நீங்கள் தேடியது "TVK"

அம்பேத்கர் புத்தக வெளியீட்டு விழாவில் தமிழக வெற்றிக் கழகத் தலைவர் விஜயும், விடுதலை சிறுத்தைகள் கட்சி தலைவர் திருமாவளவனும் ஒரே மேடையில் பங்கேற்க உள்ளதாக கூறப்பட்டது. இதனால் வருகிற சட்டசபை தேர்தலில் விஜயுடன் திருமாளவன் கூட்டணி வைக்க உள்ளதாக செய்திகள் வெளியாகி இருந்தன.

இந்த செய்தியை திருமாவளவன் பல முறை மறுப்பு தெரிவித்த நிலையில், திமுக கூட்டணியில் இருந்து திருமாவளவன் விலகுவதாக கூறப்பட்டது. இதனால் புத்தக வெளியீட்டு விழாவில் பங்கேற்பது குறித்து முடிவு செய்யப்படும் என திருமாவளவன் கூறியிருந்தார்.

இந்த நிலையில், சென்னையில் நடைபெற உள்ள புத்தக வெளியீட்டு விழாவில் திருமாவளவன் பங்கேற்கவில்லை என தகவல் வெளியாகி உள்ளது. தற்போதைய அரசியல் சூழ்நிலையை கருத்தில் கொண்டு திருமாவளவன் பங்கேற்க மறுப்பதாக கூறப்படுகிறது.

சென்னை:

நடிகர் விஜய்யின் தமிழக வெற்றி கழகம் 2026 சட்டமன்ற தேர்தலில் களம் இறங்குகிறது. கூட்டணி அமைத்து தேர்தலை சந்திப்பதற்கு விஜய் திட்டமிட்டுள்ளார். மேலும் கட்சி வளர்ச்சி பணியிலும் தீவிரம் காட்டி வருகிறார். அந்த வகையில் அவரது அறிவுறுத்தலின் பேரில் சென்னை பனையூரில் உள்ள தமிழக வெற்றி கழகத்தின் தலைமை அலுவலகத்தில், செங்கல்பட்டு மாவட்ட நிர்வாகிகள், உறுப்பினர்கள் ஆலோசனை கூட்டம் நடைபெற்றது.

இந்த கூட்டத்துக்கு தமிழக வெற்றி கழகத்தின் பொதுச்செயலாளர் புஸ்சி ஆனந்த் தலைமை தாங்கி பேசியதாவது:-

மற்ற கட்சிகளில் கூட்டம் என்றால் 200, 300 பேர் இருப்பார்கள். நமது கட்சியில்தான் 2 ஆயிரம், 3 ஆயிரம் கூடி இருக்கிறார்கள். நான் இந்த கூட்டம் தொடங்குவதற்கு முன்பாக கட்சி அறையில் இருந்தேன். அப்போது எவ்வளவு பேர் வந்திருக்கிறார்கள்? என்று கேட்டேன். 30, 40 பேர் மட்டும் வந்து அமர்ந்திருக்கிறார்கள் என்று சொன்னார்கள். இன்னும் அரை மணி நேரத்தில் பாருங்கள் என்று சொன்னேன். அதை போன்று கூட்டம் திரண்டுள்ளது. இதுதான் தளபதி (விஜய்) மீது வைத்திருக்கிற பாசம், அன்பு.

தளபதியின் அறிவுறுத்தலின்படி கட்சியில் உழைப்பவர்களுக்கு மிக விரைவில் பதவிகள் வழங்கப்படும். யாரெல்லாம் கட்சிக்கு உழைத்தார்களோ அவர்களுக்கு தேடி போய் பதவி கொடுப்பதுதான் தமிழக வெற்றி கழகம். கீழ் மட்டத்தில் இருந்து மேல் மட்டம் வரையில் பதவிகள் வழங்கப்பட இருக்கிறது. நம் தலைவரை முதலமைச்சர் இருக்கையில் அமர வைப்பதற்கு நாம் அனைவரும் கடுமையாக உழைக்க வேண்டும்.

இவ்வாறு அவர் பேசினார்.

கந்தர்வகோட்டை:

புதுக்கோட்டை மாவட்டம் கந்தர்வகோட்டை தாலுகாவில் சுமார் 36 கிராம பஞ்சாயத்துகளும் அது சார்ந்த கிராமங்களும் உள்ளன.

இந்த பகுதியில் ஊராட்சிக்கு ஒரு இடத்தில் தமிழக வெற்றிக்கழகம் சார்பாக கொடி கம்பம் நட்டு கொடியேற்று விழா நடத்த கட்சி நிர்வாகிகள் திட்டமிட்டனர்.

இதையடுத்து இதற்கு அனுமதி கோரி கடந்தவாரம் கந்தர்வகோட்டை போலீஸ் நிலையத்தில் தமிழக வெற்றிக்கழகம் சார்பாக மனு கொடுக்கப்பட்டது. மனுவை பெற்றுக்கொண்ட போலீசார் கொடியேற்று விழா நடத்த அனுமதி கொடுக்கவில்லை என தெரிகிறது.

இதுபற்றி நிர்வாகிகள் கேட்டதற்கு இன்று, நாளை என்று தாமதப்படுத்தி வந்துள்ளனர். இதையடுத்து கட்சி நிர்வாகிகள், தொண்டர்கள் அனைவரும் தங்கள் வீடுகளில் கொடியேற்றுவது என்று முடிவு செய்தனர்.

இதையடுத்து நேற்று முன்தினம் கந்தர்வகோட்டை ஒன்றிய த.வெ.க. தலைவர் அருண்பிசாத், செயலாளர் சுரேந்திரன், பொருளாளர் அய்யாதுரை ஆகியோர் முன்னிலையில் நிர்வாகிகள், தொண்டர்கள் தங்கள் வீடுகளில் கொடிகளை ஏற்றினார்கள். தொடர்ந்து நேற்றும், இன்றும் கொடிகள் ஏற்றப்பட்டு வருகின்றன.

