சிட்னி:
இந்தியா - ஆஸ்திரேலியா அணிகள் இடையிலான 5-வது மற்றும் கடைசி டெஸ்ட் கிரிக்கெட் போட்டி சிட்னியில் நேற்று தொடங்கியது.
இதில் டாஸ் வென்று முதலில் பேட்டிங் செய்த இந்திய அணி ஆஸ்திரேலிய வேகப்பந்தை தாக்குப்பிடிக்க முடியாமல் முதல் இன்னிங்சில் 72.2 ஓவர்களில் 185 ரன்களில் ஆல்-அவுட் ஆனது. அதிகபட்சமாக பண்ட் 40 ரன்கள் அடித்தார். ஆஸ்திரேலிய தரப்பில் வேகப்பந்து வீச்சாளர் ஸ்காட் போலன்ட் 4 விக்கெட்டும், மிட்செல் ஸ்டார்க் 3 விக்கெட்டும் சாய்த்தனர்.
பின்னர் தனது முதல் இன்னிங்சை தொடங்கிய ஆஸ்திரேலியா முதல் நாள் ஆட்ட நேர முடிவில் 3 ஓவர்களில் ஒரு விக்கெட்டுக்கு 9 ரன் எடுத்திருந்தது. கான்ஸ்டாஸ் 9 ரன்களுடன் களத்தில் இருந்தார். கவாஜா (2 ரன்) பும்ரா பந்து வீச்சில் ஸ்லிப்பில் ராகுலிடம் அவுட் ஆனார்.
இன்று 2-வது நாள் ஆட்டம் நடைபெற்று வருகிறது. தொடர்ந்து பேட்டிங் செய்த ஆஸ்திரேலிய அணிக்கு இந்திய பந்துவீச்சாளர்கள் கடும் நெருக்கடி கொடுத்தனர். மார்னஸ் லபுஸ்சேன் 2 ரன்களில் வந்த வேகத்திலேயே பும்ரா பந்துவீச்சில் வீழ்ந்தார்.
அவரை தொடர்ந்து கான்ஸ்டாஸ் 23 ரன்களிலும், டிராவிஸ் ஹெட் 4 ரன்களிலும் சிராஜின் ஓவரில் வீழ்ந்தனர். இந்த இக்கட்டான சூழலில் ஸ்டீவ் சுமித்துடன் கை கோர்த்த அறிமுக வீரர் வெப்ஸ்டர் அணியை சரிவிலிருந்து மீட்கும் முயற்சியில் ஈடுபட்டார். இதில் சுமித் தனது பங்குக்கு 33 ரன்கள் அடித்த நிலையில் பிரசித் கிருஷ்ணா பந்துவீச்சில் வீழ்ந்தார்.
இவரை தொடர்ந்து களமிறங்கிய விக்கெட் கீப்பர் அலெக்ஸ் கேரி 21 ரன்களிலும், கம்மின்ஸ் 10 ரன்களிலும், ஸ்டார்க் 1 ரன்னிலும் ஆட்டமிழந்தனர். ஒருபுறம் விக்கெட் சரிந்தாலும் மறுமுனையில் வெப்ஸ்டர் பொறுப்புடன் விளையாடி அணியை முன்னெடுத்து சென்றார். அறிமுக போட்டியிலேயே அரைசதம் அடித்த அவர் 57 ரன்களில் ஆட்டமிழந்தார்.
முடிவில் 51 ஓவர்கள் தாக்குப்பித்த ஆஸ்திரேலியா முதல் இன்னிங்சில் 181 ரன்களில் ஆல் அவுட் ஆனது. இந்தியா தரப்பில் சிராஜ் மற்றும் பிரசித் கிருஷ்ணா தலா 3 விக்கெட்டுகளும், பும்ரா, நிதிஷ் ரெட்டி தலா 2 விக்கெட்டுகளும் வீழ்த்தினர். இந்தியா முதல் இன்னிங்சில் 4 ரன்கள் முன்னிலை பெற்றுள்ளது.
