பெண்ணாடம்:
பெண்ணாடம் அருகேயுள்ள கொத்தட்டையைச் சேர்ந்தவர் வேல்முருகன், கொத்தட்டை ஊராட்சி அ.தி.மு.க. செயலாளராக இருந்து வருகிறார். இவரது நண்பர் மேகராஜன்(வயது 63). ஓய்வு பெற்ற ஆசிரியர்.
கடந்த 21-ந் தேதி இருவரும் மோட்டார் சைக்கிளில் பெண்ணாடத்தில் இருந்து கொத்தட்டைக்கு மோட்டார் சைக்கிளில் புறப்பட்டனர். பெண்ணாடம் புதிய பஸ் நிலையம் அருகே மோட்டார் சைக்கிள் சென்று கொண்டிருந்தது. அப்போது தளவாய் கிராமத்தைச் சேர்ந்த அஜித்குமார்(21), வினோத் குமார் (20), முத்துவேல் ஆகியோர் ஒரே மோட்டார் சைக்கிளில் வந்தனர். 2 மோட்டார் சைக்கிள்களும் நேருக்கு நேர் மோதிக்கொண்டன.
இதில் வேல்முருகன், மேகராஜன், அஜித்குமார், வினோத்குமார் ஆகிய 4 பேரும் படுகாயம் அடைந்தனர். அஜித்குமாரும், வினோத் குமாரும் 108 ஆம்புலன்ஸ் மூலம் பெரம்பலூர் அரசு ஆஸ்பத்திரியில் சேர்க்கப்பட்டனர்.
அங்கு அவர்களுக்கு தீவிர சிகிச்சை அளிக்கப்படுகிறது. வேல்முருகனும், மேகராஜனும் திருச்சி அரசு ஆஸ்பத்திரியில் அனுமதிக்கப்பட்டனர். அங்கு சிகிச்சை பலனின்றி ஆசிரியர் மேகராஜன் பரிதாபமாக இறந்தார். விபத்து குறித்து பெண்ணாடம் போலீசார் வழக்குப்பதிவு செய்து விசாரித்து வருகிறார்கள்.
