நீங்கள் தேடியது "Northeast monsoon"

இந்திய வானிலை ஆய்வு மையம் வெளியிட்டுள்ள செய்திக்குறிப்பில் கூறியிருப்பதாவது:

* தெற்கு அந்தமான் கடல் மற்றும் அதனை ஒட்டிய பகுதிகளில் வளிமண்டல மேலடுக்கு சுழற்சி உருவானது.

* மேற்கு-வடமேற்கு நோக்கி நகர்ந்து நாளை மறுநாள் தென்கிழக்கு வங்கக்கடலில் காற்றழுத்த தாழ்வு பகுதியாக மாறும்.

* காற்றழுத்த தாழ்வுப்பகுதி தென்மேற்கு வங்கக்கடலின் மத்திய பகுதியில் காற்றழுத்த தாழ்வு மண்டலமாக வலுப்பெற வாய்ப்பு உள்ளது.

* காற்றழுத்த தாழ்வு மண்டலம் தமிழ்நாடு-இலங்கை கடற்கரைகளை நோக்கி நகரக்கூடும் என்று தெரிவித்துள்ளது.

தெற்கு அந்தமான் கடல் மற்றும் அதனை ஒட்டிய பகுதிகளில் அடுத்த 24 மணி நேரத்தில் வளிமண்டல மேலடுக்கு சுழற்சி உருவாக வாய்ப்பு உள்ளது. தென்கிழக்கு வங்கக்கடலில் 23-ந்தேதி புதிய காற்றழுத்த தாழ்வு பகுதி உருவாக உள்ளதாக இந்திய வானிலை ஆய்வு மையம் தெரிவித்துள்ளது.

இந்நிலையில் தமிழ்நாட்டின் 10 மாவட்டங்களில் மதியம் 1 மணி வரை இடி மின்னலுடன் லேசானது முதல் மிதமான மழைக்கு வாய்ப்பு உள்ளதாக சென்னை வானிலை ஆய்வு மையம் தெரிவித்துள்ளது.

நாகை, திருவாரூர், தஞ்சை, புதுக்கோட்டை, ராமநாதபுரம், கன்னியாகுமரி, தூத்துக்குடி, நெல்லை, சிவகங்கை, விருதுநகர் மற்றும் காரைக்காலில் மதியம் 1 மணி வரை இடி மின்னலுடன் கூடிய மிதமான மழைக்கு வாய்ப்பு உள்ளதாக தெரிவித்துள்ளது.

நெல்லை:

நெல்லை, தென்காசி மாவட்டங்களில் வடகிழக்கு பருவமழை பரவலாக பெய்து வருகிறது.

நெல்லையில் ஒரு வாரத்துக்கும் மேலாக மாநகர் மற்றும் புறநகர் பகுதிகளில் பரவலாக பெய்து வரும் கனமழையால் பொதுமக்களின் இயல்பு வாழ்க்கை வெகுவாக பாதிக்கப்பட்டுள்ளது. அதே நேரம் மேற்கு தொடர்ச்சி மலைப் பகுதிகளில் தொடர்ந்து கனமழை பெய்து வருவதால் மாவட்டத்தின் பிரதான அணைகளான பாபநாசம், மணிமுத்தாறு, சேர்வலாறு அணைகளுக்கு நீர்வரத்து தொடர்ந்து அதிகரித்து வருகிறது. இதனால் அணைகளின் நீர்மட்டம் வெகுவாக உயர்ந்து வருகிறது.

மணிமுத்தாறு அணை நீர்மட்டம் நேற்று 73 அடியாக இருந்த நிலையில் இன்று 3 அடி உயர்ந்து 76 அடியை கடந்துள்ளது. அந்த அணைக்கு வினாடிக்கு 1,782 கனஅடி நீர் வந்து கொண்டிருக்கிறது.143 அடி கொள்ளளவு கொண்ட பாபநாசம் அணை நீர்மட்டம் இன்று மேலும் ஒரு அடி உயர்ந்து 88 அடியை கடந்துள்ளது. அந்த அணைக்கு வினாடிக்கு 2130 கன அடி நீர் வந்து கொண்டிருக்கிறது. அங்கு அதிகபட்சமாக 22 மில்லி மீட்டரும், மணிமுத்தாறில் 12 மில்லி மீட்டரும் மழை பதிவாகியுள்ளது. சேர்வலாறு அணை நீர்மட்டம் கிடுகிடுவென உயர்ந்துள்ளது. நேற்று அந்த அணையில் 82.68 அடி நீர் இருப்பு இருந்த நிலையில் இன்று ஒரே நாளில் சுமார் 9 அடி உயர்ந்து 91.38 அடியை எட்டியுள்ளது.

இதனிடையே தாமிரபரணி ஆற்றில் பெரிய அளவில் வெள்ளப்பெருக்கு இல்லை என்றாலும் பரவலாக பெய்து வரும் மழையால் சுமார் 2100 கன அடி தண்ணீர் வந்து கொண்டிருக்கிறது. மழையும் தொடர்ந்து பெய்த வண்ணம் உள்ளது. இதன் காரணமாக நீர்வரத்து அதிகரிக்க வாய்ப்பு இருக்கிறது. எனவே பொதுமக்கள் தாமிரபரணி ஆறு மற்றும் ஏரிகள், குளங்கள், ஓடைகளில் இறங்கி குளிக்க வேண்டாம் என்று மாவட்ட கலெக்டர் கார்த்திகேயன் கேட்டுக் கொண்டுள்ளார்.

