கோவை ரெயில் நிலையத்தில் மயங்கி விழுந்து  பயணி பலி

கோவை:

கர்நாடக மாநிலம் பெங்களூரை சேர்ந்தவர் மோகன் லால் (வயது 66). தொழில் அதிபர். இவர் கடந்த 2 நாட்களுக்கு முன்பு மேட்டுப்பாளையத்தில் உள்ள உறவினர் வீட்டுக்கு வந்து இருந்தார்.

பின்னர் நேற்று இரவு பெங்களூர் செல்வதற்காக கோவை ரெயில் நிலையத்துக்கு வந்தார். நள்ளிரவு 1 மணியளவில் ரெயில் நிலையத்தில் உள்ள 3–வது பிளாட்பாரத்தில் கொச்சிவேலி எக்ஸ்பிரஸ் ரெயிலுக்காக காத்து இருந்தார்.

அப்போது திடீரென மோகன்லாலுக்கு வலிப்பு ஏற்பட்டு மயங்கி கீழே விழுந்தார். இதனை பார்த்த சக பயணிகள் அதிர்ச்சியடைந்தனர்.

பின்னர் இது குறித்து ரெயில்வே போலீசாருக்கு தகவல் தெரிவித்தனர். போலீசார் உடனடியாக சம்பவஇடத்துக்கு விரைந்து வந்து மோகன்லாலை மீட்டு கோவை அரசு ஆஸ்பத்திரிக்கு அனுப்பி வைத்தனர்.

அங்கு அவரை பரிசோதனை செய்த டாக்டர்கள் அவர் ஏற்கனவே இறந்து விட்டதாக தெரிவித்தனர். இது குறித்து ரெயில்வே போலீசார் வழக்குப்பதிவு செய்து விசாரணை நடத்தி வருகிறார்கள்.