பயங்கர ஆயுதங்களுடன் பள்ளி மாணவர்கள் மோதல்- கத்தி, சைக்கிள் செயின், கஞ்சா பறிமுதல்

திருப்பூர்:

திருப்பூர் வீரபாண்டி கே.வி.ஆர்.நகரில் மாநகராட்சி மேல்நிலைப்பள்ளி உள்ளது. இப்பள்ளியில் கபடிபோட்டி நடந்தது. இதில் 8, 9, 10ம் வகுப்பு படிக்கும் மாணவர்களுக்கு இடையே தகராறு ஏற்பட்டது. இதையடுத்து மாணவர்கள் இரு குழுக்களாக பிரிந்து மோதிக்கொண்டனர். அதன் தொடர்ச்சியாக மாணவர்கள் தினமும் வகுப்பு இடைவேளையின்போது ஒருவரை ஒருவர் தாக்கி உள்ளனர்.

இதற்கிடையே ஒரு குழுவை சேர்ந்த மாணவர்கள் மற்றொரு குழுவை சேர்ந்த மாணவர்களை தாக்க கத்தி, சைக்கிள் செயின் ஆகியவற்றை கழிப்பறையில் பதுக்கி வைத்திருந்தனர். அதேப்போல் மற்றொரு குழுவை சேர்ந்த மாணவர்களும் எதிர்தரப்பு மாணவர்களை தாக்க ஆயுதங்களை பள்ளிக்கு கொண்டு வந்து மறைத்து வைத்திருந்தனர்.

இந்த விவரம் பள்ளி ஆசிரியர்களுக்கு தெரியவரவே அவர்கள் கழிப்பறையில் சோதனை நடத்தினர். அங்கு கத்தி உள்ளிட்ட பயங்கர ஆயுதங்கள் இருப்பதை கண்டு அதிர்ச்சியடைந்தனர். மேலும் அவற்றை பறிமுதல் செய்து மாணவர்களை எச்சரித்தனர்.

இதுகுறித்து வீரபாண்டி போலீசிலும் புகார் செய்தனர். போலீசார் பள்ளிக்கு சென்று இரு தரப்பு மாணவர்களிடம் விசாரணை நடத்தினர். மேலும் மாணவர்களுக்கு எச்சரிக்கை விடுத்ததுடன் அறிவுரையும் வழங்கினர்.

பள்ளி தலைமை ஆசிரியர் கூறுகையில், பள்ளி மாணவர்களின பெற்றோரை அழைத்து எழுதி வாங்கி உள்ளோம். மாணவர்களிடம் இருந்து சைக்கிள் செயின், கத்தி, கஞ்சா உள்ளிட்டவை பறிமுதல் செய்யப்பட்டு உள்ளது. தொடர்ந்து மாணவர்களின் நடவடிக்கையை கண்காணித்து வருகிறோம் என்றார்.