எனினும் அதனை கண்டுகொள்ளாமல் நெல்லை மாநகரப் பகுதியில் குறுக்குத்துறை வண்ணாரப்பேட்டை பேராட்சி அம்மன் கோவில் படித்துறைகளில் பொதுமக்கள் இன்று காலையில் இருந்து குளித்து வருகின்றனர்.

மாநகர் பகுதியில் நேற்று மாலையில் தொடங்கி இரவு வரை விட்டுவிட்டு சாரல் மழை பெய்து கொண்டிருந்தது. இன்று காலை முதல் டவுன் சந்திப்பு, வண்ணார்பேட்டை, மேலப்பாளையம், கேடிசி நகர், டக்கரம்மாள்புரம் உள்ளிட்ட பகுதிகளில் சாரல் மழை பெய்து வருகிறது. இதனால் காலையில் பள்ளி, கல்லூரிகளுக்கு செல்லும் மாணவ, மாணவிகள், பணிக்கு செல்லும் பெண்கள், வாகன ஓட்டிகள் பலதரப்பட்டவர்களும் மிகுந்த அவதி அடைந்தனர். அவர்கள் குடை பிடித்தபடி சாலையில் சென்றனர். மாவட்டத்தில் மூலைக்கரைப்பட்டி சுற்றுவட்டார பகுதிகளில் 20 மில்லி மீட்டர் மழை பதிவாகியுள்ளது. சேரன்மகாதேவி, களக்காடு, நாங்குநேரி, ராதாபுரம், அம்பை உள்ளிட்ட பகுதிகளில் இன்று காலையில் இருந்தே பரவலாக சாரல் மழை பெய்து வருகிறது. இதனால் விவசாயிகள் மிகுந்த மகிழ்ச்சி அடைந்துள்ளனர். பிசான பருவ நெல் சாகுபடி பணிகளும் மும்முரமாக நடைபெற்று வருகிறது.

தொடர் கனமழை காரணமாக மணிமுத்தாறு அருவியில் இன்று 8-வது நாளாக குளிக்க தடை நீட்டிக்கப்பட்டுள்ளது. களக்காடு தலையணையிலும் நீர்வரத்து அதிகமாக இருப்பதால் அங்கும் தடை நீடிக்கிறது. பாபநாசம் அகஸ்தியர் அருவியில் தண்ணீர் ஆர்ப்பரித்து கொட்டி வருகிறது.

தென்காசி மாவட்டத்தில் நேற்று விட்டுவிட்டு சில இடங்களில் சாரல் மழை பெய்து வந்த நிலையில் இன்று காலையில் இருந்து பரவலாக சாரல் மழை அடித்து வருகிறது. இதனால் குளிர்ச்சியான சூழ்நிலை நிலவுகிறது. பொதுமக்களின் இயல்பு வாழ்க்கை பாதிப்படைந்துள்ளது. தென்காசி, செங்கோட்டை, ஆய்க்குடி, சிவகிரி உள்ளிட்ட மேற்கு தொடர்ச்சி மலையை ஒட்டி அமைந்துள்ள பகுதிகளில் மழை அதிகமாக பெய்து வருகிறது. இதனால் சாலைகளில் வெள்ளம் பெருக்கெடுத்து ஓடுகிறது.

அணைப்பகுதிகளை பொறுத்தவரை 85 அடி கொள்ளளவு கொண்ட கடனா அணை நீர்மட்டம் இன்று ஒரே நாளில் 7 அடி உயர்ந்து 57.50 அடியை எட்டியுள்ளது. ராமநதி அணை நீர்மட்டம் 2 அடி உயர்ந்து 65 அடியாக உள்ளது. தொடர்ந்து பெய்து வரும் கனமழை காரணமாக அந்த அணைகளுக்கு நீர்வரத்து அதிகரித்து வருவதால் விவசாயிகள் மகிழ்ச்சி அடைந்துள்ளனர். கருப்பாநதி அணை நீர்மட்டம் 47.57 அடியாகவும், அடவிநயினார் அணை நீர்மட்டம் 56.25 அடியாகவும் உள்ளது. கடனாநதி அணைப்பகுதியில் 51 மில்லி மீட்டர் மழை பதிவாகியுள்ளது. ராம நதிகள் 16 மில்லி மீட்டர், குண்டாறு பகுதியில் 18 மில்லி மீட்டரும் மழை பெய்துள்ளது.

சென்னை:

இந்திய வானிலை ஆய்வு மையம் வெளியிட்டுள்ள செய்திக்குறிப்பில் கூறியிருப்பதாவது:

தெற்கு அந்தமான் கடல் மற்றும் அதனை ஒட்டிய பகுதிகளில் அடுத்த 24 மணி நேரத்தில் வளிமண்டல மேலடுக்கு சுழற்சி உருவாக வாய்ப்பு உள்ளது.

இதனால் தென்கிழக்கு வங்கக்கடலில் 23-ந்தேதி புதிய காற்றழுத்த தாழ்வு பகுதி உருவாக உள்ளது. இதைத்தொடர்ந்து தமிழ்நாடு, புதுச்சேரி காரைக்காலில் 25-ந்தேதி கனமழையும், 26-ந்தேதி மிக கனமழைக்கும் வாய்ப்பு உள்ளது.

தமிழகத்தில் வரும் 26-ந்தேதி மிக கனமழைக்கான ஆரஞ்சு அலர்ட் விடுக்கப்பட்டுள்ளது.

இவ்வாறு அதில் கூறப்பட்டுள்ளது.

