ஆன்மிகம்

சரஸ்வதி பூஜை மற்றும் விஜயதசமி ஆகிய பண்டிகை நாட்கள் இந்திய அளவில் அனைத்து மாநில மக்களாலும் விமரிசையாக கொண்டாடப்படுகிறது. அந்த வகையில் சரஸ்வதி பூஜை தேசிய அளவில் இரண்டு முறை கொண்டாடப்படுகிறது.

முதலாவது, செப்டம்பர் மற்றும் அக்டோபர் மாதங்களில் வரக்கூடிய நவராத்திரி பண்டிகையின் ஒன்பதாவது நாளில் சரஸ்வதி பூஜை, ஆயுத பூஜை என்றும், அதற்கு அடுத்த பத்தாவது நாளில் விஜயதசமி என்று கொண்டாடப்படுகிறது. இந்த முறை தென்னிந்திய மாநிலங்களில் நடைமுறை வழக்கமாக அமைந்துள்ளது.

இரண்டாவது, ஜனவரி மற்றும் பிப்ரவரி மாதங்களில் வரக்கூடிய மாசி மாத சுக்கில பட்ச ஐந்தாம் நாளான வசந்த பஞ்சமி சரஸ்வதி பூஜையாக வட இந்திய மாநிலங்களில் கொண்டாடப்படுகிறது. அந்த நாள் சரஸ்வதி அவதாரம் செய்த தினம் என்பதால் சரஸ்வதியை வழிபட்டு கல்விச் செல்வத்தை பெறும் வகையில் வீடுகளிலும், கோவில்களிலும், பொது இடங்களிலும் சமுதாய திருநாளாக சரஸ்வதி பூஜை அனுசரிக்கப்படுகிறது.

புராணங்களில்படி சரஸ்வதி தேவி மும்மூர்த்திகளில் முதலாவது மூர்த்தியாக சொல்லப்படும் பிரம்மாவின் மனைவியாக குறிப்பிடப்படுகிறார். உலகில் உள்ள அனைத்து வித ஞானங்களுக்கும், கல்விச்செல்வத்திற்கும் ஆதிபத்தியம் பெற்ற தெய்வ அம்சமாக சரஸ்வதி இருக்கிறார் என்பது ஐதீகம். சரஸ்வதி தேவிக்கு வெண்மை நிற ஆடை மற்றும் வெண்மை நிற மலர்கள் சமர்ப்பணம் செய்வது வழிபடுவது மரபாக இருக்கிறது.

சரஸ்வதி தேவியை வாக்தேவி, சாரதா, பாரதி, பிராமி, வீணாவாதினி, வாணி ஆகிய பெயர்களில் அழைக்கிறார்கள். வசந்த பஞ்சமி நாளிலிருந்து அடுத்து வரக்கூடிய 40-வது நாளில் வண்ணங்களின் திருவிழாவான ஹோலி பண்டிகையின் தொடக்கத்தை அங்கீகரிக்கும் வகையிலும் வசந்த பஞ்சமி வட இந்தியாவில் விமரிசையாக அனுசரிக்கப்படுகிறது.

தமிழகத்தை பொறுத்தவரை நவராத்திரி கொலு வைத்து பூஜைகள் செய்யப்படும் ஒன்பதாவது நாளில் சரஸ்வதி பூஜை கொண்டாடப்படுகிறது. பத்தாவது நாள் விஜயதசமி என்று சொல்லப்படும். அந்த நாளில் தான் பள்ளிகளில் புதிய மாணவர் சேர்க்கை நடைபெறும். மேலும், குழந்தைகளுக்கு அவர்களுடைய தந்தை, குடும்ப மூத்தவர்கள், ஆசிரியர்கள் கல்வி கற்றலுக்கான முதல் நாளை தொடங்கி வைக்கிறார்கள்.

நவராத்திரி என்ற கொலு வைத்து கொண்டாடப்படும் திருவிழா நாட்களில் பத்தாவது நாள் விஜயதசமி என்று சொல்லப்படுகிறது. இந்த நாளை கர்நாடகா மற்றும் ஆந்திராவில் தசரா என்று குறிப்பிடுகிறார்கள். அந்த நாட்களில் எந்த ஒரு தொழிலையும், வித்தையையும் கற்பதற்கான நாளாக அனுசரிக்கிறார்கள்.

மேலும் குடும்பத்தில் உள்ள பெரியவர்கள் குழந்தைகளுக்கு புத்தகங்கள் மற்றும் நோட்டு புத்தகங்கள் பேனா ஆகியவற்றை பரிசாக வழங்கி அவர்களுக்கு நல்ல கல்வி செல்வம் கிடைப்பதற்கு ஆசிகளையும் வழங்குவது சமூக மரபாக கடைபிடிக்கப்பட்டு வருகிறது.

திருவாரூர்:

திருவாரூர் மாவட்டம் நன்னிலம் அருகே உள்ள கூத்தனூரில் கல்வி தெய்வம் சரஸ்வதி தேவிக்கு தனி கோவில் அமைந்துள்ளது. தென்னிந்தியாவிலேயே சரஸ்வதி அம்மனுக்கு என்று இங்கு தான் தனி கோவில் உள்ளது என்பது குறிப்பிடத்தக்கது.

சரஸ்வதி தாயார் இங்கு கன்னியாக அமர்ந்து பக்தர்களுக்கு அருளை வழங்கி வருகிறார். கருவறையில் வெண்ணிற ஆடை உடுத்தி, வெண் தாமரையில் வீற்றிருந்து, வலது கீழ் கரத்தில் சின்முத்திரையும், இடது கையில் புத்தகமும், வலது மேல் கரத்தில் அட்சர மாலையும், இடது மேல் கையில் அமிர்த கலசமும் தாங்கியிருந்து ஜடா முடியுடன், ஞானச்சஸ் என்கிற மூன்றாவது கண்ணும் கொண்டு, கிழக்கு நோக்கி அருள்பாலித்து வருகிறார்.

இவ்வாறு சிறப்புமிக்க இந்த கோவிலில் ஆண்டுதோறும் சரஸ்வதி பூஜை மற்றும் விஜயதசமி விழா விமர்சையாக நடைபெறும்.

சரஸ்வதி அம்மனுக்கு அபிஷேக ஆராதனை செய்யப்பட்டு வெண்ணாடை உடுத்தி பாத தரிசனம் விழா நடைபெற்றபோது எடுத்தப்படம்.

