கொடைக்கானலில் பலத்த மழை

கொடைக்கானல்:

கொடைக்கானலில் தொடர்ந்து மழை பெய்து வருவதால் குளுகுளு சீசன் நிலவுகிறது. இந்த ஆண்டு வழக்கத்திற்கு மாறாக கோடை காலம் முடிந்தபின்னரும் வெயில் சுட்டெரிக்கிறது. இதனால் கொடைக்கானலுக்கு சீசன் முடிந்து பின்னரும் சுற்றுலா பயணிகள் வருகை அதிகரித்துள்ளது.

கொடைக்கானலிலும் பகல்வேளையில் வெயில் தாக்கம் சற்று அதிகமாக இருந்தது. கடந்த சில 2 தினங்களாக அவ்வப்போது மழை பெய்து வருகிறது. மேகமூட்டத்துடன் குளிர்ந்த காற்று வீசுவதால் சுற்றுலா பயணிகள் குளுகுளு சீசனை அனுபவித்தவாறு இயற்கை காட்சிகளை கண்டுகளித்து வருகின்றனர்.

நேற்று மாலை 2 மணிநேரம் பலத்த மழை பெய்தது. இதனால் சாலைகளில் தண்ணீர் பெருக்கெடுத்து ஓடியது. வெள்ளிநீர்வீழ்ச்சி, பாம்பாறு உள்ளிட்ட அருவிகளில் வெள்ளப்பெருக்கு ஏற்பட்டது. சுற்றுலா பயணிகள் குடைபிடித்தவாறு ஏரிச்சாலை, கோக்கர்ஸ் வாக், பூங்கா உள்ளிட்ட பகுதிகளை சுற்றி பார்த்தனர்.

தொடர்ந்து பெய்த மழை காரணமாக கொடைக்கானலில் இரவு நேரத்தில் குளிர் அதிகரித்துள்ளது. இன்றும் மழை பெய்யக்கூடிய சூழல் உள்ளது.