ஆன்மிகம்

இந்து கலாசாரம் மற்றும் பாரம்பரியத்தில் ஆண்கள், பெண்கள் என அனைவருமே குங்குமம் அணிவதை ஒரு காலத்தில் வழக்கமாக கொண்டிருந்தனர். ஆனால் இன்றைய காலகட்டத்தில் குங்குமம் அணியும் பழக்கம் கொஞ்சம் கொஞ்சமாக குறைந்து வருகிறது. குறிப்பாக நவநாகரீக பெண்கள் குங்குமத்துக்கு பதிலாக ஸ்டிக்கர் பொட்டு அணிகிறார்கள்.

ஆனால் குங்குமம் அணிவது நமது பாரம்பரியம் மட்டுமல்லாமல், குங்குமம் அணியும் போது ஏராளமான நன்மைகளும் உள்ளன. குங்குமத்தின் சிறப்பு அம்சங்கள் மற்றும் நன்மைகளை பற்றி தெளிவாக காணலாம்.

நமது அன்றாட வாழ்க்கையில் நாம் பாரம்பரியமாகவே பல்வேறு நல்ல விஷயங்களை பின்பற்றி வருகிறோம். இந்த குறிப்பிடத்தக்க நல்ல விஷயங்களில் ஒன்று நெற்றியில் குங்குமம் அணிவதும் அடங்கும்.

திருமணமான பெண்கள் குங்குமத்தை நெற்றியில் இரண்டு புருவத்தின் மத்தியிலும், உச்சி வகிடு பகுதியிலும் வைத்துக்கொள்ளலாம். திருமணம் ஆகாத பெண்கள் குங்குமத்தை நெற்றியில் மட்டுமே வைத்து கொள்ள வேண்டும்.

நம்முடைய பாரம்பரிய வழக்கப்படி திருமணமான பெண்களாக இருந்தாலும் சரி, திருமணமாகாத பெண்களாக இருந்தாலும் சரி, தினமும் காலையில் எழுந்து குளித்து முடித்துவிட்டு நெற்றியில் குங்குமம் வைக்க வேண்டும்.

கூடுமானவரை இரண்டு புருவத்திற்கு நடுவே கட்டாயமாக குங்குமம் இருக்கும்படி பார்த்துக்கொள்ளுங்கள். -காரணம் பெண்களுடைய உடம்பில் ஊடுருவக்கூடிய கெட்ட சக்தியானது, அந்த இரண்டு புருவத்தின் மத்தியில் தான் செல்லும் என்பது நம்முடைய முன்னோர்களின் கணிப்பு.

எனவே அந்த இடத்திற்கு ஒரு பாதுகாப்பு இருக்க வேண்டும் என்பதற்காகத் தான் குங்குமத்தை இரண்டு புருவங்களுக்கு மத்தியில் வைக்க வேண்டும் என்று சொல்லியுள்ளார்கள்.

மேலும் குங்குமம் உடல், மனம் மற்றும் உணர்ச்சி ஆகிய விஷயங்களிலும் பலதரப்பட்ட நன்மைகளை அளிக்க வல்லது. திருமணமான பெண்கள் குறிப்பாக, உச்சி முகட்டில் குங்குமத்தை வைக்கும் போது, அது உடலுக்கு குளிர்ச்சியை தரும். இந்த பகுதி உணர்திறன் வாய்ந்ததாக கருதப்படுகிறது.

மஞ்சள் மற்றும் சந்தனத்தால் ஆன குங்குமத்தின் குளிர்ச்சியான பண்புகளால் உடலுக்கு பயன்கள் கிடைக்கிறது. இது ஆயுர்வேத மூலப்பொருளாகும். ஆயுர்வேதத்தில் உச்சந்தலையானது ஒரு முக்கிய ஆற்றல் மையமாகக் கருதப்படுகிறது.

குங்குமத்தில் உள்ள மஞ்சளில், அழற்ஜி எதிர்ப்பு மற்றும் ஆக்சிஜனேற்ற பண்புகள் நிறைந்துள்ளது. எனவே, மஞ்சள் கொண்டு தயாரிக்கப்படும் குங்குமத்தை உச்சந்தலையில் வைத்தால், அது உடனடியாக நல்லதொரு பலனை அளிக்கிறது. இது பதற்றம் மற்றும் வெப்பத்தால் ஏற்படும் தலைவலியை குறைக்க உதவுகிறது.

குங்குமத்தில் உள்ள சிவப்பு நிறமானது உணர்ச்சி மற்றும் அன்பை குறிக்கிறது. அதாவது இது காதல் உணர்வுகளை அதிகரிக்கக் கூடியதாகும். திருமணமான பெண்கள் குங்குமம் அணியும் போது கணவருடன் நல்ல நெருக்கம் மற்றும் பிணைப்பை உருவாக்குகிறது.

மேலும் குங்குமம் அணிவது மனதை ஒருமுகப்படுத்தவும், இயற்கையான ஆற்றலை அதிகரிக்கவும் உதவும். இன்று பல்வேறு காரணங்களால் பலரும் தொடர்ந்து மன அழுத்தம் மற்றும் பதற்றத்துடன் காணப்படுகின்றனர். குங்குமம் மனநிலையை இயல்பாக்குவதற்கும், மேம்படுத்துவதற்கும் உதவுகிறது.

குங்குமத்தில் அடங்கியுள்ள மஞ்சள், சுண்ணாம்பு மற்றும் பாதரச சல்பைடு போன்ற இயற்கை பொருட்கள் மனதை அமைதிப்படுத்துவதற்கு உதவும்.

குங்குமம் அணிவதன் பலன்களை ஜோதிடர் அருளமுதம் பார்த்தசாரதி குருஜி இப்படி கூறுகிறார்...

பெண்கள் குங்குமத்தால் திலகம் இடுவது ரொம்ப ரொம்ப முக்கியம். குங்குமத்துக்கு ஹரித்ரா சூரணம் என்று பெயர். இது ஒரு மங்களகரமான பொருள்.

16 சவுபாக்கிய திரவியங்களில் ஒரு திரவியம் குங்குமம். இன்று பல பெண்கள் மஞ்சளும் பூசி கொள்வது கிடையாது, வளையலும் போட்டுக் கொள்வது கிடையாது, கழுத்தில் சங்கிலியும் அணிவது கிடையாது. மற்ற எல்லாவற்றையும் கூட விட்டு விடலாம், ஆனால் கைகளில் வளையல் போடாமல் இருக்கக் கூடாது. கழுத்து வெறும் கழுத்தாக இருக்கக் கூடாது, நெற்றியிலும் திலகம் இல்லாமல் இருக்கக் கூடாது. நெற்றியில் கண்டிப்பாக குங்குமம் வைக்க வேண்டும்.

நெற்றியில் திலகம் பெரிதாக யார் வைக்கின்றார்களோ அவர்களுக்கு எப்போதுமே நல்லது நடக்கும். குறைந்தபட்சம் 48 நாள் நெற்றியில் திலகம் வைத்தால் அந்த குடும்பத்தில் எவ்வளவு பெரிய கஷ்டங்கள் இருந்தாலும் அனைத்தும் தீர்ந்துவிடும். அது மட்டுமல்ல, அன்று முதல் அவர்களுக்கு வெற்றி கிடைக்கும். வாழ்க்கையில் ஜெயிக்க முடியும். ஐம்புலன்களும் அவர்களுக்கு கட்டுப்படும். எனவே பெண்கள் தினமும் நெற்றியில் குங்குமம் அணியுங்கள்.

இன்றைய பஞ்சாங்கம்

குரோதி ஆண்டு தை-10 (வியாழக்கிழமை)

பிறை: தேய்பிறை

திதி: நவமி மாலை 4.45 மணி வரை பிறகு தசமி

நட்சத்திரம்: விசாகம் மறுநாள் விடியற்காலை 4.29 மணி வரை பிறகு அனுஷம்

யோகம்: சித்தயோகம்

ராகுகாலம்: நண்பகல் 1.30 மணி முதல் 3 மணி வரை

எமகண்டம்: காலை 6 மணி முதல் 7.30 மணி வரை

சூலம்: தெற்கு

நல்ல நேரம்: காலை 9 மணி முதல் 10 மணி வரை மாலை 4 மணி முதல் 5 மணி வரை

சுவாமிமலை ஸ்ரீ முருகப் பெருமான் தங்கக் கவசம் அணிந்து வைரவேல் தரிசனம். திருப்பதி ஸ்ரீ ஏழுமலை யப்பன் புஷ்பாங்கி சேவை. மைசூர் மண்டபம் எழுந்தருளல். மதுரை ஸ்ரீ செல்லாத்தம்மன் யானை வாகனத்தில் வீதியுலா. ஆழ்வார் திருநகரி ஸ்ரீ நம்மாழ்வார் புறப்பாடு. திருப்பரங்குன்றம் ஸ்ரீ ஆண்டவர் புறப்பாடு கண்டருளல். ஸ்ரீ தாயுமான அடிகள் குரு பூஜை. திருமெய்யம் ஸ்ரீ சத்தியமூர்த்தி புறப்பாடு. சோழவந்தான் அருகில் குருவித்துறை ஸ்ரீ குருபகவானுக்கு அபிஷேகம். திருக்கோஷ்டியூர் ஸ்ரீ சவுமிய நாராயணப் பெருமாள் திருமஞ்சனம். திருவல்லிக்கேணி ஸ்ரீ ராகவேந்திர சுவாமி மடத்தில் ஸ்ரீ ராகவேந்திரருக்கு குருவார திருமஞ்சனம். ஆலங்குடி ஸ்ரீ குருபகவான் கொண்டைக்கடலைச் சாற்று வைபவம். தக்கோலம் ஸ்ரீ தட்சிணாமூர்த்தி சுவாமிக்கு அபிஷேகம். குறுக்குத்துறை முருகப் பெருமான் வழிபாடு.

