நீங்கள் தேடியது "by-elections"

திருவனந்தபுரம்:

மக்களவை தேர்தலில் வயநாடு மற்றும் ரேபரேலி தொகுதியில் போட்டியிட்டு வெற்றி பெற்ற காங்கிரஸ் கட்சியின் முன்னாள் தலைவர் ராகுல் காந்தி, ரேபரேலி தொகுதி எம்.பி.யாக பதவியேற்றார். அவர் வயநாடு தொகுதி எம்.பி. பதவியை ராஜினாமா செய்தார்.

இதனால் வயநாடு தொகுதிக்கு இடைத்தேர்தல் அறிவிக்கப்பட்டது. நாடு முழுவதும் பலத்த எதிர் பார்ப்புக்கு மத்தியில் நேற்று இடைத்தேர்தல் நடைபெற்றது. இங்கு காங்கிரஸ் கட்சி சார்பில் ராகுல் காந்தியின் சகோதரி பிரியங்கா காந்தி, இந்திய கம்யூனிஸ்டு கட்சி சார்பில் சத்யன் மொகேரி, பாரதிய ஜனதா சார்பில் நவ்யா ஹரிதாஸ் உள்ளிட்ட 16 பேர் போட்டியிட்டனர்.

வயநாடு தொகுதியை பொருத்தவரை காங்கிரஸ், பாஜக, இந்திய கம்யூனிஸ்டு கட்சிகளுக் கிடையே தான் கடும் போட்டி நிலவியது. இதனால் அந்த கட்சிகளின் சார்பில் போட்டியிட்ட வேட்பாளர்கள் தீவிர பிரசாரத்தில் ஈடுபட்டனர். நட்சத்திர வேட்பாளரான பிரியங்கா காந்தி 3 கட்டங்களாக பிரசாரம் செய்தார்.

அவருடன் அவரது சகோதரரான ராகுல் காந்தியும் பிரசாரத்தில் ஈடுபட்டார். அவர்கள் பிரசாரம் சென்ற இடங்களில் எல்லாம் கட்சி தொண்டர்கள் மற்றும் மக்கள் கூட்டம் அலைமோதியது. இதனால் இடைத்தேர்தலில் பிரியங்கா காந்திக்கு அதிக வாக்குகள் கிடைக்கக்கூடும் என்றும், வாக்குப்பதிவு சதவீதம் அதிகரிக்கும் எனவும் எதிர்பார்க்கப்பட்டது.

தேர்தலுக்கு முந்தைய பல கணிப்புகளிலும் அவ்வாறே கூறப்பட்டன. ஆனால் வயநாடு இடைத்தேர்தலில் கடந்த தேர்தல்களை விட வாக்குப்பதிவு சதவீதம் குறைந்தது. வாக்குப்பதிவு தொடங்கிய போது வாக்காளர்கள் ஆர்வமாக வந்து ஓடடுப் போட்ட நிலையில், நேரம் செல்லச்செல்ல வாக்காளர்களின் வருகை எதிர்பார்த்தபடி இல்லை.

அனைத்து வாக்குச்சாவடிகளிலும் வாக்காளர்களில் வருகை மிகவும் குறைவாகவே இருந்தது. இதன் காரணமாக வாக்குப்பதிவு சதவீதம் குறைந்தது. அங்கு 14 லட்சத்து 71 ஆயிரத்து 742 வாக்காளர்கள் உள்ள நிலையில், 64.69 சதவீத வாக்குகளே பதிவாகின. 2019-ம் ஆண்டு நடந்த மக்களவை தேர்தலில் வயநாடு தொகுதியில் 80.33 சதவீதம் வாக்குப்பதிவு ஆகியிருந்தது.

கடந்த மே மாதம் நடைபெற்ற மக்களவை தேர்தலில் 73.48 சதவீத வாக்குகள் பதிவாகியிருந்தன. அதனை ஒப்பிடுகையில் தற்போது நடந்த இடைத்தேர்தலில் வாக்குப்பதிவு 8.79 சதவீதம் குறைந்திருக்கிறது. ராகுல் காந்தி மற்றும் பிரியங்கா காந்தி பிரசாரத்தின் போது காணப்பட்ட உற்சாகம் கூட, நேற்று நடந்த இடைத்தேர்தலின் போது வாக்குச்சாவடிகளில் காணப்படவில்லை.

வயநாடு மக்களவை தொகுதியில் உள்ள 7 சட்டமன்ற தொகுதிகளிலும் வாக்குப்பதிவு மந்தமாகவே இருந்தது. இளம் வயதினர் பலர் மேற்படிப்புக்காக வெளி நாடுகளில் இருப்பதால், வாக்குச்சாவடிகளுக்கு இளைஞர்களின் வருகை மிகவும் குறைவாகவே இருந்தது. வாக்குப்பதிவு சதவீதம் குறைந்ததற்கு இது ஒரு காரணமாக கருதப்படுகிறது.

அதே நேரத்தில் கடந்த மே மாத இறுதியில் நடந்த வயநாடு நிலச்சரிவு அதிர்ச்சியில் இருந்து மக்கள் இன்னும் மீளவில்லை என்பதன் வெளிப்பாடாக இருக்கலாம் என்றும் கருதப்படுகிறது. நிலச்சரிவால் மிக அதிகமாக பாதிக்கப்பட்ட மேப்பாடியில் அமைக்கப்பட்டிருந்த வாக்குச்சாவடியில் மிக குறைந்த வாக்காளர்களே ஓட்டுப்போட வந்தனர்.

அவ்வாறு வந்தவர்களும் சோகத்துடனே காணப்பட்டனர். இப்படி பல்வேறு காரணங்களால் வாக்குப் பதிவு சதவீதம் குறைந்திருக்கிறது. வாக்குப்பதிவு சதவீதம் குறைந்திருப்பது வேட்பாளர்களின் வெற்றி வாய்ப்பை பாதிக்கக்கூடும் என்று அஞ்சப்படுகிறது. எப்படியும் வயநாடு தேர்தல் களத்தில் வெற்றிவாகை சூடப்போவது யார்? என்பது ஓட்டுக்கள் எண்ணிக்கை நடைபெற இருக்கும் வருகிற 23-ந்தேதி தெரிந்துவிடும்.

