தமிழக-ஆந்திர எல்லையில் 4 பேரை மிதித்து கொன்ற யானைகளை மயக்க ஊசி செலுத்தி பிடிக்க தீவிரம்

ஜோலார்பேட்டை:

கிருஷ்ணகிரி வனபகுதியில் சுற்றி திரிந்த காட்டு யானைகள் 2 பேரை மிதித்து கொன்றது. அந்த யானைகள் ஆந்திர வனப்பகுதிக்கு சென்றன.

ஆந்திர மாநிலம் பருத்தி கொல்லி கிராமம் தமிழக எல்லையில் திருப்பத்தூர் மாவட்டத்தை ஒட்டியுள்ளது. இந்த பகுதியில் யானைகள் முகாமிட்டுள்ளன.

பருத்திக்கொல்லி கிராமத்தை சேர்ந்த தேவேந்திரன் மனைவி உஷா (வயது 42) என்பவரும் மற்ற நபர்களும் வேலைக்கு செல்வதற்காக மல்லானூர் ரெயில் நிலையம் நோக்கி சென்று கொண்டிருந்தனர்.

அப்போது திடீரென இவர்களை யானைகள் வழிமறித்து தாக்கியுள்ளது. இதில் கீழே விழுந்த உஷா, சிவலிங்கம் (70) ஆகிய இருவரையும் யானைகள் மிதித்ததில் அவர்கள் சம்பவ இடத்திலேயே இறந்து விட்டனர்.

மேலும் இருவர் படுகாயம் அடைந்து குப்பம் அரசு மருத்துவமனையில் தீவிர சிகிச்சை அளிக்கப்பட்டு வருகிறது. இந்த சம்பவம் தொடர்பாக குப்பம் போலீசார் வழக்குப் பதிவு செய்து விசாரணை நடத்தி வருகின்றனர்.

இந்த நிலையில் 2 பேரை மிதித்து கொன்ற யானைகள் மல்ல குண்டா ஊராட்சி ஒன்றியத்துக்கு உட்பட்ட தகரகுப்பம் பகுதியில் இன்று காலை சுற்றி திரிந்தன.

இதனால் நாட்டறம்பள்ளி தாசில்தார் குமார் தலைமையில் நாட்டறம்பள்ளி, திம்மாம்பேட்டை போலீசார் மற்றும் தமிழக வனத்துறையினர் தலைமையில் அப்பகுதிக்கு சென்றனர்.

அப்பகுதி பொதுமக்கள் வீட்டை விட்டு யாரும் வெளியே வரவேண்டாம் என விழிப்புணர்வு ஏற்படுத்தினர்.

வனத்துறையினர் டிரோன் கேமரா மூலம் காட்டுப்பகுதிக்கு சென்றனர். டிரோன் கேமராவை பறக்கவிட்டு யானைகளை கண்காணித்து வருகின்றனர்.

2 யானைகளை மயக்க ஊசி செலுத்தி பிடிக்க நடவடிக்கை எடுத்துள்ளனர்.

யானைகள் ஆந்திர வனப்பகுதியில் இருந்து தமிழக எல்லைக்குள் வந்தது அப்பகுதியினரிடையே அச்சத்தை ஏற்படுத்தி உள்ளது.