பாராளுமன்ற தேர்தல் 2024

மக்களவை தேர்தல் முடிவு நேற்று வெளியானது. இதில் பாஜக தலைமையிலான தேசிய ஜனநாயக கூட்டணி 296 இடங்களில் வெற்றி பெற்றுள்ளது. பாஜக தனித்து 240 இடங்களில் வெற்றி பெற்றது. அந்த கட்சி ஆட்சி அமைப்பதற்கான தனி மெஜாரிட்டியை பிடிக்க முடியவில்லை.

தேர்தலுக்கு முன்னதாக 400 இடங்கள் என்பதை இலக்காக கொண்டு பாஜக களம் இறங்கியது. தங்களை ஒரு தோற்கடிக்க முடியாத கட்சியாக பாஜக கருதியது. பாஜக-வை எப்படியாவது தோற்கடிக்க வேண்டும் என எதிர்க்கட்சிகள் திட்டமிட்டன. அதற்காகத்தான் இந்தியா கூட்டணி உருவாகியது.

மக்களவை தேர்தலில் பாஜக-வால் தனித்து பெரும்பான்மை பெற முடியாமல் போனது. இந்த நிலையில் மக்களவை தேர்தல் முடிவு, பாஜக-வை தோற்கடிக்க முடியும் என்பதை காட்டுகிறது என உத்தவ் தாக்கரே தெரிவித்துள்ளார்.

இது தொடர்பாக உத்தவ் தாக்கரே கூறுகையில் "பாஜக-வை தோற்கடிக்க முடியும் என்பதை தேர்தல் முடிவு காட்டுகிறது. பாஜக-வை தோற்கடிக்க முடியாது என்ற பிம்பம் உடைக்கப்பட்டுள்ளது" எனத் தெரிவித்துள்ளார்.

உத்தவ் தாக்கரே தலைமையிலான சிவசேனா தேர்தலில் 9 இடங்களில் வெற்றி பெற்றது. வெற்றி பெற்ற எம்.பி.க்களை உத்தவ் தாக்கரே சந்தித்து வருகிறார். அவர்கள் சந்தித்த போது இவ்வாறு தெரிவித்துள்ளார்.

மக்களவை தேர்தலில் திமுக கூட்டணி தமிழகம் மற்றும் புதுச்சேரியில் 40 தொகுதிகளிலும் வெற்றி பெற்றுள்ளது. 2004-ம் ஆண்டுக்குப் பிறகு தற்போது முழுமையான வெற்றி கண்டுள்ளது. இந்தியா கூட்டணி கட்சி தலைவர்கள் கூட்டத்தில் கலந்து கொள்வதற்காக திமுக தலைவர் முக ஸ்டாலின் டெல்லி சென்றுள்ளார்.

இந்த நிலையில் தொண்டர்களுக்கு கடிதம் எழுதியுள்ளார். அந்த கடிதத்தில் கூறியிருப்பதாவது:-

சர்வாதிகாரத்தனமான ஒற்றையாட்சி முறைக்கு மக்கள் ஆதரவாக இல்லை என்பதை இந்திய நாடாளுமன்ற தேர்தல் முடிவுகள் காட்டுகின்றன. ஆன்மிக நம்பிக்கைகளை அரசியல் சுயலாபத்துக்குப் பயன்படுத்த நினைக்கும் மதவாத சக்திகளை, கோவில் கட்டிய மண்ணிலேயே வீழ்த்திக் காட்டியிருக்கிறார்கள் இறைநம்பிக்கையுள்ள வாக்காளர்கள்.

சிறுபான்மை மக்களின் நெஞ்சில் இருந்த அச்ச உணர்வு நீங்கியிருக்கிறது. தமிழ்நாட்டிலும் இந்திய அளவிலும் நமது கூட்டணி பெற்றுள்ள வெற்றியால் சர்வாதிகாரத்திற்குக் கடிவாளம் போடப்பட்டுள்ளது. ஜனநாயகத்தின் நம்பிக்கைத் துளிர்கள் அரும்பியுள்ளன. அரசியலமைப்பு வழங்கியுள்ள நெறிமுறைகளைப் பாதுகாக்கின்ற வகையில், நாட்டை வழி நடத்தும் பணியை இந்தியா கூட்டணி மேற்கொள்ளும்.

அதற்கு நாற்பதுக்கு நாற்பது என்ற மகத்தான வெற்றி பெருந்துணையாக இருக்கும். இந்த வெற்றிக்குத் துணை நின்ற உடன்பிறப்புகள் அனைவருக்கும் என நெஞ்சம் நிறைந்த நன்றியை உரித்தாக்கிக் கொள்கிறேன். தோழமைக் கட்சித் தலைவர்கள், நிர்வாகிகள், தொண்டர்கள் அனைவருக்கும் என் மனமார்ந்த நன்றி.

