன் சகஸ்ர கலசாபிஷேகம். மதுராந்தகம் ஏரிகாத்த ஸ்ரீ கோதண்டராம சுவாமிக்கு திருமஞ்சனம். திருப்பெருந்துறை ஸ்ரீ மாணிக்கவாசகர் ஊர்துவ தாண்டவ காட்சி. இரவு வெள்ளி யானை வாகனத்தில் பவனி. திருக்குற்றாலம் ஸ்ரீ குற்றாலநாதர் பஞ்ச மூர்த்திகளுடன் ரதோற்சவம். இரவு சுவாமி பூத வாகனத்திலும் அம்பாள் கிளி வாகனத்திலும் திருவீதியுலா. சிதம்பரம் ஸ்ரீ சிவபெருமான் ரிஷப வாகனத்தில் புறப்பாடு. ஸ்ரீ வில்லிபுத்தூர் ஸ்ரீ ஆண்டாள் கள்ளர் திருக்கோலமாய் பவனி. திருநெல்வேலி சமீபம் நான்காம் நவதிருப்பதி திருப்புளிங்குடி மூலவர் ஸ்ரீ பூமிபாலகர், ஸ்ரீ புளியங்குடி வள்ளியம்மை கோவிலில் அபிஷேகம். ஸ்ரீ ரங்கம் ஸ்ரீ நம்பெருமாள், ஸ்ரீ வைகுண்டம் ஸ்ரீ வைகுண்டபதி தேவக்கோட்டை ஸ்ரீ ரங்கநாதர் கோவில்களில் பெருமாள் புறப்பாடு. விருதுநகர், வேதாரண்யம் ஸ்ரீ சிவபெருமான் காலை சிறப்பு அபிஷேகம்.

இன்றைய ராசிபலன்

மேஷம்-நலம்

ரிஷபம்-பெருமை

மிதுனம்-அமைதி

கடகம்-நட்பு

சிம்மம்-சாந்தம்

கன்னி-வரவு

துலாம்- நன்மை

விருச்சிகம்-செலவு

தனுசு- புகழ்

மகரம்-இன்பம்

கும்பம்-சாதனை

மீனம்-கண்ணியம்

ஆண்டாள் தன்னுடைய திருப்பாவையில் முதல் ஐந்து பாடல்களின் வாயிலாக நோன்பு இருப்பதன் மாண்பைப் பற்றி சொல்கிறார். அடுத்துவரும் 6 முதல் 15 வரையான பாடல்களில் கண்ணனின் லீலைகளைப் பற்றி எடுத்துரைக்கிறார்.

அதோடு அறியாமையில் மூழ்கி உறங்கிக்கொண்டிருக்கும் ஆயர்குல பெண்களையும், மானிடர்களையும் விழித்தெழப் பாடுகிறார். 16 முதல் 25-ம் பாசுரம் வரை, கண்ணனின் மாளிகையிலும், அதன் சுற்றுப்புறத்திலும் இருக்கும் அருளைப் பெறும் விதமாக இருக்கிறது.

26-வது பாடலில் கண்ணனை நேரடியாக அழைத்து, ஆயர்குல பெண்கள் நோன்பு இருக்க தேவையானவற்றை பரிசாக அளிக்கும்படி கேட்கிறார்.

அடுத்து வரும் 27-வது பாடலில், கண்ணன் எப்படியும் தனக்கு பேரருளை தருவான் என்ற நம்பிக்கையில், அவன் கையைப் பிடிப்பது உறுதியாகிவிட்ட நிலையில், கண்ணன் தன்னை கைப்பிடிக்கும் சமயத்தில் அவனின் அழகுக்கு நிகராக தானும் ஓரளவேனும் அழகாக இருக்க வேண்டும் என்பதற்காக மணம் கமழும் மலர் சூட்டி, சில ஆபரணங்களை அணிந்து தன்னை அழகுபடுத்திக்கொள்வதாக கூறப்பட்டுள்ளது.

பாவை நோன்பு இருந்த ஆண்டாள், தனக்கும் அரங்கநாதருக்கும் திருமணம் செய்துவைத்தால், அக்காரவடிசலும், வெண்ணெயும் சமர்ப்பிப்பதாக கள்ளழகரிடம், ஆண்டாள் நாச்சியார் வேண்டிக்கொள்கிறாள்.

அவர் நினைத்தபடியே அரங்கநாதருடன் கைகோர்த்த ஆண்டாள் நாச்சியார், அரங்கனுடன் ஐக்கியமாகி விட்டார். ஆனால் கள்ளழகருக்கு அவர் சமர்ப்பிப்பதாக கூறிய அக்காரவடிசலும், வெண்ணெயும் சமர்ப்பிக்கப்படாமலேயே இருந்தது.

