இந்த வார சமையல் டிப்ஸ் உங்களுக்காக...

* இட்லி கல் மாதிரி இருப்பதாக தெரிந்தால், நான்கு பச்சை அப்பளத்தை தண்ணீரில் நனைத்து பின் மிக்சியில் அரைத்து எடுத்து வேக வைக்கும் இட்லி மாவில் சேர்த்து அவித்தால் இட்லி பூ போல வரும்.

* ஒரு வெண்டைக்காயை சிறு துண்டுகளாக நறுக்கி, நீரில் போட்டு இரவு முழுவதும் வைத்திருக்கவும். மறுநாள் காலை அந்த நீரை சப்பாத்தி செய்யும் மாவில் கலந்தால், சப்பாத்தி மிருதுவாகவும் சுவையாகவும் இருக்கும்.

* பஜ்ஜி போடும்போது உப்பி வர சமையல் சோடா சேர்க்க வேண்டாம். சிறிது இட்லி மாவு சேர்த்தால் பஜ்ஜி உப்பி வரும், உடலுக்கு கெடுதல் கிடையாது.

* தேங்காய் துருவி அதை கொதி நீரில் போட்டு வைத்துவிட்டு பிறகு கை பொறுக்கும் சூட்டில் எடுத்து பிசைந்தால் நல்ல கெட்டியான தேங்காய் பால் கிடைக்கும்.

* காய்ந்த எலுமிச்சை, ஆரஞ்சு தோல்களை அலமாரிகளில் போட்டு வைத்தால் பூச்சிகள் வராது.

* முருங்கை கீரை சமைக்கும்போது சிறிதளவு சர்க்கரை சேர்த்து சமைத்தால் முருங்கை இலைகள் ஒன்றோடொன்று ஒட்டாமல் இருக்கும்.

* பொரித்த அப்பளத்தை நொறுக்கி இரண்டு டீஸ்பூன் துருவிய தேங்காய், கருவேப்பிலை, புளி, ஒன்று அல்லது இரண்டு பச்சை மிளகாய், தேவையான அளவு உப்பு சேர்த்து மிக்சியில் அரையுங்கள். அசத்தலான அப்பள துவையல் ரெடி!

* உங்கள் வீட்டில் ஜவ்வரிசி பயன்பாடு இல்லாமல் இருந்தால் அதை கொண்டு சூப்பராக உடனடி ஸ்நாக்ஸ் செய்யலாம். அதற்கு ஜவ்வரிசியை கடாயில் வறுத்து உப்பு, காரம் தேவையான அளவு சேர்த்துக் கொண்டால் போதும். சுவையான காராப்பூந்தி தயார். மேலும் ருசி கூட்ட கருவேப்பிலை, இடித்த பூண்டுவை எண்ணெய்யில் பொரித்து அதனுடன் சேர்த்தால் அருமையாக இருக்கும்.