திருப்பதியில் குவியும் பக்தர்கள்- 20 மணிநேரத்திற்கு மேல் காத்திருந்து தரிசனம்

திருப்பதி:

திருப்பதி ஏழுமலையான் கோவிலில் புத்தாண்டு நெருங்குவதையொட்டி பக்தர்கள் கூட்டம் அதிகரித்து வருகிறது.

தற்போது பள்ளிகளுக்கு தொடர் விடுமுறை என்பதாலும் கோவிலில் கூட்டம் அதிகரித்து காணப்படுகிறது.

நேற்று 20 மணி நேரம் காத்திருந்து பக்தர்கள் சாமி தரிசனம் செய்தனர். இன்று சனிக்கிழமை என்பதால் அதிகாலை முதலே கோவிலில் கூட்டம் அலைமோதியது.

பக்தர்கள் காத்திருப்பு அறைகள் நிரம்பி வழிந்தன. தரிசன டோக்கன் இல்லாமல் நேரடி தரிசனத்திற்கு வந்த பக்தர்கள் 20 மணி நேரத்திற்கு மேல் காத்திருந்து சாமி தரிசனம் செய்தனர்.

ரூ.300 விரைவு தரிசனத்தில் 4 மணிநேரத்திலும், இலவச நேரடி தரிசன டோக்கன் பெற்ற பக்தர்கள் 3 முதல் 4 மணி நேரமும் காத்திருந்து தரிசனம் செய்தனர்.

நேற்று 66,715 பக்தர்கள் சாமி தரிசனம் செய்தனர். 24,503 பேர் முடி காணிக்கை செலுத்தினர். ரூ. 4.06 கோடி உண்டியல் காணிக்கை வசூலானது.

திருப்பதியில் அவ்வப்போது மழை பெய்து வருகிறது. கடும் குளிர் வாட்டி வதைக்கிறது. இதற்கு தகுந்தாற்போல் பக்தர்கள் தகுந்த முன்னெச்சரிக்கையுடன் திருப்பதிக்கு வர வேண்டும் என தேவஸ்தானம் அறிவுறுத்தி உள்ளது.

பக்தர்களுக்கு தேவையான அடிப்படை வசதிகளை தேவஸ்தான அதிகாரிகள் செய்து செய்து வருகின்றனர்.