நீங்கள் தேடியது "slug 201641"

சென்னை:

ம.தி.மு.க. வெளியிட்டுள்ள அறிக்கையில் கூறப்பட்டுள்ளதாவது:-

ம.தி.மு.க. 5-வது அமைப்புத் தேர்தலை முன்னிட்டு, 61 மாவட்டங்களில் 25 லட்சதது 8 ஆயிரத்து 786 உறுப்பினர்கள் புதிதாக சேர்க்கப்பட்டார்கள். கிளை, வட்டம், பேரூர், நகரம், ஒன்றிய, பகுதி, மாவட்ட, மாநகர் மாவட்ட ஆகிய அமைப்புகளின் நிர்வாகிகள் தேர்தல் முறைப்படி நடத்தி முடிக்கப்பட்டு விட்டன. நிறைவாக தலைமை நிர்வாகிகள், ஆட்சிமன்றக் குழு, தணிக்கைக் குழு உறுப்பினர்கள் ஆகிய பொறுப்புகளுக்கு வேட்பு மனுக்கள் வழங்கியவர்கள் போட்டியின்றி தேர்வு செய்யப்பட்டார்கள். 14-ந்தேதி அண்ணா நகர், விஜய்ஸ்ரீ மகாலில் ம.தி.மு.க. 29-வது பொதுக்குழுவில் இந்த நிர்வாகிகள் தேர்தலுக்கு ஒப்புதல் அளிக்கப்படும்.

இவ்வாறு அதில் கூறப்பட்டுள்ளது.

சென்னை:

ம.தி.மு.க. 5-வது உள்கட்சி தேர்தல் சென்னை எழும்பூரில் உள்ள அக்கட்சியின் தலைமை அலுவலகமான தாயகத்தில் நடைபெற்று வருகிறது. இதில் வைகோ மீண்டும் பொதுச்செயலாளர் பதவிக்கு வேட்புமனுத்தாக்கல் செய்தார். அவரது மகனும், கட்சியின் தலைமை நிலைய செயலாளருமான துரை வைகோ முதன்மை செயலாளர் பதவிக்கு வேட்புமனு அளித்தார்.

இந்த பதவிகளுக்கு 2 பேரை தவிர வேறு யாரும் வேட்புமனுத்தாக்கல் செய்யவில்லை. எனவே 5-வது முறையாக ம.தி.மு.க. பொதுச்செயலாளராக வைகோ தேர்வாகிறார். துரை வைகோ முதன்மை செயலாளர் ஆகிறார்.

ம.தி.மு.க. பொதுக்குழு கூட்டம் சென்னையில் அடுத்த மாதம் (ஜூலை) 14-ந்தேதி நடைபெறுகிறது. இந்த கூட்டத்தில் வைகோ, துரை வைகோ முறைப்படி கட்சி பதவியை ஏற்பார்கள். ம.தி.மு.க. பொதுச்செயலாளராக மீண்டும் பதவி ஏற்க உள்ள வைகோவுக்கும், முதன்மை செயலாளராக பதவி ஏற்க உள்ள துரை வைகோவுக்கும் நிர்வாகிகள் மாலை அணிவித்து வாழ்த்து கூறினார்கள்.

சென்னை:

ம.தி.மு.க. வின் உட்கட்சி தேர்தல் வருகிற 14-ந்தேதி நடைபெறுகிறது. இதில் கட்சியின் தலைவர், பொதுச் செயலாளர், பொருளாளர் ஆகிய பதவிகளுக்கு தேர்தல் நடைபெறுகிறது.

பொதுச்செயலாளர் பதவிக்கு வைகோ இன்று மனுதாக்கல் செய்தார். அவைத்தலைவர் பதவிக்கு அர்ஜூன் ராஜ், பொருளாளர் பதவிக்கு செந்தில் லதிபன், முதன்மை செயலாளர் பதவிக்கு துரை வைகோ, துணை பொதுச் செயலாளர் பதவிக்கு மல்லை சத்யா உள்பட பல்வேறு பதவிகளுக்கு இன்று மனுதாக்கல் செய் தனர்.

எந்த புயல் வீசினாலும் ம.தி.மு.க.வை மன உறுதியுடன் நடத்தி வருகிறோம். என்னுடைய மகன் துரை வைகோ வாக்கெடுப்பு மூலமாகவே தேர்ந்தெடுக்கப்பட்டார். ம.தி.மு.க.வில் வாரிசு அரசியல் என்ற பேச்சுக்கே இடமில்லை.