இதுபற்றி நிர்வாகிகள் கூறுகையில், தமிழக வெற்றிக்கழக கொடி ஏற்று விழாவுக்கு முறைப்படி அனுமதி கேட்டு மனு கொடுத்தோம். ஆனால் போலீசார் தொடர்ந்து தாமதப்படுத்தி வந்தனர்.

பொது இடத்தில் கொடியேற்ற தானே போலீஸ் அனுமதி பெறவேண்டும். வீடுகளில் ஏற்ற அனுமதி தேவை இல்லையே என எண்ணி எங்கள் பகுதியில் உள்ள நிர்வாகிகள், உறுப்பினர்கள் வீடுகளில் கட்சி கொடியை ஏற்றியுள்ளோம். இதுவரை சுமார் 2 ஆயிரம் வீடுகளில் கொடி ஏற்றப்பட்டு உள்ளது என்றனர். 

திருவள்ளூர் மாவட்டத்தில் தேமுதிக பொதுச் செயலாளர் பிரேமலதா விஜயகாந்த் செய்தியாளர்களுக்கு பேட்டி அளித்தார்.

அப்போது அவர் கூறியதாவது:-

தமிழகம் முழுவதும் அனைத்து இடங்களிலும் படுகொலைகள், பலாத்காரங்கள், கொலை, கொள்ளை என்று சட்டம் ஒழுங்கு முற்றிலுமாக சீரழிந்து இன்று தமிழ்நாடே கேள்விக்குறியாக இருக்கிறது. அதில், மாற்றுக் கருத்தே இல்லை.

பள்ளிகளில் பாலியல் வன்கொடுமை, போதைக் கலாச்சாரம் போன்று பல்வேறு விஷயங்கள் தமிழகத்தில் நடக்கிறது. இவை அனைத்தையும் கண்டிக்க வேண்டும். ஆனால், இதை தடுக்க வேண்டிய அரசு வெறும் வாய்வார்த்தைகளை சொல்லிக்கொண்டு, வாக்குறுதிகளை நிறைவேற்றாமல் ஒரு ஆட்சியை நடத்திக் கொண்டிருக்கின்றனர்.

எதிர்வரப்போகும் மழை வெள்ளத்திற்கு எந்த முன்னெச்சரிக்கை ஏற்பாடும் இல்லை. இதுதான் திராவிட மாடல் ஆட்சியா என்று மக்கள் கேட்கின்ற கேள்வியை நானும் கேட்கிறேன்.

யார் வருவதற்காகவும் இன்னெரு கட்சி வேலை செய்ய வேண்டும் என்கிற அவசியம் கிடையாது. அவரவர்களின் கட்சி பணிகளை அவரவர்களின் கட்சிகள் செய்துக் கொண்டிருக்கின்றனர். எங்கள் கட்சிகளின் பணிகளை நாங்கள் செய்துக் கொண்டிருக்கிறோம். அதுபோன்று, திமுக, அதிமுக மற்றும் தமிழகத்தில் உள்ள பிற கட்சிகளும் அவரவர்களின் பணிகளை செய்துக் கொண்டிருக்கின்றனர்.

தேமுதிக- அதிமுக இடையே கூட்டணி தொடரும்.

இவ்வாறு அவர் குறிப்பிட்டுள்ளார்.

கோவை:

அ.தி.மு.க. பொதுச்செயலாளர் எடப்பாடி பழனிசாமி கோவை விமான நிலையத்தில் நிருபர்களுக்கு பேட்டி அளித்தார். அவர் கூறியதாவது:-

முதலமைச்சர் மு.க.ஸ்டாலின் என்னை பற்றி பல விமர்சனங்களை அண்மை காலங்களாக தெரிவித்து வருகிறார். எதிர்க்கட்சி தலைவர் எடப்பாடி பழனிசாமியாகிய நான் அவரை பற்றி விமர்சனம் செய்வதாக, அவரது கட்சி நிர்வாகிகளுக்கு எழுதிய மடலில் தெரிவித்துள்ளார்.

ஏதோ நான் முதலமைச்சரை கொச்சைப்படுத்தி பேசியதாகவும், எதிர்கட்சி தலைவர் என்ற நிலையில் இருந்து நான் தவறுதலாக பேசுவதாக விமர்சனம் செய்திருக்கிறார்.

மு.க.ஸ்டாலின் எதிர்க்கட்சி தலைவராக இருந்தபோது, நான் முதலமைச்சராக இருந்த காலகட்டத்தில், எப்படியெல்லாம் பேசினார் என்பது உங்களுக்கு தெரியும். குறிப்பாக என்னை தனிப்பட்ட முறையில் விமர்சனம் செய்தார். எடப்பாடி பழனிசாமி தமிழக முதலமைச்சராக வர ஊர்ந்து பறந்து சென்றார் என விமர்சனம் செய்தார்.

இப்படி முதலமைச்சர் தன்னுடைய பதவியை, நிலையை மறந்து தன்னை விமர்சிக்கிறார்.

ஆனால் என்னை பொறுத்தவரைக்கும், அ.தி.மு.க கட்சி நிர்வாகிகளை பொறுத்தவரை எந்த ஒரு எதிர்கட்சியினரையும் தவறுதலாக விமர்சனம் செய்வது கிடையாது. ஆனால் எங்களை பற்றி ஆளுங்கட்சியினரின் தவறுதலான விமர்சனங்களுக்கு தக்க பதிலடி அவ்வப்போது கொடுப்போம். அ.தி.மு.க ஆட்சியில் எந்த திட்டங்களும் நிறைவேற்றப்படவில்லை என்ற தவறான கருத்தை முதலமைச்சர் தெரிவிக்கிறார். கோவை மாவட்டத்தில் அ.தி.மு.க ஆட்சியில் எண்ணற்ற திட்டங்களை நிறைவேற்றியுள்ளோம்.

