செங்கல்பட்டு

மாமல்லபுரம்:

டெல்லியில் இருந்து மத்திய அரசின் 16-வது நிதிக்குழு தலைவர் அரவிந்த் பனகாரியா தலைமையில், செயலர் ரிவத்விக் பாண்டே, உறுப்பினர்கள் அன்னி ஜார்ஜ், அஜய் நாராயன்ஜா, மனோஜ் பாண்டே, அன்னி ஜார்ஜ் மேத்யு, சவும்யா கண்டி கோஷ், உள்ளிட்ட 12 பேர் கொண்ட குழுவினர் 4 நாட்கள் பயணமாக தமிழ்நாடு வந்துள்ளனர்.

அடுத்த 5 ஆண்டு பொருளாதார வளர்ச்சி மற்றும் வரி வருவாய் திட்டம் எப்படி இருக்க வேண்டும், எதற்கு முக்கியத்துவம் தரவேண்டும், என்பது தொடர்பான பல்வேறு தகவல்கள் மற்றும் அதற்கான தரவுகளை ஒவ்வொரு மாநிலத்திற்கும் சென்று இந்த நிதிக்குழு சேகரித்து வருகிறது.

இதன் ஒரு பகுதியாக இன்று காலை மாமல்லபுரம் அடுத்த நெம்மேலியில் இயங்கிவரும் 15 கோடி லிட்டர் கொள்ளளவு, கடல்நீரை குடிநீராக்கும் ஆலையை குழுவினர் ஆய்வு செய்து, அதன் செயல்பாடுகள், உற்பத்தி, பாது பயன்பாடு, வருவாய் உள்ளிட்ட முக்கிய விஷயங்களை அதிகாரிகளிடம் கேட்டரிந்தனர்.

இது குறித்து அதிகாரிகள் கூறியதாவது:-

தமிழ்நாட்டை பொறுத்தவரை 9-வது நிதிக்குழு பரிந்துரைப்படி தமிழ்நாட்டிற்கு, 7.931 சதவீத மாக இருந்த நிதி பகிர்வு, 15-வது நிதிக்குழுவால், 4.079 சதவீதமாக குறைக்கப்பட்டது. இதனால், 3.57 லட்சம் கோடி ரூபாய் வரை தமிழ்நாட்டிற்கு இழப்பு ஏற்பட்டுள்ளது.

எனவே, தமிழக அரசுக்கான நிதி பகிர்வை அதிகரிக்க வேண்டும் என, தமிழக அரசு சார்பில், 16-வது நிதிக் குழுவிடம் வலியுறுத்தப்பட உள்ளது. அரசின் தேவைகளை எடுத்துரைத்து நிதி பெறும் பணி, வணிக வரித்துறை செயலர் பரதேஜந்திர நவ்னீத்திடம் ஒப்படைக்கப்பட்டு உள்ளது.

பல்வேறு தரப்பினரிடம் ஆலோசனை நடத்தும் 16-வது நிதிக்குழு, தன் பரிந்துரைகளை, அடுத்த ஆண்டு அக்.31-க்குள் சமர்ப்பிக்கும். இக்குழு பரிந்துரைப்படி, 2026 ஏப்.1 முதல், தமிழ்நாடு நிதியை பெற துவங்கும்

இவ்வாறு அவர்கள் கூறினர்.

ஆய்வின் போது குடிநீர் வடிகால் வாரிய முதன்மை செயலர் கார்த்திகேயன், செங்கல்பட்டு மாவட்ட கலெக்டர் அருண்ராஜ், எஸ்.பி. சாய்பிரனீத் உள்ளிட்டோர் உடனிருந்தனர். பின்னர் அங்கிருந்து புறப்பட்டு ஸ்ரீபெரும்புதூரில் அமைந்துள்ள ஏற்றுமதி தொழில் சார்ந்த நிறுவனங்களை பார்வையிட சென்றனர். 

திருப்போரூர்:

வண்டலூர் அடுத்த மேலக்கோட்டையூரில் உள்ள தமிழ்நாடு உடற்கல்வியியல் மற்றும் விளையாட்டு பல்கலைக்கழகத்தில் தேசிய அளவிலான ட்ராக் சைக்கிளிங் போட்டியை துணை முதலமைச்சர் உதயநிதி ஸ்டாலின் தொடங்கி வைத்தார்.