இதில் எந்த ஒரு மாற்றமும் இருக்காது. ஒளிமயமான எதிர்காலத்தை நோக்கி ம.தி.மு.க. பயணிக்கும்

இவ்வாறு வைகோ பேசினார்.

வேட்பு மனு தாக்கல் இன்று முடிவடைந்த நிலையில் ம.தி.மு.க. பொதுச்செயலாளர் பதவிக்கு வைகோ மட்டுமே மனுதாக்கல் செய்துள்ளார். அவரை எதிர்த்து வேறு யாரும் மனுதாக்கல் செய்யவில்லை. எனவே ம.தி.மு.க. பொதுச்செயலாளராக வைகோ மீண்டும் போட்டியின்றி தேர்வு செய்யப்படுகிறார். இதற்கான அறிவிப்பு வருகிற 3-ந்தேதி வெளியாகிறது. 

திருப்பூர்:

ம.தி.மு.க.வில் இருந்து விலகுவதாக அறிவித்த அவைத்தலைவர் துரைச்சாமி திருப்பூரில் இன்று நிருபர்களிடம் கூறியதாவது:-

ம.தி.மு.க. இனி தனியாக வளர்வதற்கு வாய்ப்பில்லை. ஏற்கனவே நாடாளுமன்றம் மற்றும் சட்டமன்ற தேர்தலில் கருணாநிதியின் முன்னணி தோழர்களை ம.தி.மு.க.வில் இருந்து ராஜினாமா செய்யக்கூறியதுடன், அவர்கள் தி.மு.க.வில் உறுப்பினர்களாக சேர்க்கப்பட்டுதான் உதயசூரியன் சின்னம் கொடுக்கப்பட்டது. அப்படி என்றால் ஏற்கனவே நாம் தி.மு.க.வில் இணைந்துவிட்டோம். இனி தனிக்கட்சி வைத்து நடத்தக்கூடிய சூழ்நிலை இல்லை.

வைகோவின் பேச்சாற்றல் 4 ஆண்டுகளுக்கு முன்பாக இருந்ததே தவிர தற்போது எதுவும் இல்லை. இனியும் ஒரு அமைப்பை வைத்து நடத்த முடியாது. தற்போது நான் அரசியல் வாழ்க்கையில் இருந்து ஒதுங்குகிறேனே தவிர பொது வாழ்க்கையில் இருந்து ஒதுங்கவில்லை. இவ்வாறு அவர் கூறினார்.

திருப்பூர்:

சமீபத்தில் ம.தி.மு.க., பொதுச்செயலாளர் வைகோவுக்கு, அக்கட்சியின் அவைத்தலைவர் துரைசாமி எழுதிய கடிதத்தில், 'உங்களின் அண்மைக் கால நடவடிக்கைகளால், மக்கள் மத்தியில் அவப்பெயர் ஏற்பட்டுள்ளது. கட்சியின் நலன் கருதி ம.தி.மு.க.,வை தி.மு.க.,வுடன் இணைத்து விடுங்கள் என கூறியிருந்தார்.

அவரது கடிதத்திற்கு பதிலளித்த வைகோ, 'தி.மு.க.,வில் இணைக்கும் பேச்சுக்கே இடமில்லை. துரைசாமி மீது கட்சி விரோத நடவடிக்கை எடுப்பது குறித்து பொதுக்குழுவில் முடிவு செய்யப்படும் என்றார்.

இந்தநிலையில் திருப்பூர் துரைசாமி ம.தி.மு.க.வில் இருந்து விலகுவதாக இன்று அறிவித்தார். இது குறித்து அவர் கட்சியின் பொதுச்செயலாளர் வைகோவுக்கு அனுப்பியுள்ள கடிதத்தில் கூறியிருப்பதாவது:-

ம.தி.மு.க. துவங்கப்பட்ட காலத்தில் இருந்து உங்கள் குடும்பத்தை சார்ந்த யாரும் கட்சி பதவிக்கு வர மாட்டார்கள் என்று தொடர்ந்து பேசி வந்தீர்கள். அதை தலைமைக்கழக நிர்வாகிகளும், கட்சித் தொண்டர்களும் முழுவதுமாக நம்பினார்கள். பிற்காலத்தில் உங்களின் தவறான அரசியல் நிலைப்பாடு காரணமாக தலைவர்களும், தோழர்களும் கழகத்தை விட்டு படிப்படியாக வெளியேறி தி.மு.க.வில் இணைந்து விட்டனர்.

