திருவண்ணாமலை

வந்தவாசி:

வந்தவாசி அடுத்த சாலைவேடு கிராமத்தை சேர்ந்தவர் ஏழுமலை (வயது 42). விவசாயி. இவர் தனது நிலத்தில் வேர்க்கடலை பயிரிட்டுள்ளார்.

முயல் வேட்டை

வயலில் காட்டுப்பன்றிகள் தொல்லை அதிகமாக உள்ளதால் சுற்றி மின் வேலி அமைத்திருந்தார். அதே பகுதியில் உள்ள இருளர் காலணியை சேர்ந்தவர் சக்திவேல் (18) என்பவர் தனது 17 வயது நண்பனுடன் முயல் மற்றும் எலிகளை வேட்டையாடுவதற்காக வயலுக்கு சென்றார்.

நள்ளிரவு மின் வேலி ஒயர் இருப்பதை அறியாமல் சக்திவேல் அதனை மிதித்தார். அதிலிருந்து மின்சாரம் தாக்கி அவர் சம்பவ இடத்திலேயே பரிதாபமாக இறந்தார். இதைப் பார்த்த அவனுடன் சென்ற சிறுவன் அலறி அடித்துக் கொண்டு அங்கிருந்து ஓடி விட்டார். வயல்வெளிக்கு தண்ணீர் பாய்ச்சுவதற்காக ஏழுமலை சென்றபோது மின்வெளியில் சிக்கி சக்திவேல் உயிரிழந்திருப்பதை கண்டு அதிர்ச்சி அடைந்தார்.

அதனை மறைப்பதற்காக சக்திவேலின் உடலை 10 கிலோ மீட்டர் தொலைவில் எடுத்துக்கொண்டு செங்கல்பட்டு மாவட்டம் ராமாபுரம் பகுதிக்கு பைக்கில் சென்றார். அங்கு அடர்ந்த காட்டுப் பகுதியில் வீசிவிட்டு திரும்பி விட்டார்.

இச்சம்பவம் குறித்து சிறுவன், சக்திவேல் பெற்றோரிடம் நேற்று காலை தெரிவித்தார். அதிர்ச்சியடைந்த அவர்கள் கீழ் கொடுங்காலூர் போலீசில் புகார் அளித்தனர். போலீசார் ஏழுமலையிடம் விசாரணை நடத்தியபோது சக்திவேலின் உடலை ராமாபுரம் காட்டில் கொண்டு போய் வீசியதை ஒப்புக்கொண்டார். பின்னர் போலீசார் சம்பவ இடத்திற்கு விரைந்து சென்று சக்திவேல் உடலை மீட்டு பிரேத பரிசோதனைக்காக வந்தவாசி அரசு மருத்துவமனைக்கு அனுப்பி வைத்தனர். இது சம்பந்தமாக போலீசார் வழக்கு பதிவு செய்து ஏழுமலையை கைது செய்து விசாரணை நடத்தி வருகின்றனர்.

வேங்கிக்கால்:

திருவண்ணாமலை அருணாசலேஸ்வரர் கோவிலில் கார்த்திகை தீப திருவிழா வருகிற நவம்பர் மாதம் 14-ந் தேதி துர்க்கை அம்மன் உற்சவத்துடன் தொடங்குகிறது.

மூலவர் சன்னதி முன்பு உள்ள தங்க கொடிமரத்தில் வரும் நவம்பர் 17-ந் தேதி கொடியேற்றம் நடைபெற்றதும், 10 நாள் உற்சவம் ஆரம்பமாகும். 7-ம் நாளில் 'மகா தேரோட்டம்' நடைபெற உள்ளது.

கார்த்திகை தீப திருவிழாவின் முக்கிய நிகழ்வாக 'மலையே மகேசன்' என போற்றப்படும் 2,668 அடி உயரமுள்ள அண்ணாமலையின் உச்சியில் வரும் நவம்பர் 26-ந் தேதி மாலை 6 மணிக்கு மகாதீபம் ஏற்றப்படுகிறது.

