தாம்பரம்:
சென்னை மற்றும் புறநகர் பகுதிகளில் நேற்று முன்தினம் தொடங்கிய மழை நேற்று காலை வரை கன மழையாக கொட்டித் தீர்த்தது. இதனால் சென்னையில் தாழ்வான இடங்களில் உள்ள குடியிருப்புகளில் மழைநீர் புகுந்தது. பல இடங்களில் போக்குவரத்து பாதிக்கப்பட்டுள்ளது.
இதேபோல் சென்னை புறநகர் பகுதிகளும் மழை வெள்ளத்தில் மிதக்கின்றன. தாம்பரம், முடிச்சூர், பெருங்களத்தூர், அனகா புத்தூர், பம்மல், பரங்கிமலை உள்ளிட்ட பகுதிகளில் சுமார் 10 ஆயிரம் வீடுகளை வெள்ள நீர் சூழ்ந்துள்ளது.
மழைநீர் செல்ல வழியில்லாததால் தெருக்களில் குளம் போல் தண்ணீர் தேங்கி கிடக்கிறது. மழை காரணமாக அடையாறு ஆற்றில் வெள்ளம் கரை புரண்டு ஓடுகிறது.
பெருங்களத்தூர் கண்ணன் அவென்யூ, சமத்துவ பெரியார் நகர், அன்னை அஞ்சுகம் நகர் ஆகிய பகுதிகளில் சுமார் 500 வீடுகளுக்குள் மழைநீர் புகுந்துள்ளது.
மழைநீர் செல்லும் கால்வாயில் அடைப்பு ஏற்பட்டுள்ளதால் அடையாறு ஆற்றுக்கு செல்லும் தண்ணீர் குடியிருப்புக்குள் புகுந்துள்ளதால் பொது மக்கள் குற்றம் சாட்டினர்.
பொழிச்சலூர் தாங்கல் பகுதியில் மழைநீர் தேங்கி கிடக்கிறது. தெருக்களில் முட்டு அளவு தண்ணீர் ஓடுகிறது.
ராஜகீழ்ப்பாக்கம் ஏரி முழுவதுமாக நிரம்பி உள்ளது. இதனால் ஏரியில் இருந்து வெளியேறும் உபரி நீர் சாலை வழியாக குடியிருப்புக்குள் செல்கிறது.
அனகாபுத்தூர், செம்பாக்கம் திருமலை நகர், மப்பேடு, திருவஞ்சேரி பகுதியிலும் மழை வெள்ளத்தால் பொது மக்கள் மிகவும் பாதிக்கப்பட்டுள்ளனர்.
தாம்பரம் மற்றும் சுற்று வட்டார பகுதிகளில் நேற்று இரவு குறைந்த அளவு மழை பெய்தது. இன்று காலை வரை மழை இல்லை. இதனால் பொது மக்கள் நிம்மதி அடைந்துள்ளனர். பால், தண்ணீர் உள்ளிட்ட அத்தியாவசிய பொருட்கள் அவர்களுக்கு கிடைத்து வருகிறது. காலை 10 மணிக்கு பின்னர் மீண்டும் மழை பெய்யத் தொடங்கியது.
மேலும் 5 நாட்கள் மழை நீடிக்கும் என்று வானிலை மையம் எச்சரித்துள்ளதால் தாம்பரம், முடிச்சூர் பகுதி மக்கள் பீதி அடைந்துள்ளனர்.
கடந்த 2015-ம் ஆண்டு பெருவெள்ளம் ஏற்பட்ட போது தாம்பரம், முடிச்சூர் பகுதி மக்கள் கடுமையாக பாதிக்கப்பட்டனர். தற்போது ஒருநாள் பெய்த மழைக்கே குடியிருப்புகள் முழுவதும் மழை வெள்ளம் சூழ்ந்து நிற்கிறது.
தொடர்ந்து கனமழை நீடித்தால் மேலும் பாதிக்கப்படலாம் என்று நினைத்து தாம்பரம், முடிச்சூர், பெங்களத்தூர் பகுதியில் தாழ்வான இடங்களில் வசித்து வரும் சுமார் ஆயிரத்துக்கும் மேற்பட்டோர் தங்கள் வீடுகளை காலி செய்து உறவினர்கள் வீடுகளில் தஞ்சம் அடைந்துள்ளனர்.
மழை வெள்ளம் காரணமாக தாம்பரம் - முடிச்சூர் சாலையில் போக்குவரத்து நிறுத்தப்பட்டுள்ளது. அங்கு பாதாள சாக்கடை பணி, குடிநீர் குழாய் பதிக்கும் பணி சமீபத்தில் நடந்தது.
இதனால் அப்பகுதியில் பள்ளங்கள் ஏற்பட்டு மழைநீர் தேங்கி நிற்கிறது. இதைத்தொடர்ந்து பழைய தாம்பரம், கிருஷ்ணாநகர், பெருங்களத்தூர் செல்லும் வாகனங்கள் நிறுத்தப்பட்டுள்ளன.
வாகனங்கள் அனைத்தும் தாம்பரம்-கிஷ்கிந்தா சாலை வழியாகவும், தாம்பரம்- வண்டலூர் சாலை வழியாகவும் திருப்பி விடப்பட்டுள்ளன.
இந்த நிலையில் இன்று காலை மழையால் பாதிக்கப்பட்ட முடிச்சூர் அஷ்டலட்சுமி நகர், அமுதம் நகர் உள்ளிட்ட பகுதிகளை காஞ்சீபுரம் மாவட்ட கலெக்டர் பொன்னையா, மாவட்ட புயல் கண்காணிப்பு அலுவலர் அமுதா ஆகியோர் பார்வையிட்டு ஆய்வு செய்தனர்.
அப்போது புயல் கண்காணிப்பு அலுவலர் அமுதா கூறும்போது, ‘கடந்த 2015-ம் ஆண்டே இப்பகுதியில் உள்ள மழைநீர் கால்வாய் ஆக்கிமிப்புகள் அகற்றப்பட்டன. தற்போது மணிமங்கலம், ஆதனூர் ஏரிகளில் இருந்து வெளியேறும் உபரி நீர் மற்றும் காலி மனைகளில் இருந்து வரும் மழைநீர் முறையாக அடையாறு ஆற்றுக்கு செல்ல முடியாமல் ஆக்கிரமிப்புகளால் குடியிருப்பு பகுதிகளில் புகுந்துள்ளது. இன்னும் சில நாட்கலில் ஆக்கிரமிப்பாளர்களுக்கு நோட்டீஸ் அனுப்பி நடவடிக்கை எடுக்கப்படும்.
குடியிருப்புகளில் தேங்கி உள்ள மழைநீரை அகற்றும் பணி நடந்து வருகிறது’ என்றார்.
மழைநீரை அகற்றும் பணியில் நகராட்சி, பேரூராட்சி ஊழியர்கள் ஈடுபட்டுள்ளனர். அவர்கள் ஜே.சி.பி. எந்திரம் மூலம் அடைப்பு ஏற்பட்டுள்ள பகுதிகளை அப்புறப்படுத்தி வருகிறார்கள்.