திருவனந்தபுரம்:

கேரள மாநிலத்தில் கடந்த ஏப்ரல் மாதம் நடந்த மக்களவை தேர்தலில் வயநாடு தொகுதியில் போட்டியிட்டு வெற்றி பெற்ற ராகுல்காந்தி, தனது எம்.பி. பதவியை ராஜினாமா செய்தார். இதனால் வயநாடு தொகுதிக்கு இடைத்தேர்தல் அறிவிக்கப்பட்டது.

அங்கு காங்கிரஸ் கட்சி யின் சார்பில் ராகுல் காந்தி யின் சகோதரி பிரியங்கா காந்தி, இந்திய கம்யூனிஸ்டு கட்சி சார்பில் சத்யன் மொகேரி, பா.ஜ.க. சார்பில் நவ்யா ஹரிதாஸ் உள்ளிட்ட 16 பேர் போட்டியிட்டனர். இடைத்தேர்தலுக்கான பிரசாரம் நேற்று முன்தினம் முடிவுக்கு வந்தது.

இந்தநிலையில் இடைத்தேர்தலுக்கான வாக்குப்பதிவு இன்று நடந்தது. இதற்காக தொகுதி முழுவதும் மொத்தம் 1,354 வாக்குச்சாவடிகள் அமைக்கப்பட்டிருந்தன.

மின்னணு வாக்குப்பதிவு எந்திரத்தில் கோளாறு ஏற்பட்டதால் ஒரு சில வாக்குச்சாவடிகளை தவிர, அனைத்து வாக்குச்சாவடிகளிலும் காலை 7 மணிக்கு வாக்குப்பதிவு தொடங்கியது.

அனைத்து வாக்குச்சாவடிகளிலும் வாக்காளர்கள் ஆர்வமுடன் வந்து வாக்களித்தனர். பல வாக்குச்சாவடிகளில் ஓட்டுப்பதிவு தொடங்குவதற்கு முன்னதாகவே வாக்காளர்கள் வந்து காத்து நின்றதை காண முடிந்தது. ஏராளமான இளம் வாக்காளர்கள் மற்றும் பெண்கள் காலையிலேயே ஆர்வமாக வந்து ஓட்டு போட்டனர்.

நகர்ப்புறங்களை காட்டிலும் கிராமப்புறங்களில் வாக்காளர்கள் அதிக ஆர்வத்துடன் வந்து ஓட்டு போட்டனர். ஓட்டுப்பதிவு தொடங்கிய ஒன்றரை மணி நேரத்தில் வயநாடு மக்களவை தொகுதியில் 6.97 சதவீதம் வாக்குப்பதிவு ஆகியிருந்தது.

காங்கிரஸ் வேட்பாளர் பிரியங்கா காந்தி கல்பெட்டாவில் உள்ள ஒரு பள்ளியில் செயல்பட்ட வாக்குச்சாவடிக்கு இன்று காலை வந்து ஓட்டுப் பதிவை பார்வையிட்டார்.

இதேபோல் இந்திய கம்யூனிஸ்டு மற்றும் பா.ஜ.க. வேட்பாளர்களும் சில வாக்குச்சாவடிகளுக்கு சென்று பார்வையிட்டார்கள்.

அனைத்து வாக்குச் சாவடிகளிலும் பலத்த பாதுகாப்பு ஏற்பாடுகள் செய்யப்பட்டிருந்தன. பதட்டமான வாக்குச்சாவடிகளில் கூடுதல் போலீசார் பாதுகாப்பு பணியில் ஈடுபட்டிருந்தனர். மேலும் துணை ராணுவப் படையினரும் பாதுகாப்பு பணியில் ஈடுபட்டார்கள்.

வயநாடு தொகுதி இடைத்தேர்தலில் மொத்தம் 14 லட்சத்து 71 ஆயிரத்து 742 வாக்காளர்கள் வாக்களிக்கின்றனர். மாலை 6 மணி வரை வாக்குப்பதிவு நடைபெறுகிறது.

வாக்குச்சாவடிகளில் வாக்காளர்களுக்கு குடிநீர் வசதி உள்ளிட்ட அனைத்து அடிப்படை வசதிகளும் செய்யப்பட்டிருந்தன.

வயநாடு மக்களவை தொகுதியில் கடந்த தேர்த லில் ராகுல்காந்தி 6லட்சத்து 47 ஆயிரத்து 445 வாக்குகளும், அவரை எதிர்த்து போட்டியிட்ட இந்திய கம்யூனிஸ்டு வேட்பாளர் அன்னி ராஜா 2 லட்சத்து 83 ஆயிரத்து 23 வாக்குகளும், பா.ஜ.க. வேட்பாளர் சுரேந்திரன் 1 லட்சத்து 41 ஆயிரத்து 45 வாக்குகளும் பெற்றிருந்தனர் என்பது குறிப்பிடத்தக்கது.

அதேபோன்று செலக்கரா சட்டசபை தொகுதியின் எம்.எல்.ஏ.வாக இருந்த மார்க்சிஸ்ட் கம்யூனிஸ்டு கட்சியின் ராதாகிருஷ்ணன் ஆலத்தூர் மக்களவை தொகுதியிலும், பாலக்காடு சட்டசபை தொகுதி எம்.எல்.ஏ.வாக இருந்த காங்கிரஸ் கட்சியை சேர்ந்த ஷாபி பரம்பில் வடகரா மக்களை தொகுதியிலும் போட்டியிட்டு வெற்றி பெற்று எம்.பி. ஆகினர்.

இதனால் அவர்கள் தங்களின் எம்.எல்.ஏ. பதவியை ராஜினாமா செய்தனர். இதன் காரணமாக அந்த இரு சட்டசபை தொகுதிகளுக்கும் இடைத்தேர்தல் அறிவிக்கப்பட்டது.

அந்த தொகுதிகளுக்கும் வயநாடு மக்களவை தொகுதியுடன் சேர்த்து இடைத்தேர்தல் நடக்கும் என்று அறிவிக்கப்பட்டிருந்தது.

ஆனால் பாலக்காடு தொகுதிக்கான இடைத்தேர்தல் வருகிற 20-ந்தேதிக்கு மாற்றப்பட்டது. செலக்கரா சட்டசபை தொகுதிக்கு மட்டும் இன்று இடைத் தேர்தல் நடைபெற்றது. அங்கும் வாக்காளர்கள் ஆர்வமாக வந்து வாக்களித்தனர்.