அ.தி.மு.க ஆட்சியில் கொண்டு வரப்பட்டு நிறைவேற்றப்பட்ட திட்டங்களை தி.மு.க. அரசு ஸ்டிக்கர் ஒட்டி திறந்து வருகிறது. அ.தி.மு.க ஆட்சியில் கொண்டு வரப்பட்ட திட்டம் என்பதற்காகவே தி.மு.க. பல திட்டங்களை ஆமை வேகத்தில் மேற்கொண்டு வருகிறது. அ.தி.மு.க ஆட்சியில் கொண்டு வரப்பட்ட திட்டங்களை எல்லாம் கிடப்பில் போட்டு விட்டனர்.

ஆனால் முதலமைச்சர் மு.க.ஸ்டாலின் அ.தி.மு.க. ஆட்சியில் எந்த திட்டமும் நிறைவேற்றவில்லை என்று தெரிவிக்கிறார். எப்படியாவது இந்த ஆட்சியாளர்கள் மக்களை குழப்பி அரசியல் ஆதாயம் தேட முயற்சிக்கிறார்கள். அது ஒருபோதும் நடக்காது.

தி.மு.க. ஆட்சிக்கு வந்த பிறகு மு.க.ஸ்டாலின் எந்த திட்டங்களை கோவைக்கு கொண்டு வந்தார். திட்டங்களை அறிவிக்கிறார். எந்த திட்டமும் நடைமுறைப்படுத்தவில்லை. பணி தொடங்கவில்லை. பல மாவட்டங்களுக்கு ஆய்வுக்கு போகிறேன் என்கிறார். தி.மு.க ஆட்சியில் எந்த திட்டமும் அறிவிக்கவில்லை. எந்த பணியும் நடக்கவில்லை. அப்படி இருக்கையில் எப்படி போய் ஆய்வு பணி மேற்கொள்ள முடியும்.

அ.தி.மு.க. ஆட்சியில் திட்டங்களை அறிவித்து, பணி முடிந்ததும் நாங்கள் அதனை திறந்தோம். ஆட்சி மாற்றம் ஏற்பட்டு தி.மு.க ஆட்சிக்கு வந்த பிறகு நாங்கள் கொண்டு வந்த திட்டங்களை தான் முதலமைச்சர் திறந்து வைக்கிறார். இதுதான் நிலைமை.

2021 தேர்தலின் போது அவர் அளித்த வாக்குறுதிகள் எதையும் நிறைவேற்றவில்லை. தி.மு.க ஆட்சிக்கு வந்த பிறகு என்னென்ன திட்டங்கள் நிறைவேற்றியுள்ளீர்கள் என நான் முதலமைச்சரிடம் கேள்வி கேட்டேன். அதற்கு முதலமைச்சர் பதில் சொல்லாமல், உதயநிதி பதில் சொல்கிறார். முதலமைச்சர் எங்கே போனார்.

ஏற்கனவே நான் சொன்னபடி எல்லா மாநிலத்திலும் ஒரு முதலமைச்சர் தான் இருக்கிறார்கள். தமிழகத்தில் 4 முதலமைச்சர்கள் இருக்கிறார்கள். அந்த அடிப்படையில் தான் உதயநிதி பதில் சொல்லி கொண்டிருக்கிறார். முதலமைச்சர் சொல்ல வேண்டிய பதில் முதலமைச்சர் தான் சொல்ல வேண்டும். அதிகார மையங்கள் 4 இருக்கிறது. அது யார் என்பது உங்களுக்கு தெரியும்.

தமிழகத்தில் சட்டம் ஒழுங்கு சீரழிந்து விட்டது. அப்படி ஒரு முதலமைச்சர் தான் தமிழ்நாட்டை ஆண்டு கொண்டிருக்கிறார். பொதுமக்கள் பிரச்சனை என்று சொன்னால் அதை விசாரித்து நடவடிக்கை எடுக்க வேண்டும். காவல்துறைக்கு முழு சுதந்திரம் கிடையாது.

அ.தி.மு.க. கட்டமைப்பு பலமாக இருக்க வேண்டும் என்ற எண்ணத்தின் அடிப்படையில் தான் தொடர் நடவடிக்கை எடுத்துள்ளோம்.

இவ்வாறு அவர் கூறினார்.

2026 சட்டமன்ற தேர்தலில் தமிழக வெற்றிக்கழகத்துடன் அ.தி.மு.க. கூட்டணி அமைக்குமா? என நிருபர்கள் கேள்வி எழுப்பினர். அதற்கு பதில் அளித்து அவர் கூறியதாவது:-

சட்டமன்ற தேர்தல் வர ஒன்றரை ஆண்டு காலம் இருக்கிறது. அப்போது தான் கூட்டணி குறித்து தெரிவிக்க முடியும். ஏற்கனவே ஒருமித்த கருத்துள்ள கட்சிகள் எங்களுடன் கூட்டணிக்கு வரும் என தெரிவித்துள்ளேன். வருகிற சட்டமன்ற தேர்தலில் பா.ஜ.கவுடன் கூட்டணி இல்லை என்பதை நாங்கள் பலமுறை தெரிவித்து விட்டோம்.

இவ்வாறு அவர் கூறினார்.

சென்னை:

விஜய்யின் தமிழக வெற்றிக் கழக மாநாடு, செயற்குழுக் கூட்டம் முடிவடைந்ததை தொடர்ந்து கட்சியின் வளர்ச்சி மற்றும் அடுத்தக்கட்ட நடவடிக்கைகளில் கட்சி தலைவர் விஜய் தீவிரமாக ஈடுபட்டு வருகிறார்.