அந்த வகையில் இந்த வருட நவராத்திரி விழாவை முன்னிட்டு கடந்த 3-ம் தேதி திருவிழா தொடங்கியது. ஒவ்வொரு நாளும் ஒவ்வொரு உற்சவம் நடைபெற்று வந்த நிலையில் நேற்று சரஸ்வதி பூஜை விழா வெகு விமரிசையாக கொண்டாடப்பட்டது. மகா சரஸ்வதி அம்மனுக்கு அபிஷேக ஆராதனை செய்யப்பட்டு வெண்ணாடை உடுத்தி பாத தரிசனம் விழா நடைபெற்றது.

இன்று விழாவின் முக்கிய நிகழ்வாக விஜயதசமி விழா கொண்டாடப்பட்டு வருகிறது. விஜயதசமியை முன்னிட்டு இன்று காலையில் இருந்தே ஏராளமான பொதுமக்கள் வந்த வண்ணம் உள்ளனர். நோட்டு, பேனா, புத்தகம், சிலேட்டு போன்றவற்றை சரஸ்வதி அம்மன் பாதத்தில் வைத்து பூஜை செய்து வழிபாடு செய்தனர். பின்னர் ஒரு தாம்பாளத்தில் நெல்மணிகளை பரப்பி அதில் தங்களது குழந்தைகளை தமிழ் உயிர் எழுத்தின் முதல் எழுத்தான 'அ' வை எழுத வைத்து வித்யாரம்பம் செய்தனர்.

முன்னதாக குழந்தைகளின் நாக்கில் மூன்று முறை தேனை தொட்டு வைத்து பின்பு குழந்தைகள் காதுகளில் மந்திரங்களை சொல்லிய பிறகு நெல்மணிகளில் பிள்ளையார் சுழி எழுதி அதற்கு பின்பு தமிழ் உயிர் எழுத்துக்கள் எழுதப்பட்டன.

இந்த விழாவுக்கு திருவாரூர் மாவட்டம் மட்டுமல்லாது தமிழகத்தின் பல்வேறு ஊர்களில் இருந்து ஏராளமான பக்தர்கள் வருகை புரிந்து வருகின்றனர். கோவில் நிர்வாகம் சார்பில் இரு புறங்களிலும் தடுப்புகள் அமைக்கப்பட்டுள்ளது. மேலும் அசம்பாவிதங்களை தவிர்க்கும் வகையில் மாவட்ட போலீஸ் சூப்பிரண்டு ஜெயக்குமார் தலைமையில் 200-க்கும் மேற்பட்ட போலீசார் பாதுகாப்பு பணியில் ஈடுபட்டுள்ளனர்.

நாகர்கோவில்:

குமரி மாவட்டத்தில் ஆயுத பூஜை மற்றும் விஜயதசமி ஆண்டுதோறும் சிறப்பாக கொண்டாடப்படுவது வழக்கம். அதன்படி இந்த ஆண்டும் நேற்று ஆயுதபூஜை கோலாகலமாக கொண்டாடப்பட்டது. வர்த்தக நிறுவனங்கள், தொழில் நிறுவனங்கள், ஆட்டோ நிலையங்கள் போன்றவற்றில் சிறப்பு வழிபாடுகள் நடத்தப்பட்டன.

நாகர்கோவில் கோட்டார் போலீஸ் நிலையத்திலும் ஆயுத பூஜை விழா விமர்சையாக நடந்தது. இதனை தொடர்ந்து இன்று (சனிக்கிழமை) விஜயதசமி சிறப்பாக கொண்டாடப்பட்டது. கல்வி, விளையாட்டு, தொழில் என எதை தொடங்குவதாக இருந்தாலும், அதற்கு நல்ல நாள் பார்த்து செய்வது வழக்கம். ஆனால் இந்த நாளில் செய்தால், அது மிகுந்த வளர்ச்சி அடையும் என கருதப்படும் நாள் தான் விஜயதசமி.

நேற்று ஆயுதபூஜை கொண்டாடிய அனைவரும் பூஜையில் வைத்த தொழில் கருவிகள், புத்தகங்கள் போன்றவற்றை விஜயதசமி நாளான இன்று மீண்டும் பூஜை செய்து எடுத்து பயன்படுத்தினர். விஜயதசமி நாளில் என்ன செய்தாலும் அது மென்மேலும் பெருகும் என்பது ஐதீகம்.

இதனை கருத்தில் கொண்டே பலரும் தங்கள் குழந்தைகளுக்கு இன்று தாம்பாளத்தில் வைக்கப்பட்ட அரிசி மற்றும் நெல்லில் எழுத்துக்களை எழுத கற்றுக்கொடுப்பார்கள். வித்யாரம்பம் என கருதப்படும் இந்த நிகழ்ச்சி இன்று கோவில்களிலும், வீடுகளிலும் நடைபெற்றது. குமரி மாவட்ட கோவில்களில் இன்று காலை வித்யாரம்பம் நிகழ்ச்சி நடைபெற்றது. இதற்கான சிறப்பு ஏற்பாடுகள் அனைத்து கோவில்களிலும் செய்யப்பட்டு இருந்தன.

பெற்றோர், தங்கள் குழந்தைகளுடன் கோவிலுக்கு வந்து சிறப்பு வழிபாடுகளை நடத்தினர். நாகர்கோவில் நாகராஜா கோவிலில் நடந்த வித்யாரம்பம் நிகழ்ச்சியில் கலந்துகொள்ள ஏராளமான பொதுமக்கள் தங்களது குழந்தைகளை அழைத்து வந்திருந்தனர். அங்கு தாம்பூலத்தில் வைக்கப்பட்டிருந்த அரிசியில் அ, ஆ எழுத வைத்தனர். தங்க ஊசியால் குழந்தையின் நாக்கில் அ எழுதப்பட்டது.

கன்னியாகுமரி பகவதி அம்மன் கோவில், நாகர்கோவில் நாகராஜா கோவில், ஐயப்பன் கோவில் உள்ளிட்ட பல கோவில்களிலும் வித்யாரம்பம் நிகழ்ச்சி நடந்தது. இதனால் அனைத்து கோவில்களிலும் இன்று காலையிலேயே கூட்டம் அதிகமாக காணப்பட்டது. பார்வதிபுரம் வனமாலீஸ்வரர் கோவிலில் உள்ள சரசுவதி சன்னிதானத்தில் தங்க ஊசியாலும், பச்சரிசியிலும் அகர முதல எழுத்துக்களை எழுத செய்து குழந்தைகளின் கல்வியை தொடங்கி வைத்தனர்.

இங்கு அதிக அளவில் குழந்தைகளுடன் பெற்றோர் கலந்து கொண்டனர். வழக்கமாக கேரளாவில் இருந்தும் ஏராளமான பெற்றோர் தங்களது குழந்தைகளை இங்கு அழைத்து வருவார்கள். கேரளாவில் நாளை வித்யாரம்பம் நிகழ்ச்சி நடைபெறுவதால் கேரளாவை சேர்ந்தவர்கள் வருகை குறைவாக இருந்தது. இது தவிர இன்று பள்ளிகளில் குழந்தைகளை சேர்ப்பதிலும் பெற்றோர் ஆர்வம் காட்டினர்.