ஜோதி வடிவில் அண்ணாமலையார் காட்சி கொடுப்பார். தொடர்ந்து, 11 நாட்களுக்கு மகா தீப தரிசனத்தை பக்தர்கள் காணலாம்.

கார்த்திகை தீபத்திரு விழாவை முன்னிட்டு பூர்வாங்க பணிகளுக்கான பந்தக்கால் நடும் முகூர்த்த நிகழ்ச்சி இன்று காலை நடந்தது.

பந்தக்கால் நடும் நிகழ்ச்சியை முன்னிட்டு அருணாசலேஸ்வரர் கோவிலில் உள்ள சம்பந்த விநாயகர் சன்னதியில் பந்தக்காலிற்கு சிறப்பு அபிஷேக ஆராதனைகள் செய்யப்பட்டன.

பின்னர் தேரடி முனீஸ்வரர் கோவில் மற்றும் பஞ்சமூர்த்திகளின் திருத்தேர்களுக்கு முன்பு வைத்து பூஜை செய்யப்பட்டது.

இதனை தொடர்ந்து ராஜகோபுரம் முன்பு காலை 8.25 மணிக்கு துலா லக்கினத்தில் பந்தக்கால் நடப்பட்டது.

இதில் கலெக்டர் பா.முருகேஷ், கோவில் இணை ஆணையர் ஜோதி, அறங்காவலர் குழு தலைவர் இரா.ஜீவானந்தம், உறுப்பினர்கள் டிவிஎஸ் ராஜாராம், கோமதி குணசேகரன், சினம் பெருமாள், டாக்டர் மீனாட்சி சுந்தரம் உட்பட பலர் கலந்து கொண்டனர். 

வேங்கிக்கால்:

திருவண்ணாமலை மாவட்டத்தில் உள்ள பொதுமக்கள் டெங்கு காய்ச்சலில் இருந்து காத்துக்கொள்ள வீடுகளை சுத்தமாக வைத்து தண்ணீர் சேகரிக்கும் பாத்திரங்களை மூடி வைக்க வேண்டும் என கலெக்டர் பா.முருகேஷ் கேட்டுக்கொண்டார்.

தற்போது பருவமழை மற்றும் பருவநிலை மாற்றத்தால் தொற்று நோய்களான டெங்கு, சிக்கன்குனியா, லேப்டோஸ்பைரோசிஸ், ஸ்க்ரப்டைப்பஸ் போன்ற தொற்று நோய்கள் உருவாகலாம்.

நோய் தொற்றை தடுக்கும் பொருட்டு வீடு வீடாக சென்று கொசு மருந்து தெளித்தல், தண்ணீரில் உள்ள குளோரின் அளவை ஆய்வு செய்தல், சிறப்பு மருத்துவ முகாம்கள் நடத்தி ரத்த பரிசோதனைகள் செய்தல் உள்ளிட்ட பணிகள் நடைபெற்று வருகிறது.

ஏ.டி.எஸ். எனும் கொசு கடிப்பதன் மூலம் டெங்கு காய்ச்சல் பரவுகிறது.

டெங்கு காய்ச்சலால் பாதிக்கப்பட்ட நபரை கடிக்கும் ஏடிஸ் கொசு, ஆரோக்கியமாக உள்ள நபரை கடிப்பதால் டெங்கு காய்ச்சல் பரவுகிறது. ஏடிஸ் கொசு என்பது சுத்தமான தண்ணீரில் உற்பத்தியாகிறது.