இதைத் தொடர்ந்து பூத் கமிட்டி மற்றும் வாக்காளர் சேர்த்தல், திருத்தல் முகாமில் பொதுமக்களுக்கு உதவும் வகையில் தமிழக வெற்றிக் கழகம் சார்பில் விழிப்புணர்வு ஏற்படுத்த வேண்டும் என கட்சி நிர்வாகிகளுக்கும் தொண்டர்களுக்கும் விஜய் அறிக்கை வாயிலாக வலியுறுத்தி இருக்கிறார்.

மேலும் கட்சி வளர்ச்சிக்காக அடுத்தடுத்து அதிரடி திட்டங்களை அறிவித்து வருகிறார். விஜய்யின் அரசியல் நடவடிக்கைகள் பல்வேறு அரசியல் கட்சிகள் மட்டுமின்றி பொதுமக்கள் மத்தியிலும் விவாத பொருளாக இருந்து வருகிறது.

நாம் தமிழர் கட்சி தலைவர் சீமான் 'விஜய்' அரசியல் பயணம் பற்றி கடுமையாக சமீபத்தில் விமர்சனம் செய்திருந்தார். இந்நிலையில் கடந்த 8-ந்தேதி சீமான் பிறந்த நாளையொட்டி அவருக்கு விஜய் சமூக வலைதளம் வாயிலாக வாழ்த்து தெரிவித்திருந்தார்.

இதைத் தொடர்ந்து தமிழக வெற்றிக் கழகம் சார்பில் தொலைக்காட்சி விவாதங்களில் பங்கேற்போர் மற்றும் கட்சி நிர்வாகிகள் ஆலோசனைக் கூட்டம் பொதுச்செயலாளர் புஸ்சி ஆனந்த் தலைமையில் பனையூரில் உள்ள கட்சி தலைமை அலுவலகத்தில் கட்சி தலைவர் விஜய் ஆலோசனையின் பேரில் நேற்று நடந்தது.

கூட்டத்தில் பொதுச்செயலாளர் புஸ்சி ஆனந்த் பேசியதாவது:-

தமிழக வெற்றிக் கழகம் சார்பில் விவாதங்களில் பங்கேற்போர் மிகவும் கண்ணியத்துடன் நடந்து கொள்ள கட்சி தலைவர் விஜய் அறிவுறுத்தி உள்ளார். எக்காரணம் கொண்டும் யாரும் தனிநபர் தாக்குதலில் ஈடுபடக் கூடாது. எதிர்தரப்பினர் தரம் தாழ்ந்து பேசினாலும் அவர்களுடன் நம் கட்சியினர் மல்லுக்கட்ட கூடாது. நெறியாளர்களிடம் எடுத்துரைத்து நமது விவாதங்களை புரிந்து கொள்ளும் வகையில் வெளிப்படுத்த வேண்டும்.

விவாதங்களில் பங்கேற்க செல்பவர்கள் பொறுமை, சகிப்புத்தன்மை, நிதானத்தை கடைபிடிக்க வேண்டும். தரவுகளின் அடிப்படையில் பதில் அளிக்க வேண்டும். தரக்குறைவான வார்த்தைகளை கொண்டு விமர்சனம் செய்யக் கூடாது.

பேசுபவர்கள் பேசிவிட்டு போகட்டும். மற்றக் கட்சி நிர்வாகிகளை எக்காரணம் கொண்டும் மரியாதை குறைவாக பேசக்கூடாது. கட்சி கொள்கை, கொடி விளக்கம், கட்சியின் பெயர் காரணங்கள் ஏற்கனவே அறிவிக்கப்பட்டுள்ளது. அதன் அடிப்படையில் பதில் அளிக்க வேண்டும்.

தமிழக வெற்றிக் கழகத்தின் கொள்கைகளை உள்வாங்கி கருத்தியல் வாயிலாக விவாதித்து மிளிர செய்ய வேண்டும். தமிழக வெற்றிக் கழக நிர்வாகிகள் கடமை, கண்ணியம், கட்டுப்பாடுடன் எப்போதும் நடந்து கொள்ள வேண்டும்.

இவ்வாறு புஸ்சி ஆனந்த் பேசினார்.

கட்சி தலைவர் விஜய் வலியுறுத்தலின் பேரில் நிர்வாகிகளுக்கு இவ்வாறு உத்தரவிடப்பட்டதாக தகவல்கள் வெளியாகி உள்ளது.

தமிழ்நாடு சுகாதாரத்துறை அமைச்சர் மா. சுப்பிரமணியன் இன்று காலை பல்லடம் அரசு மருத்துவமனையில் திடீர் ஆய்வு மேற்கொண்டார்.

அப்போது நோயாளிகளிடம் மருத்துவமனையில் உள்ள வசதிகள் குறித்தும், அளிக்கப்படும் சிகிச்சை முறைகள் குறித்தும் கேட்டறிந்தார். பின்னர் நோயாளிகளுக்கு சிறந்த முறையில் சிகிச்சை வழங்குமாறும், அவர்களிடம் கனிவாக நடந்து கொள்ளும் படியும் டாக்டர்கள் மற்றும் பணியாளர்களுக்கு அறிவுறுத்தினார்.

இதையடுத்து, கோவையில் சுகாதாரத்துறை அமைச்சர் மா. சுப்பிரமணியன் செய்தியாளர்களை சந்திப்பதாக கூறப்பட்டது. அதற்கான ஏற்பாடுகள் செய்யப்பட்டு இருந்தது. அப்போது மேஜையில் தமிழக வெற்றிக்கழகத்தின் வண்ணத்திலான போர்வை போர்த்தப்பட்டு இருந்தது.

இதனை அடுத்து அப்போர்வை அகற்றப்பட்டு மாற்று போர்வை மேஜை மீது போர்த்தப்பட்டது. இதுதொடர்பான வீடியோ காட்சிகள் சமூக வலைத்தளத்தில் வைரலாகி வருகிறது. 