மதவாதத்தையும் வெறுப்பரசியலையும் விதைக்க நினைப்பர்கள் தமிழ்நாட்டில் எப்படியாவது கால் ஊன்றி விட வேண்டும் எனத் திட்டமிட்டார்கள்.

நாட்டின் பிரதமர் 8 முறை தமிழ்நாட்டுக்கு வந்தார். திமுக மீது அவதூறு சேற்றினை அள்ளி வீசினார். திமுக வெறுப்புப் பிரசாரம் செய்யவில்லை. பொறுப்பான முறையிலே தேர்தல் களத்தில் தன் கடமையை ஆற்றியது.

நாற்பதுக்கு நாற்பது என்ற இந்த வெற்றி இந்திய அரசியலின் அடுத்த ஐந்தாண்டுகளுக்கு மிகப்பெரிய தாக்கத்தை ஏற்படுத்தும். மத்திய ஆட்சியாளர்கள் மீது மக்களுக்கு நம்பிக்கையில்லை என்பதைத்தான் தனிப்பெரும்பான்மை பெரும்பான்மையை பெற முடியாத பாஜக-வின் சரிவு காட்டுகிறது.

இவ்வாறு மு.க. ஸ்டாலின் கடிதத்தில் குறிப்பிட்டுள்ளார்.

பாராளுமன்ற தேர்தலில் பா.ஜ.க. தலைமையிலான தேசிய ஜனநாயக கூட்டணி 290-க்கும் அதிக தொகுதிகளில் வெற்றி பெற்றுள்ளது. காங்கிரஸ் தலைமையிலான இந்தியா கூட்டணி 234-க்கும் அதிக தொகுதிகளில் வெற்றி பெற்றுள்ளது.

இதில் பா.ஜ.க. கட்சி 240 இடங்களிலும், காங்கிரஸ் கட்சி 99 இடங்களிலும் வெற்றி பெற்றுள்ளது. அந்த வகையில், கடந்த ஜூன் 1 ஆம் தேதி வெளியான தேர்தலுக்கு பிந்தைய கருத்துக்கணிப்பு முடிவுகள் பொய்த்துப்போய் உள்ளன.

கடந்த 1 ஆம் தேதி நடைபெற்ற இறுதிக்கட்ட வாக்குப்பதிவு முடிந்தவுடன் தேர்தலுக்கு பிந்தைய கருத்துக்கணிப்பு முடிவுகள் வெளியிடப்பட்டன. இதில் அனைத்து நிறுவனங்களும் பா.ஜ.க. கூட்டணிக்கு 330 முதல் 392 தொகுதிகள் வரை கிடைக்கும் என்று பலவித எண்ணிக்கையில் தங்கள் கணிப்பை வெளியிட்டன.

இந்தியா கூட்டணிக்கு 107 தொகுதிகள் முதல் 182 தொகுதிகள் வரை கிடைக்கலாம் என்று கணிப்பை வெளியிட்டு இருந்தன. ஆனால் ஓட்டு எண்ணிக்கையின்போது, கருத்துக்கணிப்பு முடிவுகள் பொய்த்துப் போய்விட்டன. பா.ஜ.க.வுக்கு தனிப்பெரும்பான்மை கிடைக்கவில்லை. இந்த தேர்தலில் பா.ஜ.க. 36.56 சதவீத வாக்குகளை பெற்றுள்ளது.

கடந்த 2014 தேர்தலில் நரேந்திர மோடி தலைமையில் களம் கண்ட பா.ஜ.க. 282 தொகுதிகளில் வெற்றி பெற்றது. பா.ஜ.க. தலைமையிலான தேசிய ஜனநாயக கூட்டணி மொத்தத்தில் 336 இடங்களில் வெற்றி பெற்று நரேந்திர மோடி, இந்தியாவின் 14 ஆவது பிரதமர் ஆனார். இந்த தேர்தலில் பா.ஜ.க. மட்டும் 31 சதவீத வாக்குகளை பெற்றது.

இதைத் தொடர்ந்து 2019 தேர்தலிலும் மோடி தலைமையிலேய பா.ஜ.க. களம் கண்டது. 2014 தேர்தலை போன்றே 2019 தேர்தலிலும் நாடு முழுக்க மோடி பிம்பம் காணப்பட்டது. இந்த தேர்தலில் பா.ஜ.க. 37.36 சதவீத வாக்குகளை பெற்று அசத்தியது. இதில் 303 இடங்களில் பா.ஜ.க. தனித்து வெற்றி பெற்றது. பா.ஜ.க. தலைமையிலான தேசிய ஜனநாயக கூட்டணி 353 இடங்களில் வெற்றி பெற்றது.