தண்ணீரை சேமித்து வைக்கும் சிமெண்ட் தொட்டி, டிரம், குடங்கள், மண்பாண்டங்கள், டயர்கள், தேங்காய் மட்டைகள், உரல், ஆட்டுக்கல், உபயோகமற்ற பிளாஸ்டிக் கப்புகள், மேல்நிலை நீர்தேக்கத் தொட்டி, கீழ்நிலை நீர் தேக்க தொட்டி, குளிர்சாதன பெட்டி, ஏர்கூலர் போன்றவற்றிலிருந்தும் கொசு உற்பத்தியாகும்.

காய்ச்சல் ஏற்பட்ட நபர்கள் சுயமாக மருத்துவ சிகிச்சை எடுத்துக் கொள்ளாமல் அரசு ஆரம்ப சுகாதார நிலையங்கள், மருத்துவமனைகள், மருத்துவ கல்லூரிகளுக்கு சென்று சிகிச்சை பெறலாம்.

காய்ச்சல் 3 நாட்களுக்கு மேல் நீடித்தால் ரத்த பரிசோதனை செய்ய வேண்டும் என கலெக்டர் தெரிவித்தார்.

திருவண்ணாமலை:

திருவண்ணாமலை அருணாசலேஸ்வரர் கோவில் பின்புறம் உள்ள மலையை சிவனாக வணங்கி 14 கிலோமீட்டர் தூரம் கிரிவலம் வருகின்றனர்.

இதில் ஒவ்வொரு மாதம் பவுர்ணமி தினத்தில் லட்சக்கணக்கான பக்தர்களும் மற்றும் தினந்தோறும் பல ஆயிரக்க ணக்கான பக்தர்கள் வெளிநாடு வெளி மாநிலம் வெளி மாவட்டம் உள்ளூர் பக்தர்கள் என கிரிவலம் செல்கின்றனர்.

கிரிவல பாதையில் அவ்வப்போது பல்வேறு குற்ற செயல்களை நடைபெற்று வருவதை தொடர்ந்து 8 இடங்களில் புறக்காவல் நிலையங்கள் அமைக்கப்பட்டு போலீசார் கண்காணித்து வருகின்றனர்.

இதனைத் தொடர்ந்து மோட்டார் சைக்கிளில் 2 கிலோ மீட்டருக்கு ஒரு ரோந்து போலீசார் போடப்பட்டுள்ளனர்.

மேலும் 14 கிலோமீட்டர் சுற்றிலும் சுமார் 130 கேமராக்களும் பொருத்தப்பட்டிருந்தன. இந்த சிசிடி கேமரா மூலம் பல்வேறு குற்ற செயல்களை அவ்வப்போது கண்டுபிடித்து போலீசார் நடவடிக்கைகள் எடுத்து வந்தனர்.

இதில் ஏ.டி.எம். கொள்ளையில் ஈடுபட்ட வட மாநில கொள்ளையர்களை இந்த கேமராக்கள் மூலம் தான் கண்டறியப்பட்டன என்பது குறிப்பிடத்தக்கது.

கடந்த சில மாதங்களாகவே இந்த கேமராக்கள் பராமரிப்பு இன்றி பொருத்தப்பட்ட திசையில் இருந்து மாறியும் பழுதடைந்தும் கிடக்றிது.

தற்போது வெறும் 10 கேமராக்கள் மட்டுமே செயல்பாட்டில் இருந்து வருகின்றன. இதனால் பக்தர்கள் பெரும் அதிர்ச்சி அடைந்துள்ளனர்.

கிரிவலப் பாதையில் பொருத்தப்பட்டுள்ள இந்த 130 கேமராக்களையும் பராமரிக்க பணியாளர்கள் நியமிக்கப்பட்டுள்ளனர். ஆனால் அவர்கள் இந்த கேமராக்களை ஏன் பராமரிக்கவில்லை என்பது குறித்து தெரியவில்லை. ேபாலீசார் பராமரிக்கும் பணி அவர்களிடம் இல்லாததால் மிகவும் வேதனை அடைந்து வருகின்றனர்.