இன்றைய ராசிபலன்

மேஷம்-நற்செயல்

ரிஷபம்-வெற்றி

மிதுனம்-உழைப்பு

கடகம்-விவேகம்

சிம்மம்-தாமதம்

கன்னி-அனுகூலம்

துலாம்- திறமை

விருச்சிகம்-பயிற்சி

தனுசு- ஆதரவு

மகரம்-முயற்சி

கும்பம்-அன்பு

மீனம்-ஜெயம்

உத்தரகாண்ட் மாநிலத்தில் அலக்நந்தா நதிக்கரையில் அமைந்துள்ளது பத்ரிநாத். இந்தியாவின் மிகவும் புனிதமான யாத்திரை தலங்களில் இது முக்கியமானதாக போற்றப்படுகிறது. இந்த இடத்தில் பத்ரி நாராயணன் என்ற பெயரில் இறைவன் வீற்றிருந்து அருள் பாலிக்கிறார்.

`சார் தாம்' என்று அழைக்கப்படும் இந்தியாவின் 4 புனிதமான தலங்களில் இந்த பத்ரிநாத் திருத்தலமும் ஒன்று. பத்ரிநாத் கோவிலின் மிகவும் சுவாரசியமான அம்சங்களில் ஒன்று. அங்குள்ள வெந்நீர் ஊற்று. இதனை தப்ட் குண்ட் என்பார்கள்.

இது மருத்துவ குணம் கொண்டதாக நம்பப்படுகிறது. அதோடு பக்தர்களால், புனிதமானதாக போற்றப்படுகிறது. பக்தர்கள் பத்ரிநாத் கோவிலுக்குள் நுழையும் முன்பாக, இந்த சுடுநீரில் நீராடுவது வழக்கம்.

பத்ரிநாத் கோவில் 3000 ஆண்டுகளுக்கு மேல் பழமை வாய்ந்ததாக கூறப்படுகிறது. மேலும் இது 108 திவ்ய தேசங்களில் ஒன்றாகக் கருதப்படுகிறது. இங்கே மகாவிஷ்ணு வாழ்ந்து வருவதாக நம்பப்படுகிறது.

இமயமலையின் மிதமிஞ்சிய குளிரின் காரணமாக இந்த ஆலயம். ஆண்டுக்கு ஆறு மாதங்கள் (ஏப்ரல் கடைசியில் இருந்து நவம்பர் தொடக்கம் வரை) மட்டுமே திறந்து வைக்கப்படும்.

பாரதப் போர் நிறைவு பெற்றது. திரவுபதி உடல் ரீதியாகவும், மன ரீதியாகவும் தனக்கு மிகவும் வயதானதைப் போல உணர்ந்தாள். அஸ்தினாபுரம் நகரைச் சுற்றி கைம்பெண்கள் அதிகமாக இருந்தனர். ஒரு சில ஆண்கள் மட்டுமே தெருக்களில் தென்பட்டனர்.

ஆதரவற்ற நிலையில் இருந்த பிள்ளைகள் பலரும், வீதிகளில் சுற்றித் திரிவதைக் கண்டு திரவுபதி மனம் வருந்தினாள். ஒரு போர்க்களம் மக்கள் வாழ்வை புரட்டிப் போட்டுவிட்டதை அவள் உணர்ந்தாள். அஸ்தினாபுரத்தின் அரண்மனையில் நின்று ஓரிடத்தை வெறித்துப் பார்த்துக் கொண்டிருந்தாள்.

அப்போது அவள் நின்ற அறைக்குள் நுழைந்தார் கிருஷ்ணர். அவரைக் கண்ட தும் ஒடோடி வந்து அவர் பாதம் பணிந்து வணங்கினாள். கிருஷ்ணர், அவளின் தலையை தொட்டு ஆசீர்வதித்தார். திரவுபதியோ அழத் தொடங்கினாள்.

திரவுபதி ஆசுவாசப்படுத்திக் கொள்ள நேரம் கொடுத்த கிருஷ்ணர். அங்கிருந்து விலகி ஓரிடத்தில் அமர்ந்தார். பின்னர் அவளிடம் கேட்டார் "திரவுபதி என்ன நடந்து விட்டது?"

"ஒன்றும் நடக்கவில்லையே கிருஷ்ணா!" என்று விரக்தியாக பதிலளித்தாள், திரவுபதி.

கிருஷ்ணரோ, "விதி கொடூரமானது பாஞ்சாலி, நாம் நினைப்பது போல் வேலை செய்யாது! அது அதன் போக்கில் அதனுடைய செயல்களைச் செய்கிறது.

முடிவுகளையும் மாற்றுகிறது. நீ பழிவாங்க நினைத்தாய்... அதில் வெற்றியும் பெற்றுவிட்டாய். உன் பழிவாங்கல் முடிந்தது. துரியோதனனும், துச்சாதனனும் மட்டுமல்ல, கவுரவர்கள் அனைவரும் மடித்துவிட்டனர். நீ மகிழ்ச்சியாக இருக்க வேண்டும்! என்றார்.

"சகோதரா.. என் காயங்களை ஆற்ற வந்தீர்களா? அல்லது அதை இன்னும் கிளறி புண்படுத்த வந்தீர்களா?" என்று கோபமாக கேட்டாள் திரவுபதி.

கிருஷ்ணரிடம் என்றும் மாறாத புன்னகை உதித்தது. "திரவுபதி, உண்மை நிலையை உனக்கு உணர்த்தவே வந்தேன். எல்லாம் நமது தொலைநோக்கு பார்வையற்ற செயல்களின் விளைவு என்பதை உணர்த்த வந்தேன்' என்றார். "இப்போது என்ன சொல்ல வருகிறீர்கள் கிருஷ்ணா.. அனைத்துக்கும் நான்தான் பொறுப்பா?" என்றாள், திரவுபதி.

"இல்லை திரவுபதி. நீ மட்டுமே காரணம் இல்லை.

ஆனால், உன்செயல்களில் நீ கொஞ்சம் தொலைநோக்குப் பார்வையைக் கொண்டிருந்தால், இவ்வளவு துன்பங்கள் நேர்ந்திருக்காது''

"நான் என்ன செய்திருக்க முடியும் கிருஷ்ணா?"

நீ நிறைய செய்திருக்க முடியும் பாஞ்சாலி, உனது சுயம்வரம் நடந்தபோது கர்ணனை அவமானப்படுத்தாமல் போட்டியில் கலந்து கொள்ள வாய்ப்பளித்து இருந்தால், ஒருவேளை முடிவு வேறுவிதமாக இருந்திருக்கக் கூடும்.

குந்தி உன்னை ஐந்து பேருக்கு மனைவியாகும்படி கட்டளையிட்டதை, ஏற்றுக் கொள்ளாமல் இருந்தாலும், முடிவு வேறுவிதமாக இருந்திருக்கும்.

உன் அரண்மனையில் துரியோதனனை பார்வையற்றவரின் மகன்கள் குருடர்கள்' என்று அவமதித்தாய், அவ்வாறு நீ சொல்லாமல் இருந்திருந்தால். துரியோதன சபையில் உனக்கு நேர்ந்த அவமானத்தை தவிர்த்திருக்கலாம்.

நம் வார்த்தைகள் கூட, பின்னால் நடக்கும் சில விளைவுகளுக்கு பொறுப்பு தான் திரவுபதி. பேசுவதற்கு முன் ஒவ்வொரு வார்த்தையையும் எடைபோடுவது மிகவும் முக்கியமானது. இல்லையெனில், அதன் தீய விளைவுகள் உன்னை மட்டுமல்ல, உனது சுற்றுப்புறத்தையும் மகிழ்ச்சியற்றதாக ஆக்கிவிடும்.

