வாணியம்பாடி:
வாணியம்பாடியை அடுத்த கோணாமேடு பகுதியை சேர்ந்தவர் மூர்த்தி. இவரது மகன் எழிலரசன் (வயது 27). இவர் தனியார் தோல் தொழிற்சாலையில் வேலைபார்த்து வந்தார். நேற்று காலை வாணியம்பாடி கோணாமேடு பகுதியில் இருந்து வளையாம்பட்டு நோக்கி மோட்டார் சைக்கிளில் சென்று கொண்டிருந்தார். அப்போது எதிரே வந்த கிரேன், மோட்டார் சைக்கிள் மீது மோதியது.
இதில் தூக்கி வீசப்பட்ட எழிலரசன் படுகாயம் அடைந்தார். அவரை உடனடியாக வாணியம்பாடி அரசு மருத்துவமனைக்கு கொண்டு சென்றனர். ஆனால் அவர் வழியிலேயே இறந்துவிட்டார்.
இதுகுறித்து வாணியம்பாடி டவுன் போலீசார் வழக்குப்பதிவு செய்து கிரேன் ஓட்டி வந்த வாணியம்பாடியை அடுத்த பள்ளிப்பட்டு கிராமத்தை சேர்ந்த ரஞ்சித் (வயது 30) என்பவரை கைது செய்தனர்.