19-ந்தேதி வரை நடைபெறும் இப்போட்டிகளில் 28 மாநிலங்கள் 8 யூனியன் பிரதேசங்களை சேர்ந்த நூற்றுக்கும் மேற்பட்ட சைக்கிள் வீரர்கள் கலந்து கொள்கின்றனர். விழாவில் தமிழ்நாடு விளையாட்டு மற்றும் இளைஞர் நலத்துறைச் செயலாளர் அதுல்ய மிஸ்ரா, அமைச்சர் தா.மோ. அன்பரசன், காஞ்சிபுரம் எம்.பி.செல்வம், செங்கல்பட்டு மாவட்ட கலெக்டர் அருண்ராஜ், திருப்போரூர் ஒன்றிய குழு தலைவர் எல். இதயவர்மன், ஒன்றிய குழு துணை தலைவர் சத்யா சேகர், தெற்கு ஒன்றிய செயலாளர் பையனூர் சேகர், மேலக்கோட்டை ஊராட்சி மன்ற தலைவர் கௌதமி ஆறுமுகம், ஒன்றிய குழு உறுப்பினர்கள் சுரேஷ், அருண்குமார்.

திருப்போரூர் பேரூராட்சி தலைவர் தேவராஜ், தகவல் தொழில்நுட்ப அணி அமைப்பாளர் எக்ஸ்பிரஸ் எல்லப்பன், ஊராட்சி மன்ற தலைவர்கள் ராணி எல்லப்பன், தாரா சுதாகர், மகாலட்சுமி ராஜாராம், புதுப்பாக்கம் ஆறுமுகம் உள்ளிட்ட பலர் கலந்து கொண்டனர். முன்னதாக நிகழ்ச்சியில் கலந்து கொள்ள வந்த துணை முதலமைச்சர் உதயநிதி ஸ்டாலினுக்கு திருப்போரூர் ஒன்றிய தி.மு.க. சார்பில் ஒன்றிய குழு தலைவர் எல்.இதயவர்மன் தலைமையில் மேலக்கோட்டையூர் எல்லையில் இருந்து பூக்கள் தூவி சிறப்பான வரவேற்பு அளிக்கப்பட்டது. இதில் ஏராளமான தி.மு.க. நிர்வாகிகள் கலந்து கொண்டனர்.

தமிழ் சினிமாவில் உச்ச நட்சத்திரமாக திகழ்பவர் நடிகர் சிவகார்த்திகேயன். சமீபத்தில் இவர் நடிப்பில் வெளியான அமரன் திரைப்படம் வசூல் ரீதியாக மக்களிடையே நல்ல வரவேற்பை பெற்று வருகிறது.

இதை கருத்தில் கொண்டு, 'ஓடிடி தேதியை இன்னும் தள்ளிவையுங்கள்; திரையரங்கில் நல்ல வரவேற்பு உள்ளது' என்று திரையரங்கு உரிமையாளர்களே சிவகார்த்திகேயன் மற்றும் அமரன் தயாரிப்பாளர்களுக்கு கோரிக்கை வைத்துள்ளனர்.

இந்நிலையில் தாம்பரம் பகுதியில் சிவகார்த்திகேயனின் புதிய படத்தின் படப்பிடிப்பு நடைபெற்று வருகிறது. அதற்காக பெருங்களத்தூரில் உள்ள மேம்பாலத்தில் இருந்து சிவகார்த்திகேயன் கீழே குதிக்கும் காட்சி படமாக்கப்பட்டது. அப்போது, சிவகார்த்திகேயனைப் பார்க்க அப்பகுதியில் மக்கள் கூட்டம் திரண்டது.

வாகன ஓட்டிகள் ஆங்காங்கே நின்று கொண்டு சூட்டிங்கை வேடிக்கை பார்த்தனர். அதனால் வண்டலூர், ஆலப்பாக்கம் உள்ளிட்ட பகுதிகளில் போக்குவரத்து கடுமையாகப் பாதிக்கப்பட்டது.

செங்கல்பட்டு மாவட்டம் திருக்கழுக்குன்றம் அடுத்த அருங்குன்றம் ஊராட்சிக்கு உட்பட்ட ஏரியில், வனத்துறை சார்பில் ஒரு கோடி பனை மரம் நடும் நெடும் பணியின் ஒரு பகுதியாக "பனை நடவு திருவிழா 2024 - 2025" என்ற பெயரில் இன்று குறு, சிறு மற்றும் நடுத்தர தொழில் நிறுவனங்கள் துறை அமைச்சர் தா.மோ.அன்பரசன் முன்னிலையில் பனை விதைகள் நடும் நிகழ்ச்சி நடைபெற்றது.