இடைத் தேர்தல் காரணமாக செலக்கரா சட்டமன்ற தொகுதிக்குட்பட்ட பகுதிகளுக்கு இன்று பொதுவிடுமுறை விடப்பட்டிருந்தது.

திருவனந்தபுரம்:

கேரள மாநிலத்தில் ஏப்ரல் மாதம் நடந்த மக்களவை தேர்தலில் வயநாடு தொகுதியில் காங்கிரஸ் கட்சியின் முன்னாள் தலைவர் ராகுல்காந்தி போட்டியிட்டு வெற்றி பெற்றார். ஆனால் அவர் ரேபரேலி தொகுதியிலும் வெற்றி பெற்றதால், அவர் ரேபரேலி தொகுதி எம்.பி.யாகவே பதவியேற்றார்.

அவர் வயநாடு தொகுதி எம்.பி. பதவியை ராஜினாமா செய்ததால், அந்த தொகுதி காலியானது. வயநாடு மக்களவை தொகுதிக்கு வருகிற 13-ந்தேதி இடைத்தேர்தல் நடக்கிறது. அங்கு காங்கிரஸ் கட்சி சார்பில் பிரியங்கா காந்தி போட்டியிடுகிறார்.

அவரை எதிர்த்து பா.ஜ.க. சார்பில் நவ்யா ஹரிதாஸ், இந்திய கம்யூனிஸ்ட் கட்சி சார்பில் சத்யன் மொகேரி ஆகியோர் போட்டியிடுகின்றனர். வயநாடு தொகுதியில் இவர்களுடன் சேர்த்து மொத்தம் 16 பேர் போட்டியிடுகிறார்கள். தேர்தலுக்கு இன்னும் 8 நாட்களே இருப்பதால் அனைவரும் தீவிர பிரசாரத்தில் ஈடுபட்டு வருகின்றனர்.

பிரியங்கா காந்தியை பொருத்தவரை வேட்புமனு தாக்கல் செய்த கடந்தமாதம் 23-ந்தேதி தனது தேர்தல் பிரசாரத்தை தொடங்கினார். அவருக்கு ஆதரவாக ராகுல் காந்தியும் பிரசாரம் செய்தார். அதன் பிறகு அவர்கள் இருவரும் டெல்லிக்கு திரும்பிச் சென்றனர்.

இந்தநிலையில் பிரியங்கா காந்தி இரண்டாம் கட்ட தேர்தல் பிரசாரத்துக்காக கடந்த 3-ந்தேதி கேரளா வந்தார். அவர் தனது சகோதரரான ராகுல்காந்தியுடன் 3 மற்றும் 4-ந்தேதிகளில் வயநாடு தொகுதியில் தீவிர தேர்தல் பிரசாரத்தில் ஈடுபட்டார். அவர்கள் இருவரும் பல்வேறு பொதுக்கூட்டங்களில் கலந்து கொண்டு பேசினார்கள்.

2 நாட்கள் பிரசாரத்தை முடித்துக்கொண்டு ராகுல்காந்தி டெல்லி திரும்பிய நிலையில், வயநாட்டில் பிரியங்கா காந்தி தொடர்ந்து பிரசாரம் செய்து வருகிறார். அவர் திறந்தவெளி வாகனத்தில் சென்றபடியும், பொதுக் கூட்டங்களில் பங்கேற்று பேசியும் ஆதரவு திரட்டி வருகிறார்.

மேலும் பிரசாரத்துக்கு செல்லும் இடங்களில் உள்ள கல்லூரிகளுக்கு சென்று மாணவ-மாணவிகளுடன் கலந்துரையாடி வருகிறார். அவர் பிரசாரத்துக்கு செல்லும் இடங்களில் மக்களோடு மக்களாக இருந்து சகஜமாக பேசுவது அனைவரையும் கவரும் வகையில் உள்ளது.

தேர்தல் பிரசாரம் முடிய இன்னும் 6 நாட்களே இருக்கும் நிலையில், பிரியங்கா காந்தி தனது பிரசாரத்தை நாளை மறுநாளுடன் முடித்துக் கொள்கிறார்.

அவர் இன்று கோழிக்கோடு திருவம்பாடி, மலப்புரத்தில் உள்ள வண்டூர், ஏர்நாடு, நிலம்பூர் ஆகிய இடங்களில் பிரசாரம் செய்கிறார்.

அவர் நாளை இறுதிக்கட்ட பிரசாரத்தில் ஈடுபடுகிறார். அதன்பிறகு மீதமுள்ள நாட்களில் அவருக்கு ஆதரவாக கட்சியின் நிர்வாகிகள் தொகுதி முழுவதும் பிரசாரத்தில் ஈடுபட உள்ளனர்.

திருவனந்தபுரம்:

கடந்த பாராளுமன்ற தேர்தலில் கேரள மாநிலம் வயநாடு மற்றும் உத்தரப்பிர தேச மாநிலம் ரேபரேலியில் போட்டியிட்டு வெற்றி பெற்ற ராகுல்காந்தி, வய நாடு தொகுதி எம்.பி. பதவி யை ராஜினாமா செய்தார். இதனை தொடர்ந்து அந்த தொகுதி இடைத்தேர்தலை சந்திக்கிறது.

அடுத்த மாதம் (நவம்பர்) 13-ந் தேதி அங்கு வாக்குப் பதிவு நடக்கிறது. இந்த தொகுதியில் காங்கிரஸ் சார்பில் பிரியங்கா காந்தி வேட்பாளராக அறிவிக்கப்பட்டுள்ளார். அவர் வருகிற 23-ந் தேதி வேட்பு மனு தாக்கல் செய்ய உள்ளார்.

மனு தாக்கலுக்கு முன்னதாக அன்றைய தினம் அவர், தனது சகோதரரும், நாடாளு மன்ற எதிர்க்கட்சி தலைவருமான ராகுல்காந்தியுடன் வயநாட்டில் ரோடுஷோவில் பங்கேற்கிறார்.

காங்கிரஸ் கட்சி தேர்தல் பணிகளில் தீவிரம் காட்டிய நிலையில், பா.ஜ.க சார்பில் களம் இறங்கப் போவது யார்? என்பது எதிர்பார்ப்பை ஏற்படுத்தி வந்தது.

