பவானிசாகர்:
தென்னிந்தியாவின் மிகப்பெரிய மண் அணையும், ஈரோடு மாவட்டத்தின் முக்கிய நீராதாரமாகவும் பவானிசாகர் அணை விளங்குகிறது. இந்த அணையின் நீர்பிடிப்பு பகுதிகளாக நீலகிரி மலைப்பகுதி, குந்தா, கூடலூர், எமரால்டு ஆகிய பகுதிகள் உள்ளன. அணையின் கொள்ளளவு 105 அடியாகும்.
அணையில் இருந்து கீழ்பவானி, தடப்பள்ளி, அரக்கன்கோட்டை, காலிங்கராயன் வாய்க்கால்களில் திறந்துவிடப்படும் தண்ணீர் மூலம் 2 லட்சத்து 50 ஆயிரம் ஏக்கர் பரப்பளவிலான நிலங்கள் பாசன வசதி பெறுகின்றன. அதுமட்டுமின்றி ஈரோடு மாவட்ட மக்களின் குடிநீர் தேவையும் இந்த அணையின் தண்ணீர் மூலம் பூர்த்தி செய்யப்படுகிறது.
கடந்த சில நாட்களாக நீர்பிடிப்பு பகுதியில் பெய்த பலத்த மழை காரணமாக அணைக்கு நீர்வரத்து அதிகரித்தது. இதனால் அணையின் நீர்மட்டம் மளமளவென உயர்ந்து வந்தது. இதைத்தொடர்ந்து அணையின் நீர்மட்டம் கடந்த 10-ந் தேதி 100 அடியை தாண்டியது.
எனினும் கடந்த 2 நாட்களுக்கும் மேலாக அணைக்கு நீர்வரத்து வினாடிக்கு 3 ஆயிரம் கன அடிக்கு மேல் இருந்து வந்தது. இதன்காரணமாக அணையின் நீர்மட்டம் நேற்று 101 அடியை தாண்டியது.
நேற்று முன்தினம் மாலை 4 மணி அளவில் அணையின் நீர்மட்டம் 100.86 அடியாக இருந்தது. அணைக்கு வினாடிக்கு 3 ஆயிரத்து 144 கன அடி தண்ணீர் வந்தது. அணையில் இருந்து தடப்பள்ளி, அரக்கன்கோட்டை வாய்க்கால் பாசனத்துக்காக வினாடிக்கு 700 கன அடியும், காலிங்கராயன் வாய்க்கால் பாசனத்துக்காக வினாடிக்கு 500 கன அடியும் என மொத்தம் வினாடிக்கு 1,200 கன அடி தண்ணீர் திறந்துவிடப்பட்டது.
நேற்று மாலை 4 மணி நிலவரப்படி அணையின் நீர்மட்டம் 101.16 அடியாக இருந்தது. அணைக்கு வினாடிக்கு 3 ஆயிரத்து 428 கன அடி தண்ணீர் வந்தது. அணையில் இருந்து தடப்பள்ளி, அரக்கன்கோட்டை வாய்க்கால் பாசனத்துக்காக வினாடிக்கு 700 கன அடியும், காலிங்கராயன் வாய்க்கால் பாசனத்துக்காக வினாடிக்கு 500 கன அடியும் என மொத்தம் வினாடிக்கு 1,200 கன அடி தண்ணீர் திறந்துவிடப்பட்டது.
பவானிசாகர் அணையின் நீர்மட்டம் 101 அடியை தாண்டி உள்ளதால் விவசாயிகள் மகிழ்ச்சி அடைந்து உள்ளனர்.
