திருவண்ணாமலை:
தருமபுரி மாவட்டம் கல்தானிப்பாடியை சேர்ந்தவர் தங்கவேல் (வயது 50). இவரது மகன் சிவக்குமார் (32). கட்டிட மேஸ்திரி. இவர், நேற்று மாலை திருவண்ணாமலை மாவட்டம் தானிப்பாடிக்கு பைக்கில் வந்தார்.
இவருடன் தந்தை தங்கவேல், அதே பகுதியை சேர்ந்த ரவி ஆகியோரும் வந்தனர். தானிப்பாடி-அரூர் சாலையில் ஜோடிக்கல் கூட்ரோடு அருகே வந்தபோது, எதிரே வந்த பைக் சிவக்குமாரின் பைக் மீது மோதியது.
இந்த விபத்தில் பலத்த காயமடைந்த சிவக்குமார் சம்பவ இடத்திலேயே துடிதுடித்து இறந்தார். மகன் கண்முன் இறந்ததை பார்த்த தங்கவேல் கதறி அழுதார். இந்த சம்பவத்தில் தங்கவேல், ரவி ஆகியோரும் படுகாயமடைந்தனர்.
விபத்து ஏற்படுத்திய மற்றொரு பைக்கில் வந்த தருமபுரி போடிகுட்டையை சேர்ந்த சக்திவேல் (வயது 39) என்பவரும் காயமடைந்தார். சிகிச்சைக்காக 3 பேரும் அரூர் அரசு ஆஸ்பத்திரியில் அனுமதிக்கப்பட்டனர்.
இதுகுறித்து தானிப்பாடி போலீசார் வழக்குப்பதிவு செய்து விசாரணை நடத்தி வருகிறார்கள்.