இதனால் மாவட்டத்தில் உள்ள தனியார் மற்றும் அரசு பள்ளிகளில் இன்று மாணவர் சேர்க்கை நடந்தது. பெற்றோர் பலரும் தங்கள் குழந்தைகளை ஆர்வத்துடன் பள்ளியில் சேர்த்தனர். பத்மநாபபுரம் தேவாரகட்டு சரஸ்வதி அம்மன் கோவிலிலும் இன்று காலை வித்யாரம்பம் நிகழ்ச்சி நடந்தது.

தேவிக்கு நடந்த சிறப்பு பூஜைக்கு பிறகு குழந்தைகளுக்கு எழுத்தறிவு சொல்லிக்கொடுக்கும் வித்யாரம்பம் நிகழ்ச்சி தொடங்கியது. குழந்தைகளின் நாவில் தங்க குச்சியாலும், தாம்பாள தட்டில் வைக்கப்பட்டிருந்த தானியத்தில் கைவிரல்களாலும் எழுத்துக்களின் வடிவங்களை எழுதி, எழுத்தறிவை சொல்லி கொடுத்தனர். இதில் 100-க்கும் மேற்பட்ட குழந்தைகள் கலந்து கொண்டனர்.

திருப்பதி ஏழுமலையான் கோவிலில் வருடாந்திர பிரம்மோற்சவ விழா கடந்த 4-ந்தேதி கொடி ஏற்றத்துடன் கோலாகலமாக தொடங்கியது.

விழாவின் முக்கிய நிகழ்வான கருட சேவை கடந்த 8-ந்தேதி நடந்தது. தங்க கருட வாகனத்தில் ஏழுமலையான் 4 மாட வீதிகளில் உலா வந்தார். ஒரே நாளில் 4 லட்சம் பக்தர்கள் கருட சேவையில் கலந்து கொண்டனர்.

பிரம்மோற்சவ விழாவின் 8-வது நாளான நேற்று காலை ஏழுமலையான், ஸ்ரீதேவி, ஸ்ரீதேவி சமேதராய் பிரம்மாண்ட தேரில் 4 மாட வீதிகளில் உலா வந்தார்.

ஏராளமான பக்தர்கள் தேரை வடம் பிடித்து இழுத்துச் சென்றனர். கடல் அலையைப் போல் குவிந்து இருந்த பக்தர்கள் 'கோவிந்தா கோவிந்தா' என பக்தி பரவசம் பொங்க விண்ணதிரும் வகையில் கோஷங்களை எழுப்பினர்.

நேற்று இரவு ஏழுமலையான் தங்க குதிரை வாகனத்தில் பவனி வந்தார். இன்று காலை வராக சாமி கோவில் அருகே உள்ள புஷ்கரணியில் சக்கரத்தாழ்வார் தீர்த்தவாரி நடந்தது. கோவில் அர்ச்சகர்கள் வேத மந்திரங்கள் முழங்கியவாறு சக்கரத்தாழ்வாரை புஷ்கரணிக்கு கொண்டு சென்று தீர்த்தவாரி செய்தனர்.

சக்கரத்தாழ்வாருக்கு 1,200 கிலோ எடையுள்ள பல்வேறு வகையான மலர்கள் கொண்டு மலர் அபிஷேகம் நடந்தது.

லட்சக்கணக்கான பக்தர்கள் புஷ்கரணியில் நீராடினர். அசம்பாவித சம்பவங்களை தடுப்பதற்காக திருப்பதி தேவஸ்தானம் சார்பில் தேசிய பேரிடர் மீட்பு படை, மாநில பேரிடர் மீட்பு படை, நீச்சல் வீரர்கள் 20 மீட்டருக்கு ஒருவர் என நிறுத்தப்பட்டு இருந்தனர்.

புஷ்கரணியில் நீராட செல்லும் பக்தர்கள் தங்களது பாதுகாப்பை கருத்தில் கொண்டு நீராட வேண்டும் என கோரிக்கை விடுத்தனர். இன்று இரவு கொடி இறக்கத்துடன் பிரம்மோற்சவ விழா நிறைவு பெறுகிறது.

பிரம்மோற்சவ விழா தொடக்க நாளில் இருந்து நேற்று வரை ஆந்திர மாநில அரசு போக்குவரத்து கழகம் சார்பில் தினமும் காலை முதல் இரவு வரை 404 பஸ்கள் 13,566 தடவை இயக்கப்பட்டது.

8 லட்சத்து 50 ஆயிரத்து 85 பக்தர்கள் பயணம் செய்தனர். இதன் மூலம் ஆந்திர அரசு போக்குவரத்து கழகத்திற்கு ரூ.6.81 கோடி வருவாய் கிடைத்தது. நேற்று குறைந்த அளவு பக்தர்கள் தரிசனத்திற்கு வந்து இருந்தனர்.

திருப்பதியில் நேற்று 71,443 பேர் தரிசனம் செய்தனர். 26,948 பக்தர்கள் முடி காணிக்கை செலுத்தினர்.

ரூ.2.52 கோடி உண்டியல் காணிக்கை வசூலானது. நேரடி இலவச தரிசனத்தில் வந்த பக்தர்கள் 10 மணி நேரம் காத்திருந்து தரிசனம் செய்தனர்.

இன்றைய பஞ்சாங்கம்

குரோதி ஆண்டு புரட்டாசி-26 (சனிக்கிழமை)

பிறை: வளர்பிறை.

திதி: நவமி காலை 6.08 வரை

தசமி நள்ளிரவு கடந்து அதிகாலை 4.36 வரை.

நட்சத்திரம்: திருவோணம் நள்ளிரவு 12.54 வரை.

யோகம்: சித்தயோகம்

ராகு காலம்: காலை 9.00 மணி முதல் 10.30 மணி வரை

எமகண்டம்: நண்பகல் 1.30 மணி முதல் 3.00 மணி வரை

சூலம்: கிழக்கு

சந்திராஷ்டமம்: மிருகசீரிஷம், திருவாதிரை

நல்ல நேரம்: காலை 10.45 மணி முதல் 11.45 மணி வரை, நண்பகல் 12.15 மணி முதல் 1.15 மணி வரை, மாலை 4.45 மணி முதல் 5.45 மணி வரை

இன்று திருவோண விரதம். குலசேகரப்பட்டினம் முத்தாரம்மன் சூரசம்கார நிகழ்ச்சி, விஜயதசமி, குழந்தைகள் கல்வி தொடங்க உகந்த நாள்.