பற்களில் விஷம் இல்லாமலேயே, பேசும் வார்த்தைகளில் விஷத்தைக் கக்கும் ஒரே இனம் மனித இனம் தான். இப்போது உனக்கு புரிகிறதா திரவுபதி?" என்று தன்னுடைய விளக்கத்தை அளித்தார். கிருஷ்ணர்.

நாம் எப்போதும் வார்த்தைகளை புத்திசாலித்தனமாக பயன்படுத்த வேண்டும். யாருடைய மனதையும் நம் வார்த்தைகள் புண்படுத்திவிடக்கூடாது என்று திரவுபதி உணர்ந்துகொண்டாள்.

இன்றைய பஞ்சாங்கம்

குரோதி ஆண்டு தை-9 (புதன்கிழமை)

பிறை: தேய்பிறை.

திதி: அஷ்டமி பிற்பகல் 2.51 மணி வரை. பிறகு நவமி.

நட்சத்திரம்: சுவாதி பின்னிரவு 2.14 மணி வரை. பிறகு விசாகம்.

யோகம்: சித்தயோகம்.

ராகுகாலம்: நண்பகல் 12 மணி முதல் 1.30 மணி வரை

எமகண்டம்: காலை 7.30 மணி முதல் 9 மணி வரை

சூலம்: வடக்கு

நல்ல நேரம்: காலை 6 மணி முதல் 7 மணி வரை மாலை 4 மணி முதல் 5 மணி வரை

திருப்பதி ஸ்ரீஏழுமலையப்பன் சகஸ்ர கலசாபிஷேகம். கத்தவால் சமஸ்தான மண்டபம் எழுந்தருளல், ஸ்ரீவில்லிபுத்தூர் பெரியாழ்வார் புறப்பாடு. மதுரை ஸ்ரீசெல்லாத்தம்மன் சிம்மாசனத்தில் பவனி. ஸ்ரீவைகுண்டம் ஸ்ரீவைகுண்டபதிக்கு பால் அபிஷேகம். திருவல்லிக்கேணி ஸ்ரீபார்த்தசாரதி பெருமாள் கோவிலில் ஆண்டாளுக்கு திருமஞ்சனம். மதுராந்தகம் ஏரிகாத்த ஸ்ரீகோதண்டராம சுவாமிக்கு திருமஞ்சனம். பத்ராசலம் ஸ்ரீராமபிரான் புறப்பாடு. ஸ்ரீரங்கம் ஸ்ரீநம்பெருமாள் தேவக்கோட்டை ஸ்ரீரங்கநாதர் கோவில்களில் பெருமாள் புறப்பாடு. விருதுநகர் ஸ்ரீவிஸ்வநாதர், வேதாரண்யம் ஸ்ரீசிவபெருமா

னுக்கு காலையில் சிறப்பு அபிஷேகம். திருப்பெருந்துறை ஸ்ரீமாணிக்கவாசகர் புறப்பாடு. திருநெல்வேலி சமீபம் புளியங்குடி வள்ளியம்மை கோவிலில் அபிஷேகம், அலங்காரம். கரூர் ஸ்ரீஅபயபிரதான ரங்கநாதர் புறப்பாடு.

இன்றைய ராசிபலன்

மேஷம்-அனுகூலம்

ரிஷபம்-உண்மை

மிதுனம்-சுகம்

கடகம்-பொறுமை

சிம்மம்-சுபம்

கன்னி-அன்பு

துலாம்- திறமை

விருச்சிகம்-தனம்

தனுசு- நற்செய்தி

மகரம்-பொறுப்பு

கும்பம்-திடம்

மீனம்- தீரம்

பாண்டிய நாட்டில் உள்ள 14 சிவ தலங்களில் மிகவும் தொன்மையானது, திருக்குற்றாலம் குற்றாலநாதர் கோவில். தென்காசியை அடுத்துள்ள குற்றாலத்தில் இருக்கும் இத்தலம், தீர்த்தம், மூர்த்தி ஆகியவை இணைந்த சிறப்புமிக்கது.

'கு' என்பதற்கு 'பிறவிப்பிணி' என்றும், 'தாலம்' என்பதற்கு 'தீர்ப்பது' என்றும் பொருள். பிறவிப்பிணியைத் தீர்க்கும் திருத்தலம் என்பதால் இந்த ஊர், 'குத்தாலம்' என்று அழைக்கப்பட்டு, அதுவே மருவி 'குற்றாலம்' என்றானதாக சொல்கிறார்கள்.

இந்த குற்றாலம், மூலிகை நிறைந்த மலைப் பகுதியாகும். இந்த மலையில் 2 ஆயிரத்துக்கும் மேற்பட்ட மூலிகைச் செடிகள் உள்ளன.

இவ்வாலய இறைவனின் பெயர் திருக்குற்றாலநாதர், அம்பாளின் திருநாமம், குழல்வாய் மொழி என்பதாகும். இங்குள்ள தீர்த்தம் 'சிவமது கங்கை', 'வட அருவி', 'சித்ரா நதி' என்ற பெயர்களில் அழைக்கப்படுகிறது.

உற்சவ மூர்த்தியின் திருநாமம் சோமாஸ்கந்தர். சிவபெருமானின் பஞ்ச சபைகளில் ஒன்றான சித்திர சபை, இந்த குற்றாலநாதர் கோவிலில் உள்ளது. சுமார் 2 ஆயிரம் ஆண்டுகள் பழமையான இக்கோவில் சங்கு வடிவ அமைப்பில் உள்ளது.

சித்திர சபையை காசி பராக்கிரம பாண்டிய மன்னன் கட்டியுள்ளார். இந்தக் கோவிலின் தலவிருட்சம் குறும்பலா மரம். இது, குழல்வாய் மொழி அம்பாள் சன்னிதி முன்பாக உள்ளது.

பிரம்மா, விஷ்ணு, ருத்ரன் என்ற மும்மூர்த்திகளின் பெயர் தாங்கிய 3 சிகரங்கள் உள்ளதால், குற்றால மலையை 'திரிகூடமலை' என்றும், இறைவனை 'திரிகூடநாதர்' என்றும் அழைப்பார்கள்.

குழல்வாய்மொழி அம்பாள் உயரமான கர்ப்பக்கிரகத்தில் எழுந்தருளியுள்ளார். குழல்வாய்மொழி என்றால் 'வேய்ங்குழலின் ஒலி போன்று இனிமை பொருந்திய சொல்லுடையவள்' என்று பொருள்.

இந்த கோவில் ஆரம்ப காலத்தில் திருமால் கோவிலாக இருந்தது. அந்த சமயத்தில் 'திருமுற்றம்' என்று அழைக்கப்பட்டது. சிவன், சக்தி திருமணத்தின் போது வடக்கு தாழ்ந்து தெற்கு உயர்ந்தது.

இதை சமன் செய்ய தெற்கு நோக்கி ஈஸ்வரனால் அனுப்பப்பட்ட அகத்தியப் பெருமான் இந்த கோவிலில் உள்ள திருமாலை அழுத்தி சிவனாக மாற்றினார். இதனால் அவருடைய ஐந்து கை விரல் தழும்பு சிவலிங்கத்தின் உச்சியில் தற்போதும் பதிந்திருப்பதைக் காண முடியும்.

தலையில் உள்ள தழும்பால் சிவனுக்குத் தலைவலி வந்து விடக்கூடாது என்பதற்காக, இத்தலத்து இறைவனுக்கு மூலிகை அபிஷேகம் நடக்கிறது.

குற்றாலத்திற்கு பெருமை சேர்க்க பல அருவிகள் உள்ளன. அதில் செண்பகாதேவி அருவி, தேனருவி, சிற்றருவி, ஐந்தருவி, பேரருவி, புலிஅருவி என்ற பாசுபதசாஸ்தா அருவி, பழைய குற்றால அருவி ஆகியவை முக்கியமானவை. இந்த அருவிகளில் குளித்து நமது புற அழுக்கை கழுவி, மன அழுக்கு நீங்க குற்றாலநாதரை வணங்குவது சிறப்பானது.

முற்காலத்தில் குற்றால நங்கை என்ற தேவி, சித்திர சபையின் வடக்கு வாசலில் அமர்ந்து அருள்பாலித்துள்ளார். இந்த ஆலயம் தற்போது, குற்றாலநாதர் ஆலயத்துக்கு நன்னகரம் அருகில் உள்ள பாட்டக்கரையில் உள்ளது.

வயல் வேலை செய்யும் பெண் ஒருத்திக்கு, குழல்வாய் மொழியம்மையின் அருளால் நீண்ட காலத்திற்குப் பிறகு, குழந்தைப் பேறு உண்டானது. நிறைமாத கர்ப்பிணியான அந்த பெண்ணுக்கு பிரசவ வலி வந்தபோது, அவள் அருகில் யாரும் இல்லை.