செங்கல்பட்டு மாவட்ட கலெக்டர் ச.அருண்ராஜ், காஞ்சிபுரம் பாராளுமன்ற உறுப்பினர் க.செல்வம், மாவட்ட கூடுதல் கலெக்டரும், மாவட்ட ஊரக வளர்ச்சி முகமை திட்ட இயக்குனருமான அனாமிகா ரமேஷ், மாவட்ட வன அலுவலர் ரவி மீனா, திருப்போரூர் ஊராட்சி ஒன்றிய குழு தலைவர் எஸ்.எல்.ஆர்.இதயவர்மன், அருங்குன்றம் ஊராட்சி தலைவர் மற்றும், உள்ளாட்சி பிரதிநிதிகள் பலர் பங்கேற்றனர்.

தொடர்ந்து, அமைச்சர் அங்கு நடைபெற்ற அரசு நலத்திட்ட உதவிகளை வழங்கி, மருத்துவ காப்பீடு திட்டம் குறித்து அதிகாரிகளிடம் கேட்டறிந்து, மருத்துவ முகாமை பார்வையிட்டார்.

நிகழ்ச்சியில் அமைச்சர் பேசியதாவது:-

தமிழ்நாடு முதலமைச்சர் மு.க.ஸ்டாலின் அவர்கள் நமது தமிழக பாரம்பரிய மரமான பனை மரங்களை காக்கும் விதமாக ஆண்டிற்கு ஒரு கோடி பனை மரங்கள் வளர்க்கும் திட்டத்தை துவக்கி வைத்தார்.

இதை தொடர்ந்து செங்கல்பட்டு மாவட்டத்தில் மட்டும் 5 லட்சம் விதைகள் நட முடிவு செய்துள்ளோம். இதுவரை 3.31லட்சம் விதைகள் இதுவரை நடவு செய்துள்ளோம். இன்று மட்டும் ஒரு லட்சம் நட்டுள்ளோம் மீதமுள்ள விதைகள் இம்மாதம் இறுதிக்குள் நடவுள்ளோம்.

மாமல்லபுரத்தில் 100 கோடி ரூபாய் செலவில் புதிய பேருந்து நிலையம் கட்டும் பணிகள் விரைவாக நடந்து வருகிறது. செங்கல்பட்டு நகருக்குள் போக்குவரத்து நெரிசலை தவிர்க்க அங்குள்ள அரசு பேருந்து பணிமனையை இடமாற்றம் செய்யும் பணிகள் நடந்து வருகிறது. கிளாம்பாக்கம் புதிய பேருந்து நிலையத்தில் இருந்த சின்ன சின்ன வசதிகள் குறைபாடுகளை சரி செய்துள்ளோம்.

இவ்வாறு அவர் குறிப்பிட்டுள்ளார்.

மாமல்லபுரம்:

செங்கல்பட்டு மாவட்ட ஊரக வளர்ச்சித் துறையின் கீழ் ஊராட்சிப் பகுதிகளில் உள்ள குளம், ஏரிகளில் நாட்டு இன மீன் வகைகளான ரோகு, கட்லா, மிர்கால் ஆகியவற்றின் குஞ்சுகளை விட்டு, நாட்டு இன மீன்கள் அழியாமல் பாதுகாத்து வருகின்றனர்.

மாவட்டத்திற்கு உட்பட்ட பகுதிகளில் மீன் உற்பத்தியை பெருக்கும் வகையில் மீன்வளத்துறையுடன் இணைந்து செயல்படுத்தி வருகின்றனர்.

இதன்படி வட்டார வளர்ச்சி கட்டுப்பாட்டில் உள்ள நீர்நிலைகளில் மீன் குஞ்சுகள் இருப்பு வைக்கப்படுகிறது., செங்கல்பட்டு மாவட்டத்தில் 500 ஏக்கர் பரப்பளவு நீர்நிலைகளில் மீன் குஞ்சிகள் இருப்பு வைக்க நிர்ணயிக்கப்பட்டுள்ளது

அதன்படி மீன்வளத்துறை, மாவட்ட மீன் வளர்ப்போர் மேம்பாட்டு முகமை சார்பில், 4லட்சம் மீன் குஞ்சுகளை இருப்பு வைக்க தயாராகி வருகிறது.