இரண்டு தேர்தல்களில் பா.ஜ.க. அமோக வெற்றி பெற்ற நிலையில், இந்த முறையும் பா.ஜ.க. தலைமையிலான தேசிய ஜனநாயக கூட்டணி தேர்தலை எதிர்கொண்டது. இதில் கடந்த இரு தேர்தல்களில் பா.ஜ.க. மற்றும் தேசிய ஜனநாயக கூட்டணி பெற்ற வாக்குகள் மற்றும் தொகுதிகளின் எண்ணிக்கை சரிந்துள்ளது.

2024 தேர்தலில் பா.ஜ.க. வெறும் 240 இடங்களில் மட்டுமே வெற்றி பெற்றுள்ளது. பா.ஜ.க. தலைமையிலான தேசிய ஜனநாயக கூட்டணி 292 இடங்களில் வெற்றி பெற்றுள்ளது. இதில் பா.ஜ.க. மட்டும் 36.56 சதவீத வாக்குகளை பெற்றுள்ளது. இதன் மூலம், சமீபத்திய பாராளுமன்ற தேர்தலில் பிரதமர் நரேந்திர மோடியின் பிம்பம் சரிந்தது அப்பட்டமாக வெளிச்சத்திற்கு வந்துள்ளது.

பாராளுமன்ற தேர்தலில் பா.ஜ.க. தலைமையிலான தேசிய ஜனநாயக கூட்டணி 290-க்கும் அதிக தொகுதிகளில் வெற்றி பெற்றுள்ளது. எனினும், பெரும்பான்மைக்கு தேவையானதை விட 240 இடங்களில் மட்டுமே பா.ஜ.க. தனித்து வெற்றி பெற்றுள்ளதால் மத்தியில் கூட்டணி ஆட்சி அமைக்கும் சூழல்தான் உருவாகி இருக்கிறது.

ஏ.ஐ.எம்.ஐ.எம். கட்சி தலைவர் அசாதுதீன் ஒவைசி இந்தியாவில், நரேந்திர மோடி மீண்டும் பிரதமர் ஆவதை தடுக்க செய்ய வேண்டியவற்றை நிச்சயம் செய்வேன் என்று தெரிவித்துள்ளார். முன்னதாக இந்தியாவின் அடுத்த பிரதமரை தேர்வு செய்வதற்கான வியூகம் அமைத்து இருப்பதாக காங்கிரஸ் கட்சியின் ராகுல் காந்தி தெரிவித்து இருந்தார்.

இதனிடையே "இந்தியாவின் அடுத்த பிரதமர் யார் என்பதை இந்தியா கூட்டணியின் ஆலோசனை கூட்டத்தில் முடிவு எடுப்போம்," என்று சிவசேனா கட்சியின் தலைவரும், மகாராஷ்டிரா முன்னாள் முதலமைச்சருமான உத்தவ் தாக்கரே தெரிவித்து இருந்தார்.

இது குறித்து பேசிய அவர், "இந்தியா கூட்டணி அமைக்கப்பட்டதில் இருந்தே, நாட்டில் சர்வாதிகாரத்தை முடிவுக்கு கொண்டு வந்து, ஜனநாயகத்தை காப்பாற்ற வேண்டும் என்று முடிவெடுத்துவிட்டோம். பிரதமர் யார் என்பதை நாங்கள் முடிவு செய்வோம். பா.ஜ.க.-வால் இன்னலுக்கு ஆளானவர்கள் நிச்சயம் எங்களுக்கு துணை நிற்பார்கள். சந்திரபாபு நாயுடுவும் பா.ஜ.க. அரசாங்கத்தால் துன்புறுத்தலுக்கு ஆளாகி இருக்கிறார்."

இந்த சூழலில்தான், இந்தியா கூட்டணி கட்சி தலைவர்கள் பங்கேற்கும் ஆலோசனை கூட்டம் இன்று நடைபெற இருக்கிறது. டெல்லியில் நடைபெறும் இந்த கூட்டத்தில் தமிழக முதலமைச்சர் மு.க. ஸ்டாலின் கலந்து கொள்கிறார். மத்தியில் இந்தியா கூட்டணி ஆட்சி அமைப்பது தொடர்பாக காங்கிரஸ் சார்பில் தெலுங்கு தேசம் கட்சியின் தலைவர் சந்திரபாபு நாயுடு மற்றும் ஜனதா தளம் கட்சியின் தலைவர் நிதிஷ் குமார் ஆகியோருடன் பேச்சுவார்த்தை நடைபெற்று வருவதாக தகவல்கள் வெளியாகி வருகின்றன.

இந்தியாவின் அடுத்த பிரதமர் யார் என்ற கேள்விக்கு இதுவரை தெளிவான முடிவு கிடைக்கவில்லை. இதனிடையே தெலுங்கு தேசம் கட்சியின் சந்திரபாபு நாயுடு மற்றும் ஜனதா தளத்தை சேர்ந்தவரும், இந்தியா கூட்டணி உருவாக முக்கிய காரணமாக விளங்கியவருமான நிதிஷ் குமார் இந்தியா கூட்டணிக்கு ஆதரவு தெரிவிப்பார்களா என்ற எதிர்பார்ப்பு எழுந்துள்ளது.

