பண்ருட்டியில் இளம்பெண் தூக்கு போட்டு தற்கொலை

கடலூர்:

கடலூர் மாவட்டம் பண்ருட்டி காமராஜ் நகரை சேர்ந்தவர் தீனதயாளன். இவர் தனியார் பள்ளியில் விளையாட்டு பயிற்சியாளராக உள்ளார். இவருக்கு திருமணமாகி இவரது மனைவி இறந்துவிட்டார். இதையடுத்து திண்டுக்கல் மாவட்டம் பழனியை அடுத்த மானூர் கிராமத்தை சேர்ந்த கவிதா (வயது 30) என்பவரை கடந்த 5 மாதங்களுக்கு முன்பு திருமணம் செய்து கொண்டார். இந்நிலையில் தீனதயாளன் அம்மாவிற்கும், கவிதாவிற்கும் இடையே அடிக்கடி தகராறு ஏற்பட்டது. இதனை தீனதயாளன் கேட்காததால், ஆத்திரமடைந்த கவிதா வீட்டின் அறையில் இருந்த மின் விசிறியில் தூக்கு போட்டு இறந்தார்.

இது குறித்த புகாரின் பேரில் பண்ருட்டி போலீஸ் இன்ஸ்பெக்டர் கண்ணன் தலைமையிலான போலீசார் சம்பவ இடத்திற்கு விரைந்து சென்றனர். கவிதாவின் உடலை கைப்பற்றி பிரேத பரிசோதனைக்காக பண்ருட்டி அரசு ஆஸ்பத்திரிக்கு அனுப்பி வைத்தனர். இளம்பெண் தற்கொலை தொடர்பாக வழக்கு பதிவு செய்து விசாரணை நடத்தி வருகின்றனர்.