அதற்காக ஆத்தூர் மீன்வள பண்ணையில் இருந்து கட்லா, ரோகு, மிர்கால் வகை மீன் குஞ்சுகள் உற்பத்தி செய்யப்பட்டுள்ளது., முதல்கட்டமாக மீன் குஞ்சிகளை செங்கல்படாடு மாவட்ட சப்-கலெக்டர் நாராயணசர்மா திருக்கழுக்குன்றம் அடுத்த அகஸ்தீஸ்வரமங்கலத்தில் புதிதாக உருவாக்கப்பட்ட குளத்தில் 26 ஆயிரம் குஞ்சுகளை விட்டு திட்டத்தை தொடக்கி வைத்தார்.

மீன்வளத்துறை உதவி இயக்குனர் ஜனார்த்தனன், ஒன்றியக் குழு தலைவர் ஆர்.டி.அரசு உள்ளிட்டோர் பங்கேற்றனர்.

இவ்வகை மீன்கள் 7 மாதங்களில் வளர்ந்ததும் அதை பொது ஏலம் விட்டு பிடித்து விற்க்கும் போது கட்லா வகை கிலோ ரூ.220-க்கும், ரோகு வகை ரூ.190-க்கும், மிர்கால் 180-க்கும் விலை போகும் என கூறப்படுகிறது.

செங்கல்பட்டு:

சென்னை புளியந்தோப்பு காவலர் குடியிருப்பில் வசித்து வருபவர் ஜெயஸ்ரீ (வயது 38). இவர் ஆவடி காவல் ஆணையரகத்துக்குட்பட்ட மாதவரம் பால் பண்ணை அனைத்து மகளிர் போலீஸ் நிலையத்தில் சப்-இன்ஸ்பெக்டராக பணிபுரிந்து வந்தார். இந்த நிலையில் இவர் அதே போலீஸ் நிலையத்தில் முதல் நிலை காவலராக பணிபுரிந்து வந்த நித்யா (33) என்பரை அழைத்து கொண்டு நேற்று அதிகாலை மோட்டார் சைக்கிளில் மேல்மருவத்தூர் நோக்கி சென்று கொண்டிருந்தனர்.

அப்போது செங்கல்பட்டு மாவட்டம் மதுராந்தகம் அடுத்த சிறுநாகலூர் என்ற இடத்தில் சென்னை-திருச்சி நெடுஞ்சாலையில் சென்று கொண்டிருந்த போது, திருவண்ணாமலை நோக்கி அதிவேகமாக சென்ற கார் ஒன்று திடீரென இவர்கள் சென்ற மோட்டார் சைக்கிளின் பின்னால் எதிர்பாராத வகையில் மோதியது.

இதில் மோட்டார் சைக்கிளோடு சப்-இன்ஸ்பெக்டர் ஜெயஸ்ரீ, பெண் போலீஸ் நித்யா ஆகியோர் தூக்கி வீசப்பட்டனர். இந்த விபத்தில் பலத்த காயமடைந்த ஜெயஸ்ரீ சம்பவ இடத்திலேயே பரிதாபமாக உயிரிழந்தார்.

இந்த விபத்தில் கட்டுப்பாட்டை இழந்த காரும் கவிழ்ந்து சாலையில் உருண்டது. இதனைப்பார்த்து அதிர்ச்சியடைந்த அவ்வழியாக சென்றவர்கள் மேல்மருவத்தூர் போலீசாருக்கு தகவல் தெரிவித்தனர். போலீசார் விரைந்து வந்து காவலர் நித்யா, கார் டிரைவர் அன்பழகன் ஆகியோரை மீட்டு செங்கல்பட்டு அரசு ஆஸ்பத்திரியில் சேர்த்தனர். அங்கு சிகிச்சை பலனின்றி காவலர் நித்யா பரிதாபமாக உயிரிழந்தார்.

திருவண்ணாமலை மாவட்டம் கீழ்பெண்ணாத்தூர் அருகே உள்ள குள்ளக்குப்பம் கிராமத்தை சேர்ந்த அன்பழகன் அதிவேகமாக காரை ஓட்டி வந்ததே விபத்துக்கு காரணம் என்று தெரியவந்ததையடுத்து, அவரை கைது செய்து போலீசார் விசாரித்து வருகின்றனர்.