ம.தி.மு.க. துவங்கப்பட்ட காலத்திலிருந்து சட்ட மன்றம், பாராளுமன்றம், உள்ளாட்சி மன்ற தேர்தல்களின் போது தேர்தல் நிதி மற்றும் கட்சி வளர்ச்சி என தனித்தனியாக நிதி திரட்டியுள்ளோம். ஆனால் நீங்கள் ஒருமுறை உயர்நிலைக்குழு கூட்டத்திலோ, மாவட்ட செயலாளர்கள் கூட்டத்திலோ, பொதுக்குழு கூட்டத்திலோ வரவு, செலவு கணக்கை தாக்கல் செய்து ஒப்புதல் பெற்றதில்லை.

பரந்த ஜனநாயகம் பேசிய நீங்கள், கட்சிக்கென்று பொருளாளர் இருந்தும், அவர் கையொப்பமின்றி நீங்களாகவே 17 ஆண்டுகளுக்கு மேலாக காசோலைகளில் தன்னிச்சையாக கையொப்பமிட்டு வங்கியில் பணம் எடுத்து வருகிறீர்கள். எந்த ஒரு அரசியல் கட்சியிலும் இது போன்ற தவறு நடக்கவில்லை.

பொது வாழ்வில் தூய்மை, லட்சியத்தில் உறுதி என்று நீங்கள் முழங்கிவிட்டு அவற்றை மனசாட்சியின்றி காற்றில் பறக்கவிட்டு இப்படி சுயநலமாக நீங்கள் இருப்பீர்கள் என்று கழக தோழர்கள் யாரும் நினைக்கவில்லை.

பேரறிஞர் அண்ணாவின் கடமை, கண்ணியம், கட்டுப்பாடு என வாழ்ந்து அரசியல் செய்துவந்த என்னால் இனியும் உங்களுடன் பயணிக்க முடியாது. உங்கள் மீது நம்பிக்கை வைத்து அன்று உயிர் நீத்த உண்மை தொண்டர்களுக்காக கட்சியை உங்கள் காலத்திலேயே தி.மு.க.வுடன் இணைத்துவிடுவது நல்லது. கடந்த 30 ஆண்டுகளாக ஏமாற்றியதை போல், இனியும் ஏமாற்ற வேண்டாம் என உங்களிடம் மீண்டும் ஒருமுறை கேட்டுக்கொண்டு இன்று முதல் ம.தி.மு.க.வின் வாழ்நாள் உறுப்பினர் பொறுப்பு உள்ளிட்ட எல்லா பொறுப்புகளிலும் இருந்து என்னை விடுவித்து கொள்கிறேன்.

இவ்வாறு அந்த கடிதத்தில் அவர் கூறியுள்ளார்.

சென்னை:

ம.தி.மு.க. பொதுச்செயலாளர் வைகோ வெளியிட்டுள்ள அறிக்கையில் கூறியிருப்பதாவது

செங்கல்பட்டு மாவட்டம், திருக்கழுக்குன்றம் வட்டம் மாமல்லபுரம் சிறப்பு நிலை பேரூராட்சி வார்டு எண் 9 மற்றும் 14 ஆகியவற்றை உள்ளடக்கிய அண்ணாநகர் புல எண் 160/2 கிராம நத்தத்தில் நீண்ட நாட்களாக குடியிருந்து வரும் மக்களுக்கு பட்டா வழங்கவேண்டும் என்று வலியுறுத்தி வருகிறோம்.

இதுதொடர்பாக முதலமைச்சர் மு.க.ஸ்டாலினிடம் மனுவும் அளிக்கப்பட்டது. அதன் தொடர்ச்சியாக, தக்க நடவடிக்கை எடுக்கக்கோரி வருவாய் மற்றும் பேரிடர் மேலாண்மை துறை மூலமாக செங்கல்பட்டு மாவட்ட கலெக்டரிடம் கேட்டுக் கொள்ளப்பட்டுள்ளது. ஆனால் இதுவரை எந்த நடவடிக்கையும் எடுக்காமல் இருப்பது வருத்தத்திற்குரியது.