இந்த நிலையில் வயநாடு தொகுதி வேட்பாளராக கட்சியின் மாநில மகளிர் அணி தலைவர் நவ்யா ஹரிதாசை, பா.ஜ.க. அறிவித்துள்ளது.

வயநாடு வேட்பாளராக அறிவிக்கப்பட்டுள்ள நவ்யா ஹரிதாஸ், தற்போது கோழிக்கோடு மாநகராட்சியில் பா.ஜ.க. தலைவராக உள்ளார்.

2 முறை இந்த மாநகராட்சியில் கவுன்சிலராக தேர்வு செய்யப்பட்ட அவர், கடந்த 2021-ம் ஆண்டு சட்டசபை தேர்தலில் கோழிக்கோடு தெற்கு தொகுதியில் போட்டியிட்டார். ஆனால் காங்கிரஸ் வேட்பாளர் அகமது தேவர்கோவிலிடம் வெற்றி வாய்ப்பை இழந்தார். தற்போது அவர் மீண்டும் தேர்தல் களம் இறங்க உள்ளார்.

36 வயதான நவ்யா ஹரிதாஸ், பி.டெக் என்ஜினீயர் ஆவார். பா.ஜ.க.வில் வளர்ந்து வரும் பெண் தலைவராக கருதப்படும் இவர், கட்சியின் பல்வேறு நிகழ்ச்சிகளில் பங்கேற்று கட்சியினரிடம் நன்மதிப்பை பெற்றுள்ளார்.

வேட்பாளராக அறிவிக்கப் பட்ட நவ்யா ஹரிதாஸ் கூறுகையில், வயநாட்டில் உள்ள மக்களுக்கு சில முன்னேற்றம் தேவை. ராகுல்காந்தி வயநாட்டு மக்களின் தேவைகளை பூர்த்தி செய்ய வில்லை.

வயநாடு மக்களுக்கு அவர்களின் பிரச்சனைகளுக்கு தீர்வு காணும் சிறந்த நாடாளுமன்ற உறுப்பினர் தேவை. உள்ளூர் நிர்வாகத்தின் பின்னணியுடன் பொது சேவையில் எனக்கு அனுபவம் உள்ளது. கடந்த 8 ஆண்டுகளாக அரசியல் துறையில் மக்களுக்கு சேவை செய்து வருகிறேன். அவர்களுடன் எப்போதும் இருந்து வருகிறேன் என்றார்.

வயநாடு தொகுதியில் கம்யூனிஸ்டு சார்பில் சத்யன் மொகேரி போட்டியிடுகிறார். எனவே அங்கு தற்போது மும்முனை போட்டி நிலவுகிறது.

திருவனந்தபுரம், அக்.16

கேரள மாநிலத்தில் உள்ள 20 மக்களவை தொகுதிகளுக்கான தேர்தல் கடந்த ஏப்ரல் மாதம் 26-ந்தேதி நடைபெற்றது. தேர்தல் முடிவுகள் கடந்த ஜூன் மாதம் வெளியானது. இதில் 18 தொகுதிகளின் காங்கிரஸ் கூட்டணி கட்சி களும், பாஜக மற்றும் மார்க்சிஸ்ட் கம்யூனிஸ்ட் கட்சிகள் தலா ஒரு தொகுதியிலும் வெற்றி பெற்றன.

வயநாடு தொகுதியில் காங்கிரஸ் சார்பில் மீண்டும் போட்டியிட்ட ராகுல் காந்தி வெற்றி  பெற்றிருந்தார். ஆனால் அவர் தனது தாய் சோனியா காந்தியின் தொகுதியாக உத்தரப் பிரதேச மாநிலம் ரேபரேலி தொகுதியிலும் போட்டியிட்ட நிலையில் அங்கும் வெற்றிபெற்றார். இரண்டு தொகுதிகளில் ஒன்றை மட்டுமே தேர்தெடுக்க வேண்டும் என்ற சூழல் எழுந்ததால் வட மாநிலங்களில் காங்கிரசை வலுப்படுத்தும்   நோக்கத்தில் ரேபரேலி தொகுதி எம்.பி.யாகவே பதவியேற்றார். இதனால் வயநாடு மக்களவை தொகுதி காலியான தாக அறிவிக்கப்பட்டது.

மேலேயும் மக்களவை தேர்தலில் கேரளாவில்  2 எம்.எல்.ஏ.க்.கள் போட்டியிட்டு வெற்றி பெற்றனர். அதாவது செலக்கரா தொகுதியின் எம்.எல்.ஏ.வாக இருந்த மார்க்சிஸ்ட் கம்யூனிஸ்டு கட்சியின் ராதாகிருஷ்ணன் ஆலத்தூர் மக்களவை தொகுதியில் போட்டியிட்டு வெற்றி பெற்றார்.

பாலக்காடு தொகுதி எம்.எல்.ஏ.வாக இருந்த காங்கி ரஸ் கட்சியை சேர்ந்த ஷாபி பரம்பில் வடகரா மக்களை தொகுதியில் போட்டியிட்டு வெற்றி பெற்றார். அவர்கள் இருவரும் எம்.பி.க்களாக பதவியேற்றனர். இதனால் செலக்கரா மற்றும் பாலக்காடு சட்டமன்ற தொகுதிகளும் காலியான தாக அறிவிக்கப்பட்டன.

வயநாடு மக்களவை தொகுதி மற்றும் செலக்கரா-பாலக்காடு சட்டமன்ற தொகுதிகள் ஆகிய 3 தொகுதிகளும் 4 மாதங்களுக்கு மேலாக காலியாக இருந்ததால், அந்த தொகுதிகளுக்கு விரைவில் இடைத்தேர்தல் நடத்தப்படலாம் என்ற சூழல் நிலவியது.  

இந்தநிலையில் வயநாடு மக்களவை தொகுதி, பாலக்காடு மற்றும் செலக்கரா சட்டமன்ற தொகுதிகளுக்கான இடைத்தேர்தல் தேதியை தேர்தல் ஆணையம் நேற்று அறிவித்தது. மகாராஷ்டிரா, ஜார்கண்ட் சட்டமன்றத் தேர்தல் அறிவிப்புடன் இந்த அறிவிப்பும் வெளியாகியுள்ளது.  அதன்படி அந்த 3 தொகுதிகளுக்கும் வருகிற நவம்பர் 13-ந்தேதி இடைத் தேர்தல் நடத்தப்படும் என்றும், அதற்கான வேட்பு மனு தாக்கல் வருகிற 18-ந்தேதி தொடங்கும் எனவும் அறிவிக்கப்பட்டது.