இந்த விபத்தால் அப்பகுதியில் சிறிது நேரம் போக்குவரத்து பாதிக்கப்பட்டது. விபத்தில் பலியான சப்-இன்ஸ்பெக்டர் ஜெயஸ்ரீயின் சொந்த ஊர் மதுரை மாவட்டம் கூடல்புதூர் ஆகும். இவரது கணவர் ஜான். வெளிநாட்டில் வேலை பார்த்து வருகிறார். இவர்களுக்கு 10-ம் வகுப்பு படிக்கும் விகாஷ் என்ற மகனும். 6-ம் வகுப்பு படித்து வரும் விக்க்ஷிதா என்ற மகளும் உள்ளனர்.

பலியான பெண் போலீஸ்காரர் நித்யாவின் சொந்த ஊர் திண்டுக்கல் மாவட்டம் கொசவபட்டி கிராமம் ஆகும். சப்-இன்ஸ்பெக்டர் ஜெயஸ்ரீயும், நித்யாவும் கல்லூரியில் ஒன்றாக படித்தவர்கள் என்று கூறப்படுகிறது. இதனால் இவர்கள் இருவரும் ஒரே இடத்தில் பணிபுரிந்து வந்ததால் நெருக்கமாக பழகி வந்துள்ளனர். இந்த நிலையில் விபத்தில் போலீஸ்காரர்கள் இருவரும் பலியான சம்பவம் போலீஸ் அதிகாரிகளிடையே அதிர்ச்சியையும், சோகத்தையும் ஏற்படுத்தியுள்ளது.

இந்த சம்பவம் தொடர்பாக மேல்மருவத்தூர் போலீசார் வழக்குப்பதிவு செய்து விசாரணை நடத்தி வருகின்றனர்.

சென்னை:

சென்னை மாநகர போக்குவரத்துக் கழகம் வெளியிட்டுள்ள சமூக வலைத்தளப் பதிவில் கூறியிருப்பதாவது:-

தீபாவளி பண்டிகையை சொந்த ஊரில் கொண்டாடிவிட்டு சென்னை திரும்பும் பயணிகளின் வசதிக்காக மாநகர போக்குவரத்துக் கழகம் 3-ந் தேதி (நேற்று) பிற்பகல் முதல் 4-ந் தேதி (இன்று) பயணிகளின் நெரிசல் குறையும் வரை கிளாம்பாக்கம் பஸ் நிலையத்தில் இருந்து வழக்கமாக இயக்கப்படும் 478 பஸ்களின் 3 ஆயிரத்து 529 பயண நடைகளுடன் கூடுதலாக 250 பஸ்களின் மூலம் ஆயிரத்து 113 பயண நடைகள் கிளாம்பாக்கம் பஸ் நிலையத்தில் இருந்து இயக்கப்படும்.

மேலும், தாம்பரம் ரெயில் நிலையம், தாம்பரம், பூந்தமல்லி, கோயம்பேடு, மாதவரம், எழும்பூர் ரெயில் நிலையம் மற்றும் சென்டிரல் ரெயில் நிலையம் ஆகிய இடங்களுக்கும் வழக்கமாக இயக்கப்படும் பஸ்களுடன் கூடுதலாக சிறப்பு பஸ்கள் இயக்கப்படும். மேலும், மேற்குறிப்பிட்ட பஸ் நிலையங்களில் அலுவலர்கள் நியமிக்கப்பட்டு பஸ் இயக்கங்களை கண்காணிக்க நடவடிக்கை எடுக்கப்பட்டுள்ளது.

இவ்வாறு அதில் கூறப்பட்டுள்ளது.

தீபாவளி பண்டிகையை கொண்டாட மக்கள் சொந்த ஊர்களுக்கு நேற்று முன்தினம் முதல் பயணத்தை தொடங்கினர். சென்னையில் இருந்து 2 நாட்களில் அரசு பஸ்களில் மட்டும் 3.5 லட்சம் பேர் பயணம் செய்துள்ளதாகவும் ஆம்னி பஸ்களில் 1 லட்சம் பேர் சென்றதாகவும் தெரிகிறது.

