களக்காடு அருகே இளம்பெண் மாயம்

களக்காடு:

களக்காடு அருகே உள்ள கீழதேவநல்லூர் நடுத்தெருவை சேர்ந்தவர் நம்பி. டிரைவர். இவரது மகள் புவனேஷ்வரி (வயது18) 

களக்காட்டில் உள்ள துணிக்கடையில் வேலை பார்த்து வந்தார். இதையொட்டி தினசரி காலை 8.30 மணிக்கு வீட்டில் இருந்து வேலைக்கு செல்லும் புவனேஷ்வரி இரவு 9 மணிக்கு வீட்டிற்கு திரும்புவது வழக்கம். 

கடந்த 5-ந்தேதி காலை வேலைக்கு செல்வதாக வீட்டில் கூறி விட்டு சென்றவர் பின்னர் வீடு திரும்பவில்லை. 

இதனால் அதிர்ச்சி அடைந்த நம்பி களக்காட்டிற்கு சென்று அவர் வேலை பார்த்து வந்த துணிக்கடையில் விசாரித்த போது 5-ந்தேதி மதியமே அவர் சென்று விட்டதாக தெரிவித்தனர்.

 

இதுபற்றி நம்பி களக்காடு போலீசில் புகார் செய்தார். போலீசார் வழக்குப்பதிவு செய்து விசாரணை நடத்தி மாயமான புவனேஷ்வரியை தேடி வருகின்றனர்.