இடைத்தேர்தல் தேதி அறிவிக்கப்பட்டதையடுத்து கேரள மாநிலத்தில் தேர்தல் நடத்தை விதிகள் உடனடியாக அமலுக்கு வந்தன. நாளைமறுநாள் வேட்புமனு தாக்கல் தொடங்க இருக்கிறது. அரசியல் கட்சியினரும் இடைத்தேர்த லுக்கு தயாராக தொடங்கி விட்டனர். தேர்தலில் போட்டியிடும் வேட்பாளர்கள் விவரங்களை காங்கிரஸ் கட்சி ஏற்கனவே அறிவித்துவிட்டது.

வயநாடு மக்களவை தொகுதியில் பிரியங்கா காந்தி போட்டியிடுவார் என்று காங்கிரஸ் கட்சி சார்பில் கடந்த சில மாதங்களுக்கு முன்னதாகவே தெரிவிக்கப் பட்டிருந்த நிலையில், அது தொடர்பான அதிகாரபூர்வ அறிவிப்பை நேற்று இரவு வெளியாகியுள்ளது.

இதனால் வயநாடு தொகுதியில் காங்கிரஸ் கட்சி சார்பில் பிரியங்கா காந்தி போட்டியிடுவது உறுதியாகி இருக்கிறது. அதேபோல் பாலக்காடு மற்றும் செலக்கரா சட்ட சபை தொகுதிகளில் போட்டியிடும் வேட்பாளர்களையும் காங்கிரஸ் கட்சி அறிவித்துவிட்டது.

தொடர்ந்து வயநாடு தொகுதியில் போட்டியிடும் பிரியங்காகாந்தி பிரசா ரத்தில் ஈடுபட கேரளாவுக்கு வருகிறார். அவருக்கு ஆதரவாக பிரசாரத்தில் ஈடுபட ராகுல்காந்தியும் வர உள்ளார். மற்ற காட்சிகள் யாரை நிறுத்துவது என்பது குறித்து ஆலோசித்து வருகின்றன.

வயநாடு மக்களவை தொகுதியில் பிரியங்கா காந்தி போட்டியிடுவார் என்று காங்கிரஸ் கட்சி அறிவித்திருப்பதால், அவருக்கு கடும் போட்டியாக இருக்கும் வகையில் வேட்பாளரை களமிறக்க பாஜக மற்றும் கம்யூனிஸ்டு கட்சிகள் முடிவு செய்துள்ளன. பாலக்காடு சட்டசபை தொகுதி ஏற்கனவே காங்கிரஸ் வசம் இருந்தது.

அதனை மீண்டும் தனதாக்கிக்கொள்ள காங்கிரஸ் திட்டமிட்டு தேர்தல் பணி களை மேற்கொண்டு வருகிறது. அதேபோல் செலக்கரா தொகுதியை மீண்டும் தனதாக்கிக்கொள்ள கம்யூனிஸ்ட் கட்சி திட்டமிட்டிருக்கிறது. அதற்கு தகுந்தாற்போல் வேட்பாளர்களை களமிறக்க இரு கட்சிகளும் முடிவு செய்துள்ளன. இவர்களுக்கு மத்தியில் பாஜகவும் வேட்பாளர்களை களமிறக்குகிறது.

பாஜக மூத்த தலைவர் சுப்ரமணிய சுவாமி, பிரதமர் நரேந்திர மோடி மற்றும் உள்துறை அமைச்சர் அமித் ஷாவால் கட்சி வழிநடத்படுவதை தொடர்ந்து விமர்சித்து வருபவர் ஆவார். தற்போது தமிழ்நாடு உட்பட 7 மாநிலங்களில் நடந்து முடிந்த சட்டமன்ற இடைத்தேர்தலில் மொத்தம் 13 இடங்களில் காங்கிரஸ் தலையாமையிலான இந்தியா கூட்டணி 10 இடங்களில் வெற்றி பெற்றுள்ளது.

சுயேட்சை வேட்பாளர் ஒரு இடத்தைப் பிடித்த நிலையில் பாஜக வெறும் 2 இடங்களில் மட்டுமே வெற்றியை பதிவு செய்தது. சமீபத்தில் நடந்த மக்களவைத் தேர்தலிலும் ஆட்சியமைக்க தனிப்பெரும்பான்மையை இழந்த பாஜக கூட்டணி கட்சிகளின் ஆதரவுடன் மோடி தலைமையில் மீண்டும் ஆட்சிக்கு வந்துள்ளது. அதைத்தொடர்ந்து நடந்த இடைத் தேர்தலிலும் பாஜக சறுக்களை சந்தித்துள்ளது அரசியல் வட்டாரங்களில் சலசலப்பை ஏற்படுத்தியுள்ளது. இந்நிலையில் பாஜகவின் இடைத்தேர்தல் சறுக்கல் குறித்து சுப்ரமணிய சுவாமி மோடியை கடுமையாக விமர்சித்துள்ளார்.

அவர் தனது எக்ஸ் பக்கத்தில் வெளியிட்டுள்ள பதிவில், பாஜகவில் இருக்கும் நாம் நமது கட்சி டைட்டானிக் கப்பல் போல் மூழ்குவதை பார்க்க வேண்டும் என்றால் அதற்கு மோடியின் தலைமையே சிறந்ததாகும். இடைத்தேர்தல் முடிவுகள் பாஜக நிரந்தரமாக மூழ்குவதற்கான விரிசல்கள் விழுந்து வருவதையே குறிக்கிறது என்று தெரிவித்துள்ளார். உள்ளடியாக சுப்ரமணிய சுவாமியின் இந்த கருத்து பாஜக மேலிடத்தில் புகைச்சலை ஏற்படுத்தியுள்ளது.

நாடு முழுவதும் 7 மாநிலங்களில் உள்ள 13 சட்டமன்ற தொகுதிகளுக்கு கடந்த 10-ந்தேதி இடைத்தேர்தல் நடைபெற்றது.