இன்றைய ராசிபலன்

மேஷம் - பாராட்டு

ரிஷபம் - பரிவு

மிதுனம் - நன்மை

கடகம் - பகை

சிம்மம் - யோகம்

கன்னி - வரவு

துலாம் - நலம்

விருச்சிகம் - மேன்மை

தனுசு - சிந்தனை

மகரம் - கவனம்

கும்பம் - பெருமை

மீனம் - பயணம்

தூத்துக்குடி மாவட்டம் கோவில்பட்டி பஸ்நிலையத்தில் இருந்து சுமார் 2 கிலோமீட்டர் தொலைவில் உள்ளது, பழமையான பூவநாத சுவாமி திருக்கோவில். இந்த ஆலயத்தில் இறைவன் பூவநாத சுவாமி என்ற பெயரிலும், அம்பாள் செண்பகவல்லித் தாயார் என்ற பெயரிலும் அழைக்கப்படுகிறார்கள்.

இத்தல அம்மனுக்கு புடவை சாத்தியும், ஏழைகளுக்கு அன்னதானம் வழங்கியும் வழிபாடு செய்தால், பேச்சுக் குறைபாடு உள்ளவர்களுக்கு, அந்தக் குறை படிப்படியாக சரியாகும் என்கிறார்கள்.

ஈரோடு மாவட்டத்தில் உள்ள திண்டல் என்ற இடத்தில் சிறிய குன்றின் மேல் முருகப்பெருமான் திருக்கோவில் அமைந்துள்ளது.

குன்றிருக்கும் இடமெல்லாம் குமரன் இருக்கும் இடம் என்ற சொல்மொழிக்கு ஏற்ப, இந்த ஆலயமும் முருகனின் அருள் ஆலயங்களின் வரிசையில் முக்கிய இடம் பிடிக்கிறது. இந்த ஆலயத்தில் நின்ற கோலத்தில் முருகப்பெருமான் அருள்பாலிக்கிறார்.

புத்திரப்பேறு இல்லாதவர்கள், இத்தல முருகனுக்கு அபிஷேகம் செய்து, ஏழைகளுக்கு அன்னதானம் வழங்கி வழிபாடு செய்தால், விரைவில் குழந்தை பாக்கியம் கிடைக்கும் என்பது அசைக்க முடியாத நம்பிக்கை. ஈரோட்டில் இருந்து பெருந்துறை செல்லும் வழியில் சுமார் 6 கிலோமீட்டர் தொலைவில், திண்டல் திருத்தலம் உள்ளது.

இறைவன் அவதாரத்தின் முக்கிய நோக்கமே, அன்பான பக்தர்களை காப்பதுதான். இருப்பினும் அன்பரை காக்க அவதரிக்கும்போது வம்பரையும் (தீயவர்) அழிக்கிறான், இறைவன். அவ்வாறே அன்பான சான்றோர் மக்களை காத்து வம்பான கலியனை அழிப்பதற்காக, கலியுகத்தில் திருமால் எடுத்த அவதாரமே 'அய்யா வைகுண்டர்' அவதாரம் ஆகும்.

இறைவன் தனது அவதாரத்தின்போது வாழ்ந்து காட்டுவதன் வாயிலாகவும், வழிகாட்டுவதன் மூலமாகவும் நாம் நல்வழியில் வாழ்வதற்கான உபதேசங்களை தருகின்றார். அவ்வகையில் பெற்றோரிடம் பிள்ளைகள் எவ்வாறு நடந்து கொள்ள வேண்டும் என்பதையும் சொல்லியுள்ளார். பெற்றோரை மதித்து அவர்களுக்கு உரிய மரியாதை கொடுத்து, அவர்களின் சொல்படி நடப்பதால் கிடைக்கும் நன்மையையும் அகிலத்திரட்டு அம்மானை மூலமாக எடுத்துரைக்கிறார்.

துவாபர யுகத்தின் முடிவில், இறந்த உறவினர்களுக்கு செய்ய வேண்டிய இறுதிச் சடங்குகளை செய்யும்படி, பாண்டவர்களுக்கு பகவான் கிருஷ்ணர் உத்தரவிட்டார். இந்தநிலையில் கர்ணனுக்கு மோட்சம் அளிப்பதற்கான பணிகளும் நடைபெற்றது. அப்போது அங்கு வந்த வியாசர், "பாவிகளோடு இருந்த கர்ணனுக்கு மோட்சம் அளிப்பதன் காரணம் என்ன?" என்று கேட்டார்.

அதற்கு கிருஷ்ணர், "திரேதா யுகத்தில் ராவணனை அழிப்பதற்காக, நான் ஸ்ரீராமனாக அவதரித்திருந்தேன். அந்த வேளையில் எனக்கு தொண்டு செய்வதற்காக வாலியாக படைக்கப்பட்டவன்தான் இந்த கர்ணன். ஆனாலும் ராவணனோடு வாலிக்கு இருந்த நட்பின் காரணமாக, நான் அவனை மறைந்திருந்து கொல்லும் நிலை உண்டானது. மார்பில் அம்பு பாய்ந்து உயிர் போகும் தருவாயில் என்னை உணர்ந்து கொண்ட வாலி என்னைப் பணிந்து, 'நன்றியுள்ள திருமாலே.. நான் உமக்கு ஏவல் செய்வதற்காகவே படைக்கப்பட்டவன். முன்பு அமிர்தம் கடையும்போது என்னை ஒரு புறத்தில் நிறுத்தி வேலை செய்ய வைத்து அழகு பார்த்தவர் நீங்கள். அப்படி இருக்கையில் நீங்கள் சொல்லியிருந்தால், ராவணனின் பத்து தலைகளையும் கொய்து, கொன்றிருக்க மாட்டேனா' என்று கேட்டான்.

அப்போது நான், 'நீ எனக்கு ஏவல் செய்வதற்காகவே பிறந்தாய். இருப்பினும் எனக்கு ஆகாத பாவியான ராவணனுடன் நட்பு கொண்டிருந்தாய். அதோடு ராவணனிடம் 'உனக்கு எதிரி.. எனக்கும் எதிரி' என சபதமும் செய்திருந்தாய். நான் உன்னை மறைந்திருந்து தாக்காவிட்டால், ராவணனுக்கு நீ செய்த சத்தியத்தையும் மீறி, நீ என்னோடு நட்புகொண்டிருப்பாய். என் பக்தன் ஒருவன், அவனுடைய சத்தியத்தை மீறுவது சரியல்ல. எனவேதான் நீ என்னை அறியும் முன்பாக, நான் உன்னை மறைந்திருந்து வீழ்த்தினேன். அடுத்து வரும் யுகத்தில் கர்ணனாக பிறக்கப்போகும் நீ, தீயவனான துரியோதனனோடு இருந்தாலும் என் சொல்படி நடப்பாய். அப்போது உனக்கு மோட்சம் தருவேன்' என்று உறுதியளித்தேன்.

