கடலூர் முதுநகர் அருகே தனியார் நிறுவனத்தில் இரும்பு பொருட்கள் திருட்டு

கடலூர்:

கடலூர் முதுநகர் பகுதியை சேர்ந்தவர் தினகரன் (வயது 56). இவர் முதுநகர் அருகில் சிப்காட்டில் உள்ள ஒரு தனியார் நிறுவனத்தில் காவலாளியாக வேலை பார்த்து வருகிறார். சம்பவத்தன்று தினகரன் பணியில் இருந்த போது, மோட்டார் சைக்கிளில் வந்த மர்மநபர்கள் 3 பேர், அந்த நிறுவனத்தில் உள்ள கிடங்கில் இருந்த இரும்பு பொருட்களை திருடினர்.

இதை பார்த்து அதிர்ச்சி அடைந்த அவர் கூச்சலிட்டார். இந்த சத்தம் கேட்டு அக்கம் பக்கத்தினர் வருவதற்குள், மர்மநபர்கள் 3 பேரும் தாங்கள் வந்த மோட்டார் சைக்கிளில் தப்பிச்சென்றனர். திருடுபோன இரும்பு பொருட்களின் மதிப்பு ரூ.35 ஆயிரம் இருக்கும் என கூறப்படுகிறது.

இதுகுறித்து தினகரன் கொடுத்த புகாரின் பேரில் கடலூர் முதுநகர் போலீசார் வழக்குப்பதிவு செய்து, இரும்பு பொருட்களை திருடிக் கொண்டு மோட்டார் சைக்கிளில் தப்பிச்சென்ற மர்மநபர்கள் 3 பேரையும் வலைவீசி தேடி வருகின்றனர்.