இது சம்பந்தமாக கலெக்டர் நடவடிக்கை எடுக்க வேண்டும் என பக்தர்கள் வலியுறுத்தி உள்ளனர்.

திருவண்ணாமலை:

தென்பெண்ணையாறு நீர் பிடிப்பு பகுதிகளில் கனமழை பெய்து வருகிறது. இதனால் சாத்தனூர் அணையின் நீர்மட்டம் அதிகரித்து வருகிறது. அணைக்கு நேற்று பிற்பகல் பிற்பகல் 2 மணி நிலவரப்படி விநாடிக்கு ஆயிரம் கனஅடி நீர் வந்து கொண்டிருந்தது.

இதனால்,119 அடி உயரம் கொண்ட அணையின் நீர்மட்டம் தற்போது 114 அடியை எட்டியது. அணையில் 6200 மில்லியன் கனஅடி தண்ணீர் உள்ளது.இதனால், பெண்ணையாற்று கரையோரம் எச்சரிக்கை விடுக்கப்பட்டுள்ளது.

இதுகுறித்து திருவண்ணாமலை, தண்டராம்பட்டு, செங்கம் மற்றும் கள்ளக்குறிச்சி மாவட்டம் திருக்கோவிலூர் தாசில்தார்களுக்கு நீர்வளத் துறையினர் கடிதம் அனுப்பி உள்ளனர்.

அதில் கூறியிருப்பதாவது:-

சாத்தனூர் அணையின் நீர்மட்டம் 114 அடியை எட்டியுள்ளது. 119 அடி உயரத்தில் 5 அடி மட்டும் குறைவாக உள்ளது. அணைக்கு நீர்வரத்து தொடர்ந்து அதிகரித்து வருகிறது.

விநாடிக்கு 10 ஆயிரம் கன அடி தண்ணீர் வரத்து ஏற்படும்போது, முழுமையாக திறந்துவிடப்படும்.

எனவே, சேதம் மற்றும் இழப்பு ஏற்படுவதை தடுக்க முன்னெச்சரிக்கை நடவடிக்கை எடுக்குமாறு கேட்டுக்கொள்வதாக தெரிவித்துள்ளனர்.

இதுகுறித்து சாத்தனூர் அணை அதிகாரி தெரிவித்துள்ளதாவது:-

அணைக்கு விநாடிக்கு ஆயிரம் கனஅடி தண்ணீர் வருகிறது. நீர்வரத்து திடீரென அதிகரிக்கும் சூழல் உள்ளது. இதனால், அணை யின் நீர்மட்டம் கிடுகிடுவென 117 அடியை எட்டிவிடும்.

அப்போது நீர்வரத்து தொடர்ந்தால், 11 கண் மதகுகள் வழியாக, தென் பெண்ணையாற்றில் தண்ணீர் திறந்துவிடப்படும். எனவே, 114 அடியை எட்டியுள்ள நிலையில், கரையோர கிராமங்களுக்கு முதற்கட்ட எச்சரிக்கை விடுக்கப்பட்டுள்ளது.

வெள்ள அபாய எச்சரிக்கை

தென்பெண்ணை ஆற்றின் கரையோரங்களில் வசிக்கும் மக்கள், பாதுகாப்பான இடங்களுக்கு செல்ல தயாராக இருக்க வேண்டும்.

மேலும், தென்பெண்ணை ஆற்றில் கால்நடைகளை குளிக்க வைக்கவும், மற்றும் துணி களை துவைக்கவும் கூடாது. இதேபோல், ஆற்றை கடந்து செல்லும் முயற்சியிலும் ஈடுபட வேண்டாம். நீர்வரத்து எப்போது வேண்டுமானாலும் அதிகரிக்கும்.

திருவண்ணாமலை, கள்ளக்குறிச்சி, விழுப்புரம், கடலூர் ஆகிய மாவட்டங்களில் தென்பெண்ணை ஆற்றின் கரையோரங்களில் வசிக்கும் மக்கள் அனைவரும் மிகுந்த எச்சரிக்கையுடன் இருக்க வேண்டும்.