சென்னை கிளாம்பாக்கத்தில் இருந்து சிறப்பு பஸ்கள் பல்வேறு நகரங்களுக்கு இயக்கப்பட்டு வருகிறது. கோயம்பேடு, மாதவரம் பஸ் நிலையத்தில் இருந்து இயக்கப்படும் பஸ்களும் வண்டலூர் வழியாக சென்றது. இதேபோல 1,400 ஆம்னி பஸ்களும் சேர்ந்து இயக்கப்பட்டன. சென்னையில் இருந்து புறப்பட்டு சென்ற அரசு பஸ்கள், ஆம்னி பேருந்துகள் வண்டலூரில் நெரிசலில் சிக்கின.

இரவு 9 மணி முதல் 12 மணி வரை ஜி.எஸ்.டி. சாலையில் போக்குவரத்து நெரிசல் ஏற்பட்டது. பஸ்கள் அணிவகுத்து நின்றன.

கிளாம்பாக்கம் பஸ் நிலையத்திற்குள் பஸ்கள் செல்ல முடியாமல் போனதால் எல்லா பேருந்துகளும் சென்னை-திருச்சி சாலையில் நின்றன. நெரிசல் சீராக நள்ளிரவு 12 மணி ஆனது.

கிளாம்பாக்கம் பஸ் நிலையத்திற்குள் செல்ல ஒரே வழிதான் உள்ளது. பஸ்கள் வெளியே வர 4 வழிகள் உள்ளன. இதனால் தான் பிரச்சனை ஏற்பட்டது.

பஸ் முனையத்திற்குள் உள்ள பஸ்கள் வெளியே போக முடியாமல் நின்றதால் உள்ளே செல்வதில் சிரமம் ஏற்பட்டது.

இதனால் பயணிகள் சிரமத்திற்கு ஆளானார்கள். சென்னையில் இருந்து புறப்பட்ட பஸ்கள் எந்த இடத்திலும் நெரிசலில் சிக்கவில்லை. கிளாம்பாக்கத்தில்தான் பாதிப்பு ஏற்பட்டது. இதனால் வெளிவட்ட சாலையில் பஸ்கள் நீண்ட வரிசையில் நின்றன.

பஸ் பயணிகள் குறிப்பிட்ட நேரத்திற்கு குறிப்பிட்ட இடங்களுக்கு செல்ல வேண்டும். போக்குவரத்து நெரிசலை தவிர்க்க வேண்டும் என அரசு நடவடிக்கை எடுத்தாலும் கூட ஏதாவது ஒரு இடத்தில் எதிர்பாராமல் நடக்கும் தவறுகளால் மக்கள் பாதிக்கப்படுகிறார்கள்.

தீபாவளி பண்டிகையையொட்டி, சென்னையில் இருந்து தென் மாவட்டங்களுக்கும், பிற பகுதிகளுக்கும் சிறப்பு ரெயில் இயக்கப்பட்டு வருகிறது. அந்த வகையில் தீபாவளிக்கு சொந்த ஊர்களுக்குச் செல்லும் மக்கள் வசதிக்காக தாம்பரத்தில் இருந்து நாகர்கோவிலுக்கு நாளை சிறப்பு ரெயில் இயக்கப்படுகிறது.

இந்த சிறப்பு ரெயிலானது, நாளை மதியம் 3.45 மணிக்கு புறப்பட்டு விழுப்புரம், விருத்தாசலம், திருச்சி மதுரை, நெல்லை வழியாக காலை 4.40க்கு நாகர்கோவில் சென்றடைகிறது. அதே ரெயில் மறுமார்க்கத்தில் நாளை மறுநாள் காலை 8.45க்கு புறப்பட்டு இரவு 9.55க்கு தாம்பரம் வந்தடைகிறது.

அதேபோல, தாம்பரத்தில் இருந்து மானாமதுரைக்கும் சிறப்பு ரெயில் இயக்கப்படுகிறது. மாலை 5 மணிக்கு புறப்படும் சிறப்பு ரெயில், விழுப்புரம், கடலூர், சிதம்பரம், திருவாரூர், காரைக்குடி, சிவகங்கை வழியாக காலை 3.45க்கு மானாமதுரை சென்றடைகிறது. அதே ரெயில் மறுமார்க்கத்தில் நாளை மறுநாள் காலை 11.45க்கு புறப்பட்டு இரவு 11.10க்கு தாம்பரம் வந்தடைகிறது.