ஒன்றிரண்டு வருடங்கள் அல்ல... சுமார் 2 ஆயிரம் வருடங்கள் இந்த வேண்டுதல் நிறைவேறவே இல்லை. ஆண்டாள் வாழ்ந்ததாகக் கூறப்படும் காலத்திற்கு 2 ஆயிரம் வருடங்களுக்குப்பின் வந்த ராமானுஜர், ஆண்டாளின் ஆசையையும், அவரது வேண்டுதலையும் கேள்விப்பட்டார்.

அவர் ஆண்டாளின் நேர்த்திக்கடனை செலுத்துவதற்காக, கள்ளழகர் கோவிலின் முன்பாக வந்து அங்குள்ள அர்ச்சகரின் அனுமதியைப் பெற்று, நூறு அண்டாக்களில் அக்காரவடிசலையும், வெண்ணெயையும் சமர்ப்பித்தார்.

இதனால் 2 ஆயிரம் வருடங்களாக நிறைவேறாத ஆண்டாளின் வேண்டுதல், நேர்த்திக்கடன் நிறைவேறியது. அதை நிறைவேற்றியவர் ராமானுஜர்.

கள்ளழகருக்கு நேர்த்திக்கடன் செலுத்திய ராமானுஜர், அந்த பிரசாதத்தை எடுத்துக்கொண்டு திருவில்லிபுத்தூரில் கோவில் கொண்டிருந்த ஆண்டாளை பார்ப்பதற்காகச் சென்றார். ஆனால் வயது வித்தியாசம் பார்க்காத ஆண்டாள், தனக்கான வேண்டுதலை நிறைவேற்றிய ராமானுஜரை, 'அண்ணனே..' என்று அழைத்ததாக தல வரலாறு சொல்கிறது.

ஒரு பெண்ணின் மனதில் உள்ள விஷயங்களை நிறைவேற்ற வேண்டிய பொறுப்பு, அவளது தந்தைக்கு உண்டு. அதன்பிறகு அந்த பொறுப்பு அவளது அண்ணனுக்கு உரியது. அதனால் தான் ராமானுஜரை, ஆண்டாள் நாச்சியாா் 'அண்ணனே' என்று அழைத்திருக்கிறார்.

அன்று முதல் திருப்பாவையின் 27-ம் பாசுரத்தில் 'பால் சோறு மூட நெய் பெய்து..' என்று இருப்பதால், அக்காரவடிசலான பால்சோறு, நூறு அண்டாக்களில் சமர்ப்பிக்கும் வழக்கம், இன்றைக்கும் அழகர்மலையில் உள்ள கள்ளழகர் ஆலயத்தில் நடைபெற்று வருகிறது.

இது பிற்காலத்தில் பிற வைணவ ஆலயங்களிலும் செய்யும் ஒரு நடைமுறை வழக்கமாக மாறிப்போனது. திருவில்லிபுத்தூர் ஆண்டாள் கோவில், திருவரங்கம் அரங்கநாதர் கோவில், கள்ளழகர் ஆலயங்களில் இந்த விழா வெகு சிறப்பாக நடை பெறும்.

இந்த வைபவத்தின் போது, 120 லிட்டர் பால், 250 கிலோ அரிசி, 15 கிலோ கல்கண்டு, கிலோ கணக்கில் முந்திரி, பாதாம், உலர்ந்த திராட்சை சேர்த்து, பலமணி நேரம் சுண்டக் காய்ச்சித் தயாரிக்கும் அக்காரவடிசலும், வெண்ணெயும் கள்ளழகருக்கு சமர்ப்பிக்கப்படுகிறது.

'கூடாரை வெல்லும் சீர் கோவிந்தா! உன் தன்னைப்

பாடிப்பறை கொண்டு யாம் பெறும் சம்மானம்

நாடு புகழும் பரிசினால் நன்றாக

சூடகமே தோள் வளையே தோடே செவிப்பூவே

பாடகமே யென்றனைய பல்கலனும் யாமணிவோம்

ஆடையுடுப்போம் அதன் பின்னே பாற்சோறு

மூடநெய் பெய்து முழங்கை வழிவாரக்

கூடியிருந்து குளிர்ந்தேலோ ரெம்பாவாய்'

மேற்கண்ட இந்தத் திருப்பாவையின் 27-வது பாடலை, அதற்குரிய மார்கழி 27-ந் தேதி, பக்தா்கள் அனைவரும் தங்கள் இல்லங்களிலும், அருகில் உள்ள கோவில்களிலும் பால்சோறு எனப்படும் அக்காரவடிசல் செய்து, இறைவனுக்கு நைவேத்தியமாக படைத்து, அக்கம் பக்கத்தினர் அனைவருக்கும் பகிர்ந்து உண்ணலாம்.