2024 பாராளுமன்ற தேர்தலில் கிங் மேக்கர்களாக இருக்கும் சந்திரபாபு நாயுடு மற்றும் நிதிஷ் குமார் யாருக்கு ஆதரவு என்பதில் தங்களின் நிலைப்பாட்டை இதுவரை அறிவிக்கவில்லை. ஒருவேளை இந்தியா கூட்டணிக்கு ஆதரவளிக்கும் பட்சத்தில் இருவருக்கும் மத்திய மந்திரிசபையில் பொறுப்பு வழங்கப்படுமா அல்லது துணை பிரதமர் போன்ற பதவி வழங்கப்படுமா என்ற எதிர்பார்ப்பு ஏற்பட்டுள்ளது.

இந்த நிலையில், இருவரும் இந்தியா கூட்டணிக்கு ஆதரவளிக்கும் போது, மற்ற கட்சிகளும் ஆட்சியமைக்கும் கூட்டணிக்கு ஆதரவளிக்கும் சூழல் உருவாகலாம். மத்தியில் ஆட்சி அமைக்கும் விவகாரத்தில் பிரதமர் பதவி, துணை பிரதமர் பதவி அல்லது மந்திரி சபையில் இடமளிப்பது உள்ளிட்டவை இந்தியா கூட்டணியின் கடைசிக்கட்ட அஸ்திரமாக இருக்கும் என்று தெரிகிறது.

யாருக்கு ஆதரவளிப்பார் என்ற வகையில், சந்திரபாபு நாயுடு இன்று காலை செய்தியாளர்களை சந்திக்க இருக்கிறார். அப்படியாக நாட்டின் அடுத்த பிரதமர் யார் என்ற குழப்பத்திற்கு விரைவில் முடிவு கிடைத்துவிடும்.

மக்களை தேர்தல் வாக்கு எண்ணிக்கை இன்று நடைபெற்றது. இந்த தேர்தலில் பாஜக கூட்டணி அமோக வெற்றி பெறும் என கருத்து கணிப்புகள் தெரிவித்தன.

ஆனால் காங்கிரஸ் கட்சி தலைமையிலான இந்தியா கூட்டணி எதிர்பாராத வகையில் பாஜக கூட்டணிக்கு கடும் நெருக்கடி கொடுத்தது. இதனால் பாஜக-வால் தனி மெஜாரிட்டி பெறமுடியவில்லை. கூட்டணி கட்சிகளுடன் சேர்ந்து 290 தொகுதிகளை பிடித்துள்ளது.

இந்தி பெல்ட் என கருதப்படும் மாநிலங்களிலும் பாஜக-வுக்கு கடும் பின்னடைவு ஏற்பட்டுள்ளது. குறிப்பாக உத்தர பிரதேசத்தில் பாதிக்கும் மேற்பட்ட இடங்களை இழந்துள்ளது.

இந்த தேர்தலில் சில மாநிலங்களில் கட்சி அல்லது கூட்டணி முழுமையான அனைத்து இடங்களையும் கைப்பற்றியுள்ளன.

தமிழகம் மற்றும் புதுச்சேரியில் திமுக தலைமையிலான கூட்டணி 40 இடங்களிலும் வெற்றி பெற்றுள்ளது.

டெல்லியில் பா.ஜனதா தனித்து போட்டியிட்டது. ஏழு தொகுதிகளையும் மொத்தமாக கைப்பற்றியுள்ளது.

மத்திய பிரதேசம் மாநிலத்தில் பாஜக 29 தொகுதிகளிலும் தனித்து போட்டியிட்டது. 29 தொகுதிகளிலும் பாஜக வெற்றி வாகை சூடியது.

இமாச்சல பிரதேச மாநிலத்தில் 4 தொகுகளில் தனித்து போட்டியிட்டது. 4 தொகுதிகளிலும் வெற்றி பெற்றுள்ளது.

உத்தரகாண்ட் மாநிலத்தில் பாஜக 5 தொகுதிகளிலும் தனித்து போட்டியிட்டது. ஐந்து தொகுதிளிலும் வெற்றி பெற்றுள்ளது.

பாராளுமன்ற மக்களவை தேர்தல் வாக்கு எண்ணிக்கை நடைபெற்று வருகிறது. பா.ஜனதா தலைமையிலான தேசிய ஜனநாயக கூட்டணி சுமார் 290 தொகுதிகளை வாய்ப்புள்ளது. இந்தியா கூட்டணி 235 தொகுதிகளை பிடிக்கும் வாய்ப்புள்ளது.