பிரபல நடிகர் டெல்லி கணேஷ் சென்னையில் உடல்நலக்குறைவு காரணமாக உயிரிழந்தார். 80 வயதான நடிகர் டெல்லி கணேஷ் சென்னையில் உள்ள அவரது இல்லத்தில் நேற்றிரவு உயிரிழந்தார். டெல்லி கணேஷின் உடல் பொதுமக்கள் அஞ்சலிக்காக அவரது வீட்டில் வைக்கப்பட்டுள்ளது.

டெல்லி கணேஷின் மறைவுக்கு திரைத்துறையை சேர்ந்த பலர் நேரிலும், சமூக வலைதளங்களில் இரங்கல் தெரிவித்து வருகின்றனர்.

இந்நிலையில், நடிகர் டெல்லி கணேஷ் மறைவுக்கு தமிழக வெற்றிக் கழகத் தலைவர் விஜய் இரங்கல் தெரிவித்துள்ளார்.

இதுகுறித்து விஜய் தனது எக்ஸ் தள பக்கத்தில் கூறியிருப்பதாவது:-

மூத்த நடிகர் டெல்லி கணேஷ் அவர்கள் உடல்நலக் குறைவால் காலமான செய்தி, வேதனை அளிக்கிறது. 40 ஆண்டுகளுக்கு மேலாக 400 க்கும் அதிகமான திரைப்படங்களில் பல தரப்பட்ட கதாபாத்திரங்களில் நடித்துப் புகழ்பெற்ற அவரது திடீர் மறைவு, தமிழ்த் திரையுலகிற்குப் பேரிழப்பாகும்.

அவரை இழந்து வாடும் குடும்பத்தினருக்கும் நண்பர்களுக்கும் ஆழ்ந்த இரங்கலைத் தெரிவித்துக்கொள்கிறேன்.

இவ்வாறு அவர் குறிப்பிட்டுள்ளார்.

பெரம்பலூர்:

பெரம்பலூரில் தமிழக வெற்றிக்கழக மாவட்ட நிர்வாகிகள் கூட்டம் நடைபெற்றது. கூட்டத்தில் தமிழக வெற்றிக்கழக மாநில பொதுச்செயலாளர் புஸ்ஸி ஆனந்த் கலந்துகொண்டு பேசினார்.

தமிழக வெற்றி கழகத்தினர் முதல் மாநாட்டை எப்படி நடத்த போகிறார்கள் என்று உலகமே உற்று நோக்கி வந்த நிலையில் ஒவ்வொரு தொண்டரும், நிர்வாகிகளும் ஒற்றுமையோடு ஒவ்வொருவரின் குடும்பத்தில் நடக்கும் விழாவாக நினைத்து கடுமையாக உழைத்து மாநாட்டை வெற்றிகரமாக நடத்தி முடித்துள்ளோம்.

யார் என்ன சொன்னாலும் சரி, தமிழக வெற்றிக் கழத்தினருக்கு ஒரு பிரச்சினை என்றால் முதலில் குரல் கொடுப்பதும் விஜய் தான். உங்களுக்காக முதலில் வந்து நிற்பதும் அவர்தான். சட்டமன்ற தேர்தலுக்கு இன்னும் 18. மாதங்கள் மட்டுமே உள்ளன. 2026-ல் முதலமைச்சர் இடத்தில் விஜய்யை உட்கார வைப்பதற்கு நாம் உழைக்க வேண்டும்.

நிர்வாகிகள் அனைவரும் ஒற்றுமையாக இருந்து அதனை செயல்படுத்த வேண்டும். நல்ல விஷயங்களுக்காக நல்ல முறையில் நமது கட்சியை பயன்படுத்தி தமிழக வெற்றி கழகத்தை வளர்ப்பதற்கு தொண்டர்கள் பாடுபட வேண்டும்.

இப்போது சாலையில் செல்லும் 10 கார்களில் 8 கார்கள் தமிழக வெற்றி கழகத்தின் கொடிகளைக் கட்டி செல்கின்றன. இன்று உச்சத்தில் இருந்தாலும் மக்களுக்கு சேவை செய்யக்கூடிய ஒரு தலைவர் உண்டு என்றால் அது விஜய்தான். இனி வரும் காலங்களில் இது போன்ற மாநாடுகள் நிறைய நடத்தப்பட உள்ளது.

அதற்கும். தொண்டர்கள் ஓத்துழைப்பு தர வேண்டும். வருகிற 16, 17,23,24-ந் தேதிகளில் நடக்கவுள்ள வாக்காளர் பெயர் சேர்க்கை, திருத்தம் முகாம்களில் தமிழக வெற்றி கழகத்தினர் கலந்து கொண்டு வாக்குச்சாவடி வாரியாக சென்று பொதுமக்களில் விடுபட்ட பெயர்களை சேர்க்கவும் திருத்தம் செய்வதற்கும் உதவ வேண்டும்.

இது போன்ற விஷயங்களுக்கு மக்களுக்கு உதவுவதோடு மக்களோடு மக்களாக தமிழக வெற்றி கழக தொண்டர்கள் இருக்க வேண்டும். சட்டமன்ற தொகுதி வாரியாக ஒவ்வொறு தொகுதிக்கும் விஜய் வர உள்ளார். அப்போது நம் கட்சியினர் மக்களுக்கு செய்த உதவிகளை அவரிடம் தெரிவிக்கும் வகையில் உதவ வேண்டும்.