வளிமண்டல மேலடுக்கு சுழற்சி காரணமாக ராமநாதபுரம் மாவட்டத்தில் பல்வேறு பகுதிகளில் நேற்று முன்தினம் முதல் நேற்று இரவு வரை இடைவிடாது கனமழை கொட்டியது. குறிப்பாக ராமேசுவரத்தில் நேற்று முன்தினம் இரவு முதல் விடிய, விடிய கனமழை பெய்து கொண்டே இருந்தது. நேற்று காலையிலும் மழை பெய்தது. இந்த மழை அவ்வப்போது சாரல் மழையாகவும், திடீரென கனமழையாகவும் என மாறி மாறி பெய்து கொண்டே இருந்தது.

நேற்று திடீரென ராமேசுவரத்தில் அதிகனமழை பெய்யத்தொடங்கியது. இந்த கனமழை ராமேசுவரம் நகர சாலைகள் வெள்ளக்காடாக மாறின. தாழ்வான பகுதிகளில் இருந்த வீடுகளை மழைநீர் சூழ்ந்தது.

ராமேசுவரத்தில் மேக வெடிப்பு காரணமாகவும், அதிகனமழையாலும் நேற்று காலை 6 மணி முதல் மாலை 4 மணி வரை என 10 மணி நேரத்தில் மட்டும் சுமார் 411 மில்லி மீட்டர் மழை (41.1 சென்டி மீட்டர்) பதிவாகியது. இது இதுவரை இல்லாத அளவுக்கு அதிகபட்ச மழைப்பொழிவு ஆகும்.

கனமழை காரணமாக நேற்று ராமநாதபுரம் மாவட்டம் முழுவதும் பள்ளி, கல்லூரிகளுக்கு மாவட்ட கலெக்டர் சிம்ரன்ஜீத் சிங் காலோன் விடுமுறை அறிவித்து இருந்தார்.

இந்நிலையில் ராமநாதபுரம் மாவட்டத்தில் இன்றும் கனமழை பெய்து வருகிறது.

இதையடுத்து ராமநாதபுரத்தில் பள்ளிகளுக்கு விடுமுறை அளிப்பது குறித்து தலைமையாசிரியர் முடிவு செய்யலாம் என்று அம்மாவட்ட கலெக்டர் சிம்ரன் ஜித் சிங் காலோன் உத்தரவிட்டுள்ளார்.

கனமழை பெய்தால் பள்ளிகளுக்கு விடுமுறை அளிக்கலாம் என அறிவுறுத்தப்பட்டுள்ளது. சூழலுக்கு ஏற்ப தலைமை ஆசிரியர்களே முடிவெடுக்கலாம் என உத்தரவிடப்பட்டுள்ளது.

வங்கக்கடலில் வருகிற 23-ந்தேதி காற்றழுத்த தாழ்வுப் பகுதி உருவாக உள்ளது. இதையொட்டி தென் தமிழக கடலோர பகுதிகளில் கடந்த 2 நாட்களாக பலத்த மழை பெய்து வருகிறது.

இந்நிலையில், ராமநாதபுரம் மாவட்டம் பாம்பனில் நேற்று முற்பகல் 11.30 மணி முதல் பிற்பகல் 2:30 மணி வரை 19 சென்டிமீட்டர் மழை பதிவாகியுள்ளது. மிகக் குறுகிய இடத்தில் உருவான வலுவான மேகக் கூட்டங்கள் காரணமாக மேக வெடிப்பு நிகழ்ந்துள்ளது என்று சென்னை வானிலை மையம் தெரிவித்தது.

அதே சமயம் ராமநாதபுரம் மாவட்டம் பாம்பனில் நேற்று மாலை 5.30 மணி நிலவரப்படி 28 செ.மீ. அதிகனமழை கொட்டித் தீர்த்துள்ளது என்று வெதெர்மேன் பிரதீப் ஜான் தனது எக்ஸ் பக்கத்தில் பதிவிட்டு இருந்தார்.

இதனிடையே ராமநாதபுரம் மாவட்டத்தில் பெய்த மழை அளவு மில்லி மீட்டரில் வருமாறு:-

அதிகபட்சமாக தங்கச்சி மடத்தில் 338.40 மில்லி மீட்டர் மழை பதிவாகி உள்ளது. ராமநாதபுரம்- 125.60, மண்டபம் 271.20, ராமேஸ்வரம் 438.00, பாம்பன் 280.00, திருவாடனை 12.80, தொண்டி 7.80, ஆர்.எஸ்.மங்கலம் 14.90, பரமக்குடி 25.60, மொடக்குறிச்சி 49.00, கமுதி 49.00, கடலாடி 73.20.

சென்னை :

சென்னை வானிலை ஆய்வு மையம் வெளியிட்டுள்ள அறிக்கையில்,

குமரிக்கடல் மற்றும் அதனை ஒட்டிய பகுதிகளின் மேல் ஒரு வளிமண்டல கீழடுக்கு சுழற்சி நிலவுகிறது. கேரள கடலோரப்பகுதிகளை ஒட்டிய தென்கிழக்கு அரபிக்கடல் பகுதிகளின் மேல் ஒரு வளிமண்டல கீழடுக்கு சுழற்சி நிலவுகிறது. தெற்கு அந்தமான் மற்றும் அதனை ஒட்டிய பகுதிகளில் நாளை ஒரு வளிமண்டல மேலடுக்கு சுழற்சி உருவாகக்கூடும். இதன் காரணமாக, 23-ஆம் தேதி வாக்கில் தென்கிழக்கு வங்கக்கடல் பகுதிகளில் ஒரு காற்றழுத்த தாழ்வு பகுதி உருவாகக்கூடும். இது மேற்கு-வடமேற்கு திசையில் நகர்ந்து, அதற்கடுத்த இரு தினங்களில் தென்மேற்கு வங்கக்கடல் பகுதிகளில் காற்றழுத்த தாழ்வு மண்டலமாக வலுப்பெறக்கூடும்.