#WATCH | BJP workers welcome PM Modi at the party headquarters to celebrate the party's victory in Lok Sabha elections 2024 pic.twitter.com/RIDLxdAhf1

— ANI (@ANI) June 4, 2024

பா.ஜனதா கூட்டணியில் உள்ள ஒன்றிரண்டு கட்சிகளை தங்கள் பக்கம் இழுத்து பாஜக ஆட்சி அமைக்க நெருக்கடி கொடுக்க இந்தியா கூட்டணி முடிவு செய்துள்ளதாக கூறப்படுகிறது. இதனால்தான் ராகுல் காந்தி மற்றும் மல்லிகார்ஜூன கார்கே ஆகியோர் ஆட்சி அமைப்பதற்கான வியூகம் அமைப்போம் எனத் தெரிவித்துள்ளனர்.

#WATCH | PM Modi at the BJP headquarters to celebrate the party's victory in Lok Sabha elections pic.twitter.com/p38GFjbxOn

— ANI (@ANI) June 4, 2024

இந்த நிலையில் டெல்லியில் உள்ள பா.ஜனதா தலைமை அலுவலகத்தில் வெற்றிக் கொண்டாட்டம் நடைபெற்றது. இதில் பிரதமர் மோடி, பா.ஜனதா தலைவர் ஜே.பி. நட்டபா, அமித் ஷா, ராஜ்நாத் சிங் ஆகியோர் கலந்து கொண்டனர்.

#WATCH | BJP all set to form the government for the third consecutive time; PM Modi at BJP headquarters to address the party leaders and workers pic.twitter.com/ZtYKrtaemj

— ANI (@ANI) June 4, 2024

பிரதமர் மோடி அலுவலகம் வரும்போது வெற்றிக்கான இரட்டை விரலை காண்பித்து உற்சாகத்துடன் வந்தார். இந்த வெற்றி கொண்டாட்ட விழாவில் ஜே.பி. நட்டா பேசும்போது "தேர்தலாக இருந்தாலும் சரி, நாட்டை வழிநடத்துவதாக இருந்தாலும் சரி, பிரதமர் மோடி எப்போதும் நாட்டையும், கட்சியையும், மக்களையும் முன்னணியில் இருந்து வழிநடத்தி வருகிறார் என்பது நாம் அனைவரும் அறிந்ததே. அவரை வாழ்த்துகிறேன்.

ஆந்திராவில் கூட்டணி கட்சிகளுடன் இணைந்து தேசிய ஜனநாயகக் கூட்டணி அரசு அமையப் போகிறது. கேரளாவில் தாமரை மலர்ந்தது. நமது வாக்கு அதிகரித்துள்ளது. 2014-ல் ஒரு சரித்திரம் நடந்தது, ஏழைத் தாயின் மகன் நாட்டின் பிரதமரானார்.

முதன்முறையாக என்டிஏ கூட்டணி தொடர்ந்து மூன்றாவது முறையாக ஆட்சி அமைக்கப் போகிறது. சிலருக்கு தங்கள் சுயநலமே முக்கியம். அவர்களை நாடு நிராகரிக்கிறது. மேற்கு வங்கத்தில் நாங்கள் முன்னேறினோம். 3-ல் இருந்து 77 இடங்களை பெற்றோம். தற்போது முதல்முறையாக ஒடிசாவில் பாஜக ஆட்சி அமைக்க போகிறது. 30-40 இடங்களில் வெற்றிபெறும் சிலர் நாடு மோடியுடன் எப்படி நிற்கிறது என்பதை மறந்துவிட்டு அதைக் கொண்டாடத் தொடங்குகிறார்கள். மோடி 3-வது முறையாக பிரதமராக பதவி ஏற்பார்" எனத் தெரிவித்துள்ளார்.

#WATCH | Prime Minister Narendra Modi says, " ...On this sacred day, it is confirmed that NDA is forming govt for the 3rd time. We are grateful to the people..." pic.twitter.com/foNvYKs8E0

— ANI (@ANI) June 4, 2024

பின்னர் பிரதமர் மோடி பேசினார். அப்போது அவர் கூறுகையில் "எனக்கு ஆசி வழங்கியதற்கான நாட்டு மக்கள் அனைவருக்கும் நன்றி. 140 கோடி மக்களுக்கான வெற்றி இது. இது ஜனநாயகத்திற்கான மிகப்பெரிய வெற்றி. பா.ஜனதா 3-வது முறையாக ஆட்சி அமைக்க போகிறது. தேர்தல் ஆணையத்திற்கு நன்றி. நாட்டின் அரசியலமைப்புக்கு கிடைத்த வெற்றி. கடும் வெப்பத்திற்கு இடையே தேர்தல் ஆணையம் தனது கடமையை சிறப்பாக செய்துள்ளது. 

மக்களவை தேர்தல் வாக்கு எண்ணிக்கை இன்று நடைபெற்றது. ராகுல் காந்தி வயநாடு மற்றும் ரேபரேலி தொகுதியில் போட்டியிட்டார். இரண்டு தொகுதிகளிலும் ராகுல் காந்தி வெற்றி பெற்றுள்ளார். இரண்டில் ஒரு தொகுதியை விட்டுக்கொடுக்க வேண்டும்.