4 மாவட்ட நிர்வாகமும் முன்னெச்சரிக்கை நடவடிக்கை களை மேற்கொள்ளுமாறு தெரிவிக்கப்பட்டுள்ளது என கூறினார்.

செய்யாறு:

செய்யாறு அடுத்த எச்சூர் கிராமத்தை சேர்ந்தவர் விஜயகுமார் (வயது 28). இ- சேவை மையம் நடத்தி வருகிறார்.

அதே கிராமத்தை சேர்ந்தவர்கள் சரவணன் (30), மற்றொரு சரவணன் (29) உதயகுமார் (33). கூலி தொழிலாளிகள்.

நேற்று முன்தினம் 3 வாலிபர்களும் பைக்கில் விஜயகுமாரின் கடைக்கு வந்தனர். அப்போது பைக்கை கடையின் முன்பு வெளியே நிறுத்தினர்.

இதனை கண்ட விஜயகுமாரின் நண்பர் சீனிவாசன் என்பவர் ஏன் கடையின் வெளியே பைக்கை நிறுத்துகிறீர்கள் என்று கேட்டார். அப்போது 3 வாலிபர்களும் சீனிவாசனிடம் வாக்குவாதத்தில் ஈடுபட்டனர்.

இதனை பார்த்த விஜயகுமார் ஏன் தகராறில் ஈடுபடுகிறீர்கள் என்று கேட்டார். இதனால் ஆத்திரமடைந்த 3 வாலிபர்கள் விஜயகுமாரை சரமாரியாக தாக்கினர்.

இதனை தடுக்க வந்த விஜயகுமாரின் தந்தை முனியப்பனை கத்தியால் வெட்டி கொலை மிரட்டல் விடுத்தனர்.

இதில் காயம் அடைந்த விஜயகுமார் மற்றும் முனியப்பனை அங்கிருந்தவர்கள் மீட்டு செய்யாறு அரசு மருத்துவ மனைக்கு சிகிச்சைக்காக அனுப்பி வைத்தனர். இது குறித்து அனக்காவூர் போலீசில் புகார் அளிக்கப்பட்டது.

புகாரின் பேரில் போலீசார் வழக்கு பதிவு செய்து சரவணன், உதயகுமார் உள்பட 3 பேரை நேற்று கைது செய்தனர்.

செங்கம்:

செங்கம் அடுத்த தோக்கவாடி பகுதியை சேர்ந்தவர் காசியம்மாள் (வயது 80).

இவர் இன்று காலை செங்கம் புதிய பஸ் நிலையம் அருகே பெங்களூரு தேசிய நெடுஞ்சாலையில் நடந்து சென்று கொண்டிருந்தார்.

அப்போது அந்த வழியாக பள்ளி மாணவர்களை ஏற்றிக்கொண்டு வந்த தனியார் பஸ் மூதாட்டி மீது எதிர்பாராத விதமாக மோதியது.

இதில் தலை நசுங்கி சம்பவ இடத்திலேயே காசியம்மாள் பரிதாபமாக இறந்தார்.

புதுப்பாளையம்:

செங்கம் அடுத்த பெரிய தள்ளபாடியை சேர்ந்தவர் மதன்குமார் (வயது 18).

இவர் முன்னூர்மங்கலம் கிராமத்தில் உள்ள பாட்டி வீட்டில் தங்கி அருகே உள்ள தனியார் தொழில்நுட்பக் கல்லூரியில் படித்து வந்தார்.

விநாயகர் சதுர்த்தியையொட்டி அப்பகுதியில் வீட்டின் அருகே நண்பர்களுடன் சேர்ந்து விநாயகர் சிலை வைத்து வழிபட்டு வந்தார். நேற்று மாலை விநாயகர் சதுர்த்தி நிகழ்ச்சிக்காக மைக் செட் ஒலி, ஒளி அமைக்கப்பட்டு இருந்தது.