தீபாவளி பண்டிகையை முன்னிட்டு பயணிகளின் வசதிக்காகவும், கூட்ட நெரிசலை தவிர்க்கவும் சென்னை சென்ட்ரல்-கன்னியாகுமரி, சென்ட்ரல்-செங்கோட்டை, சென்ட்ரல்-மங்களூரு, தாம்பரம்-கன்னியாகுமரி, கொச்சுவேலி-பெங்களூரு இடையே சிறப்பு ரெயில்கள் இயக்கப்படுவதாக தெற்கு ரெயில்வே ஏற்கனவே தெரிவித்து உள்ளது.

இந்த நிலையில், தீபாவளி பண்டிகையையொட்டி தாம்பரம்- நெல்லை இடையே நவம்பர் 3 மற்றும் 4 ஆகிய தேதிகளில் சிறப்பு ரெயில் இயக்கப்படுவதாக தெற்கு ரெயில்வே தெரிவித்துள்ளது.

அதன்படி, நெல்லை- தாம்பரம் இடையே நவம்பர் 3-ந்தேதியும், தாம்பரம்- நெல்லை இடையே நவம்பர் 4-ந்தேதியும் சிறப்பு ரெயில் இயக்கப்படுகிறது. 

அக்டோபர் 20 ஆம் தேதி மாமல்லபுரம் ஐந்துரதம் புராதன சின்னம் அருகில் நோ பார்க்கிங் வழியாக கார் ஒன்று செல்ல முயன்றது.அப்போது அங்கு பணியில் இருந்த காவலாளி ஏழுமலை (வயது 45) என்பவர் காரை ஐந்துரத வாகன நிறுத்துமிடத்தில் நிறுத்துமாறு கூறினார். அதை மீறி காரில் வந்தவர்கள் காரை நோ பார்க்கிங்கில் நிறுத்த முயன்றதாக தெரிகிறது. இதனால் ஆத்திரத்தில் ஏழுமலை அவர்களை திட்டியதாக கூறப்படுகிறது.

உடனே காரில் இருந்து இறங்கிய 2 பெண்கள் உள்ளிட்ட 4 பேர் "ஏய் யாரை பார்த்து திட்டுகிறாய்" என ஆவேசமடைந்து, நடுரோட்டிலேயே ஏழுமலையை சரமாரியாக அடித்து உதைத்தனர். அவர்களுடன் வந்த ஆண்களும் சேர்ந்து அவரை கடுமையாக தாக்கினர். இந்த கைகலப்பு சம்பவத்தால் அந்த பகுதியே பரபரப்பானது.

பின்னர் அவ்வழியாக சென்றவர்கள் 4 பேரையும் சமாதானம் செய்து காவலாளி ஏழுமலையை அவர்களின் பிடியிலிருந்து காப்பாற்றினர். பின்னர் 2 பெண்கள் உள்ளிட்ட 4 சுற்றுலா பயணிகளும் காரில் சென்றுவிட்டனர். இந்த தாக்குதலில் முகத்தில் காயமடைந்த ஏழுமலை ஆஸ்பத்திரிக்கு சென்று சிகிச்சை பெற்று வீடு திரும்பினார்.

இச்சம்பவத்தை அந்த வழியாக சென்ற சுற்றுலா பயணி ஒருவர் வீடியோ எடுத்து சமூக வலைத்தளங்களில் வெளியிட்டார். அந்த வீடியோ வைரலாகி வருகிறது.

காவலாளி ஏழுமலைக்கு அங்குள்ள வியாபாரிகள் நாள் ஒன்றுக்கு ரூ.500 ஊதியம் என்ற தினக்கூலி அடிப்படையில் மாதம் ரூ.15 ஆயிரம் சம்பளம் வழங்கி வருகின்றனர். இந்நிலையில் அவரை தாக்கியவர்கள் மீது போலீசார் நடவடிக்கை எடுக்க வேண்டும் என்று ஐந்துரதம் வணிக வளாக வியாபாரிகள் மற்றும் பொதுமக்களிடம் இருந்து கோரிக்கை எழுந்தது.

இதனையடுத்து காவலாளியை தாக்கியது தொடர்பாக முடிச்சூரை சேர்ந்த பிரபு இன்பதாஸ் (41), சண்முகப்பிரியா (38), கீர்த்தனா (29) உள்ளிட்டோர் மீது 4 பிரிவுகளின் கீழ் வழக்குப் பதிவு செய்து போலீசார் கைது செய்தனர்.