சுதந்திரம் அடைந்து இத்தனை ஆண்டுகள் ஆகியும் கிராம நத்தத்தில் நீண்ட நாட்களாக குடியிருந்து வரும் மக்கள் பட்டா வேண்டி போராட வேண்டிய நிலையில்தான் நாடு இருக்கிறது. மக்களுக்காக திராவிட மாடல் ஆட்சி நடத்தும் முதலமைச்சர் மு.க.ஸ்டாலின் தலைமையிலான அரசு, மாமல்லபுரம் மக்களின் நீண்ட நாள் கோரிக்கையை 30-ந்தேதி (இன்று) தொடங்கி ஜூன் 9-ந்தேதி வரை செங்கல்பட்டில் நடக்கும் வருவாய் தீர்வாயத்தில் (ஜமாபந்தி) நிவர்த்தி செய்து பட்டா வழங்கவேண்டும்.

இதில் மத்திய தொல்லியல் துறை ஆட்சேபனை இருந்தால், முத்தரப்பு களஆய்வு செய்து, மக்களின் கருத்தை அறிந்து, தேவைப்பட்டால் நிபந்தனைகளுடன் பட்டா வழங்கி உதவிடவேண்டும்.

இவ்வாறு அவர் கூறியுள்ளார்.

சென்னை:

ம.தி.மு.க. பொதுச்செயலாளர் வைகோ வெளியிட்டுள்ள அறிக்கையில் கூறி இருப்பதாவது:-

கிருஷ்ணா, கோதாவரி மற்றும் காவிரி படுகை எண்ணெய்-இயற்கை எரிவாயு நிறுவனங்களின் தலைமை அலுவலகம், மையப்பகுதியான சென்னை எழும்பூர் தாலமுத்து-நடராஜன் மாளிகையில் இயங்கி வருகிறது. இந்த அலுவலகத்தின் ஒரு பகுதியான கிருஷ்ணா, கோதாவரி படுகை பிரிவு அலுவலகம் கடந்த 2005-ம் ஆண்டு ஆந்திர மாநிலம் ராஜமுந்திரிக்கு மாற்றும் முயற்சியினை மேற்கொண்டபோது, அப்போதைய பெட்ரோலியத்துறை அமைச்சர் மணிசங்கர் ஐயர் மூலமாக அதை தடுத்து நிறுத்தினேன்.

இந்நிலையில் தற்போது எந்த முகாந்திரமும் இல்லாமல் மீண்டும் கிருஷ்ணா, கோதாவரி படுகைப் பிரிவு அலுவலகத்தை எந்தவிதமான வலுவான காரணமும் இன்றி ஆந்திர மாநிலம் ராஜமுந்திரிக்கு மாற்ற முயற்சிப்பதாக தெரிய வருகிறது. அதனை உடனடியாகக் கைவிட வேண்டும். அனைத்து விதமான அடிப்படை வசதிகளும் கொண்ட இந்த அலுவலகத்தின் கிருஷ்ணா, கோதாவரி படுகை பிரிவில் தமிழக இளைஞர்கள் பலர் அதிகாரிகளாக பணியாற்றுகிறார்கள். இந்த அலுவலகம் மாற்றப்பட்டால், எண்ணற்ற இளைஞர்களின் வேலைவாய்ப்பு கேள்விக்குறியாகும். தற்போதைய கணினி யுகத்தில் இந்த மாற்றம் தேவையற்றது. எனவே, ராஜமுந்திரிக்கு மாற்றும் இந்த முடிவை உடனடியாகக் கைவிட வேண்டும் என்று ஒன்றிய அரசை கேட்டுக் கொள்கின்றேன்.

இவ்வாறு அவர் கூறியுள்ளார்.

கொடுமுடி:

ஈரோடு மாவட்டம் அரச்சலூர் பேரூராட்சியில் மொத்தம் 15 வார்டுகள் உள்ளன. இதில் 11 வார்டுகளில் தி.மு.க. கவுன்சிலர்களும், ஒரு வார்டில் அ.தி.மு.க. கவுன்சிலரும், 2 சுயேச்சைகளும், ஒரு வார்டில் ம.தி.மு.க. கவுன்சிலரும் உள்ளனர்.

இந்த பேரூராட்சியின் தலைவராக தி.மு.க.வை சேர்ந்த விஜயகுமார் என்பவர் உள்ளார். துணைத்தலைவராக ம.தி.மு.க.வை சேர்ந்த துளசிமணி என்பவர் உள்ளார்.