அதன்படிதான் அவனை குந்தியின் மகனாக, பாண்டவர்களின் மூத்தவனாக பிறவிக்கச் செய்து, துரியோதனன் பக்கம் அனுப்பினேன். எனினும் இறைவனான என் புத்தியை உள்ளிருத்தி, அதன்படியே வாழ்ந்தான். தன் தாய்க்கு செய்த சத்தியத்தின்படி, ஒரு முறைக்கு மேல் நாகாஸ்திரத்தை எய்தாமல் சத்தியம் காத்தான். அதனால்தான், முன்பு கூறியபடியே அவனுக்கு மோட்சம் அருள்கிறேன்" என்று கூறினார்.

ஒரு ஆன்மாவுக்கு கிடைக்கக்கூடிய உச்சபட்ச உயர்வு, மோட்சம்தான். அது தாய்- தந்தையர் சொல்லைக் கேட்டு நடப்பதால் ஒருவருக்கு கிடைக்கும் என்பதை அகிலத்திரட்டு அம்மானை மூலம் இறைவன் நமக்கு உணர்த்துகிறார். மேலும் 'ராமபிரான், மறைந்திருந்து வாலியைக் கொன்றது சரியா? தவறா?' என்று உலகில் நடக்கும் பட்டிமன்ற வினாவிற்கு சரி என்ற விடையை தருவதோடு, அதற்கான காரணத்தையும் அகிலத்திரட்டு அம்மானை மூலமாக அளிக்கிறார்.

ஸ்ரீமன் நாராயணர் தனது கிருஷ்ண அவதாரத்தை நிறைவு செய்துவிட்டு, திருவரங்கம் செல்லும் வழியில் சப்த மாதர்கள் மூலமாக பிறந்தவர்களே சான்றோர்கள் ஆவர். சான்றோர்களை பெற்றெடுத்த பிறகு, சப்த கன்னியர்கள் தவம் செய்வதற்காக கானகம் சென்றனர். அவர்கள் முன்பாக தோன்றிய திருமால், சப்த கன்னியர்கள் பூலோகத்தில் பிறவி எடுக்கும்போது, தாம் வைகுண்டராக அவதரித்து அவர்களை திருமணம் செய்வதாக கூறினார். அதன்படியே ஸ்ரீமன் நாராயணன், வைகுண்டராக அவதரித்து வந்தபோது சப்த மாதர்களை திருக்கல்யாணம் புரிந்தார்.

இந்த திருக்கல்யாணத்தின்போது சப்தமாதர்களின் பெற்றோரை அழைத்த அய்யா, கைப்பிடித்து தரும்படி கூறினார். அப்போது அவர்கள் அய்யாவிடம் "இதற்கு முன்பே இவர்கள் உமக்கு மனைவியர் தானே" என்று சொல்லிவிட்டு, "இருந்தாலும் நீர் சொன்னதால் நாங்கள் கைப்பிடித்து கொடுக்கிறோம்" என்று சொல்லி கைபிடித்துக் கொடுத்தனர். திருமணத்தின்போது கைப்பிடித்து கொடுக்கின்ற பெரிய பாக்கியத்தை பிள்ளைகள் தங்களின் பெற்றோருக்கு கொடுக்க வேண்டும் என்பதை, இந்த அவதார திருக்கல்யாண லீலை மூலம் அய்யா வைகுண்டர் நமக்கு உணர்த்துகிறார். அய்யா வைகுண்டரின் வாக்குப்படி பெற்றோரை மதித்தும், அவர்களுக்கு கட்டுப்பட்டும், அவர்களுக்கு செய்ய வேண்டிய கடமையை சரியாக செய்தும் வாழ்வதுதான் பிள்ளைகளின் கடமையாகும்.

இப்படிப்பட்ட உயர்ந்த தத்துவத்தைக் கொண்டிருந்த அய்யா வைகுண்டருக்கு, தமிழகம் முழுவதும் பல்வேறு இடங்களில் ஆலயங்கள் எழுப்பப்பட்டு இருக்கின்றன. அவற்றில் ஒன்றுதான் சென்னை மணலிப் புதுநகரில் உள்ள 'அய்யா வைகுண்ட தர்மபதி' ஆகும். இந்த ஆலயத்தில் தினமும் மூன்று வேளை பணிவிடையும், மூன்று வேளையும் நித்திய அன்னதானமும், தினமும் மாலையில் வாகன பவனியும் நடைபெறுவது சிறப்புக்குரியதாகும். இந்த ஆலயத்தின் திருவிழா கடந்த 4-ந் தேதி கொடியேற்றத்துடன் தொடங்கியது. வருகிற 13-ந் தேதி (ஞாயிற்றுக்கிழமை) வரை நடைபெறும் இந்த விழாவில், முக்கிய நிகழ்வாக 13-ந் தேதி காலை 11.30 மணிக்கு அய்யா வைகுண்டர் திருத்தேரில் பவனி வரும் நிகழ்வு நடைபெறுகிறது.

குலசேகரன்பட்டினம்:

தூத்துக்குடி மாவட்டம் குலசேகரன்பட்டினம் ஞானமூர்த்தீஸ்வரர் உடனுறை முத்தாரம்மன் கோவிலில் பிரசித்தி பெற்ற தசரா திருவிழா கடந்த 3-ந்தேதி கொடியேற்றத்துடன் தொடங்கியது. விழா நாட்களில் தினமும் இரவில் அம்மன் பல்வேறு வாகனங்களில் வெவ்வேறு திருக்கோலங்களில் எழுந்தருளி வீதி உலா சென்று பக்தர்களுக்கு அருள்பாலித்து வருகிறார்.

தசரா திருவிழாவையொட்டி, தூத்துக்குடி, நெல்லை, தென்காசி, கன்னியாகுமரி, ராமநாதபுரம் உள்ளிட்ட தென்மாவட்டங்களில் பெரும்பாலான ஊர்களிலும் விரதம் இருந்து காப்பு கட்டி பல்வேறு வேடங்களை அணிந்த பக்தர்கள் ஒவ்வொரு ஊரிலும் வீதி வீதியாக சென்று காணிக்கை வசூலிக்கின்றனர். அந்தந்த ஊர்களில் உள்ள கோவில்களின் அருகில் பிறை அமைத்து தங்கியிருந்து அம்மனை வழிபடுகின்றனர்.