இன்னும் 16- 17 மாதங்கள் கடுமையாக பொறுமையாக இருந்து பாடுபட வேண்டும். தமிழக வெற்றி கழகம் ஆரம்பிப்பதற்கு முன்பாகவே விஜய் படத்தை வைத்து உள்ளாட்சிகளில் 127 இடங்களில் வார்டு உறுப்பினர்கள் மற்றும் தலைவர்கள், துணைத் தலைவர் பதவிக்கு வெற்றி பெற்றுள்ளோம். தற்போது கட்சியாக ஆரம்பிக்கப்பட்டதால் இனி எல்லாமே வெற்றி தான்.

இவ்வாறு அவர் பேசினார்.

தமிழக அரசின் நலத் திட்டங்கள் மக்களை சென்று சேர்வதை உறுதி செய்யும் வகையில் முதலமைச்சர் மு.க.ஸ்டாலின் அனைத்து மாவட்டங்களிலும் கள ஆய்வு மேற்கொள்ள முடிவு செய்தார்.

அதன்படி, 2 நாள் பயணமாக இன்று விருதுநகர் சென்ற முதலமைச்சர் மு.க. ஸ்டாலின் அங்குள்ள தனியார் பட்டாசு ஆலையில், பட்டாசு உற்பத்தியாளர்கள் மற்றும் பட்டாசு தொழிலாளர்களுடன் கலந்துரையாடினார்.

இதைதொடர்ந்து, சூலக்கரைமேட்டில் உள்ள அரசு காப்பகத்தில் முதலமைச்சர் மு.க.ஸ்டாலின் திடீர் ஆய்வு மேற்கொண்டார்.

அப்போது அவர் மாணவிகளுடன் கலந்துரையாடினார். மாணவிகளுக்கு பரிசுகள், இனிப்புகள் வழங்கிய மு.க.ஸ்டாலின், காப்பகத்தில் அடிப்படிடை வசதிகள் உள்ளிட்டவை குறித்து கேட்டறிந்தார்.

அப்போது, மாணவி ஒருவர் முதலமைச்சர் மு.க.ஸ்டாலினை அப்பா என்று அழைத்தார். இந்த நெகிழ்ச்சி சம்பவம் குறித்து முதலமைச்சர் தனது எக்ஸ் பக்கத்தில் நிறைவான நாள் என்று குறிப்பிட்டு பகிர்ந்துள்ளார்.

இதையடுத்து, முதலமைச்சர் மு.க.ஸ்டாலின் விருதுநகர் புதிய பேருந்து நிலையத்தில் இருந்து ராமமூர்த்தி சாலை வரை வாகனப் பேரணி மேற்கொண்டார்.

சாலையின் இருபுறங்களிலும் திரண்டிருந்த மக்கள் முதலமைச்சருக்கு வரவேற்பை அளித்தனர்.

இயக்குநரும் நடிகரும், நாம் தமிழர் கட்சியின் தலைமை ஒருங்கிணைப்பாளாரன சீமான் இன்று தனது 58-வது பிறந்தநாளை கொண்டாடுகிறார். அவருக்கு பலரும் வாழ்த்து தெரிவித்து வருகின்றனர்.

அந்த வகையில், சீமானுக்கு தமிழக வெற்றிக்கழகத் தலைவர் விஜய் வாழ்த்து தெரிவித்துள்ளார். இதுதொடர்பாக அவர் எக்ஸ் தள பக்கத்தில் வெளியிட்டுள்ள பதிவில்,

நாம் தமிழர் கட்சியின் தலைமை ஒருங்கிணைப்பாளர் சகோதரர் சீமான் அவர்களுக்கு இனிய பிறந்தநாள் நல்வாழ்த்துகளைத் தெரிவித்துக்கொள்கிறேன் என்று கூறியுள்ளார்.

தவெக மாநாட்டிற்கு பிறகு சீமான், விஜய் கட்சியின் கொள்கைள் குறித்து கடுமையாக விமர்சித்து வரும் நிலையில், விஜய் பிறந்தநாள் வாழ்த்து கூறியிருப்பது தமிழகத்தில் பேசுபொருளானது.

இந்நிலையில் தன்னுடைய பிறந்தநாளுக்கு வாழ்த்து தெரிவித்த த.வெ.க. தலைவர் விஜய்க்கு சீமான் நன்றி தெரிவித்துள்ளார்.

இது தொடர்பான சீமானின் எக்ஸ் பதிவில், "என்னுடைய பிறந்த நாளில் வாழ்த்துகளையும், அன்பையும் தெரிவித்த, முன்னாள் முதல்வர் பெருமதிப்பிற்குரிய ஐயா ஓ.பன்னீர்செல்வம் அவர்களுக்கும்,

முன்னாள் மாநில ஆளுநரும், பாஜக-தமிழ்நாடு முன்னாள் தலைவருமான அம்மையார் தமிழிசை சௌந்தரராஜன் அவர்களுக்கும்,

விடுதலைச்சிறுத்தைகள் கட்சியின் தலைவரும், நாடாளுமன்ற உறுப்பினருமான அன்பு அண்ணன் முனைவர் தொல்.திருமாவளவன் அவர்களுக்கும்,

பாட்டாளி மக்கள் கட்சியின் தலைவரும், நாடாளுமன்ற உறுப்பினருமான மதிப்பிற்குரிய ஐயா மருத்துவர் அன்புமணி இராமதாஸ் அவர்களுக்கும்,

தமிழ்த்தேசியப் பேரியக்கத்தின் தலைவர் தமிழ்த்தேசியப் பேராசான் பெருமதிப்பிற்குரிய பெருந்தகை எங்கள் ஐயா பெ.மணியரசன் அவர்களுக்கும்,

முத்தமிழ்ப்பேரறிஞர் பெருமதிப்பிற்குரிய ஐயா வைரமுத்து அவர்களுக்கும்,

எஸ்.ஆர்.எம். பல்கலைக்கழக வேந்தரும், இந்திய ஜனநாயகக் கட்சி நிறுவனருமான பெருமதிப்பிற்குரிய ஐயா பாரிவேந்தர் அவர்களுக்கும்,