இவர் பேரூராட்சி நிர்வாகத்தில் நடைபெறும் எந்த ஒரு கணக்கு வழக்குகளையும் தன்னிடம் காட்டவில்லை என்றும், குறிப்பாக மினிட் நோட், பில் புக், தினசரி வருகை பதிவு போன்றவை பார்க்க அனுமதிக்கவில்லை என்று கூறி வந்தார்.

இதை கண்டித்து துணைத்தலைவர் துளசிமணி நேற்று காலை 11 மணி அளவில் பேரூராட்சி அலுவலகத்தில் உள்ளிருப்பு போராட்டத்தில் ஈடுபட்டார். இதுபற்றி தெரிய வந்ததும் பேரூராட்சி செயல் அலுவலர் மாதவன், துணைத்தலைவரிடம் பேச்சுவார்த்தை நடத்தினார்.

ஆனாலும் இதில் சமரசம் அடையாத துளசிமணி தொடர்ந்து உள்ளிருப்பு பேராட்டத்தில் ஈடுபட்டார். இதனால் பேரூராட்சி அலுவலகத்தில் பரபரப்பு ஏற்பட்டது. பின்னர் இதுகுறித்து தெரிய வந்ததும் அரச்சலூர் இன்ஸ்பெக்டர் ஜெயமுருகன் விரைந்து வந்து பேச்சுவார்த்தை நடத்தினார்.

தொடர்ந்து பெருந்துறை டி.எஸ்.பி. ஜெயபாலன் பேச்சுவார்த்தை நடத்தினார். இதையடுத்து இரவு 8 மணி அளவில் துணைத்தலைவர் துளசிமணி உள்ளிருப்பு போராட்டத்தை முடித்தார்.

பெண் துணைத்தலைவர் 9 மணி நேரம் உள்ளிருப்பு போராட்டம் நடத்தியதால் பேரூராட்சி அலுவலகத்தில் பரபரப்பு நிலவியது.

மாமல்லபுரம்:

சி.பா.ஆதித்தனார் அவர்களின் 43வது நினைவேந்தல் நிகழ்ச்சி மாமல்லபுரம் கோவளம் சாலையில் ம.தி.மு.க துணைப் பொதுச் செயலாளர் மல்லை சத்யா தலைமையில் நடைபெற்றது.

இதில் ம.தி.மு.க கட்சி நிர்வாகிகள் மற்றும் உள்ளூர் வியாபாரிகள், மீனவர்கள், முக்கிய பிரமுகர்கள் என பலர் பங்கேற்றனர். அனைவரும் சி.பா.ஆதித்தனார் படத்திற்கு மலர் அஞ்சலி செலுத்தி வணங்கினார்கள்.

சென்னை:

ம.தி.மு.க. பொதுச் செயலாளர் வைகோ வெளியிட்டுள்ள அறிக்கையில் கூறி இருப்பதாவது:-

ம.தி.மு.க. நிர்வாகிகள் தேர்தல் அடுத்த (ஜூன்) மாதம் 14-ந்தேதி சென்னை அணணா நகர், 3-வது அவென்யூ, புதிய ஆவடி சாலை சந்திப்பில் உள்ள விஜய்ஸ்ரீ மகாலில் கழக பொதுக்குழு கூட்டத்தில் நடைபெறும். இதனை முன்னிட்டு வருகிற ஜூன் 1-ந்தேதி வேட்புமனு பெறும் நிகழ்ச்சி சென்னை தலைமை நிலையம் தாயகத்தில் நடைபெற இருக்கிறது.

வருகிற 27-ந்தேதி (சனிக்கிழமை) காலை 11 மணி முதல் மாலை 4 மணி வரை அமைப்பு செயலாளர் இரா.பிரியகுமார் (98402 17200) மற்றும் கொள்கை விளக்க அணிச் செயலாளர் ஆ.வந்தியத்தேவன் (94430 49151) ஆகியோரிடம் உரிய கட்டணத்தை செலுத்தி வேட்பு மனுக்களை பெற்றுக் கொள்ளலாம்.

இவ்வாறு அவர் கூறியுள்ளார்.

