லக்னோ:
உத்தர பிரதேச மாநிலத்தின் ஷாஜஹான்பூர் தொகுதி எம்.எல்.ஏ.வாக இருந்து வருபவர் பா.ஜ.க.வை சேர்ந்த சேத்ராம். இவர் அங்குள்ள போவாயன் தாலுகாவில் போடப்பட்ட சாலையின் தரம் குறித்து திடீர் ஆய்வு நடத்தினார்.
அப்பகுதியில் சமீபத்தில் போடப்பட்டிருந்த தார்ச்சாலையினை ஆய்வு செய்தார். தன்னிடம் இருந்த பேனாவால் சாலையை கீறி எடுத்தார்.
லக்கிம்பூர் மாவட்டத்துடன் போவாயன் தாலுகாவை இணைக்கும் 17 கி.மீ தூரம் சாலை விரிவாக்கத் திட்டத்தில் இந்த சாலை அடங்கும். அவரது திடீர் ஆய்வின்போது ஜல்லிக்கு பதிலாக மண் பயன்படுத்தப்படுவதை கண்டுபிடித்தார்.
எம்.எல்.ஏ., பேனாவைப் பயன்படுத்தி சாலையின் மேற்பரப்பைத் துடைத்து, பயன்படுத்திய பொருட்களின் தரம் குறைந்ததைக் காட்டினார். இதுதொடர்பான புகைப்பட காட்சிகள் சமூக வலைதளங்களில் வைரலானது.
சாலை கட்டுமானத்தின் மோசமான தரம் குறித்து கடுமையாக சாடிய அவர், கட்டுமானப் பொருட்களில் குறிப்பிடத்தக்க குறைபாடுகளையும் கண்டறிந்தார். இதுதொடர்பாக அரசு உயர் அதிகாரிகளிடம் பேச உள்ளதாக கூறினார். இச்சம்பவம் பொதுப்பணித் துறைக்குள் பரபரப்பை ஏற்படுத்தியது.
பொதுப்பணித்துறை மந்திரி ஜிதின் பிரசாதாவின் சொந்த மாவட்டம் ஷாஜஹான்பூர் என்பது குறிப்பிடத்தக்கது.
