அடுத்த 48 மணி நேரத்திற்குள் தென்மேற்கு பருவமழை தொடக்கம்: சென்னையில் மழைக்கு வாய்ப்பு

சென்னை:

தென்மேற்கு பருவ மழை வழக்கமாக ஜூன் 1-ந்தேதி தொடங்கும். இந்த ஆண்டு 5 நாட்கள் தாமதமாக தொடங்குகிறது.

அடுத்த 48 மணி நேரத்திற்குள் கேரளாவில் தென்மேற்கு பருவமழை தொடங்குகிறது.

இதுகுறித்து சென்னை வானிலை ஆய்வு மைய அதிகாரிகள் கூறியதாவது:-

தென்மேற்கு பருவ மழை அடுத்த 48 மணி நேரத்திற்குள் தொடங்கும் என்று எதிர்பார்க்கப்படுகிறது. இதன் காரணமாக தமிழகம் மற்றும் புதுச்சேரியில் ஒருசில இடங்களில் மழை பெய்யக்கூடும்.

சென்னையில் வானம் மேக மூட்டத்துடன் காணப்படும். மாலை அல்லது இரவு நேரங்களில் மழையோ அல்லது இடியுடன் கூடிய மழையோ பெய்ய வாய்ப்பு உள்ளது.

தென்மேற்கு பருவ மழை கேரளா, ஆந்திரா, மகாராஷ்டிரா மாநிலங்களில் தொடர்ந்து பெய்யும். கடந்த 24 மணி நேரத்தில் தஞ்சாவூரில் 8 செ.மீ. மழை அதிகபட்சமாக பெய்துள்ளது. வேதாரண்யம், செட்டிகுளம் ஆகிய இடங்களில் 4 செ.மீ. மழை பதிவாகி உள்ளது என்று தெரிவித்தனர்.

தென்மேற்கு பருவமழை தொடங்க இருப்பதால் தமிழகத்தில் வெயிலின் தாக்கம் படிப்படியாக குறையும். மேற்கு தொடர்ச்சி மலைப்பகுதிகளில் மழை பரவலாக பெய்யும்.

சென்னையில் இன்னும் வெயிலின் தாக்கம் குறையவில்லை. தென்மேற்கு பருவமழை வெப்பத்தை தணிக்கும் என்று எதிர்பார்க்கப்படுகிறது.