மறுமலர்ச்சி திராவிட முன்னேற்ற கழகம் கட்சியை தொடங்கிய போது அதன் பிரதான கொள்கையாக தமிழ் ஈழம் பிரச்சினை இருப்பது போன்ற தோற்றம் ஏற்பட்டது. அதற்கு முக்கிய காரணம் ம.தி.மு.க. பொதுச்செயலாளர் வைகோ சென்ற இடங்களில் எல்லாம் தமிழ் ஈழம் மலர்ந்தே தீரும் என்று பேசியதுதான்.

தமிழக அரசியலை பொறுத்தவரை வைகோவை பலருக்கும் பிடிக்கும். அரசியல் கடந்த அவரது செயல்பாடுகளை பெரும்பாலானவர்கள் ரசித்தனர். ஆனால் வைகோ ஈழத்தமிழர்கள் மீது அளவு கடந்த பாசம் காட்டியதை பெரும்பாலானவர்கள் ஏற்கவில்லை. இலங்கை விஷயத்தில் வைகோ தனது நிலைப்பாட்டை சற்று மாற்றிக்கொண்டால் ம.தி.மு.க. வளர்ச்சிக்கு நன்றாக இருக்கும் என்று பொதுப்படையாக பேசப்பட்டது. இதை வைகோவிடமும் சிலர் நேரிலேயே தெரிவித்தனர். என்றாலும் வைகோ தனது நிலைப்பாட்டை மாற்றிக்கொள்ளவில்லை.

ஈழத்தமிழர் விஷயத்தில் வைகோவிடம் சிறு கடுகளவு கூட இதுவரை மாற்றம் ஏற்படவில்லை. தொடர்ந்து அவர் அதற்காக குரல் கொடுத்துக்கொண்டே இருக்கிறார்.

நாளை (ஞாயிற்றுக்கிழமை) சென்னை பெசன்ட்நகர் கடற்கரையில் நடக்கும் ஈழத்தமிழர் நினைவேந்தல் கூட்டத்தில் கலந்து கொள்வேன் என்று தமிழக அரசியல் தலைவர்களில் முதல் ஆளாக குரல் கொடுத்தார். இதன்மூலம் எடுத்த கொள்கையில் இருந்து மாறாதவர் என்ற மிகப்பெரிய சிறப்பை வைகோ பெற்றிருக்கிறார். ஆனால் ம.தி.மு.க. வளர்ச்சிக்கு இது எந்த அளவுக்கு கைகொடுக்கும் என்பதுதான் இன்று வரை அவரது கட்சி தொண்டர்களின் நியாயமான, நிதர்சனமான எதிர்பார்ப்பாக உள்ளது.

சென்னை:

உலக செவிலியர் தினத்தையொட்டி ம.தி.மு.க. பொதுச்செயலாளர் வைகோ வெளியிட்டுள்ள வாழ்த்து செய்தியில் கூறியிருப்பதாவது:-

சாதி மதங்களுக்கு அப்பாற்பட்டு, தாய்க்கு நிகரான அன்பும் பரிவும் கொண்டு, பொறுமையுடன் ஆற்றும் அரும்பணிதான் செவிலியர் பணி ஆகும்.

நோயாளிகளைக் காப்பாற்ற மருந்து இருந்தால் மட்டும் போதாது. நோயின் தன்மை அறிந்து, நோயாளிகளைத் தேற்றும் தாய் உள்ளம் வேண்டும். எனவே செவிலியர்கள் தாய்க்கு நிகரானவர்கள். தற்போது ஆண் செவிலியர்களும் இப்பணியில் இருக்கிறார்கள்.

தமிழ்நாட்டின் மக்கள் தொகை அடிப்படையில், அனைத்துத் தரப்பினருக்கும் சிறந்த முறையில் மருத்துவம் கிடைத்திட, உலக சுகாதார நிறுவனம் மற்றும் இந்திய நர்சிங் கவுன்சில் வழிகாட்டுதல்களின் அடிப்படையில், தேவையான செவிலியர் பணி இடங்களை நிரப்பிட தமிழக அரசு முன்வர வேண்டும்.

புனிதமான சேவையில் ஈடுபட்டுள்ள செவிலியர்களுக்கு ம.தி.மு.க. சார்பில் செவிலியர் நாள் நல்வாழ்த்துகளைத் தெரிவித்துக் கொள்வதில் பெருமகிழ்ச்சி அடைகிறேன்.

இவ்வாறு அவர் கூறியுள்ளார்.