அதன்படி, மேற்கு வங்காளத்தில் உள்ள ராய்கஞ்ச், ரனாகாட் தக்சின், பாக்தா மற்றும் மணிக்தலா ஆகிய 4 தொகுதிகள், மத்திய பிரதேசத்தில் அமர்வாரா, பீகாரில் ரூபாலி, உத்தரகாண்டில் உள்ள பத்ரிநாத் மற்றும் மங்களூர், பஞ்சாப்பில் ஜலந்தர் மேற்கு, இமாசல பிரதேசத்தில் டேஹ்ரா, ஹமிர்பூர் மற்றும் நலகர் ஆகிய தொகுதிகளுக்கும் இடைத்தேர்தல் நடைபெற்றது.

இதேபோல், தமிழ்நாட்டில் விழுப்புரம் மாவட்டம் விக்கிரவாண்டி தி.மு.க. சட்டமன்ற தொகுதி உறுப்பினராக இருந்த நா.புகழேந்தி கடந்த ஏப்ரல் மாதம் மரணம் அடைந்ததையடுத்து, விக்கிரவாண்டி தொகுதிக்கு இடைத்தேர்தல் நடைபெற்றது.

இந்த நிலையில் இடைத்தேர்தல் நடைபெற்ற 13 தொகுதிகளிலும் இன்று வாக்குகள் எண்ணப்பட்டு முடிவுகள் அறிவிக்கப்படுகின்றன.

இந்த நிலையில் 13 தொகுதிகளிலும் காலை 8 மணிக்கு வாக்கு எண்ணிக்கை தொடங்கி விறுவிறுப்பாக நடைபெற்று வருகிறது. அதன்படி, 11 தொகுதிகளில் இந்தியா கூட்டணி முன்னிலையில் உள்ளது.

பஞ்சாப்பில் உள்ள ஜலந்தர் மேற்கு தொகுதியில் இந்தியா கூட்டணியில் உள்ள காங்கிரஸ் மற்றும் ஆம் ஆத்மி இடையே பிரதான போட்டி நிலவுகிறது. இதில், ஒரு தொகுதியில் ஆம் ஆத்மி முன்னிலையில் உள்ளது.

மற்ற 12 தொகுதிகளிலும் தேசிய ஜனநாயக கூட்டணி - இந்தியா கூட்டணி கட்சிகள் இடையே போட்டி நிலவி வருகிறது. இமாச்சலின் தேஹ்ரா, ஹிமிர்பூர், நாலாகர் ஆகிய 3 தொகுதிகளில் காங்கிரஸ் முன்னிலையில் உள்ளது.

இதேபோல், உத்தரகாண்டின் பத்ரிநாத் மற்றும் மங்களூர் ஆகிய 3 தொகுதிகளில் காங்கிரஸ் முன்னிலை வகிக்கிறது. இமாச்சலின் தேஹ்ரா தொகுதி, மத்திய பிரதேசத்தில் அமர்வாரா தொகுதியில் பாஜக முன்னிலையில் உள்ளது.

மேற்கு வங்கத்தில் இடைத்தேர்தல் நடைபெற்ற 4 தொகுதிகளிலும் திரிணாமுல் காங்கிரஸ் முன்னிலையில் உள்ளது.

சென்னை:

விக்கிரவாண்டி தொகுதி இடைத்தேர்தலில் தி.மு.க. இளைஞரணி செயலாளர் அமைச்சர் உதயநிதி ஸ்டாலின் வருகிற 7 மற்றும் 8 ஆகிய இரு தேதிகளில் வேனில் சென்று தீவிர பிரசாரம் செய்ய முடிவு செய்து உள்ளார்.

தி.மு.க. வேட்பாளர் அன்னியூர் சிவாவை ஆதரித்து அவர் எந்தெந்த பகுதிகளுக்கு சென்று பேசுவார் என்ற விவரம் வெளியிடப்பட்டுள்ளது.

அதன்படி 7-ந்தேதி (திங்கட்கிழமை) திருவாமத்தூர், காணை பனமலைப் பேட்டை, அன்னியூர் பகுதிகளில் பிரசாரம் செய்கிறார்.

8-ந்தேதி நேமூர், ராதாபுரம், விக்கிரவாண்டி பேரூராட்சி பகுதிகளிலும் அமைச்சர் உதயநிதி ஸ்டாலின் பிரசாரம் மேற்கொள்கிறார்.

விக்கிரவாண்டியில் அவர் பேசும் 8 இடங்களிலும் திரளான கூட்டத்தை சேர்க்க அமைச்சர்கள் இப்போதே தயாராகி வருகின்றனர்.

திண்டிவனம்:

திண்டிவனம் அருகே தைலாபுரம் தோட்டத்தில் இன்று பா.ம.க. நிறுவனர் டாக்டர். ராமதாஸ் நிருபர்களுக்கு பேட்டியளித்தார். அப்போது அவர் கூறியதாவது:-

தமிழகத்தில் சாதிவாரி கணக்கெடுப்பை நடத்த மறுப்பு , மதுவிலக்கு அமல்படுத்த மறுப்பு, கள்ளக்குறிச்சி கள்ளச்சாராய சாவுகளால் மக்கள் கொந்தளிப்பில் உள்ளனர். இதனை அறிந்த தி.மு.க. விக்கிரவாண்டி இடைத்தேர்தலில் அத்துமீறல்களில் ஈடுபட்டுள்ளது.

பா.ம.க. கூட்டத்திற்கு வரும் பெண்களை அடைத்து வைப்பது, உள்ளாட்சி பிரதிநிதிகளை மிரட்டுவது என தி.மு.க. அமைச்சர்கள் ஈடுபட்டுள்ளனர். இந்த அத்துமீறல்களை முறியடித்து பா.ம..க வேட்பாளர் 40 ஆயிரம் வாக்கு வித்தியாசத்தில் வெற்றிபெறுவார்.

அ.தி.மு.க.வின் நோக்கமும் பா.ம.க.வின் நோக்கமும் இத்தேர்தலில் ஒன்றாகவே உள்ளது. எம்.ஜி.ஆரும் ஜெயலலிதாவும் தி.மு.க.வை தீய சக்தி என்று கற்றுகொடுத்தனர். அந்த தீய சக்தியை வீழ்த்தும் வலிமை பாமகவிற்கு உண்டு. எனவே பா.ம.க.வின் மாம்பழ சின்னத்தில் அ.தி.மு.க.வினர் வாக்களிக்க வேண்டும்.