இன்று தென் தமிழகத்தில் ஒருசில இடங்களிலும், வட தமிழகத்தில் ஓரிரு இடங்களிலும், புதுவை மற்றும் காரைக்கால் பகுதிகளிலும், இடி, மின்னலுடன் கூடிய லேசானது முதல் மிதமான மழை பெய்யக்கூடும். திருவாரூர், நாகப்பட்டினம், திருநெல்வேலி, கன்னியாகுமரி மாவட்டங்கள் மற்றும் காரைக்கால் பகுதிகளில் கன முதல் மிக கன மழையும், மயிலாடுதுறை, தஞ்சாவூர், புதுக்கோட்டை, சிவகங்கை, ராமநாதபுரம், தூத்துக்குடி, விருதுநகர், தென்காசி மாவட்டங்களில் ஓரிரு இடங்களில் கனமழையும் பெய்ய வாய்ப்புள்ளது.

நாளை மற்றும் நளை மறுநாள் தமிழகத்தில் ஓரிரு இடங்களிலும், புதுவை மற்றும் காரைக்கால் பகுதிகளிலும், இடி, மின்னலுடன் கூடிய லேசானது முதல் மிதமான மழை பெய்யக்கூடும்.

23-ந்தேதி மற்றும் 24-ந்தேதிகளில் தென் தமிழகத்தில் ஒருசில இடங்களிலும், வட தமிழகத்தில் ஓரிரு இடங்களிலும், புதுவை மற்றும் காரைக்கால் பகுதிகளிலும், லேசானது முதல் மிதமான மழை பெய்யக்கூடும்.

25-ந்தேதி கடலோர தமிழகத்தில் அநேக இடங்களிலும், உள் தமிழகத்தில் ஒருசில இடங்களிலும், புதுவை மற்றும் காரைக்கால் பகுதிகளிலும், லேசானது முதல் மிதமான மழை பெய்யக்கூடும். கடலூர், மயிலாடுதுறை, நாகப்பட்டினம், திருவாரூர், தஞ்சாவூர், புதுக்கோட்டை, ராமநாதபுரம் மாவட்டங்கள் மற்றும் காரைக்கால் பகுதிகளில் ஓரிரு இடங்களில் கனமழையும் பெய்ய வாய்ப்புள்ளது.

26-ந்தேதி தமிழகத்தில் அநேக இடங்களிலும் புதுவை மற்றும் காரைக்கால் பகுதிகளிலும், லேசானது முதல் மிதமான மழை பெய்யக்கூடும். மயிலாடுதுறை, திருவாரூர், தஞ்சாவூர், நாகப்பட்டினம், புதுக்கோட்டை மாவட்டங்கள், காரைக்கால் பகுதிகளில் கன முதல் மிக கன மழையும், செங்கல்பட்டு, விழுப்புரம், கடலூர், பெரம்பலூர், அரியலூர், திருச்சிராப்பள்ளி, சிவகங்கை, ராமநாதபுரம், தூத்துக்குடி, திருநெல்வேலி, கன்னியாகுமரி மாவட்டங்கள் மற்றும் புதுவையில் ஓரிரு இடங்களில் கனமழையும் பெய்ய வாய்ப்புள்ளது.

சென்னை மற்றும் புறநகர் பகுதிகளில் அடுத்த 24 மணி நேரத்திற்கு வானம் ஓரளவு மேகமூட்டத்துடன் காணப்படும். நகரின் ஒருசில பகுதிகளில் லேசான மழை பெய்ய வாய்ப்புள்ளது. அதிகாலை வேளையில் பனி மூட்டம் காணப்படும். அதிகபட்ச வெப்பநிலை 30°-31° செல்சியஸை ஒட்டியும், குறைந்தபட்ச வெப்பநிலை 25° செல்சியஸை ஒட்டியும் இருக்கக்கூடும்.

அடுத்த 48 மணி நேரத்திற்கு வானம் ஓரளவு மேகமூட்டத்துடன் காணப்படும். நகரின் ஒருசில பகுதிகளில் அதிகாலை வேளையில் பனி மூட்டம் காணப்படும். அதிகபட்ச வெப்பநிலை 31°-32° செல்சியஸை ஒட்டியும், குறைந்தபட்ச வெப்பநிலை 25°-26° செல்சியஸை ஒட்டியும் இருக்கக்கூடும் என்று கூறப்பட்டுள்ளது. 

டெல்டா மாவட்டங்கள் மற்றும் தென் மாவட்டங்களில் கடந்த சில தினங்களாக பரவலாக மழை பெய்து வருகிறது. ஓரிரு இடங்களில் கனமழை பெய்து வருகிறது.

இந்த நிலையில், மழை காரணமாக இன்று திருநெல்வேலி மாவட்டத்தில் உள்ள பள்ளிகளுக்கு விடுமுறை அறிவிக்கப்பட்டது. இதனை தொடர்ந்து தென்காசி மற்றும் தூத்துக்குடி மாவட்டங்களிலும் உள்ள பள்ளிகளுக்கு மட்டும் விடுமுறை அறிவிக்கப்பட்டுள்ளது.

மேலும் மழை காரணமாக காரைக்கால் மாவட்டத்தில் பள்ளிகளுக்கு மட்டும் இன்று விடுமுறை அறிவிக்கப்பட்டுள்ளது. அதே போல் திருவாரூர் மாவட்டத்தில் இன்று பள்ளிகளுக்கு மட்டும் விடுமுறை அறிவிக்கப்பட்டுள்ளது. இராமநாதபுரத்தில் உள்ள பள்ளி மற்றும் கல்லூரிகளுக்கு இன்று விடுமுறை அறிவிக்கப்பட்டுள்ளது.