ஒவ்வொரு தசரா குழுவிலும் காளி, சிவன், பிரம்மன், விஷ்ணு, விநாயகர், முருகபெருமான், ராமர், கிருஷ்ணர், நாராயணர், அனுமர் உள்ளிட்ட பல்வேறு சுவாமி வேடங்களை அணிந்த பக்தர்கள் அணிவகுத்து செல்வது கண்கொள்ளாக் காட்சியாக உள்ளது. அரசன், குறவன், கரடி, கிளி, புலி போன்ற வேடங்களையும் சில பக்தர்கள் அணிந்து நேர்த்திக்கடன் செலுத்துகின்றனர்.

குழந்தைகள் முதல் பெரியவர்கள் வரையிலான பக்தர்கள் பல்வேறு வேடங்களை அணிந்து வழிபடுகின்றனர்.

தசரா குழுவினருடன் நாட்டுப்புற கலைஞர்களும் சென்று கரகாட்டம், சிலம்பாட்டம், மேற்கத்திய நடனம் போன்றவற்றை நடத்துகின்றனர். தென்மாவட்டங்களில் காணும் இடமெல்லாம் சுவாமி வேடங்களை அணிந்த பக்தர்களாகவே காட்சியளிப்பதால் தசரா திருவிழா களைகட்டியது.

குலசேகரன்பட்டினம் கோவிலில் தசரா திருவிழாவின் 9-ம் நாளான இன்று (வெள்ளிக்கிழமை) இரவு 10 மணிக்கு அன்ன வாகனத்தில் கலைமகள் திருக்கோலத்தில் அம்மன் எழுந்தருளி வீதி உலா சென்று பக்தர்களுக்கு காட்சி அளிக்கின்றார்.

விழாவின் சிகர நிகழ்ச்சியான மகிஷா சூரசம்ஹாரம் 10-ம் திருநாளான நாளை (சனிக்கிழமை) நடக்கிறது. அன்று இரவு 12 மணிக்கு அம்மன் சிம்ம வாகனத்தில் கடற்கரை சிதம்பரேஸ்வரர் கோவில் முன்பாக எழுந்தருளி, மகிஷாசூரனை வதம் செய்யும் சூரசம்ஹாரம் நடைபெறுகிறது.

விழாவையொட்டி லட்சக்கணக்கான பக்தர்கள் கோவிலில் குவிந்த வண்ணம் உள்ளனர்.

இன்றைய பஞ்சாங்கம்

குரோதி ஆண்டு புரட்டாசி-25 (வெள்ளிக்கிழமை)

பிறை: வளர்பிறை.

திதி: அஷ்டமி காலை 7.22 மணி வரை. பிறகு நவமி.

நட்சத்திரம்: உத்திராடம் நள்ளிரவு 1.42 மணி வரை. பிறகு திருவோணம்.

யோகம்: சித்தயோகம்

ராகுகாலம்: காலை 10.30 மணி முதல் 12 மணி வரை

எமகண்டம்: பிற்பகல் 3 மணி முதல் 4.30 மணி வரை

சூலம்: மேற்கு

நல்ல நேரம்: காலை 6 மணி முதல் 7 மணி வரை மாலை 5 மணி முதல் 6 மணி வரை

இன்று மகா நவமி. சரஸ்வதி பூஜை, ஆயுத பூஜை. திருப்பதி ஏழுமலையப்பன் ரதோற்சவம். மதுரை ஸ்ரீமீனாட்சியம்மன் கொலு மண்டபத்தில் சிவ பூஜை செய்தருளிய காட்சி. சங்கரன்கோவில் ஸ்ரீகோமதியம்மன் தங்கப் பாவாடை தரிசனம். ஏனாதி நாத நாயனார் குரு பூஜை. சிருங்கேசி ஸ்ரீசாரதாபீடம் ஸ்ரீஅம்பாள் சிம்ம வாகனத்தில் சாமுண்டி அலங்காரத்தில் காட்சியருளல். ராமேஸ்வரம் ஸ்ரீபர்வதவர்த்தினியம்மன் நவசக்தி மண்டபம் எழுந்தருளி அம்பாள் தங்கப் பல்லக்கில் புறப்பாடு. கீழ்த்திருப்பதி ஸ்ரீகோவிந்தராஜப் பெருமாள் காலை திருமஞ்சனம், மாலை ஊஞ்சல் சேவை. திருவிடைமருதூர் ஸ்ரீபிருகத் சுந்தரகுசாம்பிகை புறப்பாடு. லால்குடி ஸ்ரீசப்தரிஷீஸ்வரர் கோவிலில் அபிஷேகம். சிவகாசி ஸ்ரீவிஸ்வநாதர் சிறப்பு அபிஷேகம். திருத்தணி ஸ்ரீமுருகப்பெருமான் கிளி வாகன சேவை.

இன்றைய ராசிபலன்

மேஷம்-போட்டி

ரிஷபம்-புகழ்

மிதுனம்-வெற்றி

கடகம்-தனம்

சிம்மம்-ஆர்வம்

கன்னி-ஆதரவு

துலாம்- அமைதி

விருச்சிகம்-செலவு

தனுசு- மாற்றம்

மகரம்-லாபம்

கும்பம்-ஜெயம்

மீனம்-பெருமை

முதலில் பிள்ளையாருக்கு இந்த 16 போற்றிகளை சொல்லவும்.

ஓம் அகர முதல்வா போற்றி!

ஓம் அணுவிற்கணுவாய் போற்றி!

ஓம் ஆனை முகத்தோய் போற்றி!ஓம் ஆனை முகத்தோய் போற்றி!ஓம் ஆனை முகத்தோய் போற்றி!

ஓம் இந்திரன் இளம்பிறை போற்றி!

ஓம் ஈடிலாத் தெய்வமே போற்றி!

ஓம் உமையவள் மைந்தா போற்றி!

ஓம் ஊழ்வினை அறுப்பாய் போற்றி!

ஓம் எருக்கினில் இருப்பாய் போற்றி!

ஓம் ஐங்கரனே போற்றி!

ஓம் ஒற்றைக் கொம்பனேபோற்றி!

ஓம் கற்பக களிறே போற்றி!

ஓம் பேழை வயிற்றோய் போற்றி!

ஓம் பெரும்பாரக் கோட்டாய் போற்றி!

ஓம் வெள்ளிக்கொம்பனே விநாயகா போற்றி!

ஓம் பொன்னும் மெய்ப்பொருளும் தருவாய் போற்றி!

ஓம் போகமும் திருவும் புணர்ப்பாய் போற்றி!

ஒவ்வொரு நாளும் இப்படி தொடங்கி 9 நாட்களும் போற்றி பாடுவது நல்லது. 9 நாட்களுக்குரிய போற்றி பாடல்கள் வருமாறு:-

முதல் நாளுக்குரிய போற்றி

ஓம் பொன்னே போற்றி!

