லக்னோ:
அயோத்தியில் ராமர் கோவில் கட்டுமானப் பணிகள் இறுதிக்கட்டத்தை எட்டியுள்ளன. ஜனவரி 22-ம் தேதி பிரமாண்டமான முறையில் கும்பாபிஷேகம் நடைபெறுகிறது. பிரதமர் நரேந்திர மோடி நேரில் வந்து தொடங்கி வைக்கிறார். கும்பாபிஷேக நிகழ்வில் நாடு முழுவதும் இருந்து பல லட்சம் பேர் கலந்துகொள்ள உள்ளனர்.
இதற்கிடையே, புதுப்பிக்கப்பட்டுள்ள அயோத்தி ரெயில் நிலையத்தில் ஷாப்பிங் மால்கள், காபி ஷாப்கள், புத்துணர்வூட்டும் வசதிகள், பார்க்கிங் வசதிகள் உள்ளிட்டவை இடம்பெறவுள்ளன. பிளாட்பாரங்கள் நவீனப்படுத்தப்பட்டுள்ளன. பயணிகள் உள்ளே செல்லவும், வெளியே வரவும் பிரத்யேக வழித்தடங்கள் அமைக்கப்பட்டுள்ளன.
12 லிப்ட்கள், 14 எஸ்கலேட்டர்கள், உணவகங்கள், பயணிகள் ஓய்வறை உள்ளிட்ட பல்வேறு வசதிகள் செய்யப்பட்டுள்ளது. உத்தரப் பிரதேச மாநிலத்தின் மிகப்பெரிய ரெயில் நிலையம் என்ற சிறப்பை பெறவுள்ளது.
பிரதமர் நரேந்திர மோடி புதுப்பிக்கப்பட்ட அயோத்தி ரெயில் நிலையம் மற்றும் விமான நிலையத்தை நாளை திறந்து வைக்கிறார்.
ரெயில் நிலையத்தில் கொடியசைத்து தொடங்கி வைக்கும் பிரதமர் மோடி சாலையின் வழியாக பேரணி செல்கிறார்.
இந்நிலையில், அயோத்தி ரெயில் நிலையத்தின் இறுதிக்கட்ட பணிகளை ரெயில்வே மந்திரி அஸ்வினி வைஷ்ணவ் இன்று ஆய்வு செய்தார். அப்போது செய்தியாளர்களைச் சந்தித்த ரெயில்வே மந்திரி அஸ்வினி வைஷ்ணவ், அயோத்யா தாம் ரெயில் நிலையம் உலகத்தரத்தில் கட்டப்பட்டு உள்ளது. ரெயில் நிலையத்தின் இரு புறங்களிலும் நுழைவு வாயில்கள் அமைக்கப்பட்டுள்ளன என தெரிவித்தார்.