'அம்மா..' என்று அலறியபடி மயங்கிச் சரிந்த அந்தப் பெண்ணின் குரல் கேட்டு, குற்றாலநாதர் ஆலயத்தில் இருந்து அம்மன், பச்சைக்கிளியாக மாறி இவ்விடம் பறந்து வந்தாள். பின்னர் தாயாக மாறி அந்தப் பெண்ணுக்கு பிரசவம் பார்த்தாள்.

இந்த நிலையில் தன்னிடம் சொல்லாமல் சென்றதால், 'இனி நீ ஆலயத்திற்குள் வர வேண்டாம்' என்று சிவபெருமான் நங்கையம்மனிடம் கூறினார். உடனே அன்னை, 'உங்களிடம் சொல்லாமல் சென்றாலும், நான் நல்ல நோக்கத்திற்காகவே சென்றேன். என் குற்றத்தை பொறுத்தருள வேண்டும்' என்று வேண்டினாள்.

இதையடுத்து அந்த அம்மனை குற்றாலநாதர் ஆலயத்தில் இருந்து வடக்கு பகுதியில் தங்கி இருக்கும்படியும், வருடத்திற்கு ஒரு முறை தன்னை தேடி வரவும் சிவபெருமான் அருள்பாலித்தார். அப்படி அந்த அம்மன் அருள்பாலிக்கும் ஊர் 'காசிமேஜர்புரம்' என்று அழைக்கப்படுகிறது.

தென்காசி மாவட்டம் குற்றாலத்தில் இருந்து 1 கிலோமீட்டர் தொலைவில் காசிமேஜர்புரம் உள்ளது. தை மாதம் நான்கு செவ்வாய்க்கிழமையும் இந்த ஆலயத்தில் திருவிழா நடைபெறும். முதல் செவ்வாய் அன்று வரியேடு என்னும் வைபவம் நடைபெறும்.

இவ்வேளையில் அம்மனிடம் உத்தரவு வாங்கி மக்கள் வரி பிரித்து கோவில் கொடை விழாவிற்கு ஆயத்தமாவார்கள். இரண்டாம் செவ்வாய்க்கிழமை கால் நாட்டு வைபவம் மிகச்சிறப்பாக நடைபெறும்.

மூன்றாம் செவ்வாய் அன்று கோவில் பூசாரி சூலாயுதம் எடுத்து அம்மனின் மூல ஆலயத்துக்கு சென்று, உத்தரவு வாங்கி வந்த பின்பு கொடை விழா வெகு விமரிசையாக நடைபெறும். அன்றைய நாளில் செண்பகாதேவி அம்மன் கோவிலில் இருந்து காவு சாமி எனும் அகத்தியர் அழைப்பு நடந்தேறும்.

இந்த அம்மனுக்கு புட்டு அமுது படைப்பார்கள். அப்பம், வடை சுண்டல், தேன் திராட்சை உள்பட பல்வேறு பதார்த்தங்களை படைத்து வணங்குவார்கள். இந்த அன்னையை வேண்டினால் குழந்தைப் பேறு கிடைக்கும் என்பது ஐதீகம்.

இந்த ஆலயத்தில் செண்பகாதேவி அம்மன் கிழக்கு நோக்கி உள்ளார். ஆதி அம்மனும் இந்த ஆலய வளாகத்துக்குள் வடக்கு நோக்கி உள்ளார். கோவில் வளாகத்தில் கருப்பசாமி, பன்றி மாடசாமி, சங்கலி பூதத்தார், கொம்பு மாடசாமி ஆகியோர் உள்ளனர். வெளியே சின்னத்தம்பி காவல்தெய்வமாக உள்ளார்.

பொதிகை விநாயகர், ஆதி அம்மன், செண்பகாதேவி ஆகியோரும் இந்த கோவில் வளாகத்தில் உள்ளனர். பாலமுருகன், பால விநாயகர் ஆகியோரும் புதிதாக பிரதிஷ்டை செய்யப்பட்டுள்ளனர். இந்த ஆலயம் தினமும் காலை 7 மணி முதல் 10 மணி வரையும், மாலை 6 மணி முதல் இரவு 8 மணி வரையும், பக்தர்கள் தரிசனம் செய்வதற்காக திறந்துவைக்கப்பட்டிருக்கும்.

கன்னியாகுமரி மாவட்டத்தில் அமைந்துள்ளது, திற்பரப்பு என்ற ஊர். குமரி மாவட்டத்தின் சிறப்பு வாய்ந்த சுற்றுலாத் தலங்களில் இதுவும் ஒன்று. இங்குள்ள திற்பரப்பு அருவியை 'குமரி குற்றாலம்' என்பார்கள்.

கோதை ஆற்றின் கரையில் உள்ளது இந்த அருவி. பேச்சிப்பாறை அணையில் இருந்து 13 கிலோமீட்டர் தூரம் ஓடி வந்து, இங்குள்ள மலையில் 15 மீட்டர் உயரத்தில் இருந்து அருவியாக விழுகிறது. இந்த அருவியைக் காண பல்வேறு மாவட்டம், வெளி மாநிலங்கள், வெளிநாடுகளில் இருந்தும் சுற்றுலாப் பயணிகள் வருகிறார்கள்.

இந்த இடத்தில் சிறப்புமிகுந்த சிவாலயம் ஒன்று உள்ளது. இதனை 'திற்பரப்பு மகாதேவர் ஆலயம்' என்று அழைக்கிறார்கள். மகாசிவராத்திரியை முன்னிட்டு, கன்னியாகுமரி மாவட்டத்தில் உள்ள 12 சிவாலயங்களுக்கு, சிவனடியார்கள் பலரும் ஒவ்வொரு ஆலயமாக ஓடிச் சென்று வழிபடும் வழக்கம் உள்ளது. இதனை 'சிவாலய ஓட்டம்' என்பார்கள்.

இந்த சிவாலய ஓட்டத்தில் மூன்றாவது வரும் ஆலயமாக, இந்த திற்பரப்பு மகாதேவர் ஆலயம் திகழ்கிறது. இந்த கோவிலின் மூலவரான வீரபத்திரர், சிவலிங்க வடிவில் காட்சி தருகிறார். இவரை 'ஜடாதரர்', 'மகாதேவர்' ஆகிய பெயர்களிலும் அழைப்பார்கள். இவ்வாலய மூலவர் வழக்கத்திற்கு மாறாக, மேற்கு நோக்கிய திசையில் வீற்றிருந்து அருள்பாலிக்கிறார். அதேபோல் நந்தியானது, மூலவருக்கு நேர் எதிரில் இல்லாமல், சற்றே விலகி காணப்படுகிறது.

கோதை ஆற்றின் கரையில் உள்ள திற்பரப்பு அருவிக்கு தெற்கு திசையில் இந்த ஆலயம் உள்ளது. மகாதேவர் கோவிலின் தெற்கே உள்ள திருச்சுற்று மண்டபத்தில் இருக்கும் நிலவறை வழியாகவும், இந்த குகை கோவிலுக்கு பாதை உள்ளது.

இந்த குகை கோவிலின் உள்ளே பத்ரகாளி தேவியின் புடைப்புச் சிற்பம் உள்ளதாக சொல்லப்படுகிறது. திற்பரப்பு சிவன் கோவில், 2 ஏக்கர் பரப்புள்ள ஆலய வளாகத்தில் உள்ளது. ஆலயத்தைச் சுற்றிலும் நான்கு புறமும் சுமார் 15 அடி உயரம் உள்ள கருங்கல் மதில் சுவர் உள்ளது. இந்த கோவிலுக்கு நான்கு திசையிலும் வாசல்கள் உண்டு.

கோவிலின் மேற்கு வாசலில் மணி மண்டபம் காணப்படுகிறது. மேற்கு பிரகாரத்தில் உள்ள சாஸ்தா கோவிலில், 16 மீட்டர் உயரம் உள்ள செப்புக் கொடிமரம் இருக்கிறது. தென்மேற்கில் சிறிய சாஸ்தா கோவில் உள்ளது.

இங்கே பூரணை- புஷ்கலை ஆகிய தேவியருடன் சாஸ்தா சுகாசனத்தில் அமர்ந்து அருள்பாலிக்கிறார். கோவிலின் உள்ளே இருக்கும் கிருஷ்ணன் கோவில் பிரகாரத்தில் நாகர் சிற்பங்கள், கிருஷ்ணன் கோவில், முருகன் கோவில், மணமேடை ஆகியவை உள்ளன.

கிருஷ்ணன் கோவில் கிழக்கு பார்த்து உள்ளது. மூலவர் கிருஷ்ணன் கையில் வெண்ணையுடன் நின்ற கோலத்தில் காட்சி தருகிறார். இவரது சன்னிதிக்கு எதிரில் முருகன் கோவில் உள்ளது.