இதனால் வயநாடு தொகுதியை விட்டுக்கொடுப்பாரா? ரேபரேலி தொகுதியை விட்டுக்கொடுப்பாரா? என்ற கேள்வி எழுந்துள்ளது.

இன்று தேர்தல் முடிவு வெளியான நிலையில், மாலை பத்திரிகையாளர்களை சந்தித்த்தார். அப்போது வயநாடு, ரேபரேலி ஆகிய இரண்டு தொகுதிகளில் எந்த தொகுதியை விட்டுக்கொடுப்பீர்கள் என்று கேள்வி எழுப்பப்பட்டது.

அதற்கு ராகுல் காந்தி "நான் இரண்டு தொகுதியிலும் எம்.பி.யாக இருக்க முடியாது. ஆனால் இரண்டு தொகுதிகளில் ஒன்றை விட்டுகொடுப்பது குறித்து முடிவு எடுக்கவில்லை" எனத் தெரிவித்துள்ளார்.

கடந்த 2019-ம் ஆண்டு அமேதி மற்றும் வயநாடு ஆகிய இரண்டு தொகுதிகளில் போட்டியிட்டார். காந்தி குடும்பத்திற்கு பாரம்பரியமான அமேதி தொகுதியில் தோல்வியடைந்தார். அதேவேளையில் வயநாடு தொகுதியில் வெற்றி பெற்றார்.

இந்த முறை அமேதி தொகுதியில் இருந்து ரேபரேலி தொகுதிக்கு மாறி அங்கு வெற்றி பெற்றுள்ளார். பாரம்பரிய தொகுதி கைவிட்டபோது கைக்கொடுத்த வயாநாடு தொகுதி எம்.பி.யாக நீடிப்பாரா? அல்லது பாரம்பரிய தொகுதிக்காக வயநாடு தொகுதியை விட்டுக்கொடுப்பாரா? என்பது ராகுல் கையில்தான் உள்ளது.

மக்களவை தேர்தல் வாக்கு எண்ணிக்கை தொடர்ந்து நடைபெற்று வருகிறது. பாஜக கூட்டணி 290 தொகுதிகளில் முன்னிலை வகிக்கிறது. இந்தியா கூட்டணி சுமார் 230 தொகுதிகளிலா் முன்னிலை வகிக்கிறது.

400 தொகுதிகளில் வெற்றிபெறும் எனக்கூறிய பிரதமர் மோடிக்கு இது தோல்வி என திரிணாமுல் காங்கிரஸ் தலைவர் மம்தா பானர்ஜி தெரிவித்துள்ளார்.

இது தொடர்பாக மம்தா பானர்ஜி கூறுகையில் "பிரதமருக்கு ஆட்சி அமைப்பதற்கான மெஜாரிட்டி கிடைக்கவில்லை என்பது மகிழ்ச்சி அளிக்கிறது. பிரதமர் நம்பகத்தன்மையை இழந்துவிட்டார். அவர் கட்டாயம் ராஜினாமா செய்ய வேண்டும். இந்த முறையை பாஜக கூட்டணி 400 இடங்களுக்கு மேல் வெற்றி பெறும் எனக் கூறினார்.

மிகப்பெரிய அளவில் கொடுமைகள் செய்த பிறகும், பணம் செலவழித்த பிறகும் மோடி மற்றும் அமித் ஷாவின் ஆணவத்தை இந்தியா கூட்டணி வென்றது. மோடி தோல்வியடைந்துள்ளார். அயோத்தியாவில் கூட தோல்வியடைந்துள்ளார்.

மோடியை அதிகாரத்தில் இருந்து வெளியேற்றவும், இந்தியா கூட்டணியை ஆட்சிக்கு கொண்டு வருதற்கான முயற்சியை மேற்கொள்வேன். பிரதமர் மோடி ஏராளமான கட்சிகளை உடைத்துள்ளார். மக்கள் அவரின் உறுதியை உடைத்துள்ளனர்" என்றார்.

மேற்கு வங்காளத்தில் இந்தியா கூட்டணியில் உள்ள திரிணாமுல் காங்கிரஸ் கட்சியும், காங்கிரஸ் கட்சியும் தனித்து போட்டியிட்டன.

பஹரம்புர் தொகுதியில் காங்கிரஸ் கட்சியின் மூத்த தலைவர்களில் ஒருவரான ஆதிர் ரஞ்சன் சவுத்ரி நிறுத்தப்பட்டார். இவர் பாராளுமன்ற மக்களவை காங்கிரஸ் கட்சி தலைவராகவும், மேற்கு வங்காள மாநில காங்கிரஸ் கட்சி தலைவராகவும் உள்ளார். இவரை எதிர்த்து மம்தா பானர்ஜி முன்னாள் கிரிக்கெட் வீரரான யூசுப் பதானை நிறுத்தினார்.

