ஜோலார்பேட்டை:
திருப்பத்துார் மாவட்டம், ஆம்பூர் அருகே மேல் கொத்தகுப்பம் கூத்தாண்டவர் நகர் பகுதியைச் சேர்ந்தவர் ஜெயபால் இவரது மகன் திலீப்குமார் (வயது 30) இவர் ஆம்பூர் பகுதியில் உள்ள ஷூ கம்பெனி நிறுவனத்தில் பணிபுரிந்து வருகிறார்.
ஏலகிரிமலை
நேற்று விடுமுறை என்பதால் ஜெயபால் தனது மனைவி தனலட்சுமி, மகள்கள் யாக்ஷினி (8), மயூரி (5), ரோஷினி (1 1/2) மற்றும் தனலட்சுமி யின் தங்கை தனம் (24) ஆகிய 6 பேர் ஒரே மோட்டார் சைக்கிளில் அழைத்துக் கொண்டு நேற்று காலை ஏலகிரி மலைக்கு சுற்றுலா சென்று கண்டு களித்தனர்.
அதன் பிறகு ஏலகிரி மலை சுற்றுலா முடிந்துக்கொண்டு நேற்று மாலை திலீப்குமார் தனது குடும்பத்தினர் உள்பட 6 பேரை மோட்டார் சைக்கிளில் அமரவைத்து மலை உச்சியில் இருந்து கீழ் நோக்கி வந்து கொண்டிருந்தார்.
விபத்தில் சிறுமி சாவு
அப்போது 3 வது திருவள்ளுவர் கொண்டை ஊசி வளைவு அருகே சென்ற போது, மோட்டார் சைக்கிள் தனது கட்டுப்பாட்டை இழந்து சாலையோரத்தில் இருந்த பாறை மீது மோதி விபத்துக்குள்ளானது.
இதில் மோட்டார் சைக்கிள் தூக்கி வீசப்பட்டதில் முன்னாள் அமர்ந்து இருந்த யாக்ஷினி பாறை மீது விழுந்ததில் தலையில் பலத்த காயம் ஏற்பட்டு சம்பவம் இடத்திலேயே பரிதாபமாக உயிரிழந்தார்.
மேலும் திலீப்குமார் மற்றும் தனலட்சுமி ஆகியோர் படுகாயம் அடைந்தனர். படுகாயம் அடைந்தவர்களை அவ்வழியாக சென்று சுற்றுலா பயணிகள் மீட்டு அரசு மருத்துவமனையில் சேர்த்தனர். அங்கு 2 பேர் சிகிச்சை பெற்று வருகின்றனர்.
விசாரணை
இது குறித்து தகவலறிந்ததும் ஏலகிரி மலை போலீஸ் சப்-இன்ஸ்பெக்டர் கோதண்டன் மற்றும் போலீசார் சம்பவ இடத்துக்கு விரைந்து சென்று சிறுமியின் பிணத்தை கைப்பற்றி பிரேத பரிசோதனைக்காக திருப்பத்தூர் அரசு மருத்துவமனைக்கு அனுப்பி வைத்தனர்
இது குறித்து ஏலகிரி மலை போலீசார் வழக்கு பதிவு செய்து விசாரணை செய்து வருகின்றனர். ஏலகிரி மலைக்கு சுற்றுலா சென்ற சிறுமி விபத்தில் பரிதாபமாக உயிரிழந்தது அப்பகுதியில் சோகத்தை ஏற்படுத்தியது.