சாதிவாரி கணக்கெடுப்பை இல்லாத காரணங்களை காட்டி அரசு தட்டிகழிக்கும் அரசு பதவி விலகவேண்டும். விழுப்புரம் அருகே டி.குமாரமங்கலத்தில் விற்கப்பட்ட கள்ளச்சாராயம் குடித்து ஜெயராமன் இறந்துள்ளார். மேலும் இருவர் மருத்துவமனையில் அனுமதிக்கப்பட்டுள்ளனர்.

புதுச்சேரியிலிருந்து முருகன் வாங்கி வந்த கள்ளச்சாராயம் என தெரியவந்துள்ளது. இதிலிருந்து கள்ளச்சாராய விற்பனையை தடுக்க தமிழக அரசு தவறியதால் முதல்-அமைச்சர் மக்களிடம் மன்னிப்பு கேட்கவேண்டும். சாதிவாரி இடஒதுக்கீட்டால்தான் பலர் கல்வி கற்றுள்ளார் என்று தி.மு.க.வை சேர்ந்த ஆர்.எஸ் பாரதி கூறியிருப்பது கண்டிக்கதக்கது.

தி.மு.க. சமூகநீதிக்கு செய்த நன்மைகளைவிட தீமைகளே அதிகம். சட்டநாதன் அறிக்கையை செயல்படுத்த மறுத்தவர் கருணாநிதி. இடைத்தேர்தலுக்கு பின் மின் கட்டண உயர்வு அறிவிக்கப்பட உள்ளதாக தகவல்கள் தெரிவிக்கிறது. இந்த இடைத்தேர்தலில் தி.மு.க தோல்வி அடைந்தால் மின் கட்டண உயர்வை அரசு கைவிடும்.

மாநில கல்வி கொள்கை அறிக்கையை அரசு வெளியிடவேண்டும். நீட் தேர்வில் முறைகேடுகள் நடைபெற்றதால் இதை கைவிட வேண்டும் என பா.ம.க . தொடர்ந்து வலியுறுத்துகிறது. நீட் தேர்வை திணித்த தி.மு.க.வும், காங்கிரசும்தான்.

அப்போது நீட் தேர்வை அறிமுகம் செய்த தி.மு.க. இன்று அதற்கு எதிராக காட்டிக்கொண்டு நீட் தேர்வை ரத்து செய்ய எவ்வித நடவடிக்கையும் எடுக்காத தமிழக முதல்-அமைச்சர் மாணவர்களிடம் மன்னிப்பு கேட்கவேண்டும்.

கல்விகண் திறந்த காமராஜர் பெயரில் உள்ள பல்கலைக்கழகம் ஊழியர்களுக்கு ஊதியம் வழங்கக்கூட நிதி இல்லாமல் உள்ளது. இப்பல்கலை கட்டுப்பாட்டில் 121 கல்லூரிகள் உள்ளது. பிற கல்லூரிகளிடமிருந்து தலா ரூ.50 லட்சம் கேட்டுள்ளது.

தமிழக அரசு இப்பல்கலைக்கு ரூ.500 கோடி கடன் வழங்க வேண்டும். தி.மு.க தோல்வி அடைந்துவிடும் என்று தெரிந்ததால் தான் முதலமைச்சர் பிரச்சாரத்திற்கு வரவில்லை என தெரிகிறது. அப்படியே பிரச்சாரம் செய்தாலும் தி.மு.க தோல்வி அடையும். மேயர்கள் பதவி விலகில் என்னவோ நடக்குது.

இவ்வாறு அவர் கூறினார்.

விழுப்புரம்:

விக்கிரவாண்டி சட்டமன்ற தொகுதி இடைத்தேர்தலில் போட்டியிடும் பா.ம.க. வேட்பாளர் சி.அன்புமணி, தொகுதிக்குப்பட்ட கிராமங்களில் வீதி, வீதியாக சென்று மாம்பழம் சின்னத்தில் பொதுமக்களிடம் ஆதரவு கேட்டு தீவிர வாக்கு சேகரிப்பில் ஈடுபட்டு வருகிறார்.

அவரை ஆதரித்து பா.ம.க. நிறுவனர் டாக்டர் ராமதாஸ், அக்கட்சியின் தலைவர் டாக்டர் அன்புமணி ராமதாஸ் எம்.பி., பசுமை தாயகம் அமைப்பின் தலைவர் சவுமியா அன்புமணி, இவர்களது மகள் சங்கமித்ரா ஆகியோர் தீவிர தேர்தல் பிரசாரம் செய்து வருகின்றனர்.

இந்நிலையில் தேசிய ஜனநாயக கூட்டணி கட்சிகள் சார்பில் பா.ம.க. வேட்பாளர் சி.அன்புமணியை ஆதரித்து தேர்தல் பிரசார பொதுக்கூட்டம் விக்கிரவாண்டி பெரியார் திடலில் இன்று (வியாழக்கிழமை) மாலை 4 மணிக்கு நடைபெற உள்ளது.

இக்கூட்டத்திற்கு பா.ம.க. தலைவர் டாக்டர் அன்புமணி ராமதாஸ் எம்.பி. தலைமை தாங்குகிறார். ஜி.கே.மணி எம்.எல்.ஏ. அனைவரையும் வரவேற்று பேசுகிறார். கூட்டணி கட்சி நிர்வாகிகள் பலர் முன்னிலை வகிக்கின்றனர்.

இதில் பா.ம.க. நிறுவனர் டாக்டர் ராமதாஸ் , பா.ஜனதா மாநில தலைவர் அண்ணாமலை, அ.தி.மு.க. உரிமை மீட்புக்குழு தலைவர் ஓ.பன்னீர்செல்வம், அ.ம.மு.க. பொதுச்செயலாளர் டி.டி.வி. தினகரன், தமிழ் மாநில காங்கிரஸ் தலைவர் ஜி.கே.வாசன், இந்திய ஜனநாயக கட்சி தலைவர் பாரிவேந்தர், புதிய நீதிக்கட்சி தலைவர் சண்முகம், இந்திய ஜனநாயக கட்சி பொதுச்செயலாளர் ரவிபச்சமுத்து, இந்திய மக்கள் கல்வி முன்னேற்ற கழக தலைவர் தேவநாதன்யாதவ், தமிழக மக்கள் முன்னேற்ற கழக தலைவர் ஜான்பாண்டியன் உள்ளிட்டோர் கலந்துகொண்டு மாம்பழம் சின்னத்தில் வாக்குகள் சேகரித்து சிறப்புரையாற்ற உள்ளனர்.