இதில் யூசுப் பதான் வெற்றிபெறும் நிலையில் உள்ளார். யூசுப் பதான் 5 லட்சத்து 22 ஆயிரத்து 564 வாக்குகள் பெற்றுள்ளார். ஆதிர் ரஞ்சன் சவுத்ரி 4 லட்சத்து 36 ஆயிரத்து 798 வாக்குகள் பெற்றுள்ளார். யூசுப் பதான் 85 ஆயிரத்து 766 வாக்குகள் முன்னிலை பெற்றுள்ளார். இதனால் வெற்றி அருகில் உள்ளார்.

மேற்கு வங்காளத்தில் இந்தியா கூட்டணியில் தொகுதி பங்கீடு தொடர்பாக மம்தாவுக்கும், ஆதிர் ரஞ்சன் சவுத்ரிக்கும் இடையில் வார்த்தை போர் நடைபெற்றது. மம்தா பானர்ஜியை கடுமையாக விமர்சித்தார்.

தன்னை கடுமையாக விமர்சித்த மூத்த அரசியல்வாதியை ஒரு கிரிக்கெட் வீரரை நிறுத்தி மம்தா பானர்ஜி தோற்கடித்துள்ளார் என கூறப்படுகிறது.

இந்திய பாராளுமன்ற தேர்தலுக்கான வாக்குப்பதிவு 542 தொகுதிகளுக்கு நடைபெற்றது. இதில் 8 ஆயிரத்திற்கும் மேற்பட்ட வேட்பாளர்கள் எந்த கட்சியையும் சாராமல் சுயேட்சையாக களம் இறங்கினர். இதில் ஆறு வேட்பாளர்கள் மட்டுமே வெற்றியை ருசிக்க இருக்கிறார்கள்.

பஞ்சாப் மாநிலம் ஃபரித்காட் தொகுதியில் சுயேட்சை வேட்பாளராக களம் இறங்கியவர் சரப்ஜீத் சிங் கல்சா. இவர் இந்திரா காந்தியை படுகொலை செய்த பியாந்த் சிங்கின் மகன் ஆவார். இவர் ஆம் ஆத்மி வேட்பாளர் கரம்ஜித் சிங் அன்மோலை எதிர்த்து வெற்றி பெற இருக்கிறார். இவர் ஏற்கனவே 2014 மற்றும் 2019-ல் போட்டியிட்டு தோல்வியடைந்தார்.

இதே மாநிலத்தில் உள்ள கதூர் சாஹிப் தொகுதியில் அம்ரித்பால் சிங் காங்கிரஸ் வேட்பாளரை சிங் ஜிராவை எதிர்த்து வெற்றிபெற இருக்கிறார்.

மகாராஷ்டிரா மாநிலம் சங்கிலி தொகுதியில் விஷால் பிரகாஷ்பாபு பாட்டில் வெற்றி பெற உள்ளார். காங்கிரஸ் கட்சி கூட்டணியில் சிவசேனாவுக்கு இந்த தொகுதி கொடுக்கப்பட்டதால் காங்கிரஸ் கட்சியில் இருந்து வெளியேறி சுயேட்சையாக போட்டியிட்டார். இவர் மகாராஷ்டிரா மாநில முன்னாள் முதல்வர் வசந்த்தாதா பாட்டில் மகன் ஆவார்.

காஷ்மீர் லடாக் தொகுதியில் தேசிய மாநாடு கட்சியில் இருந்து விலகி சுயேட்சையாக போட்டியிட்ட முகமது ஹனீபா ஜான் வெற்றி பெறும் நிலையில் உள்ளார்.

டாமன்&டையூ தொகுதியில் பட்டேல் உமேஷ் பாய் பாபுபாய் சுயேட்சையாக போட்டியிட்டு வெற்றி பெறும் நிலையில் உள்ளார்.

ஜம்மு-காஷ்மீர் மாநிலத்தில் தேசிய மாநாடு கட்சி தலைவர் உமர் அப்துல்லாவை எதிர்த்து அப்துல் ரஷித் ஷெய்க் வெற்றி பெறும் தருவாயில் உள்ளார்.

2019-ல் 8 ஆயிரத்திற்கும் மேற்பட்ட வேட்பாளர்கள் போட்டியிட்ட நிலையில் நான்கு சுயேட்சை வேட்பாளர்கள் மட்டுமே வெற்றி பெற்றுள்ளனர்.

1951-52-ல் முதன்முறையாக நடைபெற்ற தேர்தலில் 37 சுயேட்சை வேட்பாளர்கள் வெற்றி பெற்றனர். 1957-ல் 42 சுயேட்சை வேட்பாளர்கள் வெற்றி பெற்றனர். 1962-ல் 20 பேரும், 1984-ல் 13 பேரும் சுயேட்சையாக போட்டியிட்டு வெற்றி பெற்றனர்.