கிழக்கு வெளி பிரகாரத்தின் வாசலில் 8 தூண்களை கொண்ட மண்டபம் உள்ளது. இந்த வாசல் நிரந்தரமாக அடைக்கப்பட்டுள்ளது. தெற்கு பிரகாரத்தில் ஆஞ்சநேயருக்கு பரிவார கோவில் உள்ளது. இக்கோவிலின் பொதிகை கட்டுமானத்தை கொண்டு, இது 16-ம் நூற்றாண்டில் கட்டப்பட்டதாக இருக்கலாம் என்று கூறப்படுகிறது.

இக்கோவிலில் நிர்மால்ய தரிசனம், உஷா பூஜை, உச்சிகால பூஜை, சாயரட்சை, அத்தாழ பூஜைகள் உண்டு. மேலும் சிறப்பு பூஜைகளும் சிறப்பு சடங்குகளும் செய்யப்படுகின்றன.

இக்கோவிலின் திருவிழா பங்குனி மாதம் பூரட்டாதி நட்சத்திரத்தில் கொடியேற்றத்துடன் தொடங்கி பத்து நாட்கள் நடைபெறும். மூன்றாம் திருவிழாவில் கலச பூஜையும், முளையடி பூஜையும் நிகழும்.

ஆறாம் திரு விழாவில் வட்டதீபம் நிகழ்ச்சியும், இரவில் கதகளியும் நடக்கும். எட்டாம் நாள் தாரை பூஜையும், ஒன்பதாம் நாள் பன்றி வேட்டையும் நடைபெறும்.

இவ்விரு நாட்களில் மேளதாளங்களுடன் யானை ஊர்வலம் உண்டு. பத்தாம் நாள் ஆறாட்டு நிகழ்ச்சியானது, அரவங்காடு காணிக்காரர்கள் மற்றும் மலையர்களின் பங்களிப்புடன் நடைபெறும்.

திற்பரப்பு சிவன் கோவிலுக்கு எழுத்து வடிவில் தலபுராணம் இல்லை. சிவபுராணம் சார்ந்த வாய் மொழிக் கதையே உள்ளது. சிற்பக்கலை வேலைப்பாடுகள் நிறைந்த இந்த கோவில் ஒரு கலைப் பொக்கிஷமாகும்.

கோவிலில் வீற்றிருக்கும் சிவபெருமானை ஒவ்வொரு ஆண்டும் சிவராத்திரியை முன்னிட்டு நடைபெறும் சிவாலய ஓட்டத்தின்போது பல்லாயிரக் கணக்கான பக்தர்கள் வந்து தரிசிப்பது, காலம் காலமாக நடைபெற்று வரும் சிறப்பான நிகழ்வாகும்.

சிவனின் பேச்சை கேட்காமல், தன் தந்தை தட்சன் நடத்திய யாகத்திற்கு தாட்சாயிணி (பார்வதி தேவி) சென்றாள். அங்கே தாட்சாயிணிக்கு அவமரியாதை நிகழ்ந்தது. இதனால் சிவன் தன் அம்சமாக வீரபத்திரரை உருவாக்கி, அவரை தட்சன் யாகம் செய்யும் இடத்திற்கு அனுப்பினார்.

வீரபத்திரர், அந்த யாகத்தை அழித்து அனைவரையும் தண்டித்தார். ஆனாலும் வீரபத்திரரின் கோபம் குறையவில்லை. எனவே அவர், தன் மனம் அமைதி பெற, கோதை ஆற்றின் பகுதியில் அமர்ந்து தியானம் செய்தார். அப்போது அவருடன் பத்திரகாளியும் தியானத்தில் அமர்ந்தாள்.

தெற்கில் இருந்து வடக்கு நோக்கி பாயும் நதியை பார்க்கும் வகையில், மேற்கு நோக்கி அமர்ந்து தியானம் செய்தார், வீரபத்திரர். எனவே தான் இங்குள்ள சிவாலயத்தில் மூலவர், மேற்கு நோக்கி அருள்வதாகவும் சொல்கிறார்கள்.

மேலும் மூலவருக்கு நதியை மறைக்காமல் இருக்கும் வகையில் நந்தியும் சற்று விலகி இருப்பதாக கூறுகின்றனர். இந்த ஆலயம் தினமும் காலை 5 மணி முதல் 11 மணி வரையும், மாலை 5 மணி முதல் இரவு 8 மணி வரையும், பக்தர்கள் தரிசனம் செய்வதற்காக திறந்துவைக்கப்பட்டிருக்கும்.

அமைவிடம்

கன்னியாகுமரியில் இருந்து சுமார் 55 கிலோமீட்டர் தூரத்திலும், நாகர்கோவிலில் இருந்து சுமார் 35 கிலோமீட்டர் தொலைவிலும், மார்த்தாண்டத்தில் இருந்து திருவட்டாறு வழியாக சுமார் 18 கிலோமீட்டர் தூரத்திலும் திற்பரப்பு திருத்தலம் உள்ளது.

21-ந்தேதி (செவ்வாய்)

* மதுரை செல்லாத்தம்மன் சிம்மாசனத்தில் புறப்பாடு கண்டருளல்.

* சுவாமிமலை முருகப் பெருமான் ஆயிரம் நாமாவளி கொண்ட தங்கப் பூமாலை சூடியருளல்.

* திருவல்லிக்கேணி பார்த்தசாரதிப் பெருமாள் கோவிலில் ஆண்டாளுக்கு திருமஞ்சனம்.

* சமநோக்கு நாள்.

22-ந்தேதி (புதன்)

* திருவில்லிபுத்தூர் பெரியாழ்வார் புறப்பாடு.

* திருவல்லிக்கேணி பார்த்தசாரதிப் பெருமாள் கோவிலில் நரசிம்மருக்கு திருமஞ்சனம்.

* சமநோக்கு நாள்.

23-ந்தேதி (வியாழன்)

* திருப்பரங்குன்றம் முருகப்பெருமான் புறப்பாடு.

* சுவாமிமலை முருகப்பெருமான் தங்கக்கவசம் அணிந்து வைர வேல் தரிசனம்.

* திருப்பதி ஏழுமலையான் புஷ்பாங்கி சேவை.

* கீழ்நோக்கு நாள்.

24-ந்தேதி (வெள்ளி)

* திருவள்ளூர் வீரராகவப் பெருமாள் காலை சப்பரத்திலும், இரவு சிம்ம வாகனத்திலும் திருவீதி உலா.

* சங்கரன்கோவில் கோமதியம்மன் தங்கப் பாவாடை தரிசனம்.

* திருத்தணி முருகப்பெருமான் கிளி வாகன சேவை.

* திருமாலிருஞ்சோலை கள்ளழகர் கோவிலில் சுந்தரவல்லி தாயார் புறப்பாடு.

* சமநோக்கு நாள்.

25-ந் தேதி (சனி)

* சர்வ ஏகாதசி.

* மதுரை செல்லத்தம்மன் சப்பரத்தில் பவனி.

* திருவரங்கம் நம்பெருமாள் சந்தன மண்டபம் எழுந்தருளி அலங்கார திருமஞ்சனம்.

* திருவில்லிபுத்தூர் ஆண்டாள், ரெங்கமன்னார் கண்ணாடி மாளிகைக்கு எழுந்தருளல்.

* சமநோக்கு நாள்.

26-ந்தேதி (ஞாயிறு)

* திருவாவடுதுறை கோவிலில் உற்சவம் ஆரம்பம்.

* திருப்பதி ஏழுமலையான் சுத்தவால் சமஸ்தான மண்டபம் எழுந் தருளல்.

* திருபெரும்புதூர் மணவாள மாமுனிகள் புறப்பாடு.

* திருவல்லிக்கேணி பார்த்தசாரதிப் பெருமாள் கோவிலில் குளக்கரை ஆஞ்சநேயருக்கு திருமஞ்சனம்.

* சமநோக்கு நாள்.

27-ந்தேதி (திங்கள்)

* பிரதோஷம்.

* திருநெல்வேலி நெல்லையப்பர் கோவிலில் பத்திர தீப உற்சவம் ஆரம்பம்.

* திருவள்ளூர் வீரராகவப் பெருமாள் காலை சேஷ வாகனத்திலும், இரவு சந்திர பிரபையிலும் புறப்பாடு.

* சூரியனார் கோவிலில் சிவபெருமான் பவனி.

* சங்கரன்கோவில் கோமதியம்மன் புஷ்பப் பாவாடை தரிசனம்.

* கீழ்நோக்கு நாள்.