மனித நேய அறக்கட்டளை நிறுவனர் மதிப்பிற்குரிய ஐயா சைதை துரைசாமி அவர்களுக்கும்,

மக்கள் நீதி மய்யத்தின் தலைவர் பேரன்பிற்கினிய அண்ணன் கமல்ஹாசன் அவர்களுக்கும்,

புரட்சித்தமிழன் பேரன்பிற்கினிய அண்ணன் சத்தியராஜ் அவர்களுக்கும்,

அம்மா மக்கள் முன்னேற்றக் கழகத்தின் பொதுச்செயலாளர் ஐயா டி.டி.வி.தினகரன்அவர்களுக்கும்,

தமிழக மக்கள் முன்னேற்றக் கழகத்தின் தலைவர் அன்பு அண்ணன் முனைவர் பெ.ஜான்பாண்டியன் அவர்களுக்கும்,

பாஜகவின் மாநிலத் தலைவர் அன்புத்தம்பி கு.அண்ணாமலை அவர்களுக்கும்,

தமிழக வெற்றிக் கழகத்தின் தலைவர் அன்புத்தம்பி விஜய் அவர்களுக்கும்,

பாஜகவின் மகளிர் அணி தேசியச் செயலாளரும், சட்டமன்ற உறுப்பினருமான அன்புச்சகோதரி வானதி சீனிவாசன் அவர்களுக்கும்,

அன்பு அண்ணன் நடிகர் இராமராஜன் அவர்களுக்கும்,

அண்ணன் இயக்குநர் விக்ரமன் அவர்களுக்கும்,

அன்புத்தம்பி இயக்குநர் சேரன் அவர்களுக்கும்,

முக்குலத்தோர் புலிப்படைத் தலைவர் அன்பிற்கினிய இளவல் சேது.கருணாஸ் அவர்களுக்கும்,

முன்னாள் நாடாளுமன்ற உறுப்பினர் அன்புத்தம்பி ப.இரவீந்திரநாத் அவர்களுக்கும்,

ஆதித்தமிழர் விடுதலை இயக்கத்தின் தலைவர் அன்பு அண்ணன் அ.வினோத் அவர்களுக்கும்,

இயக்குநர் அன்புத்தம்பி மு.களஞ்சியம் அவர்களுக்கும்,

மருது மக்கள் இயக்கத்தின் தலைவர் தம்பி செ.முத்துப்பாண்டி அவர்களுக்கும்,

இந்திய தேசிய லீக் கட்சியின் மாநிலத் தலைவர் அன்பிற்குரிய அண்ணன் தடா ஜெ. ரஹீம் அவர்களுக்கும்,

விடுதலைச்சிறுத்தைகள் கட்சியின் இளைஞரணி மாநிலச் செயலாளர் அன்புத்தம்பி சங்கத்தமிழன்அவர்களுக்கும்,

விடுதலைச்சிறுத்தைகள் கட்சியின் துணைப்பொதுச்செயலாளர் அன்புத்தம்பி ஆதவ் அர்ஜுனா அவர்களுக்கும்,

மக்கள் நீதி மய்யத்தின் இளைஞர் அணி மாநிலச்செயலாளர் அன்புத்தம்பி கவிஞர் சினேகன்அவர்களுக்கும்,

புரட்சித் தமிழகம் கட்சியின் மாநிலத் தலைவர் அன்பு அண்ணன் ஏர்போர்ட் த.மூர்த்தி அவர்களுக்கும்,

தமிழர் சேனைக் கட்சித் தலைவர் அன்பு அண்ணன் எரிமலை மு.இராமச்சந்திரன்அவர்களுக்கும்,

முக்குலத்தோர் எழுச்சிக் கழகத்தின் தலைவர் தம்பி கவிக்குமார்அவர்களுக்கும்,

24மனை தெலுங்கு செட்டியார்கள் பேரவைத் தலைவர் அன்புத்தம்பி ஜெகநாத் மிஸ்ரா அவர்களுக்கும்,

அன்பிற்குரிய இளவல் சுரேஷ் காமாட்சி, பாசமிகு தம்பி ஆதம் பாவா, அன்புத்தம்பி நடிகர் இயக்குனர் போஸ் வெங்கட், தம்பி விருமாண்டி, அன்புத்தம்பி சண்முகம் முத்துசாமி, சமூகச் செயற்பட்டாளர் நடிகை கஸ்தூரி, நடிகர் அன்புத்தம்பி புகழ் ஆகிய திரைத்துறையைச் சேர்ந்த பெருமக்களுக்கும்,

மூத்த பத்திரிகையாளர் ஐயா பா.ஏகலைவன் அவர்களுக்கும்,

அன்பிற்கினிய தம்பிகள் ஃபெலிக்ஸ் ஜெரால்டு, சவுக்கு சங்கர், பிரசாந்த் ரங்கசாமி, அருள்மொழிவர்மன், மாதேஷ், அருண் மாணிக்கம்ஆகிய ஊடகத்துறையைச் சேர்ந்தவர்களுக்கும்,

மற்றும் அரசியல், திரைத்துறையைச் சேர்ந்த ஆளுமைகளுக்கும், தமிழ்த்தேசியச் செயற்பாட்டாளர்களுக்கும், உலகம் முழுவதுமுள்ள தாய்த்தமிழ் உறவுகளுக்கும், நாம் தமிழர் சொந்தங்களுக்கும், அன்பிற்கினிய தம்பி-தங்கைகளுக்கும் என் நெஞ்சம் நிறைந்த நன்றியையும், அன்பையும் தெரிவித்துக்கொள்வதில் உளம் மகிழ்கிறேன்" பதிவிட்டுள்ளார்.