ஓம் மெய்ப்பொருளே போற்றி!

ஓம் போகமே போற்றி!

ஓம் ஞானச் சுடரே போற்றி!

ஓம் பேரின்பக் கடலே போன்றி!

ஓம் குமாரியே போற்றி!

ஓம் குற்றங்களைவாய் போற்றி!

ஓம் முற்றறிவு ஒளியோய் போற்றி!

ஓம் பேரருட்கடலே போற்றி!

ஓம் ஆற்றல் உடையாய் போற்றி!

ஓம் அருட்கடலே போற்றி!

ஓம் ஆனந்த அறிவொளி போற்றி!

ஓம் இருளகற்றுவாய் போற்றி

ஓம் இன்பத்தின் உறைவிடமே போற்றி!

ஓம் ஈயும் தயாபரி போற்றி!

ஓம் மங்கள நாயகியே போற்றி!

-இப்படி அர்ச்சனை முடிக்கவும்.

இரண்டாவது நாள் போற்றி

ஓம் வளம் நல்குவாய் போற்றி

ஓம் நலந்தரும் நாயகி போற்றி

ஓம் முக்கண் மூர்த்தியே போற்றி

ஓம் அறத்தின் வடிவோய் போற்றி

ஓம் மின் ஒளி அம்மா போற்றி

ஓம் எரி சுடராய் நின்ற தேவி போற்றி

ஓம் ஏற்றத்துக்கரசி போற்றி

ஓம் எரம்பன் தாயானவளே போற்றி

ஓம் எங்களின் தெய்வமே போற்றி

ஓம் ஒளிக்குள் ஒளிர்பவனே போற்றி

ஓம் ஈரேழுலகில் இருப்பாய் போற்றி

ஓம் சூளா மணியே போற்றி

ஓம் சுந்தர வடிவே போற்றி

ஓம் ஞானத்தின் வடிவே போற்றி

ஓம் நட்புக்கரசியே போற்றி

ஓம் திரிமூர்த்தி தேவியே போற்றி!