மதன்குமார் மைக்கை கையில் வைத்திருந்ததாக கூறப்படுகிறது. அப்போது அந்த மைக்கில் இருந்து மின்சாரம் பாய்ந்ததாக தெரிகிறது. இதில் மதன் குமார் தூக்கி வீசப்பட்டு மயங்கி கீழே விழுந்தார்.

உடனடியாக உறவினர்கள் அவரை மீட்டு செங்கம் அரசு மருத்து வமனைக்கு சிகிச்சைக்காக கொண்டு சென்றனர்.

அங்கு பரிசோதித்த டாக்டர்கள் வரும் வழியிலேயே மதன் குமார் இறந்து விட்டதாக தெரிவித்தனர்.

இதுகுறித்து புதுப்பாளையம் போலீசாருக்கு தகவல் தெரிவிக்கப்பட்டது. போலீசார் சம்பவ இடத்திற்கு விரைந்து வந்து மதன்குமாரின் உடலை மீட்டு திருவண்ணாமலை அரசு மருத்துவக் கல்லூரி மருத்துவமனைக்கு பிரேத பரிசோதனைக்காக அனுப்பி வைத்தனர். மேலும் போலீசார் வழக்கு பதிவு செய்து விசாரணை நடத்தி வருகின்றனர்.

திருவண்ணாமலை:

திருவண்ணாமலை அருணாசலேஸ்வரர் கோவிலில் பல்வேறு திரு விழாக்கள் நடைபெறுகிறது.

இதில் முக்கிய திருவிழாவாக 10 நாட்கள் நடைபெறும் கார்த்திகை தீபத்திருவிழா திகழ்கிறது. 10 நாட்களில் தினமும் காலை மற்றும் மாலை வேளைகளில் பஞ்ச மூர்த்திகள் மாட வீதிகளில் வலம் வந்து பக்தர்களுக்கு அருள் புரிவர்.

10-ம் நாள் அதிகாலையில் கோவிலில் பரணி தீபமும், மாலையில் 2668 அடி உயரமுள்ள அண்ணாமலை உச்சியில் மகா தீபமும் ஏற்றப்படும்.

மலையே சிவனாக வணங்கப்படும் அண்ணாமலை உச்சியில் ஏற்றப்படும் தீப தரிசனம் காண தமிழ்நாட்டில் உள்ள பல்வேறு மாவட்டங்கள், வெளிமாநிலங்கள், வெளிநாடுகளில் இருந்தும் லட்சக்கணக்கான பக்தர்கள் வருவது வழக்கம்.

இந்து ஆண்டு கார்த்திகை தீபத்திருவிழா நவம்பர் 14 -ந் தேதி தொடங்கி 30-ந் தேதி வரை நடைபெறுகிறது.

கார்த்திகை தீபத்திரு விழாவை முன்னிட்டு பூர்வாங்க பணிகளுக்கான பந்தக்கால் நடும் முகூர்த்த நிகழ்ச்சி நாளை காலை 7.30 மணிக்கு மேல் 8.30 மணிக்குள் துலா லக்கினத்தில் நடைபெற உள்ளது.

பந்தக்கால் நடும் நிகழ்ச்சியை முன்னிட்டு நாளை காலை அண்ணாமலையார் கோயிலில் உள்ள சம்பந்த விநாயகர் சன்னதியில் பந்தக்காலிற்கு சிறப்பு அபிஷேக ஆராதனைகள் செய்யப்படும்.

பின்னர் கோவில் ராஜகோபுரம் முன்பு பந்தக்கால் நடும் முகூர்த்த நிகழ்ச்சி நடைபெறும்.