திருப்பூர்:

தமிழக வெற்றிக்கழகம் கட்சியை தொடங்கியுள்ள நடிகர் விஜய் விக்கிரவாண்டியில் நடத்திய முதல் மாநாடு அரசியல் கட்சியினர் மட்டுமின்றி தமிழக மக்களை வெகுவாக கவர்ந்தது. இதையடுத்து தமிழகம் முழுவதும் சுற்றுப்பயணம், பொதுக்கூட்டம் உள்ளிட்டவற்றை நடத்த விஜய் திட்டமிட்டுள்ளார். இதனால் அக்கட்சி நிர்வாகிகள், தொண்டர்கள் உற்சாகத்தில் ஆழ்ந்துள்ளனர்.

ஒவ்வொரு மாவட்டத்திற்கும் விஜய் செல்ல உள்ளதால் அந்தந்த மாவட்ட நிர்வாகிகள் இப்போது இருந்தே அதற்கான ஏற்பாடுகளை செய்ய திட்டமிட்டு வருகின்றனர்.

குறிப்பாக அரசியல் கட்சிகள் என்றால் அதில் கொடிகள் பிரதானமாக விளங்குகிறது. எனவே கொடிகள் தயாரிக்க திருப்பூரில் உள்ள கொடி உற்பத்தியாளர்களிடம் ஆர்டர்கள் கொடுக்க தொடங்கி உள்ளனர்.

இது குறித்து திருப்பூரை சேர்ந்த கொடி தயாரிப்பாளர் மகேஷ் கூறியதாவது:-

திருப்பூரில் அரசியல் கட்சி கொடி தயாரிப்பில் 3 நிறுவனங்கள் ஈடுபட்டு வருகின்றன. முன்பெல்லாம் தேர்தல் சமயங்களில் மட்டுமே கொடிகள் தயாரிக்க அதிக அளவு ஆர்டர்கள் வரும். தற்போது அனைத்து அரசியல் கட்சிகளும் சுற்றுப்பயணம், பொதுக்கூட்டம், மாநாடு என நடத்துவதால் முன்பை விட கொடிகள் தயாரிக்க ஆர்டர்கள் அதிக அளவு வருகின்றன.

தற்போது நடிகர் விஜய் தொடங்கியுள்ள தமிழக வெற்றிக்கழகத்தின் கொடிகள் தயாரிப்புக்கு தமிழகத்தின் பல்வேறு மாவட்டங்களில் இருந்து ஆர்டர்கள் வந்து கொண்டிருக்கின்றன. ஆயிரக்கணக்கில் மட்டும் தயாரிக்க ஆர்டர்கள் வருகிறது.

மாநாடு நடத்தி உள்ள நிலையில் அடுத்து பொதுக்கூட்டம், நடிகர் விஜய்யின் சுற்றுப்பயணம் நடைபெற உள்ளது. இதனால் அப்போது அதிக அளவு கொடிகள் தேவைப்படும். எனவே ஒரு சில நிர்வாகிகள் கொடிகள் தயாரிக்க ஆர்டர்கள் கொடுத்து வருகின்றனர்.

மாநாட்டின் போது துண்டுகள், காரில் முன்பு கட்டப்படும் கொடிகள் அதிக அளவு விற்பனையானது. துண்டுகள் அதிக அளவு விற்பனையாகி வருகிறது. காரின் முன்பு கட்டப்படும் கொடிகள் ரூ.100 முதல் ரூ.500 வரை விற்பனை செய்யப்படுகிறது. எல்.இ.டி. பொருத்தப்பட்டுள்ள கொடிகள் ரூ.2000, ரூ.3000 வரை விற்பனை செய்யப்படுகிறது.

பெரும்பாலான நிர்வாகிகள் கொடி கம்பத்தில் ஏற்றவும், கைகளில் பிடித்து செல்லக்கூடிய வகையிலான கொடிகள் தயாரிக்க தொடர்ந்து ஆர்டர்கள் கொடுத்து வருகின்றனர். இந்த வகை கொடிகள் ரூ.100 முதல் ரூ.250 வரை விற்பனை செய்யப்படுகிறது.

மேலும் சட்டையில் அணியக்கூடிய பேட்ஜ்கள் அதிக அளவு விற்பனை ஆகிறது. மொத்தமாக இல்லாமல் சில்லரையில் அதிகம் விற்பனை ஆகிறது. எங்கள் நிறுவனத்திற்கு வரும் ஆர்டர்களை சிறிய உற்பத்தியாளர்களுக்கு பிரித்து கொடுக்கிறோம்.

இவ்வாறு அவர் கூறினார்.

திருப்பூரை சேர்ந்த பிரபல வேட்டி தயாரிப்பு நிறுவனத்தினர் கூறுகையில், அனைத்து அரசியல் கட்சிகளின் கரைவேட்டிகள் தயாரித்து கடைகளுக்கு விற்பனைக்கு அனுப்புகிறோம். ஆர்டர்கள் கொடுத்தால் தயாரித்து கொடுக்கிறோம்.

தற்போது விஜய் தொடங்கியுள்ள தமிழக வெற்றி கழகத்தின் கரை போட்ட வேட்டிகள் தயாரித்து கடைகளுக்கு விற்பனைக்கு அனுப்பி வைத்துள்ளோம். இதுவரை ஆர்டர்கள் எதுவும் வரவில்லை. விஜய் கட்சி நிர்வாகிகள் கடைகளிலேயே வாங்கி கொள்கின்றனர். விற்பனைக்கு தகுந்தாற்போல் தயாரித்து அனுப்புகிறோம். அடுத்து விஜய் பொதுக்கூட்டம், சுற்றுப்பயணம் மேற்கொள்ள உள்ளதால் நிர்வாகிகள், தொண்டர்களிடம் இருந்து அதிக அளவு ஆர்டர்கள் வரும் என எதிர்பார்த்து காத்திருக்கிறோம் என்றனர்.