மூன்றாம் நாள் போற்றி

ஓம் அறிவினுக்கறிவேபோற்றி

ஓம் ஞானதீபமேபோற்றி

ஓம் அருமறைப் பொருளேபோற்றி

ஓம் ஆதிமூலமாய் நின்றவளேபோற்றி

ஓம் புகழ்தரும் புண்ணியளேபோற்றி

ஓம் நற்பாகின் சுவையே போற்றி

ஓம் நல்வினை நிகழ்த்துவோய் போற்றி

ஓம் பரமனின் சக்தியேபோற்றி

ஓம் பாபங்கள் களைவாய்போற்றி

ஓம் அன்பெனும் முகத்தவளேபோற்றி

ஓம் அகிலத்தின் காப்பேபோற்றி

ஓம் செம்மேனியளேபோற்றி

ஓம் செபத்தின் விளக்கமேபோற்றி

ஓம் தானியந் தருவாய் போற்றி

ஓம் கல்யாணியம்மையேபோற்றி

நான்காவது நாள் போற்றி

ஓம் கருணை வடிவேபோற்றி

ஓம் கற்பகத் தருவேபோற்றி

ஓம் உள்ளத்திருள் ஒழிப்பாய்போற்றி

ஓம் ஊழ்விணை தீர்ப்பவளேபோற்றி

ஓம் கரும்பின் சுவையேபோற்றி

ஓம் கார்முகில் மழையேபோற்றி

ஓம் வீரத்திருமகளே போற்றி

ஓம் வெற்றிக்கு வித்திடுவாய்போற்றி

ஓம் பகைக்குப் பகையேபோற்றி

ஓம் ஆவேசத் திருவேபோற்றி

ஓம் தீமைக்குத் தீயேபோற்றி

ஓம் நல்லன வளர்ப்பாய்போற்றி

ஓம் நாரணன் தங்கையேபோற்றி

ஓம் அற்புதக் கோலமேபோற்றி

ஓம் ஆற்றலுள் அருளேபோற்றி

ஓம் புகழின் காரணியேபோற்றி

ஓம் காக்கும் கவசமேபோற்றி

ஓம் ரோகிணி தேவியேபோற்றி

ஐந்தாம் நாள் போற்றி

ஓம் வீரசக்தியே போற்றி

ஓம் திரிசூலியே போற்றி

ஓம் கபாலியே போற்றி

ஓம் தாளிசினியே போற்றி

ஓம் கவுரி தேவியே போற்றி

ஓம் உத்தமத் தாயே போற்றி

ஓம் தர்மம் காப்பவளே போற்றி

ஓம் உதிரத்தின் தலைவியே போற்றி

ஓம் மெய்ஞான விதியே போற்றி

ஓம் தாண்டவத் தாரகையே போற்றி

ஓம் போற்றுவோர் துணையே போற்றி

ஓம் பச்சைக் காளியே போற்றி

ஓம் பவள நிறத்தினாய் போற்றி

ஓம் ஆகாய ஒளியே போற்றி

ஓம் பூதங்கள் உடையோய் போற்றி

ஓம் காளிகாதேவி சக்தியே போற்றி

ஆறாம் நாள் போற்றி

ஓம் பொன்னரசியே போற்றி

ஓம் நவமணி நாயகியே போற்றி

ஓம் இன்னமுதாய் இருப்போய் போற்றி

ஓம் சிங்கார நாயகியே போற்றி

ஓம் செம்பொன் மேனியளே போற்றி

ஓம் மங்காத ஒளியவளே போற்றி

ஓம் சித்திகள் தருவாய் போற்றி

ஓம் திக்கெட்டும் பரவினோய் போற்றி

ஓம் சுத்த பரிபூரணியே போற்றி

ஓம் மகாமந்திர உருவே போற்றி

ஓம் மாமறையுள் பொருளே போற்றி

ஓம் ஆநந்த முதலே போற்றி

ஓம் ஐவர்க்கும் தலைவி போற்றி

ஓம் செம்மேனியாய் மிளிர்வாய் போற்றி

ஓம் மாகேஸ்வரியே போற்றி

ஓம் மகா சண்டிகையே போற்றி

ஏழாம் நாள் போற்றி

ஓம் மெய்த் தவமே போற்றி

ஓம் மூலாதாரத்து ஒளியே போற்றி

ஓம் ஆதிமுதல் அம்பரமே போற்றி

ஓம் அகண்ட பரிபூரணியே போற்றி

ஓம் அகிலலோக நாயகி போற்றி

ஓம் நல்வினை நிகழ்த்துவாய் போற்றி

ஓம் அஞ்சலென்று அருள்வாய் போற்றி

ஓம் ஆறுமுகன் வேல் தந்தோய் போற்றி

ஓம் சொல்லுக்கு இனிய சுந்தரி போற்றி

ஓம் வில்லோன் மாயை தந்தவளே போற்றி

ஓம் ஐந்தெழுத்தோன் ஆரணங்கே போற்றி

ஓம் எழுவரில் ஒன்றானவளே போற்றி

ஓம் இல்லத்தொளி தரும் இறைவி போற்றி

ஓம் ஏற்றம் தரும் ஏறே போற்றி

ஓம் காட்சிக்கு இனியவளே போற்றி

ஓம் சாம்பவி மாதே போற்றி

எட்டாம் நாள் போற்றி

ஓம் வேத மெய்பொருளே போற்றி

ஓம் மேனிக் கருங்குயிலே போற்றி

ஓம் அண்டர் போற்றும் அருட் பொருளே போற்றி

ஓம் எண்திசை ஈஸ்வரியே போற்றி

ஓம் எங்கும் நிறைந்தவளே போற்றி

ஓம் மாயோனின் மனம் நிறைந்தவளே போற்றி

ஓம் தூய ஒளியாய் தெரிபவளே போற்றி

ஓம் சிங்க வாகினித் தேவியே போற்றி

ஓம் அங்கமெலாம் காக்கும் ஆதரவே போற்றி

ஓம் சூலத்தில் சத்தியம் காப்பாய் போற்றி

ஓம் துன்பம் துடைக்கும் தூமணி போற்றி

ஓம் எதிரிகள் விரட்டும் ஏந்தலாய் போற்றி

ஓம் கடுவிஷம் இறக்கும் மருந்தே போற்றி

ஓம் காப்பதில் நிகரிலாத் தெய்வமே போற்றி

ஓம் கற்பகமாய் எம்முன் தோன்றுவாய் போற்றி

ஓம் ஜம்தும் துர்க்கா தேவியே போற்றி!!

ஒன்பதாம் நாள் போற்றி

ஓம் ஓங்காரத்துப் பொருளே போற்றி

ஓம் ஊனாகி நின்ற உத்தமியே போற்றி

ஓம் படைத்தோன் பாகம் பிரியாய் போற்றி

ஓம் அடியவர்க்கு மங்களம் அருள்வாய் போற்றி

ஓம் முக்கோணத்துள் உள்ள மூர்த்தமே போற்றி

ஓம் ரீங்காரம் தன்னில் இருப்பவளே போற்றி

ஓம் நாற்பத்து முக்கோண நாயகியே போற்றி

ஓம் சொற்பொருள் சுவைதனைத் தந்தாய் போற்றி

ஓம் ஆறாது தத்துவம் அருளினாய் போற்றி

ஓம் பளிங்கு ஒளியாய் நின்ற பரமே போற்றி

ஓம் ஓசை விந்துநாத உட்பொருளாய் போற்றி

ஓம் அகண்ட பூரணி அம்மா போற்றி

ஓம் உண்ணும் சிவயோக உத்தமியே போற்றி

ஓம் பண் மறைவேதப் பாசறையே போற்றி

ஓம் மாகேஸ்வரியே மங்கள உருவே போற்றி

ஓம் சாம்பவி சங்கரித் தேவியே

போற்றி! போற்றி!!

சரஸ்வதி பூஜை அன்று வீடுகளிலும், அலுவலகங்களிலும் பூஜைகள் செய்து வழிபடுவது வழக்கம்.

அவ்வாறு வழிபாடு செய்வதற்கு முன்பு, வழிபாடு செய்ய இருக்கும் இடத்தை தூய்மைப்படுத்த வேண்டும். சந்தனம், தெளித்து குங்குமம் இட வேண்டும்.

சரஸ்வதியின் படத்திற்கும், படைக்கப்பட வேண்டிய பொருட்களுக்கும் சந்தனம் தெளித்து குங்குமம் இடவும், படத்திற்கு பூக்கள் வைத்து அலங்கரிக்க வேண்டும்.

அன்னையின் திருவுருவின் பார்வையில் புத்தகங்களை வைத்து அதன் முன்பாக வாழை இலை விரித்து அதில் படையலுக்காக சமைக்கப்பட்டவைகளை வைக்க வேண்டும்.

சுண்டல், சர்க்கரை பொங்கல், புளியோதரை, எலுமிச்சை சாதம் போன்றவற்றை கலைவாணிக்கு நைவேத்தியங்களாக படைக்கலாம்.

வாழை இலையை வைத்து அதில் பொறி, கடலை, அவல், நாட்டு சர்க்கரை, பழங்களை வைக்க வேண்டும்.

செம்பருத்தி, ரோஜா, வெண்தாமரை மலர்கள் அன்னைக்கு உகந்த மலர்களாகும். இவற்றால் மாலைகள் தொடுத்து அன்னைக்கும், அவள் உறைந்திருக்கும் புத்தகங்களுக்கும் அணிவித்தல் வேண்டும்.

எதற்கும் விநாயகரே முழு முதலானவர், எனவே மஞ்சளில் பிள்ளையார் பிடித்து பூஜையில் வைத்து சுக்லாம் பரதரம் விஷ்ணும் சச்இவர்ணம் சதுர்புஜம்! பிரசந்த் வதனம் தீயாயேத் சர்வ விக்நோப சாந்தயே' என்று கூறி விநாயகரை வணங்கிய பின்னரே சரஸ்வதிக்கான பூஜையை ஆரம்பித்தல் வேண்டும்.

சரஸ்வதி பூஜையின் போது `துர்க்கா லட்சுமி சரஸ் வதீப்யோ நம' என்று கூறி பூஜையை ஆரம்பிப்பது நன்று. பூஜையில் கலசம் வைத்தும் கலைவாணியை வணங்கலாம்.

கலசம் வைத்து அம்பிகையை முறைப்படி எழுந்தருளச் செய்து பூஜிப்பதால் கூடுதல் நலன் கிடைக்கும்.

பூஜையின் போது வீட்டில் உள்ள குழந்தைகள், பெண்கள் உள்பட அனைவரும் கலைவாணிக்குரிய பாடல்களைப் பாடி வணங்கலாம்.

சகலகலாவல்லி மாலை பாடல்களை பாராயணம் செய்யலாம்.

நவராத்திரி நாட்களில் அன்னையின் அருள்பெற ஒன்பது நாட்களும் விரதமிருந்து பூஜிக்க இயலாதவர்கள் சரஸ்வதி பூஜை அன்று மட்டும் அம்மனை பூஜித்து வணங்கினால் போதும். அம்பிகையின் அருள் பூரணமாய் கிடைக்கும்.