ஜோலார்பேட்டை:
ஜோலார்பேட்டை அடுத்த வக்கணம்பட்டி பகுதியைச் சேர்ந்த சிறுமி ஒருவர் தனியார் பள்ளியில் 2-ம் வகுப்பு படித்து வருகிறார்.
இவர் நேற்று பள்ளிக்குச் சென்று வீடு திரும்பினார். அதன் பிறகு பெற்றோருடன் சந்தைக்கோடியூர் பகுதியில் உள்ள கடைக்கு சென்றார். அப்போது போலீஸ் நிலைய வீதியில் கடைக்குச் சென்ற பள்ளி மாணவியின் கையை நாய் கடித்தது. காயமடைந்த சிறுமி சந்தைக்கோடியூர் ஆரம்ப சுகாதார நிலைய மருத்துவமனையில் சிகிச்சை பெற்றார்.
மேலும் அந்த நாய் கடைக்கு சென்ற ஒருவரையும் கடித்தது. இதனால் அப்பகுதி மக்கள் பீதி அடைந்தனர். இதுகுறித்து ஜோலார்பேட்டை போலீஸ் நிலையத்தில் புகார் கொடுத்தனர்.
புகாரின் பேரில் ஜோலார்பேட்டை போலீசார் உடனடியாக ஜோலார்பேட்டை நகராட்சி ஆணையாளருக்கு நாய்கள் பிடிக்க நடவடிக்கை எடுக்க கோரி தகவல் தெரிவித்தனர்.
தகவலின் பேரில் ஜோலார்பேட்டை நகராட்சி ஆணையாளர் பழனி நாய்கள் பிடிக்க சம்மந்தப்பட்ட அதிகாரிகளிடம் பேச்சு வார்த்தை நடத்தி விரைவில் நாய்கள் பிடிக்க நடவடிக்கை எடுப்பதாக தெரிவித்தார்.