இன்றைய பஞ்சாங்கம்

குரோதி ஆண்டு தை-8 (செவ்வாய்க்கிழமை)

பிறை: தேய்பிறை

திதி: சப்தமி நண்பகல் 12.45 மணி வரை பிறகு அஷ்டமி

நட்சத்திரம்: சித்திரை இரவு 11.43 மணி வரை பிறகு சுவாதி

யோகம்: சித்தயோகம்

ராகுகாலம்: பிற்பகல் 3 மணி முதல் 4.30 மணி வரை

எமகண்டம்: காலை 9 மணி முதல் 10.30 மணி வரை

சூலம்: வடக்கு

நல்ல நேரம்: காலை 8 மணி முதல் 9 மணி வரை மாலை 5 மணி முதல் 6 மணி வரை

சுவாமிமலை முருகப் பெருமான் பேராயிரம் கொண்ட தங்கப்பூமாலை சூடியருளல். திருவல்லிக்கேணி ஸ்ரீ பார்த்தசாரதிப் பெருமாள் கோவிலில் ஸ்ரீ ஆண்டாள் மூலவருக்கு திருமஞ்சன சேவை. மதுரை ஸ்ரீ செல்லத்தம்மன் சிம்மாசத்தில் புறப்பாடு கண்டருளல். திருத்தணி ஸ்ரீ முருகப் பெருமானுக்கு பால் அபிஷேகம், திருப்போரூர், வடபழனி, குன்றத்தூர், கந்தக்கோட்டம், வல்லக்கோட்டை முருகன் கோவில்களில் காலை சிறப்பு அபிஷேகம். திருநறையூர் ஸ்ரீ சித்தநாதீசுவரர் கோவிலில் ஸ்ரீ சண்முகருக்கு சத்ரு, சம்ஹார பூஜை. ஆறுமுகமங்கலம் ஸ்ரீ ஆயிரத்தொன்று விநாயகர் காலை சிறப்பு அபிஷேகம், அலங்காரம். சங்கரன்கோவில் ஸ்ரீ கோமதியம்மன் வெள்ளிப் பாவாடை தரிசனம். திருமாலிருஞ்சோலை ஸ்ரீ கள்ளழகர் புறப்பாடு. ஸ்ரீ வில்லிபுத்தூர் ஸ்ரீ ஆண்டாள் ஸ்ரீ ரெங்க மன்னார் கண்ணாடி மாளிகைக்கு எழுந்தருளல்.

இன்றைய ராசிபலன்

மேஷம்-மகிழ்ச்சி

ரிஷபம்-பரிசு

மிதுனம்-பாராட்டு

கடகம்-அமைதி

சிம்மம்-சாந்தம்

கன்னி-வெற்றி

துலாம்- முயற்சி

விருச்சிகம்-பயிற்சி

தனுசு- சாதனை

மகரம்-அனுகூலம்

கும்பம்-புகழ்

மீனம்-பண்பு

திருவனந்தபுரம்:

சபரிமலை அய்யப்பன் கோவிலில் ஒவ்வொரு ஆண்டும் மண்டல மற்றும் மகரவிளக்கு பூஜை சீசன் காலத்தில் பல்வேறு மாநிலங்களை சேர்ந்த லட்சக்கணக்கான பக்தர்கள் வந்து செல்வார்கள்.

இந்த ஆண்டுக்கான மண்டல பூஜை கடந்த நவம்பர் மாதம் 16-ந்தேதி தொடங்கி டிசம்பர் 26-ந்தேதி வரை நடைபெற்றது. இதையடுத்து மகரவிளக்கு பூஜைக்காக கடந்தமாதம் (டிசம்பர்) 30-ந்தேதி கோவில் நடை மீண்டும் திறக்கப்பட்டது.

கோவில் நடை திறக்கப் பட்டதில் இருந்து தினமும் ஆயிரக்கணக்கான பக்தர்கள் சபரிமலைக்கு வந்து சென்றார்கள். இதனால் மகரவிளக்கு பூஜை காலத்தில் சபரி மலையில் தினமும் பக்தர்கள் கூட்டம் கட்டுக்கடங்காத வகையில் இருந்தது. பக்தர்கள் நெரிசல் சிக்காமல் சாமி தரிசனம் செய்ய ஏற்பாடுகள் செய்யப் பட்டிருந்தன.

மகரவிளக்கு பூஜையின் சிகர நிகழ்ச்சியான மகர ஜோதி தரிசனம் கடந்த 14-ந்தேதி நடைபெற்றது. லட்சக் கணக்கான பக்தர்கள் ஜோதி தரிசனம் செய் தார்கள்.

இந்தநிலையில் இந்த ஆண்டுக்கான மகர விளக்கு பூஜை பந்தளம் அரண்டனை ராஜ பிரதிநிதி சாமி தரிசனத்துக்கு பிறகு இன்று நிறைவுக்கு வந்தது.

இன்று அதிகாலை 5 மணிக்கு கோவில் நடை திறக்கப்பட்டது. பின்பு கோவில் தந்திரிகள் கண்ட ரரு ராஜீவரு, பிரம்மதத்தன் ஆகியோர் தலைமையில் கணபதிஹோமம் நடைபெற்றது. அதன் தொடர்ச்சியாக அபிஷேகம் மற்றும் நைவேத்திய பூஜைகள் நடந்தன.

மகர விளக்கு வைப வத்தை முன்னிட்டு ஐயப்பனுக்கு அணிவிக்கப்பட்டிருந்த திருவாபரணங்கள் பந்தள அரண் மனையிடமிருந்து கொண்டு வந்த திருவாபரண குழுவினரிடம் ஒப்படைக்கப்பட்டது. அதனை அவர்கள் எடுத்துக் கொண்டு பதினெட்டாம்படி வழியாக இறங்கிச் சென்று பந்தளம் அரண்மனைக்கு புறப்பட்டனர்.

அதே நேரத்தில் பந்தளம் அரண்மனை ராஜ பிரதிநிதி திருக்கேத்தநாள் ராஜராஜ வர்மா ஐயப்பன் கோவிலில் சாமி தரிசனம் செய்தார். அதன்பிறகு மேல் சாந்தி அருண்குமார் நம்பூ திரி, ஐயப்பன் சிலைக்கு விபூதியாபிஷேகம் செய்தார்.

பின்னர் ஐயப்பனின் கழுத்தில் ருத்ராட்ச மாலை அணிவித்தல், கையில் யோக தடி வைத்து யோக நிலையில் அமர்த்தும் நிகழ்வு நடைபெற்றது.

பின்பு ஹரிவராசனம் பாடப்பட்டு கோவில் நடை அடைக்கப்பட்டது. கோவில் சாவியை பந்தள அரச பிரதி நிதியிடம் மேல்சாந்தி ஒப்படைத்தார். அதனை கையில் வைத்துக்கொண்டு அரச பிரதிநிதி பதினெட்டாம் படி வழியாக இறங்கிச் சென்றார்.

பதினெட்டாம் படி இயங்கியதும் கோவில் சாவியை தேவசம் பிரதி நிதிகள் மற்றும் மேல்சாந்தி முன்னிலையில் சபரிமலை நிர்வாக அதிகாரி பிஜூ நாத்திடம் ஒப்படைத்தார். அப்போது மாதாந்திர பூஜை செலவுக்கான பணமும் வழங்கப்பட்டது.

பின்னர் அரச பிரதிநிதி மற்றும் அவரது குழுவினர் பந்தளம் அரண்மனைக்கு புறப்பட்டனர். திருவாபரண ஊர்வலம் வருகிற 23-ந்தேதி பந்தளம் அரண்மனையை சென்றடைகிறது.

இந்த ஆண்டு மண்டல மற்றும் மகரவிளக்கு பூஜை சீசன் காலத்தில் கடந்த ஆண்டை விட அதிகமான பக்தர்கள் சபரிமலைக்கு வந்தனர். இந்த இரு சீசன்களிலும் மொத்தம் 53லட்சம் பக்தர்கள் சபரிமலைக்கு வந்து சென்றிருப்பதாக தெரிவிக்கப்பட்டுள்ளது.

1. நந்தி என்றால் ஆனந்தம், மகிழ்ச்சி தருபவர் என்று பொருள்.

2. நந்தியின் வேலை தடுப்பது ஆகும். அதாவது இவர் அனுமதி பெறாமல் ஈசன் உறையும் இடங்களுக்குள் யாராலும் செல்ல இயலாது. நந்தி அனுமதி கிடைத்தால்தான் ஈசன் அருளைப்பெற முடியும். எனவேதான் முக்கிய சம்பவங்களின் போது யாராவது தடுத்தால், "என்ன இவன் நந்தி மாதிரி தடுக்கிறான்" என்று சொல்லும் வழக்கம் ஏற்பட்டது.

3. பிரதோஷ காலங்களில் நந்தியை தவறாமல் வழிபடுபவர்களுக்கு அருள் வரம் தரும் பேறு கிடைக்கும் என்பது ஐதீகம்.