மக்களவை தேர்தல் வாக்கு எண்ணிக்கை நடைபெற்று வருகிறது. பா.ஜனதா தலைமையிலான தேசிய ஜனநாயக கூட்டணி 295 இடங்களில் முன்னிலை பெற்றுள்ளது. இந்தியா கூட்டணி 231 இடங்களில் முன்னிலை வகிக்கிறது.

பா.ஜனதா கட்சிக்கு ஆட்சி அமைப்பதற்கான 272 என தனி மெஜாரிட்டி கிடைக்கவில்லை. சந்திரபாபு நாயுடு தலைமையிலான தெலுங்கு தேசம் கட்சி, நிதிஷ் குமார் தலைமையிலான ஐக்கிய ஜனதா தளம், ஏக் நாத் ஷிண்டே தலைமையிலான சிவ சேனா, ராம் விலாஸ் பஸ்வான் மகன் சிராஜ் பஸ்வான் கட்சி ஆகியவற்றின் ஆதரவு ஆட்சி அமைக்க தேவைப்படும் சூழ்நிலை உருவாகியுள்ளது.

இந்த நிலையில் பா.ஜனதா தேசிய தலைவரான ஜே.பி. நட்டா வீட்டிற்கு மத்திய உள்துறை மந்திரி அமித் ஷா, பாதுகாப்புத்துறை மந்திரி ராஜ்நாத் சிங் ஆகியோர் சென்றுள்ளனர்.

#WATCH | Delhi: Union Home Minister Amit Shah arrives at the residence of BJP chief JP Nadda. pic.twitter.com/GK7get69uR

— ANI (@ANI) June 4, 2024

தற்போதுள்ள அரசியல் சூழ்நிலை குறித்து விரிவான ஆலோசனை நடத்துவார்கள் என எதிர்பார்க்கப்படுகிறது. ஆட்சி அமைக்க தனி மெஜாரிட்டி கிடைக்காத நிலையில் கூட்டணி கட்சிகளை ஒருங்கிணைப்பு ஆட்சி அமைப்பது குறித்து ஆலோசனை நடத்த வாய்ப்புள்ளது.

#WATCH | Delhi: Defence Minister and BJP leader Rajnath Singh arrives at the residence of party chief JP Nadda. pic.twitter.com/3uL2cUkzUs

— ANI (@ANI) June 4, 2024

இதற்கிடையே தேசிய ஜனநாயக கூட்டணி கட்சி தலைவர்கள் நாளை டெல்லியில் சந்தித்து ஆலோசனை நடத்த இருப்பதாக தகவல் வெளியாகியுள்ளது.

2019 தேர்தலில் பா.ஜனதா தனியாக 303 இடங்களில் வெற்றி பெற்றது. தற்போது 240 இடங்களில்தான் முன்னிலை பெற்றுள்ளது குறிப்பிடத்தக்கது.

மேற்கு வங்காளத்தில் காங்கிரஸ் கட்சியை கழற்றி விட்டு பா.ஜனதாவை தனியாக எதிர்த்து நின்றார் மம்தா பானர்ஜி. சந்தேஷ்காளி உள்ளிட்ட பல்வேறு விசயங்களை கையில் எடுத்து பா.ஜனதா மம்தா பானர்ஜி கட்சியை ஓரம் கட்ட பார்த்தது.

தேர்தலுக்கு பிந்தைய கருத்துக் கணிப்பில் பா.ஜனதா 22 இடங்களை பிடிக்கும் என தகவல் வெளியானது. அப்போது மம்தா பானர்ஜி கருத்து கணிப்பு பொய்யாகும் என உறுதியாக கூறினார்.

இன்று காலை வாக்கு எண்ணிக்கை தொடங்கியதும் பா.ஜனதா முதலில் முன்னணி வகித்தது. நேரம் செல்ல செல்ல மம்தா பானர்ஜியின் திரிணாமுல் காங்கிரஸ் கட்சி முன்னிலை வகிக்க தொடங்கியது.

தற்போது 29 இடங்களில் மம்தா பானர்ஜியின் திரிணாமுல் காங்கிரஸ் கட்சி முன்னிலை பெற்றுள்ளது. 12 இடங்களில் பாஜக முன்னிலை பெற்றுள்ளது. காங்கிரஸ் கட்சி ஒரு இடத்தில் முன்னிலை வகிக்கிறது.

கடந்த முறை 18 இடங்களை பிடித்த பாஜக, தற்போது 12 இடங்களில் முன்னிலை வகிக்கிறது. மம்தாவின் 29 இடங்கள் இந்தியா கூட்டணிக்கு மிகப்பெரிய பலமாக பார்க்கப்படுகிறது.