டெல்லி மாநில சட்டசபை தேர்தல் பிப்ரவரி 5-ந்தேதி நடைபெறுகிறது. இதற்கான தேர்தல் பிரசாரத்தில் ஆம் ஆத்மி, பாஜக, காங்கிரஸ் கட்சி தலைவர்கள் தீவிரமாக ஈடுபட்டு வருகிறார்கள். டெல்லி மாநில சட்டசபை தேர்தலுக்கான வாக்குறுதிகளை பாஜக பகுதி பகுதியாக வெளியிட்டு வருகிறது. ஏற்கனவே இரண்டு பகுதிகள் வெளியிடப்பட்டுள்ளன. இந்த நிலையில் இன்று 3-வது மற்றும் இறுதிப் பகுதியை அமித் ஷா வெளியிட்டார்.
அப்போது அமித் ஷா கூறியதாவது:-
பாஜக-வின் தேர்தல் அறிக்கையில் குறிப்பிடப்பட்டுள்ளது வெற்று வாக்குறுதிகள் அல்ல. டெல்லியில் செயல்படுத்தக் கூடிய பணிகள் பட்டியலிடப்பட்டுள்ளன.
யமுனை நதியை சுத்தம் செய்வோம், சுத்தமான குடிநீர் வழங்குவோம், மாசு இல்லாத டெல்லியாக்குவோம் போன்ற வாக்குறுதிகளை கெஜ்ரிவால் நிறைவேற்றவில்லை. கெஜ்ரிவால் தலைமையிலான ஆம் ஆதமி அரசின் ஊழல் இதுவரை இல்லாத அளவிலானது.
மத்திய அரசு டெல்லியில் சாலைகள் அமைப்பதற்காக 41 ஆயிரம் கோடி ரூபாய் செலவிட்டுள்ளது. ரெயில் தண்டவாளம் அமைக்க 15 ஆயிரம் கோடி ரூபாய் செலவிட்டுள்ளது. விமான நிலையத்திற்காக 21 ஆயிரம் கோடி ரூபாய் செலவிட்டுள்ளது.
டெல்லியில் ஏழைகளுக்கான எந்த நலத்திட்டங்களும் நிறுத்தப்படாது. பாஜக தனது வாக்குறுதிகளை நிறைவேற்றும் என்பதை நான் மீண்டும் வலியுறுத்துகிறேன்.
டெல்லி அரசை கெஜ்ரிவால் நடத்தி வருகிறார். அவர்கள் கொடுத்த வாக்குறுதிகள் நிறைவேற்றப்படவில்லை. அப்பாவி முகத்துடன் மீண்டும் அவர் பொய் மூட்டைகளுடன் வருகிறார். எனது அரசியல் வாழ்க்கையில் கெஜ்ரிவாலை போன்ற பொய்யரை பார்த்தது இல்லை. நான் உறுதியாக இருப்பதால் இந்த வார்த்தையை பயன்படுத்துவதால் எந்த பிரச்சனையும் இல்லை.
மக்கள் வசிக்கும் பகுதியில் மதுபானக் கடைகள் மூடப்படும் என கெஜ்ரிவால் கூறினார். மக்கள் வசிக்கும் இடத்தை விடுங்கள். பள்ளிக்கூடங்கள், கோவில்கள், குருத்வாரா போன்ற இடங்களையும் விட்டுவைக்கவில்லை. இவைகளுக்கு அருகில் கடைகளை திறக்க லைசென்ஸ் கொடுத்துள்ளார். ஆயிரக்கணக்கான கோடி அளவில் மதுபான ஊழல் நடந்துள்ளது. இது அவர்களுடைய கல்வி அமைச்சரால் நடந்துள்ளது. இது இதுவரை இல்லாதது. கெஜ்ரிவால் சிறையில் இருந்தபோது தார்மீக அடிப்படையில் பதவியை ராஜினாமா செய்யவில்லை. முதல்வர் பெருமையுடன் சிறைக்குள் இருந்தார்.
இவ்வாறு அமித் ஷா தெரிவித்தார்.