இந்நிலையில், இன்று திருப்போரூர் குற்றவியல் நீதிமன்றத்தில் ஆஜர்படுத்தப்பட்ட 3 பேருக்கும் 15 நாட்கள் நீதிமன்ற காவல் விதிக்கப்பட்டது. இதனையடுத்து மூவரும் சிறையில் அடைக்கப்பட்டனர்

மாமல்லபுரம்:

செங்கல்பட்டு மாவட்டம், மாமல்லபுரத்திற்கு நேற்று முன்தினம் ஞாயிற்றுக்கிழமை விடுமுறை தினம் என்பதால் ஏராளமான சுற்றுலா பயணிகள் வந்து சென்றனர். இந்நிலையில் மாமல்லபுரம் ஐந்துரதம் புராதன சின்னம் அருகில் நோ பார்க்கிங் வழியாக கார் ஒன்று செல்ல முயன்றது. அப்போது அங்கு பணியில் இருந்த காவலாளி ஏழுமலை (வயது 45) என்பவர் காரை ஐந்துரத வாகன நிறுத்துமிடத்தில் நிறுத்துமாறு கூறினார். அதை மீறி காரில் வந்தவர்கள் காரை நோ பார்க்கிங்கில் நிறுத்த முயன்றதாக தெரிகிறது. இதனால் ஆத்திரத்தில் ஏழுமலை அவர்களை திட்டியதாக கூறப்படுகிறது.

உடனே காரில் இருந்து இறங்கிய டிப்டாப் உடை அணிந்திருந்த 2 பெண்கள் உள்ளிட்ட 4 பேர் "ஏய் யாரை பார்த்து திட்டுகிறாய்" என ஆவேசமடைந்து, நடுரோட்டிலேயே ஏழுமலையை சரமாரியாக அடித்து உதைத்தனர். அவர்களுடன் வந்த ஆண்களும் சேர்ந்து அவரை கடுமையாக தாக்கினர். பதிலுக்கு ஏழுமலை தாக்க முயற்சிக்கவே, 4 பேரும் அவரை கீழே தள்ளி அவரை நைய புடைத்தனர். அதில் ஒரு பெண் காவலாளி ஏழுமலை வைத்திருந்த 2 அடி நீள பிளாஸ்டிக் குழாயை பிடுங்கி, அந்த குழாய் 2 துண்டாக உடையும் வரை அவரை தாக்கி சட்டை கிழித்தார்.

இந்த கைகலப்பு சம்பவத்தால் அந்த பகுதியே பரபரப்பானது. பிறகு அவ்வழியாக சென்றவர்கள் 4 பேரையும் சமாதானம் செய்து காவலாளி ஏழுமலையை அவர்களின் பிடியில் இருந்து காப்பாற்றி வெளியேற்றினர். பின்னர் 2 பெண்கள் உள்ளிட்ட 4 சுற்றுலா பயணிகளும் காரில் சென்றுவிட்டனர். இந்த தாக்குதலில் முகத்தில் காயமடைந்த ஏழுமலை ஆஸ்பத்திரிக்கு சென்று சிகிச்சை பெற்று வீடு திரும்பினார்.

இச்சம்பவத்தை அந்த வழியாக சென்ற சுற்றுலா பயணி ஒருவர் வீடியோ எடுத்து சமூக வலைதளங்களில் வெளியிட்டார். அந்த வீடியோ வைரலாகி வருகிறது. காவலாளி ஏழுமலைக்கு அங்குள்ள வியாபாரிகள் நாள் ஒன்றுக்கு ரூ.500 ஊதியம் என்ற தினக்கூலி அடிப்படையில் மாதம் ரூ.15 ஆயிரம் சம்பளம் வழங்கி வருகின்றனர். இந்நிலையில் அவரை தாக்கியவர்கள் மீது போலீசார் நடவடிக்கை எடுக்க வேண்டும் என்று ஐந்துரதம் வணிக வளாக வியாபாரிகள் மற்றும் பொதுமக்களிடம் இருந்து கோரிக்கை எழுந்தது.

இந்த நிலையில், காவலாளியை தாக்கியது தொடர்பாக முடிச்சூரை சேர்ந்த பிரபு இன்பதாஸ், சண்முகப்பிரியா, கீர்த்தனா உள்ளிட்டோர் மீது 4 பிரிவுகளின் கீழ் வழக்கு பதிவு செய்து போலீசார் கைது செய்துள்ளனர்.