தேர்தலுக்கு இன்னும் 6 நாட்களே உள்ள நிலையில் நடைபெற உள்ள பொதுக்கூட்டத்தில் ஒரே மேடையில் தேசிய ஜனநாயக கூட்டணி கட்சி தலைவர்கள் பங்கேற்க உள்ளதால் பா.ம.க.வினர் மிகுந்த உற்சாகம் அடைந்துள்ளனர்.

விழுப்புரம்:

விக்கிரவாண்டி தொகுதி இடைத்தேர்தலில் போட்டியிடும் பா.ம.க. வேட்பாளர் சி.அன்புமணியை ஆதரித்து காணை காலனி பகுதியில் அக்கட்சியின் தலைவர் டாக்டர் அன்புமணி ராமதாஸ் எம்.பி. தேர்தல் பிரசாரம் செய்து பொதுமக்களிடம் வாக்குகள் சேகரித்தார். அப்போது அவர் பேசியதாவது:-

தாழ்த்தப்பட்ட சமுதாயமும், வன்னிய சமுதாயமும் பெரிய சமுதாயங்களாகும். தமிழக மக்கள் தொகையில் 40 சதவீதம் இந்த இரு சமுதாயத்தினர்தான் உள்ளனர். இந்த இரு சமுதாயங்களும் ஒன்று சேர்ந்து விட்டால், வேறு எந்த கட்சிகளும் நமக்கு தேவையில்லை.

வன்னியருக்கு எதிரி தாழ்த்தப்பட்டோர் என்றும், தாழ்த்தப்பட்டோருக்கு எதிரி வன்னியர் என்றும் நிலையை உருவாக்கி வைத்திருக்கிறார்கள். சுதந்திரம் அடைந்து 75 ஆண்டுகளாகியும் நம்மை முன்னேறவிடாமல் வைத்திருக்கிறார்களே, அவர்கள் தான் நம் முதல் எதிரி. திராவிடக் கட்சிகள் நம்மை பிரித்து சூழ்ச்சி செய்து வருகின்றன.

நான் இங்கு அரசியல் பேச வரவில்லை. நியாயம் கேட்க வந்திரு க்கிறேன்.1949-ம் ஆண்டு தொடங்கப்பட்ட தி.மு.க.வில், தாழ்த்தப்பட்ட சமூகத்தை சேர்ந்தவருக்கு மத்திய அமைச்சர் பதவி கிடைத்தது 1999-ல் தான்.

ஆனால், பா.ம.க.வில் 1998-ம் ஆண்டிலேயே தாழ்த்தப்பட்ட சமூகத்தைச்சேர்ந்த தலித் ஏழுமலைக்கு மத்திய அமைச்சர் பதவி வழங்கப்பட்டது.

அதுபோல, அம்பேத்கர் சிலையை தமிழகத்தில் அதிகளவில் திறந்தவர்பா.ம.க.நிறுவனர் ராமதாஸ் தான். உங்களை வாக்கு வங்கியாகத்தான் அவர்கள் பார்க்கிறார்கள். நீங்கள் முன்னேற வேண்டும் என்பதுதான் பா.ம.க.வின் எண்ணம்.

நமக்குள் சண்டை, பிரச்சினை எதற்கு?. நாம் ஒன்று சேர்ந்தால் இவர்களுக்கு வேலை இல்லை. தாழ்த்தப்பட்ட சமூகத்தை சேர்ந்த இளைஞர்களே சிந்தித்துப்பாருங்கள். நாம் முன்னேற வேண்டும். நமக்கு ஆட்சி அதிகாரம் வேண்டும். இந்த இடைத்தேர்தல் மூலம் மக்கள் தங்கள் கோபத்தை வெளிப்படுத்தினால்தான் ஆட்சி அதிகாரத்தில் இருப்பவர்கள் மாறுவார்கள்.

இவ்வாறு அவர் பேசினார்.

விழுப்புரம்:

விக்கிரவாண்டி தொகுதியில் தி.மு.க. வேட்பாளரை ஆதரித்து மாநில சிறுபான்மை ஆணையத் தலைவர் பீட்டர் அல்போன்ஸ் பிரசாரம் செய்தார். பின்னர் அவர் நிருபர்களுக்கு பேட்டியளித்தார். அவர் கூறியதாவது:-

இந்தியாவில் நடந்து முடிந்த பாராளுமன்ற தேர்தலில் பாசிச அரசியல், மதவாத அரசியல், ஜாதி அரசியலை, முன்னெடுத்த பா.ஜ.க. மற்றும் கூட்டணி கட்சிகளை மக்கள் புறக்கணித்து விட்டார்கள்.

நாட்டு மக்கள் விரும்புவது நாட்டின் முன்னேற்றம், வளம், சமூக வளர்ச்சி, ஆகியவற்றை முன்னெடுத்த திராவிட நாயகன் முதல்வர் மு.க.ஸ்டாலினின் சமூக கட்டமைப்பு வளர்ச்சியைத்தான். இதனால் தான் இந்திய அளவில் 40-க்கு 40 தொகுதியிலும் வெற்றியினை பெற்று மகுடம் சூட்டி உள்ளனர்

சமூக நீதிக்கு எதிரான பா.ஜ.க. கட்சியுடன் பா.ம.க. கட்சி கூட்டணி சேர்ந்து, பா.ஜ.க.விற்கு கால் பிடிக்கும் வேலையை செய்கின்றது. ஜாதிவாரி கணக்கெடுப்பை நடத்திட சட்டசபையில் தனி தீர்மானம் நிறைவேற்றியுள்ள முதல்-அமைச்சர் மு. க. ஸ்டாலினால் மட்டுமே வன்னிய மக்களுக்கு பல நல்லதிட்டங்களையும், சிறந்த இட ஒதுக்கீட்டையும் வழங்க முடியும்.

இவ்வாறு அவர் கூறினார்.