 விருதுநகர் மாவட்டத்தில் பரவலாக மழை பெய்து வருவதால் இன்று பள்ளிகளுக்கு விடுமுறை அளிப்பது குறித்து அந்தந்த பள்ளிகளின் தலைமை ஆசிரியர்களே முடிவு செய்து கொள்ளலாம் என மாவட்ட ஆட்சியர் தெரிவித்துள்ளார். 

நேற்று முதல் மிதமான மழை பெய்து வந்த நிலையில், மழை தொடரும் என வானிலை மையம் தெரிவித்துள்ள நிலையில் விடுமுறை அளிக்கப்பட்டுள்ளது குறிப்பிடத்தக்கது. 

தஞ்சாவூர்:

தமிழகத்தில் வடகிழக்கு பருவமழை தீவிரம் அடைந்து வருகிறது. பல்வேறு மாவட்டங்களில் தொடர்ந்து கனமழை கொட்டி வருகிறது. அதன்படி தஞ்சாவூர், திருவாரூர், நாகை, மயிலாடுதுறை உள்ளிட்ட டெல்டா மாவட்டங்களில் கடந்த ஒரு வாரமாகவே தொடர்ந்து மழை பெய்து வருகிறது.

தஞ்சாவூர் மாவட்டத்தில் நேற்று பகலில் விட்டு விட்டு மழை வெளுத்து வாங்கியது. குறிப்பாக தஞ்சையில் நேற்று மாலை 2 மணி நேரம் தொடர்ந்து கனமழை பெய்தது. பின்னர் இரவில் விட்டு விட்டு பெய்தன. தொடர்ந்து பெய்த மழையால் சாலைகளில் தண்ணீர் பெருக்கெடுத்து ஓடின. தாழ்வான இடங்களில் தண்ணீர் தேங்கியது.

தொடர் மழையால் மாவட்டத்தில் சாகுபடி செய்யப்பட்டுள்ள பின்பட்ட சம்பா, தாளடி நெற்பயிர்கள் மழைநீரால் சூழப்பட்டுள்ளது. குறிப்பாக பாபநாசம் தாலுகா புளியக்குடி, அருந்தவபுரம், கூனங்சேரி மற்றும் அதனை சுற்றியுள்ள பகுதிகளில் கனமழையால் வயல்களில் மழைநீர் புகுந்துள்ளது. இதனால் பயிர்கள் மூழ்கி சேதமடைந்துள்ளன.

இதேபோல் ஓட்டை வாய்க்கால் என்னும் பாசன வடிகால் வாய்க்கால் தூர்வாரப்படாமல் செடி கொடிகள் வளர்ந்து காடு போல் காட்சியளிக்கிறது. இதனால் மழை முழுவதும் வயல் வழியே செல்வதால் நூற்றுக்கணக்கான ஏக்கரில் பயிரிடப்பட்ட சம்பா, தாளடி நெற்பயிர்கள் மழைநீரில் மூழ்கி சேதமடைந்துள்ளன.

இது பற்றி விவசாயிகள் கூறும்போது, தளிகையூர் பகுதியில் புதிதாக கட்டப்பட்ட கதவணை திறக்கப்படாமல் உள்ளதால் வயல்களில் தண்ணீர் தேங்கி உள்ளன. எனவே விவசாயிகளின் நலன் கருதி கதவணையை உடனடியாக திறந்தும், ஓட்டை வாய்க்காலை தூர்வார மாவட்ட நிர்வாகம் நடவடிக்கை எடுக்க வேண்டும்.

மேலும் மாவட்டத்தில் பல இடங்களில் நடவு செய்யப்பட்ட சம்பா, தாளடி இளம் நெற்பயிர்கள் நீரில் மூழ்கி பாதிக்கப்பட்டுள்ளன. வடிகால் சரிவர தூர்வாரப்படாததால் மழைநீர் வடிவதற்கு வழியில்லாமல் தேங்கி காணப்படுவதால் பயிர்கள் அழுகும் நிலை ஏற்பட்டுள்ளது.

எனவே மழையால் பாதிக்கப்பட்ட வயல்களை அதிகாரிகள் பார்வையிட்டு சேதமதிப்பை கணக்கீட்டு உரிய நிவாரணம் வழங்க வேண்டும் என்றனர்.

வடகிழக்கு பருவமழை தீவிரம் அடைந்துள்ள நிலையில் தஞ்சாவூர் மாவட்டத்தில் பல்வேறு இடங்களில் மழை பெய்து வருகிறது. இந்த நிலையில் தஞ்சாவூர் மாவட்டத்தில் கனமழை இருக்கும் பகுதிகளில் பள்ளியின் தலைமையாசிரியரே விடுமுறை அளிப்பது தொடர்பாக முடிவு எடுக்கலாம் என கலெக்டர் பிரியங்கா பங்கஜம் தெரிவித்துள்ளார்.

திருவாரூர் மாவட்டம் திருத்துறைப்பூண்டி மற்றும் அதன் சுற்றுவட்டார பகுதிகளான பாமினி, கொக்காலாடி, ஆதிரெங்கம், கட்டிமேடு, வேலூர், மணலி உள்ளிட்ட பல்வேறு இடங்களில் ஒரு மணி நேரத்திற்கு மேலாக கனமழை கொட்டி தீர்த்தது.