பந்தக்கால் முகூர்த்த நிகழ்ச்சியில் கலந்து கொண்டு அண்ணா மலையார் அருள்பெற வருமாறு கோயில் இணை ஆணையர் ஜோதி, அறங்காவலர் குழு தலைவர் இரா.ஜீவானந்தம், உறுப்பினர்கள் டிவிஎஸ் ராஜாராம், கோமதி குணசேகரன், சினம் பெருமாள், டாக்டர் மீனாட்சி சுந்தரம் ஆகியோர் அழைப்பு விடுத்துள்ளனர்.

வந்தவாசி:

திருவண்ணாமலை மாவட்டம், வந்தவாசி அடுத்த சென்னாவரம் கிராமத்தில் வசித்து வரும் விநாயகம் என்பவரின் வீட்டின் முன்பு வயது முதிர்ந்த பெண் குரங்கு ஒன்று மூச்சு திணறியப்படி சோர்ந்து அமர்ந்து இருந்ததை பார்த்தனர்.

உடனே சோர்வுடன் இருந்த குரங்குக்கு தண்ணீர் மற்றும் பழங்கள் கொடுத்தனர். இருப்பினும் அந்த குரங்கு சிறிது நேரத்தில் பரிதாபமாக இறந்து விட்டது.

குரங்கு இறந்த தகவலை அப்பகுதியில் உள்ள இளைஞர்களுக்கு தெரிவித்தனர். ஓய்வு பெற்ற தாசில்தார் உலகநாதன், விலங்கு நல ஆர்வலர் ராஜசேகரன் உள்ளிட்டோர் அடங்கிய கிராம இளைஞர்கள் அந்தக் குரங்கிற்கு இறுதிச் சடங்கை செய்வதற்காக இடம் தேட முடிவு செய்தனர்.

அதற்குள் இறந்த குரங்கு உடல் கெடாமல் இருக்க பிரிசர் பாக்ஸில் வைத்து பதப்படுத்தினர். இதை அறிந்த அப்பகுதி பொதுமக்கள் குரங்கின் உடலுக்கு மலர் தூவி அஞ்சலி செலுத்தினர்.

பின்பு மேளதாளம் முழங்கி, தேவாரம் பாடி வழி நெடுகிலும் மலர்கள் தூவி மனிதர்களை அடக்கம் செய்வது போன்று குரங்கின் உடலை தோளில் சுமந்து சென்றனர். தொடர்ந்து முறைப்படி நல்லடக்கம் செய்தனர்.

சென்னாவரம் கிராமத்தின் இளைஞர்களின் செயலை வந்தவாசி பகுதி மக்கள் பாராட்டி வருகின்றனர்.

மேலும் குரங்கை புதைத்த இடத்தில் ஆஞ்சநேயர் கோவில் கட்ட கிராம மக்கள் முடிவு செய்துள்ளனர்.

செய்யாறு:

காஞ்சிபுரம் மாவட்டம் சர்வே தீர்த்த குளத்தை சேர்ந்தவர் ரமேஷ். சென்னையில் பஸ் டிரைவராக வேலை செய்து வந்தார்.

இவரது மனைவி பிரியா, மகள் திலக் ஷனா. இவர்கள் அனைவரும் நேற்று மாலை விழுப்புரம் மாவட்டம் செஞ்சியில் நடைபெற்ற திருவிழாவிற்காக பைக்கில் சென்றனர்.

விழாமுடிந்து இன்று காலை 8.45 மணி அளவில் காஞ்சிபுரம் நோக்கி சென்று கொண்டிருந்தனர்.

வந்தவாசி-காஞ்சிபுரம் சாலை தேத்துறை பஸ் நிறுத்தம் அருகே வரும்போது எதிரே வந்த அரசு பஸ் இவர்கள் ஓட்டி சென்ற பைக் மீது மோதியது.

இதில் ரமேஷ் மற்றும் திலக் ஷனா பலத்த காயமடைந்து ரத்த வெள்ளத்தில் துடி துடித்து சம்பவ இடத்திலேயே பரிதாபமாக இறந்தனர்.