கூடாரவல்லி தினம் என்பது கண்ணன், ஆண்டாளை ஆட்கொள்ளப் போவதாக, ஆண்டாள் உறுதியாக நம்பிய நன்னாள். ஜீவாத்மா- பரமாத்மா தத்துவத்தில், பரமாத்மா வந்து ஜீவாத்மாவை தன்னுடன் ஐக்கியமாக்கிக்கொள்வது உறுதி என்பதை நிரூபித்த நிகழ்வு தினம் இது.

இந்த நாளில் பெண்கள் புத்தாடை அணிந்து கொள்வதும், அணிகலன்கள் பூட்டிக்கொள்வதும் வாழ்வில் ஒளியேற்றும். ஆண்டாளின் மன விருப்பத்தை, அரங்கநாதர் வந்து நிறைவேற்றிக் கொடுத்ததுபோல, இந்த நாளில் வேண்டிக்கொள்ளும் பெண்களின் மனவிருப்பத்தை, ஆண்டாளே நிறைவேற்றித் தருவார் என்பது நம்பிக்கை.

7-ந்தேதி (செவ்வாய்)

* திருவில்லிபுத்தூர் ஆண்டாள் சன்னிதியில் எண்ணெய்க் காப்பு உற்சவம் ஆரம்பம்.

* திருநெல்வேலி நெல்லையப்பர்-காந்திமதி அம்மன் ரிஷப வாகனத்தில் பவனி.

* ஆழ்வார்திருநகரி நம்மாழ்வார் திருவீதி உலா.

* குரங்கணி முத்துமாலையம்மன் புறப்பாடு.

* சமநோக்கு நாள்.

8-ந்தேதி (புதன்)

* குற்றாலம் திருக்குற்றாலநாதர் பஞ்சமூர்த்திகளுடன் ரத உற்சவம்.

* சிதம்பரம் சிவபெருமான் ரிஷப வாகனத்தில் பவனி.

* திருவல்லிக்கேணி பார்த்தசாரதிப் பெருமாள், முரளி கண்ணன் திருக்கோலம்.

* திருவைகுண்டம். திருமாலிருஞ்சோலை

* கள்ளழகர் தலங்களில் பகற்பத்து உற்சவம்.

* சமநோக்கு நாள்.

9-ந்தேதி (வியாழன்)

* திருவில்லிபுத்தூர் ஆண்டாள் கண்ணன் திருக்கோலம்.

* திருவரங்கம் நம்பெருமாள் மூலஸ்தானத்தில் இருந்து நாச்சியார் திருக்கோலத்துடன் அர்ச்சுன மண்டபம் எழுந்தருளல்.

* திருவல்லிக்கேணி பார்த்தசாரதிப் பெருமாள் நாச்சியார் திருக்கோலம்.

* கீழ்நோக்கு நாள்.

10-ந்தேதி (வெள்ளி)

* வைகுண்ட ஏகாதசி.

* கார்த்திகை விரதம்.

* திருவரங்கம் நம்பெருமாள் முத்தங்கி சேவை.

* திருநெல்வேலி நெல்லையப்பர், சங்கரன்கோவில் சிவபெருமான் பவனி.

* கீழ்நோக்கு நாள்.

11-ந்தேதி (சனி)

* சனிப் பிரதோஷம்.

* ஆவுடையார்கோவில் மாணிக்கவாசகர் மகாரத உற்சவம், மாலை ஆனந்த தாண்டவ காட்சி.

* சிதம்பரம் சிவபெருமான் தங்க ரதத்தில் பிட்சாண்டக் காட்சி.

* மேல்நோக்கு நாள்.

12-ந்தேதி (ஞாயிறு)

* மதுரை மீனாட்சி சுந்தரேசுவரர் கோவிலில் இரவு நடேசர் மகா அபிஷேகம்.

* காஞ்சிபுரம் வரதராஜப் பெருமாள், மதுரை கூடலழகர் தலங்களில் இராபத்து உற்சவ சேவை.

* சங்கரன்கோவில் சிவபெருமான் ரத உற்சவம், சுவாமி அம்பாள் புருசாமிருக வாகனத்தில் பவனி.

* சமநோக்கு நாள்.

13-ந்தேதி (திங்கள்)

* பவுர்ணமி விரதம்.

* ஆருத்ரா தரிசனம்.

* போகிப்பண்டிகை.

* திருச்செந்தூர் சுப்பிரமணியர் கோவிலில் பார்வதி அம்மன் ஊஞ்சல்.

* மேல்நோக்கு நாள்.