4. நந்தி தேவர் சிவபெருமானுக்கு பூஜை செய்யும் அற்புத காட்சி ஒன்று, நாகை மாவட்டம் ஆத்தூர் மந்தாரவனேசுவரர் கோவிலில் உள்ளது.

5. சென்னை சிந்தாதிரிப்பேட்டையில் உள்ள ஆதிபுரீஸ்வரர் கோவிலில் பிரமாண்ட அதிகார நந்தி வாகனம் உள்ளது. இந்த அதிகார நந்தியை தமிழ்ப் பேரறிஞர் தெ.பொ. மீனாட்சி சுந்தரனாரின் தந்தை பொன்னுசாமி கிராமணி என்பவர் செய்து கொடுத்தார்.

6. ஆந்திர மாநிலம் லபோட்சியில் உள்ள கருங்கல்லில் வடிக்கப்பட்ட நந்தியே இந்தியாவில் உள்ள கல் நந்திகளில் பெரிய நந்தியாம்.

7. தமிழ்நாடு மக்களுக்கு நந்தி என்றதும் தஞ்சை பெரிய கோவில் நந்திதான் நினைவுக்கு வரும். இந்த நந்தி ஒரே கல்லால் ஆனது.

8. மதுரை ஆவணி மூல வீதியில் "மாக்காளை" எனப்படும் சுதையால் அமைக்கப்பட்ட பிரமாண்ட நந்தி உள்ளது. இத்தகைய மாக்காளை நந்திகளை நெல்லை, சுசீந்திரம், ராமேஸ்வரம், திருவிடை மருதூர் ஆலயங்களிலும் காணலாம்.

9. திருவண்ணாமலை கிரிவலப் பாதையில் ஜோதி நந்தி உள்ளது. இந்த நந்தி முன் தீபம் ஏற்றி வலம் வந்து மலையை நோக்கி வழிபடுவதை பக்தர்கள் வழக்கத்தில் கொண்டுள்ளனர்.

10. திருவண்ணாமலை கிரிவலப் பாதையில் குறிப்பிட்ட ஒரு இடத்தில் இருந்து பார்த்தால், மலையானது, நந்தி ஒன்று படுத்து இருப்பது போன்ற தோற்றத்தில் காட்சித்தரும். அந்த இடத்தை "நந்திமுக தரிசனம்" என்கிறார்கள்.

11. மைசூர் சாமுண்டி மலை மீதுள்ள நந்தி கண்கவர் அழகான நந்தியாகும். இது சுற்றுலா பயணிகளை கவரும் வகையில் அமைக்கப்பட்டுள்ளது.

12. கேரள மாநிலம் வைக்கத்தில் மகாதேவ ஆலயம் உள்ளது. அங்கு 4 மூலைகளிலும் நந்தி வைக்கப்பட்டுள்ளது.

13. மராட்டிய மாநிலம் புனேயில் உள்ள நந்திக்கு கருவறை நந்தி என்று பெயர்.

14. திருவாரூர் தியாகராஜர் கோவில் சன்னதியில் ஈசனை ஆச்சரியத்துடன் பார்த்தபடி எழுந்து நிற்கும் நிலையில் நந்தி உள்ளது. இந்த நந்தியை வழிபட்டால் செய்த பாவங்கள் எல்லாம் தொலைந்து போகும் என்பது நம்பிக்கை.

15. திருமந்திரம் எனும் நூலை எழுதிய திருமூலருக்கு குருவாக நந்தி திகழ்ந்தார். திருமூலருக்கு நந்தி பெருமான்தான் 9 வேத ஆகமங்களை விளக்கி அருளியதாக புராணங்களில் குறிப்பிடப்பட்டுள்ளது.

16. சனகர், சனந்தர், சனாதனர், சனத்குமார், பதஞ்சலி, சிவயோக மாமுனி, வியாக்கிரமர், திருமூலர் ஆகிய 8 பேரும் நந்தி பெருமானின் மாணவர்களாவர்.

17. கர்நாடக மாநிலம் கோலார் மாவட்டத்தில் நந்தி துர்கா மலையே பரவலாக நந்தி மலை என்று அழைக்கப்படுகிறது. நந்தி மலையே பென்னாறு, பாலாறு பொன்னையாறு ஆகிய ஆறுகளின் பிறப்பிடமாக கருதப்படுகிறது. கடல் மட்டத்தில் இருந்து 1,500 அடி உயரத்தில் இருக்கின்றது. ஆயிரம் வருடத்து பழமை வாய்ந்த நந்தி கோவிலால் நந்தி மலை என்ற பெயர் ஏற்பட்டது.

18. நந்திகேசுவரரின் வரலாற்றை லிங்க புராணம் கூறுகிறது. பிறப்பில் எம்பெருமானாகிய சிவபெருமானே நந்திகேசுவரராகப் பிறந்து கணங்களின் தலைவரானார் என்பது புராண மரபு.

19. இந்திய வர லாற்றை ஆராய்ந்தால் தத்துவம், யோகம், நாட்டியம், இசை, ஆயுர்வேதம், அஸ்வவேதம், காமவேதம் முதலிய பல்வேறு சாத்திரங்களைத் தோற்றிவைத்தவராக நந்திகேசுவரர் என்ற முனிவர் வாழ்ந்திருக்கிறார் என அறியலாம்.

20. சிவபெருமான் நாட்டியக் கலையைப் பிரம்மாவுக்கு கற்றுக் கொடுக்க அம்முறையை அறிந்த நந்தி பரத முனிவருக்குப் போதித்தார் என்று அபிநய தர்ப்பணம் கூறுகிறது.

21. தமிழ்நாட்டில் ஆடவல்ல பெருமான் தண்டுவுக்கு நாட்டியம் கற்றுக்கொடுப்பதாக ஒரு சிற்பம் மாமல்லபுரத்தில் தர்மராஜ ரதத்தில் உள்ளது. இங்கு சிவன் நாட்டியாசிரியராகவும் தண்டு முனிவர் மனித உருவிலும் உள்ளனர்.

22. காஞ்சிபுரத்தில் ராஜ சிம்மன் கட்டிய கைலாய நாதராலயத்தில் பின்புறச் சுவரில் ஒரு சிற்பம் உள்ளது. அதில் சிவபிரான் ஊர்த்துவதாண்டவம் புரிகிறார். அவர் அருகில் நந்திகேசுவரர் ஆனந்தமாக நாட்டியம் கற்றுக் கொண்டு ஆடுகிறார்.

23. தமிழ்நாட்டில் நந்திகேசுவர ரின் மதம் கி.பி. 700லேயே சிறப்பிடம் பெற்றிருந்தது.

24. தமிழ்நாட்டிலும் கேரளத்திலும் பிற இடங்களிலும் உள்ள சிற்பங்களில் சிவன் ஆடும்போது நந்திகேசுவரர் பஞ்சமுக வாத்தியம் என்னும் குடமுழா வாத்தியத்தை வாசிப்பதாக உள்ளதைக் காணலாம். திருவாரூர், திருத்துறைபூண்டி ஆகிய தலங்களில் இன்றும் பஞ்சமுக வாத்தியம் வாசிக்கப்படுகிறது.

25. பஞ்சமுக வாத்தியலடீசணம் என்னும் சுவடியில் குடமுழா வாத்தியம் நந்திகேசுவரரால் இசைக்கப்பட்டது என்றும், ஆதலின் இதை இசைக்கும் முன்னர் நந்திகேசுவரருக்குச் சிறப்பு வழிபாடு செய்ய வேண்டும் என்றும் கூறுகிறது.

26. காமசாஸ்திரத்தை தோற்றுவித்தவரும் நந்திகேசுவரரே என்று பல நூல்கள் கூறுகின்றன. நந்தி இயற்றிய பல செய்யுட்களை "ரதிரகசியம்" என்று தம் நூலில் கொக்கோகர் மேற்கோளாகக் காட்டுகிறார்.

27. ஆகம சாஸ்திரங் களையும், சைவசித்தாந்த தத்துவங்களையும் சிவபெருமானிடம் அறிந்து உலகுக்குப் போதித்தவர் நந்திகேசுவரரே. சைவமர பில் தலையாயது "சிவஞான போதம்" என்னும் நூல். இதை நந்திகேசுவரரே முதலில் போதித்தார்

28. சிவாலயங்களில் துவாரபாலர் இருவரில் தலையில் சூலம் தரித்து நிற்பவர் நந்திகேசுவரர் ஆவார்.

29. சிதம்பரம் நடராஜப் பெருமானின் கோவிலில் நான்கு கோபுரங்களிலும் அதிகார நந்தியின் உருவத்தைக் காணலாம்.

30. நந்திகேசுவரரின் மறு அவதாரமாக அனுமான் கருதப்படுகிறார்.