சென்னை:

தமிழகத்தில் வடகிழக்கு பருவமழை காலத்தில் பெய்யக்கூடிய மழை மூலம் ஏரி, குளம், ஆறு உள்ளிட்ட நீர்நிலைகள் அனைத்தும் நிரம்பி விவசாயத்திற்கு பயன் அளிக்கும். இது தவிர சென்னைக்கு குடிநீர் வழங்கக் கூடிய ஏரிகளும் இதனை நம்பிதான் உள்ளன.

அக்டோபர் 1-ந்தேதி முதல் டிசம்பர் மாதம் வரை பருவமழை காலம் என்றாலும் சில ஆண்டுகளில் ஜனவரி முதல் வாரம் வரை கூட மழை பெய்வது உண்டு.

இந்த வருடம் கடந்த மாதம் 15-ந்தேதி வடகிழக்கு பருவமழை தொடங்கியது. குறைந்த காற்றழுத்த தாழ்வு பகுதியுடன் பருவமழை தொடங்கியதால் சென்னை உள்பட வட மாவட்டங்களில் கனமழை பெய்தது.

அதனை தொடர்ந்து மேலும் ஒரு காற்றழுத்த தாழ்வு பகுதி கடந்த வாரம் உருவாகி மண்டலமாக வலுபெறும் என்று எதிர்பார்க்கப்பட்டது. ஆனால் அது வலுவிழந்தது. இதனால் வட மாவட்டங்களில் எதிர்பார்க்கப்பட்ட மழை பொய்த்து போனது.

ஆனாலும் வங்க கடலில் தொடர்ந்து உருவாகி வரும் வளிமண்டல சுழற்சியின் காரணமாக தமிழகத்தில் மழை பெய்து வருகிறது. தென் மாவட்டங்கள், டெல்டா மாவட்டங்களில், உள் மாவட்டங்கள் இயல்பை விட குறைந்த அளவில்தான் மழை பெய்து உள்ளது.

ஏரி-குளம் எதுவும் நிரம்பவில்லை. பருவமழை காலம் மத்திய பகுதிக்கு வந்து விட்ட நிலையில் குறைந்த காற்றழுத்த பகுதி அடுத்தடுத்து உருவாகாமல் தாமதம் ஆவதால் எதிர்பார்த்த மழை பொழிவு இல்லை.

இதுவரை பெய்த மழைப் பொழிவின் மூலம் தமிழகத்தில் பெரும்பாலான மாவட்டங்களில் மழை குறைவாகவே பதிவாகி உள்ளது.

18 மாவட்டங்களில் இயல்பை விட குறைவாக பெய்துள்ளது. தூத்துக்குடி மாவட்டத்தில் 14 செ.மீ. மழை பெய்துள்ளது. அங்கு 51 சதவீதம் மழை பற்றாக்குறையாக உள்ளது. தென்காசி மாவட்டத்தில் 41 சதவீதம் குறைவாக பெய்து உள்ளது. காஞ்சிபுரத்தில் 35 சதவீதமும், நாகப்பட்டினம் 32 சதவீதமும் இயல்பை விட குறைவாகவே மழை பெய்துள்ளது.

சென்னையை ஒட்டிய திருவள்ளூர், செங்கல்பட்டு மாவட்டங்கள், அரியலூர், கடலூர், கள்ளக்குறிச்சி, மயிலாடுதுறை, பெரம்பலூர், ராமநாதபுரம், ராணிப்பேட்டை, திருநெல்வேலி, திருவண்ணாமலை, திருவாரூர், விழுப்புரம், விருதுநகர் மாவட்டங்களில் இயல்பை விட தற்போது வரை மழை குறைவாக பெய்துள்ளது.

சென்னையை பொறுத்தவரை 55 செ.மீ. மழை பெய்துள்ளது. சராசரி மழையை விட 5 சதவீதம் அதிகமாக பதிவாகி உள்ளது. தமிழகத்தில் இதுவரை 30 செ.மீ. மழை பெய்துள்ளது. வடகிழக்கு பருவமழை சராசரியாக 48 செ.மீ. பெய்ய வேண்டும். தற்போதைய நிலவரப்படி 3 சதவீதம் கூடுதலாக மழை பதிவாகி உள்ளது.

இந்த வாரத்தில் சென்னை அதனை ஒட்டிய மாவட்டங்களில் மழை குறைவாகவும் தென் மாவட்டங்களில் தொடர்ந்து மழைக்கு வாய்ப்பு இருப்பதாகவும் வானிலை கணிப்பாளர்கள் தெரிவிக்கின்றனர். இந்த மாதம் இறுதியில் கனமழைக்கான வாய்ப்பு அதிகம் இருக்கும் என்று எதிர்பார்க்கப்படுகிறது.

தஞ்சாவூர்:

தமிழகத்தில் வடகிழக்கு பருவ மழை தீவிரமடைந்தது பல்வேறு மாவட்டங்களில் பெய்து வருகிறது. தஞ்சை மாவட்டத்திலும் கடந்த இரண்டு வாரமாகவே பரவலாக மழை பெய்து வருகிறது. நேற்று பகல் முழுவதும் விட்டு விட்டு மழை பெய்தது.

பின்னர் மீண்டும் நள்ளிரவில் மழை பெய்ய தொடங்கியது. இன்று காலை வரை விடிய விடிய தொடர்ந்து மழை கொட்டியது.

இதே போல் வல்லம் ,திருவையாறு, பூதலூர், ஒரத்தநாடு, பாபநாசம், திருவிடைமருதூர், பேராவூரணி, பட்டுக்கோட்டை, கும்பகோணம் உள்பட பல்வேறு இடங்களிலும் பரவலாக மழை பெய்தன.