உயிருக்கு போராடிக் கொண்டிருந்த பிரியாவை மீட்டு காஞ்சிபுரம் மருத்துவமனைக்கு அனுப்பி வைத்தனர். அங்கு சிகிச்சை அளிக்கப்பட்டு வருகிறது.

இது குறித்து அனாக்காவூர் போலீசாருக்கு தகவல் தெரிவித்தனர்.

போலீசார் சம்பவ இடத்திற்கு விரைந்து சென்ற தந்தை, மகள் உடலை மீட்டு பிரேத பரிசோதனைக்கு செய்யாறு அரசு ஆஸ்பத்திரிக்கு அனுப்பி வைத்தனர்.

மேலும் போலீசார் வழக்கு பதிவு செய்து விசாரணை நடத்தி வருகின்றனர்.

வந்தவாசி:

செங்கல்பட்டு மாவட்டம் மேல்மருவத்தூர் அடுத்த எலப்பாக்கம் கிராமத்தை சேர்ந்தவர் இளவரசன் (வயது 38).

திருப்போரூர் அரசு போக்குவரத்து பணிமனையில் மெக்கானிக்காக வேலை செய்து வருகிறார். இவரது மனைவி மீனாட்சி, மகள் பிரசாந்தினி (5), மகன் பிரவீன் (3½).

இவர்கள் அனைவரும் திருவண்ணாமலை மாவட்டம், வந்தவாசி அடுத்த பொன்னூர் கிராமத்தில் உள்ள உறவினரின் பிறந்தநாள் விழாவில் கலந்த கொள்வதற்காக குடும்பத்துடன் காரில் சென்றனர்.

விழா முடிந்து நேற்று இரவு வீடு திரும்பி கொண்டிருந்தனர். காரை இளவரசன் ஓட்டிச்சென்றார்.

வந்தவாசி அடுத்த சாலவேடு கிராமம் அருகே சென்ற போது கார் கட்டுப்பாட்டை இழந்து தாறுமாறாக ஓடி சாலையில் கவிழ்ந்தது.

இதில் இளவரசனின் மகன் பிரவீன் பலத்த காயமடைந்து சம்பவ இடத்திலேயே பரிதாபமாக இறந்தான்.

படுகாயம் அடைந்த இளவரசன் மற்றும் அவரது மகள் பிரசாந்தினியை அந்த வழியாக சென்றவர்கள் மீட்டு வந்தவாசி அரசு மருத்துவமனையில் சேர்த்தனர்.

மேல் சிகிச்சைக்காக செங்கல்பட்டு தனியார் மருத்துவமனைக்கு அனுப்பி வைத்தனர். ஆனால் வழியிலேயே இளவரசன் பரிதாபமாக இறந்தார்.

பிரசாந்தினிக்கு தீவிர சிகிச்சை அளிக்கப்பட்டு வருகிறது. மீனாட்சி சிறு காயங்களுடன் உயிர் தப்பினார். மகன், கணவர் இறந்ததால் மீனாட்சி கதறி அழுதார். இது பார்த்தவர்களின் கண்களை கலங்க வைத்தது.

இதுகுறித்து கீழ்க்கொடுங்காலூர் போலீசாருக்கு தகவல் தெரிவித்தனர். போலீசார் இளவரசன் மற்றும் பிரவீன் ஆகியோர் உடலை கைபற்றி பிரேத பரிசோதனைக்காக மருத்துவமனைக்கு அனுப்பி வைத்தனர்.

மேலும் போலீசார் வழக்கு பதிவு செய்து விசாரணை நடத்தி வருகின்றனர்.

பிறந்தநாள் விழாவில் கலந்து கொண்டு ஊர் திரும்பிய போது விபத்தில் தந்தை, மகன் பலியான சம்பவம் அப்பகுதியில் சோகத்தை ஏற்படுத்தியது.