31. சில சிவாலயங்களில் நந்திக்குப் பதிலாகக் குரங்கு துவாரபாலனாகத் திகழ்வதைக் காணலாம். எவ்வாறு சிவதத்துவத்தை நந்தி வாயிலாகப் பரமன் போதித்தாரோ அதே போல ராமதத்துவம் அனுமன் வாயிலாகப் போதிக்கப்பட்டது.

32. தானும் நந்தியும் வேறல்ல, ஒருவரே என்று சிவபெருமான் நந்தி புராணத்தில் கூறுகிறார். நந்தியைத் தொழுவது சிவபெருமானைத் தொழுவதே ஆகும்.

33. முனிவர்களுக்கும் சித்தர்களுக்கும் யோகி களுக்கும் நந்திதேவரே ஆதி குரு.

34. "நந்தி" என்ற வார்த்தையுடன் "ஆ" சேரும்போது "ஆநந்தி" என்ற பொருள் தருகிறது. "நீயும் ஆனந்தமாக இரு, பிறரையும் ஆனந்தமாக வைத்திரு!" என்று சிவபெருமான் நந்திக்கு அளித்த வரம் அது.

35. நந்தியைத் தொழாமல் சிவபெருமானைத் தொழ முடியாது. ஆலயத்தில் நந்தியை மட்டுமே தொழுதுவிட்டு திரும்பிவிட்டால் கூட சிவபெருமானை வணங்கியதன் முழுபலனும் கிட்டும்.

36. ஆலயங் களைக் காவல் காக்கும் அதிகாரமும் நந்திக்கே உரியது என்பது தெளிவாகிறது. இதன் அடையாளமாகத் தான் திருக்கோவில் களின் மதில் சுவர்களில் நந்தியின் திருவுருவை அமைத்துள்ளனர்.

37. நந்தி தேவருக்கு சிவ பெருமானைப் போலவே நெற்றிக்கண்ணும் நான்கு புஜங்களும், கையில் பிரம்பும், உடைவாளும், இருபுஜங்களில் மான் மழுவும் உண்டு. மானும் மழுவும் வேதத்தைக் குறிக்கிறது. மழு வீரத்தை அல்லது ஆண்மையைக் குறிக்கிறது எனவும் கூறுவர்.

38. நந்திக்கு இவ்வுலகத்தில் எதையும் கண்டிக்கவும் தண்டிக்கவும் அதிகாரம் வழங்கியுள்ளான் பரமேஸ்வரன்.

39. நந்தியின் அருள் இருந்தால்தான் மனிதர்களுக்கு மட்டுமின்றி தேவர்களுக்கும் முக்தி கிடைக்கும். அதனாலேயே தேவர்களும் நந்திதேவரைப் போற்றித் துதிக்கின்றனர்.

40. எல்லா உயிர்களையும் ஒரு காலத்தில் ஓய்வு படுத்துதல் மகாசங்காரம் எனப்படும். இந்த அதிகாரத்தை சிவபெருமான் நந்தி தேவருக்கு வழங்கியிருக்கிறார்.

41. நந்திதேவருக்கு ருத்திரன் என்ற பெயரும் உண்டு. ருத் என்பது துக்கம். ரன் என்பது ஓட்டுகிறவன். துக்கத்தை ஓட்டுகிறவன் என்பதே ருத்திரன். தூயவன், சைலாதி எனவும் நந்தியை அழைப்பர்.

42. மாலாங்கன், இந்திரன், சோமன், பிரமன், ருத்திரன், கந்துரு, காலாங்கி, கஞ்சமாலையன் போன்ற தேவர்களெல்லாம் நந்தியைக் குருவாகக் கொண்டு வேதம் கற்றவர்கள் ஆவர்.

43. பிரவிர்த்தி என்ற சேர்க்கையை விட்டு நிவிருத்தி என்ற விலகலைத் தேர்ந்தெடுப்பது ஞானத்தின் மார்க்கம். இதைக் கற்றுக் கொடுத்தவர் நந்திதேவரே. இவர் வழி வந்தவர்களே மெய் கண்ட சந்தானத்தின் குருபரம்பரை என்றழைக் கப்படு கிறார்கள்.

44. சிவபெருமானின் முக்கண்ணின் பார்வைக்கு எதிரில் நிற்க நந்திதேவரைத் தவிர வேறுயாராலும் இயலாது. இது சிவபெருமானே நந்தி தேவருக்கு அளித்த வரமாகும்.

45. சிவ பெருமான் திருநடனம் புரிகையில் நந்திதேவரே மத்தளம் வாசித்ததாக சிவபுராணம் கூறுகிறது.

46. பிரதோஷ காலம் மட்டுமின்றி எக்காலத்தும் நாம் சிவபெருமானிடம் வைக்கும் வேண்டுதல் களை நந்திதேவரிடம் வைத்தால் போதும். அவர் அதைப் பரமேஸ்வரனிடம் கொண்டு சேர்த்துவிடுவார் என்பது ஐதீகம்.

47. நந்தியை வழிபடும்போது, "சிவனடியில் சரணம் புகுந்து சிவத்தியானத்தில் ஆழ்ந்திருக்கும் மகா புண்ணியம் பெற்ற நந்திகேசுவரரே! சன்னிதிக்குச் சென்று உமையோடு கூடிய ஈஸ்வரனைத் தரிசிக்க எனக்கு உத்தரவு தருக" என்று பிரார்த்திக்க வேண்டும்.

48. நந்திதேவருக்கு அருகம்புல் மாலையும், சிவப்பு அரிசி நிவேதனமும் நெய்விளக்கும் வைத்து வழிபட வேண்டும்.

49. பிரபஞ்சத்தில் உள்ள தீர்த்தங்கள் எல்லாம் பிரதோஷ காலத்தில் பீஜத்தை வந்தடைகின்றன. அதனால் நந்தியின் பீஜத்தைத் தொட்டு வணங்கிய பிறகே சிவதரிசனம் காணவேண்டும். பிறகு வாலைத் தொட்டு வணங்க வேண்டும்.

50. நாட்டியம் பயில்வோரும் இசை பயில்வோரும் நந்தியை வழிபட்டால் அவர்களின் கலைகள் தடையின்றி சிறந்து வளரும்.

நந்தியை சிவபெருமான் தன் மகனாகவே ஏற்றுக்கொண்டார். உரிய வயதில் அவனுக்குத் திருமணம் செய்து வைக்க எண்ணிய சிவன், வசிஷ்ட முனிவரின் பேத்தியை மணமகளாகத் தேர்ந்தெடுத்து, பங்குனி மாத பூச நட்சத்திர நாளில் சிறப்பாகத் திருமணம் செய்து வைத்தார்.

இந்த நிகழ்ச்சி திருமழபாடியில் மேற்சொன்ன நாளில் கோலாகலமாக நடைபெறும். பார்வதியும் பரமேஸ்வரனும் திருவையாறிலிருந்து பல்லக்கில் வருவர். நந்தி மாப்பிள்ளை கோலத்தில், வெள்ளியாலான தலைப்பாகை அணிந்து, கையில் செங்கோல் ஏந்தி, குதிரை வாகனத்தில் மேளதாளங்கள் முழங்க வைத்தியநாதன்பேட்டை வழியாகத் திருமழபாடி வருவார்.

திருமண விழா முடிந்ததும் புனல்வாசல் வழியாக திருவையாறு திரும்பிச் செல்வார். இதைத்தான் 'வருவது வைத்திய நாதன் பேட்டை, போவது புனல்வாசல் என்பர்.

நந்தி திருமணத்தின் போது பல தலங்களில் இருந்து பல பொருட்கள் வரும். திருப்பழனத்தில் இருந்து பழ வகைகள் வரும். திருப்பூந்துருத்தியில் இருந்து மலர் மாலைகள் வரும், திருநெய்த்தானத்திலிருந்து யாகத்திற்கும் சமையலுக்குமான நெய் வரும்.

திருச்சோற்றுத்துறையில் இருந்து அறுசுவை அன்ன வகைகள் வரும். இந்தத் தலங்களெல்லாம் திருமழபாடியைச் சுற்றி அமைந்துள்ளன. ஒவ்வொரு ஆண்டும் இந்த திருமண விழா மார்ச் அன்று நடைபெறும்.

இதைக் காணும் திருமணமாகாத ஆண்களுக்கும், பெண்களுக்கும் விரைவில் திருமணம் கூடி வரும் என்பர். 'நந்திக் கல்யாணம் கண்டால் முந்திக் கல்யாணம்' என்பது சொல் வழக்கு. இவ்விழாவைக் காண்போர் இல்லத்தில் மகிழ்ச்சியும் ஒற்றுமையும் நிலவும், சுபகாரியங்கள் நடைபெறும்.