தொடர்ந்து பெய்த மழையால் சாலையில் தண்ணீர் பெருக்கெடுத்து ஓடியது. தாழ்வான இடங்களில் மழைநீர் தேங்கின.

தொடர் மழையால் இன்று தஞ்சை மாவட்டத்தில் உள்ள பள்ளிகளுக்கு மட்டும் விடுமுறை அறிவித்து கலெக்டர் பிரியங்காபங்கஜம் உத்தரவிட்டார்.

மாவட்டத்தில் இன்று காலை 7 மணியுடன் முடிவடைந்த மழையின் அளவு விவரம் தாலுகா வாரியாக வருமாறு :-

பேராவூரணி-39, பட்டுக்கோட்டை-24, திருவிடைமருதூர்-12.80, பாபநாசம்-10.40, ஒரத்தநாடு-10.30, கும்பகோணம்-6.80, திருவையாறு-4.80, தஞ்சாவூர்-2.50 மி.மீ.

இதைப்போல் பட்டுக்கோட்டை, பேராவூரணி மற்றும் அதன் சுற்று வட்டார பகுதிகளான சூரப்பள்ளம், ஆத்திக்கோட்டை, பொன்னவராயன் கோட்டை உள்ளிட்ட பகுதிகளில் நேற்று முதல் மழை விட்டு விட்டு பெய்தது. இந்த மழையினால் குடியிருப்பு பகுதிகளில் உள்ள சாலைகளில் மழைநீர் பெருக்கெடுத்து ஓடியது. இதனால் வாகன ஓட்டிகள் அவதியடைந்தனர்.

இந்த மழையால் பட்டுக்கோட்டை மணிகூண்டு, தலைமை தபால் நிலையம் மற்றும் பேருந்து நிலையம் உள்ளிட்ட பகுதிகளில் மழைநீர் தேங்கி குளம் போல் காட்சியளிக்கிறது. பேருந்து நிலையத்தில் பயணிகள் நடந்து செல்ல முடியாத அளவிற்கு தண்ணீர் நிரம்பி இருக்கிறது. இன்று காலையிலும் பட்டுக்கோட்டை பகுதியில் மழை பெய்து வருகிறது.

இதைப்போல் திருவாரூர் மாவட்டத்தில் நன்னிலம், கூத்தாநல்லூர், வடபாதிமங்கலம், மாங்குடி, வடகரை, திருத்துறைப்பூண்டி, நீடாமங்கலம், மன்னார்குடி, வலங்கைமான், கொரடாச்சேரி, சேந்தமங்கலம், வண்டாம் பாலை, தண்டலை, புலிவலம், வாழவாய்க்கால் உள்ளிட்ட பல்வேறு இடங்களிலும் நேற்று காலை முதல் பரவலாக விட்டு விட்டு கனமழை பெய்து வருகிறது.

இந்த நிலையில் நேற்று நள்ளிரவு முதல் தற்போது வரை மாவட்டத்தின் பல்வேறு பகுதிகளில் மிதமானது முதல் கனமழை வரை தொடர்ந்து பெய்து வருகிறது.

கடந்த 24 மணி நேரத்தில் திருவாரூர் மாவட்டத்தில் 31.8 சென்டிமீட்டர் மழை அளவு பதிவாகியுள்ளது. இதில் அதிகபட்சமாக திருத்துறைப்பூண்டியில் மட்டும் 9.9 சென்டிமீட்டரும், குறைந்தபட்சமாக குடவாசலில் 1 சென்டிமீட்டர் மழை அளவு பதிவாகியுள்ளது.

இதே போன்று திருவாரூரில் 3.9, நன்னிலத்தில் 3.1, வலங்கைமானில் 3, நீடாமங்கலத்தில் 2.4 சென்டிமீட்டர் என மழை அளவு பதிவாகியுள்ளது.

நாகை மாவட்டம் வேதாரண்யம், ஆறுகாட்டுத்துறை, புஷ்பவனம், வெள்ளப்பள்ளம், கோடியக்கரை வாய்மேடு, ஆயக்காரன்புலம், கருப்பம்புலம் உள்ளிட்ட பல்வேறு பகுதிகளில் இடியுடன் கூடிய கனமழை பெய்தது.

இதனால் பல்வேறு இடங்களில் மழை நீர் தேங்கியது. மேலும் மழைநீர் தேங்கிய இடங்களில் கலெக்டர் ஆகாஷ் பார்வையிட்டு ஆய்வு செய்தார்.

இந்த கன மழையால் வேதாரண்யம் பகுதியில் சாகுபடி செய்யப்பட்டுள்ள சுமார் 10,000 ஹெக்டர் மானாவாரி சாகுபடிக்கு ஏற்ற மழையென விவசாயிகள் மகிழ்ச்சி தெரிவித்தனர். இன்றும் மழை பெய்து வருகிறது. இதனால் பொதுமக்களின் வாழ்க்கை பாதிக்கப்பட்டுள்ளது.

சேலம்:

சேலம் மாவட்டத்தில் வடகிழக்கு பருவமழை தொடங்கி ஒரு மாதத்திற்கு மேலாக மழை பெய்து வருகிறது. அதன் தொடர்ச்சியாக மாவட்டத்தின் பல்வேறு பகுதிகளில் நேற்றும் மழை பெய்தது.

குறிப்பாக தம்மம்பட்டி, வீரகனூர், ஆனைமடுவு, ஏற்காடு உள்பட பல்வேறு பகுதிகளில் நேற்றிரவு மழை பெய்தது. இந்த மழையால் தாழ்வான பகுதிகள் மற்றும் வயல்வெளிகளில் தண்ணீர் தேங்கியது. மழையை தொடர்ந்து மாவட்டம் முழுவதும் கடும் குளிர் நிலவி வருகிறது.

மாவட்டத்தில் அதிகபட்சமாக தம்மம்பட்டியில் 12 மி.மீ. மழை பதிவாகி உள்ளது. சேலம் 1.7, ஏற்காடு 7.4, வாழப்பாடி 1.4, ஆனைமடுவு 8, ஆத்தூர் 1.8, கரியகோவில் 5, வீரகனூர் 10, நத்தக்கரை 1, சங்ககிரி 6, மேட்டூர் 2.2, மி.மீ. என மாவட்டம் முழுவதும் 56.5 மி.மீ. மழை பதிவாகி உள்ளது.

மாவட்டத்தில் ஏற்கனவே தென்மேற்கு பருவமழை வழக்கத்தை விட அதிகமாக பெய்த நிலையில் தற்போது வடகிழக்கு பருவமழையும் தொடர்ந்து பெய்வதால் ஏரிகளுக்கு நீர்வரத்து அதிகரித்துள்ளது.

சேலம் மாவட்டத்தில் நீர்வளத்துறையின் கட்டுப்பாட்டில் 106 ஏரிகள் உள்ளன. இந்த ஏரியில் தேக்கப்படும் 1750 மில்லியன் கன அடி நீரை பயன்படுத்தி 22 ஆயிரத்து 56 ஏக்கர் நிலம் பாசன வசதி பெறுகிறது.

நீர்வளத்துறையின் புள்ளி விவரப்படி 12 ஏரிகளில் 25 சதவீதத்திற்கும் குறைவாக நீர் இருப்பு உள்ளது. 9 ஏரிகளில் 25 சதவீதத்திற்கும் மேலும், 6 ஏரிகள் 50 சதவீதத்திற்கும் மேலும் நிரம்பி உள்ளது. 17 ஏரிகளில் 75 சதவீதம் அளவுக்கு நீர் நிரம்பி உள்ளது. 21 ஏரிகள் முழுமையாக நிரம்பி உபரி நீர் வெளியேறும் நிலையில் உள்ளது. 41 ஏரிகள் நீர்வரத்தின்றி குட்டை போல காட்சி அளிக்கிறது.

இதில் சரபங்கா உட்கோட்டத்தில் உள்ள 37 ஏரிகளில் கன்னங்குறிச்சி புது ஏரி, வீராணம் ஏரி, காமலாபுரம் பெரிய ஏரி, சின்ன ஏரி, பூலாவாரி ஏரி, மானாத்தாள் ஏரி, டி.மாரமங்கலம் ஏரி, பேரியோரிப்பட்டி ஏரி, தாரமங்கலம் ஏரி, குளத்தாம்பட்டி ஏரி ஆகிய 10 ஏரிகள் முழுமையாக நிரம்பி உள்ளன. இதே போல 8 ஏரிகள் 75 சதவீதமும், 3 ஏரிகள் 50 சதவீதமும், 6 ஏரிகள் 25 சதவீதமும் நிரம்பி உள்ளன. 10 ஏரிகள் நீர்வரத்தின்றி குட்டை போல காட்சி அளிக்கின்றன.

சரபங்கா ஆத்தூர் உப கோட்டத்தில் மொத்தம் உள்ள 51 ஏரிகளில் அம்மாபாளையம் முட்டல் ஏரி, அபிநவம் எரி, ஜங்கமசமுத்திரம் ஏரி, செந்தாரப்பட்டி ஏரி, ஆத்தூர் புது ஏரி, புத்திரகவுண்டம்பாளையம் ஏரி, கல்லேரிப்பட்டி ஏரி, சின்னசமுத்திரம் ஏரி ஆகிய 8 ஏரிகள் முழுமையாக நிரம்பி உள்ளன. 5 ஏரிகள் 75 சதவீதமும், 1 ஏரி 50 சதவீதமும் தண்ணீர் நிரம்பி உள்ளது. 28 ஏரிகள் நீர்வரத்தின்றி குட்டை போல காட்சி அளிக்கின்றன.

மேட்டூர் உப கோட்டத்தில் உள்ள 18 ஏரிகளில் 3 ஏரிகள் முழுமையாக நிரம்பி உள்ளன. 4 ஏரிகள் 75 சதவீதமும், 2 ஏரிகள் 50 சதவீதமும், 2 ஏரிகளில் 25 சதவீதத்திற்கு கூடுதலாகவும், 4 ஏரிகளில் 25 சதவீதத்திற்கும் கு றைவாகவும் நீர் இருப்பு உள்ளது. 3 ஏரிகளில் தண்ணீர் இல்லாமல் வறண்டு உள்ளன.

தமிழகத்தில் வட கிழக்கு பருவமழை நடப்பாண்டில் சராசரிக்கும் கூடுதலாக பெய்யும் என்று வானிலை ஆய்வு மையம் அறிவித்துள்ளது. மழைக்காலம் டிசம்பர் வரை நீடிக்கும் என்பதால் மாவட்டத்தில் உள்ள பெரும்பாலான ஏரிகள் நிரம்ப வாய்ப்புள்ளது.

ஆனால் தற்போது வரை நீர்வரத்து இல்லாத ஏரிகளிலும் தண்ணீர் நிரம்பும் வகையில் ஏரிகளின் நீர்வரத்து கால்வாய்களில் ஆக்கிரமிப்புகளை அகற்றி அவற்றை விரைந்து தூர்வாரி ஏரிகள் நிரம்ப மாவட்ட நிர்வாகம் நடவடிக்கை வேண்டும் என்பது விவசாயிகளின் பெரும் எதிர்பார்ப்பாக உள்ளது.